NƲNƲLI 10
10
-Lagɔzuzuko yɛ 'slʋjeyi 'kadɔ Kɔnɛyɩ 'wʋ ghlanɩ
1-Ma Sezalee 'gbë 'mö nɩkpɛ -bhlʋ -wʋ la-a -ma, ɔ nglɩ-ɩ -yɛ-a Kɔnɛyɩ. 'Slʋjaa -zakpa wa la-a Italie dʋdʋ -gömöö 'slʋja-a, ma ɔ nyini la -bha. 2'Mɔ nɩkpɛ la'a, -Lagɔ ɔ bʋbɔ la -bha, ɔ -yɛ ɔ -kosu 'jie nɩkpa 'sɔ. 'N ɔ nyɛ-a 'zwiföa gla'aa ngazɩngwa -lie -bɛ. 'N ɔ pa-a -Lagɔ -bɛlɩ 'kɔmʋʋ. 3'Ylɩ -bhlʋɔ -dudoglie ta 'mö, -Lagɔzuzuko -bhlʋ ghlanɩɔ-a 'wʋ 'n ɔ jia-a yɩlɩ gbaa. A pla-a -ma ɔ -budu'u 'n a jio-a wɔzɩ, a nɛ: “Kɔnɛyɩ!” 4Ɔ yɩlɩ-a -Lagɔzuzuko la'a, nganɔ -wʋɔ 'lɩbha 'le, ɔ nɛ: “Nyininyɔ, 'manɩ -wʋ-ɔ -bha 'nɩ?” A nɛ -bha ɔ de naa: “Kɔnɛyɩ, -na -bɛlɩ -yɛ -na ngazɩngwaa 'nyɛnyɩɛ 'sɔ yɛ -ma -Lagɔ dlɩ'ɩ nyini ʋ dlɩ yɛ ɩ de bhlinɩ 'bhë. 5Tia -sɩka'a -ma Zope nɩkpa, nɩkpɛ wa la-a Simo, wa 'pa-a Piɛlɩ, wa -nyɔɔ 'yɛ ji. 6Nɩkpɛ wa la-a Simo, nɩmakwibhɔtɔnyɔ -ɔɔ -budu glɩ-ɛ -ma gïnyi yawʋ, -ma ɔ 'ligbë'ë ɔ glɩ -bha.” 7-Lagɔzuzuko gba-a -sɩbha Kɔnɛyɩɛ de, a mö-a 'bhë-ë, 'n ɔ ji-a ɔ nyɩgbajʋlʋɩ gla'aa nɩkpa 'sɔ wɔzɩ, -ma ɔ yawʋɔ nɩkpa gla'a 'slʋjeyi -ɔ ka-a -Lagɔ dlɩ 'wʋ, 'n ɔ jio 'yɛ-a wɔzɩ. 8Ɔ -sanʋa-a -ɩ 'bhuo ɔ yɩlɩ-a 'bhë, 'n ɔ jua-a -ma Zope tia.
-Lagɔ yɛ Piɛlɩ -li 'ji tuluanɩ
9Zlɩ zɩ-a, nɩkpa la'a namö -bhla 'yuogblʋ'ʋ, wa-a Zopee 'gbë yawʋ nyini 'le, -bhaa do'o Piɛlɩɛ -nɩ-ɛ, -ma -budu -gömö ɔ -gbla-a ɔ 'yɛ -Lagɔ -bɛlɩ 'paa yɛ. 10Ɔ glɩ -ma, 'n ngɔmʋ jio-a 'wʋ gblo. Ɔ 'jɩbha la ɔ 'yɛ li. Wa-a ɔ lili pi 'le, 'n -li jio-a 'jie 'klʋ ji. 11Ɔ yɩlɩ-a ghayɩ -Lagɔtapɛ 'walɩɔ-ɔ ngo. 'N ɔ ji-a -lu -bhlʋ yɩlɩ, ʋ -bhlee lokwi 'kadɛ, ɛ klia -mʋna 'gɔ-ɔ yɛ, ɛ 'bhö-ö -ma ghayɩ, 'n ɛ -wʋ-a dʋdʋkpata'a kwli 'le. 12Ɛ ka ma'a dʋdʋkpata -gömöö nɩma bhuo -ɩ ka-a bhɩ -mʋna -yɛ -mɩ namönɩ-a dlɩ'ɩ 'sɔ 'mö, -ma ghayɩɛ 'zɩ 'gamö. 13'N wɛlɩ -bhlʋ ji-e -bha Piɛlɩɛ de gba naa: “Piɛlɩ, -sɔ 'wʋ 'lɩbha -n 'yɛ li.” 14Piɛlɩ nɛ: “'Bhëbhë, Nyininyɔ n -yɛ la 'wlʋ, n'n -lɛ -bhla -aa gba -yɛ -lu -ʋ 'nɩ-a 'wlawla -wʋ 'sɔ ngli fa.” 15'N wɛlɩ la'a ji-a 'sɔdo'o ɔ de gba naa: “-Ʋ la'a -Lagɔ nʋ-a 'wlawla ʋ -wʋ -bha, -n 'na-a nʋ pɩ ʋ 'plɔ-ɔ -bha -nɩ.” 16-Li la'a jinɩɔ 'wʋ ta 'jie 'klʋ. 'Bhë ɩ nʋ-ɔ sa'a, 'n ɩ jio-a 'jie 'klʋ 'bhö-ö, 'n ɩ ji-e -ma -Lagɔtapɛ'ɛ nimï mö.
