NƲNƲLI 11
11
Piɛlɩ yɛ -ma Zelwizalɛmöö -lʋa 'tɩtɩ -sanɩ
1Zezwie tiatiangwa -yɛ ɔ -lʋa -mʋa -wʋ la-a -ma Zwidee dʋdʋ -gömö 'sɔ, 'n wa ji-a 'nʋ naa, nɩkpa -wa 'nɩ-a 'zwiföa yɛ 'yɛ -nɩ -Lagɔwɛlɩ 'wʋ nglu 'bhë. 2Piɛlɩ ji-e -ma Zelwizalɛmö nimï, 'n Zezwie -lʋa -wa glɩnɩ-a 'zwiföa jio-a 'lʋnʋ, 3wa nɛ -bha ɔ de naa: “-Ma -wa 'nɩ-a 'zwiföaa -buduu -n pla-a 'n -n -nyʋa 'sɔ ji-a liee?” 4Wa gba-a -sɩbha, sa ɩ 'plɩplɩnɩ-a 'mö 'n Piɛlɩ ji-e -sɩbha ɩ 'bhuo -sa.
5Ɔ nɛ naa: “-Ma Zopee 'gbë 'mö, n-n -Lagɔ -bɛlɩ 'pa 'le, 'n -li ji'i-a 'jie 'klʋ ji. -Lu -bhlʋ -bhlee lokwi 'kadɛ, ɛ klia -mʋna 'gɔ-ɔ yɛ, ɛ 'bhö-ö -ma ghayɩ 'n ɛ ji'i-a 'wʋ ji. 6N jɩla-a lokwi la'a 'tɩ, -ma ɛ 'mö, ma'a dʋdʋkpata -gömöö nɩma -ɩ ka-a bhɩ -mʋna, 'kwlanɩma, nɩma -ɩ namönɩa-a dlɩ'ɩ -yɛ -ma ghayɩɛ 'zɩ 'sɔ, 'mɩ n yɩlɩ-ɛ -ma ɛ 'mö. 7'N n ji 'yɛ-a wɛlɩ -bhlʋ 'nʋ, ɩ nɛ -bha na de naa: Piɛlɩ, -Sɔ 'wʋ, 'lɩbha -n 'yɛ li. 8N nɛ, 'bhëbhë Nyininyɔ, n -yɛ la 'wlʋ, n'n -lɛ -bhla -aa gba -yɛ -lu -ʋ 'nɩ-a 'wlawla -wʋ li. 9'N wɛlɩ la'a ji-a 'sɔdo'o -ma ghayɩ 'bhönɩ naa: -Ʋ la'a -Lagɔ nʋ-a 'wlawla ʋ -wʋ -bha, -n 'na-a nʋ pɩ ʋ 'plɔ-ɔ -bha -nɩ. 10-Li la'a -jinɩ'ɩ 'wʋ ta 'jie 'klʋ, 'bhë ɩ nʋ-ɔ sa'a, 'n ɩ ji'i-a 'jie 'klʋ 'bhö-ö, 'n ɩ 'bhuo ji-e -ma ghayɩ nimï mö. 11-Bha -gaganɩlɩ'ɩ, nɩkpa ta -wa 'bhönɩ-a Sezale wa tia'a-a 'wʋ, 'n wa ji-e -bha 'ligbë -aa 'wʋ n -wʋ laa -kʋkwa ngo'o ji. 12'N -Lagɔɔ Zuzu ji'i-a 'dɩ 'nyɛ naa, n 'na-a tɔkɔ -nɩ, n -nyʋa 'sɔ mö. Nɩkpa -ngbʋpʋlʋ a jɩnɩ-ɛ la'a 'wʋ, mʋa-a kwa'a-a -ma. -A nyini-e -ma, 'n -a ji-e -ma Kɔnɛyɩɛ 'ligbë'ë pla. 13-14'N 'mɔ nɩkpɛ la'a -jiya-a 'tɩtɩ -sanɩ. -Sa ɔ yɩlɩ-ɛ -ma ɔ -budu'u -Lagɔzuzuko, a tuluanɩɔ-a ajɩ 'ji 'n a jio-a 'dɩ 'nyɛ naa: Tia -ma Zope nɩkpa, nɩkpɛ wa la-a Simo, wa 'pa-a Piɛlɩ, wa -nyɔɔ 'yɛ ji. -Li la'a -ɩɩ mö -n ji-a 'pʋnʋɔ, -n -yɛ -na -kosu 'jie nɩkpa 'sɔ, ɔ -kamɩ -sanɩ. 15Ɔ gba-a -sɩbha, n tɛ-a gbagbɩɛ 'gamö, Zuzu Wlawla-a jua-a -gömö, sa a -jiya la'a takado'o -gömö. 16Wɛlɩ -ɩ Nyininyɔ Zezwi gba la-a naa: 'Nyu nya Za badizenɩ -bha, abhaa -nɩ-ɛ, Zuzu 'Wlawla nya a ji-a badizenɩɔ, 'n na dlɩ ji-e -bha ɩ de bhlinɩ. 17-Lagɔɔ 'bhë kʋa-a 'mö la'a -ɩ ʋ 'nyɛ-a -abha ka-a Zezwi 'Kli dlɩ 'wʋ 'nyɛ 'bhë-ë, -amö-ö bhɛlɩ la 'mö-a n 'yɛ -Lagɔɔ de 'lɩlɩlɩ nʋɔ?” 18Wa 'nʋ-a wɛlɩ la'a, 'n wa dlɩa ji-a nimï jinɩ, 'n wa ji-a -Lagɔɔ 'nglɩ 'ghlimanɩ. Wa nɛ naa: “Ɩ -yɛ sa'a 'mö -wʋ-ɔ, -Lagɔɔ 'bhë-ë nglu-a naa, -wa 'nɩ-a 'zwiföa wa ligba wa 'yɛ wa 'jinyloli cɛ 'mö -sa wa 'yɛ 'kɔgwlɛpɩ ghlɩ.”