17-Ɩ ji-e la'a Piɛlɩ 'jie 'klʋ ɔ'ɔ ɩ zɔmö -jie yɛ ɔ -wʋɩ dlɩ 'wʋ 'pa 'le-e, -bhaa do'o nɩkpa -wa Kɔnɛyɩ tia la-a -nɩ Simoo 'ligbë 'nama 'le, 'n wa ji-e -bha -kʋkwa ngo'o nyini. 18Wa 'pa-a wɛlɩ ghayɩ, 'n wa ji-a ngli 'jɩbha naa, Simo -ɔ wa la-a Piɛlɩ -yɛ la -bha 'ligbë la'a 'wʋ glɩɛ yɛ. 19Piɛlɩ-ɛ -bhla -ɩ jio la-a 'jie 'klʋ dlɩ 'wʋ 'pa 'le, -Lagɔɔ Zuzu nɛ -bha ɔ de: “Yie, nɩkpa ta -wʋmö ngli 'jɩbha 'le. 20-Sɔ 'wʋ, 'sibhë yɛ -n -nyʋa 'yɛ mö. -N 'na-a tɔkɔ -nɩ, -amö-ö tua -bha.” 21'N Piɛlɩ ji-a sɛ 'sibhë, ɔ nɛ -bha nɩkpa la'aa de: “-Amö a -wʋ la-a 'nama 'le, -amö-ö la'a, 'manɩgbʋ laya-a ma'a 'nɩ?” 22Wa nɛ: “'Slʋjaa 'bhitɩbha Kɔnɛyɩ -tiaya -bha, 'mɔ nɩkpɛ -Lagɔɔ dlɩyawʋnanɩli ɔ nʋ -bha, 'n ɔ zʋʋ-ɔ -bha. 'Zwiföaa dʋdʋ -gömöö nɩkpa 'bhuo ɔ 'dɩɛ -dɩ wa ka-a ngli. 'Mɔ -Lagɔzuzuko -bhlʋ ghlanɩ-a 'wʋ 'n a jio-a 'dɩ 'nyɛ naa, ɔ -wɔzɩmö -ma ɔ 'ligbë'ë ɔ 'yɛ -na nglie wɛlɩ 'nʋ.” 23Wa gba-a -sɩbha, 'n Piɛlɩ jua-a -ma 'ligbë'ë 'pa, 'n ɔ jua-a sɛpöde 'nyɛ. Zlɩ zɩ-a, ɔ -sɔ-a 'wʋ, 'n ɔ -nyʋa 'sɔ ji-a 'mö. 'N -ma Zopee 'gbë 'möö -Lagɔgwie -mʋmʋa -nyɔɔ ji-a mö.