Banabasɩ -yɛ Sɔlʋ 'sɔ yɛ -ma Atiɔsɩ -Lagɔwɛlɩ ngli 'pa
19La wa zia-a Etiɛnɩ 'zwɩ 'n wa jio-a 'lɩbha, Zezwie -lʋa -wa -dɩdɩnɩ la-a, wa -mʋmʋa mö -ma dʋdʋ wa la-a Fenisi -gömö, -mʋmʋa mö -ma 'nyita wa la-a Siplɩ -gömö, -mʋmʋa mö 'yɛ -ma 'bhuguglɔ wa la-a Atiɔsɩ. Wa'a-a -ma kabönɩkpɛ -Lagɔwɛlɩ 'nyɛ 'n ɛ nɩ 'zwiföaa 'nyize glɩnɩ. 20-Ma ɩ 'mö, wa gla'aa -mʋmʋa -wa glɩnɩ-a Siplɩɛ nɩkpa -yɛ -glɔ -bhlʋ wa la-a Silɛnɩɛ nɩkpa 'sɔ nyini-e -ma Atiɔsɩ, nɩkpa -waa-a 'zwiföa glɩnɩ, 'mʋa wa 'nyɛ-a Nyininyɔ Zezwie 'tɩtɩɛ -tɩtɩ. 21-Lagɔɔ 'bhë -wʋʋa kwanɩ 'lee yɛ -wa nglu-a -Lagɔwɛlɩ 'wʋ zumanɩ wa zumanɩ -bha. Wa 'bhɩla-a wa dlɩa 'mö 'n wa ji-a Nyininyɔɔ -lʋa zʋ. 22Zezwie -lʋa -mʋa -wʋ-ɔ -ma Zelwizalɛmö 'nʋ-a 'mɩ wɛlɩ la'a, 'n wa ji-a Banabasɩ -ma Atiɔsɩ tia. 23Ɔ nyini-e -ma, ɔ yɩlɩ-a sa -Lagɔ 'pʋa-a 'nyu, 'n libho -wʋ-a 'nʋɔ 'le-e, 'mʋna 'lɩbhɔ -bha, 'n ɔ ji-a wa 'bhuo 'dɩ 'mö zʋ naa, wa nyɔnʋ Nyininyɔɔ wɛlɩ cɛ wa nyʋnanɩ -ma dlɩa. 24Banabasɩ-ɛ, nɩkpɛ -ɔɔ nʋnʋli slɛnɩ-a 'mö, -ɔ Zuzu 'Wlawla ye-a dlɩ zɔmö 'bhë -ɔ ka-a -Lagɔ dlɩ 'wʋ tenyi mɔ-ɔ la-a -sɩbha. 'N nɩkpaa -zakpaa 'kada ji-a Nyininyɔ yawʋ nyini. 25'N Banabasɩ ji 'yɛ-ɛ -ma -glɔ wa la-a Talɩsɩ Sɔlʋ ye mö. 26Ɔ ghlɩɔ-ɔ -ma, 'n ɔ -nyɔɔ ji-e -ma Atiɔsɩ ji. 'Ylʋba bhë 'mö, wa -yɛ Zezwie -lʋa 'sɔ 'slonʋ-a 'wʋ, 'n wa ji-a nɩkpaa -bɛ -Lagɔwɛlɩ ngli 'pa. -Ma Atiɔsɩ, -ma wa lanɩ-a takaswɩ'ɩ Zezwie 'wʋbhlinɩngwa kletiɛ.
-Lagɔgwie yɛ kwanɩkwanɩnɩ
27-Bhaa zlɩa la'aa 'mö, -Lagɔɔ 'mögbanɩngwa 'bhönɩ -ma Zelwizalɛmö 'n wa ji-e -ma Atiɔsɩ ji. 28'N wa gla'aa -bhlʋ wa la-a Agabwisɩ ji-a 'wʋ -sɔ, -Lagɔɔ Zuzu gbanɩɔ-a 'mö, ɔ nɛ ma'a dʋdʋkpata 'bhuoo -gömö ngɔmʋ -bebe ji-e -ma jie. Laa do'o Klodɩ glɩnɩ-a dʋdʋnyininyɔ, 'n 'mʋ ngɔmʋ ji-a ji. 29'N Zezwie 'wʋbhlinɩngwa ji-a dlɩ -bhlʋ 'wʋ 'libhï, naa sa -mʋmɔ -yɛ -nɩ -ka ɔ zʋ, wa 'yɛ wa -dagwie-e -wʋ-ɔ -ma Zwidee dʋdʋ -gömöö -wa 'wʋ mö. 30'Mɩ wa nʋ -bha, 'bhë 'n wa ji-a Banabasɩ -yɛ Sɔlʋ 'sɔ -ma tia, 'n wa jiɩ-a -maa -zakpaa 'yuganɩngwa ye 'nyɛ.
Currently Selected:
NƲNƲLI 11: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