24Zlɩ -mɛ zɩ-ɛ -bhaa 'mö wa nyini-e -ma Sezale. Kɔnɛyɩ -wʋʋa la -kʋnʋ 'le, ɔ -kosu 'jie nɩkpa -yɛ ɔ 'tʋalɩbhangwa 'sɔ ɔ wɔzɩ-a ɔ -nyʋa 'sɔ glɩ -bha. 25Piɛlɩ pla-a -ma ɔ 'ligbë'ë, Kɔnɛyɩ möɔ-a 'yuo, 'n ɔ ji-e -bha ɔ dlɩ'ɩ -kokomunigbö glu 'pa. 26Piɛlɩ 'libhïɔ-a 'wlu, ɔ nɛ -bha ɔ de: “-Sɔ 'wʋ, nɩkpɛ n glɩnɩ 'yɛ-ɛ na-a 'gamö.” 27Ɔ -nyɔɔ 'sɔ-ɔ 'dɩ -sa 'le, 'n wa ji-e -ma ɔ -budu'u pla. Nɩkpaa -bebe 'titanɩɔ -ma 'wlu 'n ɔ jua-a -bha ghlɩ. 28Ɔ nɛ -bha wa de: “A 'bhï -ji sɛ naa: -Abha 'zwiföaa gböö do'o, n'n -lɛ bhɛlɩ n -yɛ -ɔ 'nɩ-a -aa 'bhiyi 'sɔ 'yɛ -ghöbhanɩ, n 'yɛ 'yɛ -ma ɔ 'ligbë'ë pla. 'Bhë -Lagɔ -slʋnʋ'ʋ-a naa, n'n la nɩkpɛ -bhlʋɔ 'bhë -ɔ 'nɩ-a 'wlawla -wʋ -yɛ pɩɛ yawʋkanyɔ 'sɔ -nɩ. 29Ɩ yɛ a -wɔzɩ'ɩ-a 'n n'n -lɛ-a ma'aa jijido'o tɔkɔ. 'Manɩgbʋ -wʋ-ɔ -bha, -ʋʋ yɛ a tia'a-a nɩkpa 'wʋ 'nɩ?” 30Kɔnɛyɩ nɛ: “-Bhaa 'ylɩɛ -mʋna-a la'a, la zlɩ -kanɩ-ɛ la'a ɛ -kanɩ -bha, -dudoglie ta 'mö, n-n -ma na -budu'u -Lagɔ -bɛlɩ 'pa 'le, nɩkpɛ -bhlʋ ka lɩlɩbana 'mö, 'n ɔ ji'i-a 'wʋ ghlanɩ. Ɔ nɛ -bha na de naa: 31Kɔnɛyɩ, -Lagɔ yɛ -na -bɛlɩ 'wʋ nglu ʋ dlɩ yɛ -na ngazɩngwaa 'nyɛnyɩɛ de bhlinɩ 'bhë. 32Tia-a 'mö nɩkpa -ma Zope, nɩkpɛ wa la-a Simo, wa 'pa-a Piɛlɩ wa -nyɔɔ 'yɛ ji. Nɩkpɛ wa la-a nɩmakwibhɔtɔnyɔ Simo, -ma ɔ 'ligbë'ë ɔ glɩ -bha, -ma gïnyi yawʋ. 33Ɔ nyɛ'ɛ-ɛ -sɩbha 'dɩ, bhleemö 'n n -jimö-a nɩkpa 'wʋ tia. Sɛɛ -sɛ -n ji -bha. -Bha -Lagɔ 'ji -aa 'bhuo glɩ-ɛ la'a, -ɩ -aa Nyininyɔ -nyɛmö-a -n kaya 'nyɛ, -a 'kɩ 'yukwli pönɩ.”
Piɛlɩ yɛ -ma Kɔnɛyɩɛ 'bhɛyɩ -Lagɔwɛlɩ gbanɩ
34Kɔnɛyɩ gba-a sa'a, Piɛlɩ nɛ naa: “N ji-a 'mö -sɩka'a sɛ naa, 'dɛdɛ'ɛ -Lagɔ 'nɩ gbëzɩ-a nɩkpa 'mö. 35-Ma ɩ 'mö, dʋdʋ -mʋɔ 'bhë -gömöö nɩkpɛ -mɔ -yɛ ʋ nganɔ -gömö -ka, ɔ -yɛ ʋ dlɩyawʋnanɩli nʋ, 'mʋna 'wʋ ɔ -bhïʋ -bha. 36Izlayɛlɩɛ nɩkpa -Lagɔ 'nyɛ-a ʋ wɛlɩ. 'Tɩtɩɛ -tɩtɩ -ɩ nʋ-a Zezwi 'Klie yɛ a bhɛlɩ a -yɛ -Lagɔ 'sɔ 'yɛ -ghöbhanɩ mɩ -bha. Zezwi 'Kli mɔ-ɔ -yɛ-a nɩkpa 'bhuoo Nyininyɔ. 37Za Badizɩ badize-a nɩkpa 'bhë, -ɩ la'a -ɩ tɛnɩ-ɛ -ma Galilee -gwlɩ yawʋ, -ɩ bhɩa-a Zwidee dʋdʋ 'bhuo 'ji, sa ɩ 'plɩplɩnɩ-a 'mö, a -ji -sɩbha. 38Sa -Lagɔ zʋ-a Nazalɛtɩɛ Zezwi Zuzu 'Wlawlaa 'mötɛnɔ -gömö, 'n ɔ binɩ-a -gwlɩ 'wʋ, 'n ɔ nʋ-a nɩkpa la'a bhuo -wa -wʋ la-a -ma 'jinylozuzukuo 'bhitɩbha Sataa 'likpï ngli -lie -li 'ji, 'n ɔ göpʋa, a -ji 'yɛ -sɩbha. -Lagɔɔ 'bhë mʋ-ʋ -nyɔɔ namö la -bha. 39-Ɩ la'a 'bhuo ɔ nʋ-ɔ -ma 'zwiföaa dʋdʋ -gömö -abha yɩlɩ-a ɩ de. -Bha su 'klʋ wa kʋnʋɔ-a 'n ɔ ji-a tlɩ. 40Ɔ tlɩ-a 'bhë, 'ylɩ ta plɩ-a, 'n -Lagɔ jio-a glu -sa, 'n ʋ jio-a tia naa, ɔ tuluanɩ ɔjɩ nɩkpa 'ji. 41Ɛ'ɛ -lɛ-a 'mö nɩkpa bhuo. -Wa la'a -Lagɔ -sa-a la-a -bha 'kɩkɩ, ɔ 'wlʋ-ɔ -ma 'kudungwa 'gbamö, -abha ɔ -nyɔɔ 'sɔ linɩ-a de -bhlʋ, -abha -bha. 42-Abha la'a -sɩbha, -abha Zezwi 'nyɛ-a 'dɩ naa, -a gba nɩkpaa de ɔ wɛlɩ naa, 'mɔ -Lagɔ zʋa-a -bhlɩbhlɩngwa -yɛ 'kudungwa 'sɔɔ -zijlitunyɔ 'wʋ. 43-Lagɔɔ 'mögbanɩngwa 'bhuo yɛ ɔ gbʋ gba 'bhë naa, nɩkpɛɛ -mɔ -kɔɔ dlɩ 'wʋ -ka, ɔ 'nglɩ 'mö ɔ 'jinylolie gbʋ-ʋ bhɩa -bha.”
Zuzu 'Wlawla yɛ Kɔnɛyɩngwa -gömö ji
44Piɛlɩ ka wɛlɩ la'a ngli 'gamö, 'n Zuzu 'Wlawla ji-a nɩkpa -wa -wʋ-a ɔ wɛlɩ 'yukwli pönɩ 'le -gömö ji. 45Zezwie -lʋa -wa glɩnɩ-a 'zwiföa -wa -yɛ Piɛlɩ 'sɔ ji la-a, ngli-i mönʋa -bha sa Zuzu 'Wlawla ji -wa 'nɩ-a 'zwiföa glɩnɩ -gömöö yɛ. 46-Wʋʋ -yɛ-a, wa nganɩ -ma nɩkpa la'aa ngli gbɩ -mɩmɩ 'bhë, wa-a 'yɛ -Lagɔɔ 'nglɩ 'ghlimanɩ 'le. 47-Ma ɩ 'mö Piɛlɩ nɛ naa: “Nɩkpa -wa Zuzu 'Wlawla ji-e -sa -aa swɩ'ɩ -gömö-ö, mʋa -a ji bhe-a 'mö nʋ -a 'na-a badizenɩ 'nyu nya nʋɔ?” 48Ɔ nɛ wa badizenʋa Nyininyɔ Zezwie 'nglɩ 'mö. Wa badizʋa-a 'bhë, 'n wa ji-a Piɛlɩ -bɛlɩ 'pa naa ɔ -sa-a -bha wa yawʋ 'ylɩ ja.
Currently Selected:
NƲNƲLI 10: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
