NƲNƲLI 13
13
-Lagɔ yɛ Banabasɩ -yɛ Sɔlʋ 'sɔ tia
1-Ma Atiɔsɩ, -Lagɔzakpa-a -wʋ la-a -maa gla'a, -Lagɔɔ 'mögbanɩngwa -yɛ -Lagɔwɛlɩɛ nglipangwa sɔ-ɔ -wʋ la-a -ma. Banabasɩ, Simeɔ -ɔ wa 'pa-a Nizɛlɩ, Silɛnɩɛ nɩkpɛ wa la-a Likisɩ, dʋdʋnyininyɔ Elodɩɛ pladu Mania, 'bhë Sɔlʋ. 2'Ylɩ -bhlʋ, wa-a Nyininyɔ bʋbɔ 'le, wa-a 'yɛ lɔlɔ 'sʋ 'le, Zuzu 'Wlawla nɛ: “A -sa -ma a gla'a Sɔlʋ -yɛ Banabasɩ 'sɔ, libho -ʋʋ yɛ n -sʋa-a -bha wa 'kʋ nʋ.” 3Wa 'wlʋ-a lɔlɔ 'mö, wa bhɩa-a -Lagɔɔ -bɛlɩpapɩɛ 'ji, 'n wa ji-a nɩkpa la'a 'sɔ cɛ 'wliyawʋ zʋ, 'bhë 'n wa jua-a ngo -gömö -sa, libho -Lagɔ nʋ la-a wa nʋ 'n wa ju-a nʋɔ mö.
Banabasɩ -yɛ Sɔlʋ 'sɔ yɛ -ma Siplɩ nyini
4-Sɩbha Zuzu 'Wlawla tia-a Banabasɩ -yɛ Sɔlʋ 'sɔ libho 'wʋ, 'n wa ji-e -ma -glɔ wa la-a Selesi, -ma wa 'libhïnɩ-a bato 'wʋ, 'n wa ji-a 'nyita 'kada wa la-a Siplɩ 'klʋ mö. 5Wa nyini-e -ma -glɔ wa la-a Salaminɩ, 'n wa ji-e -ma 'zwiföaa -Lagɔbudi'i -Lagɔwɛlɩ kwa. Wa -su wa kwanɩnyɔ Za. 6-Bha -gömö, wa -dɩ-a 'nyitadʋdʋ 'bhuo 'mö, 'n wa ji-a -glɔ wa la-a Pafɔsɩ ghlɩ. -Ma wa ghlɩ-a -zliinyɔ -bhlʋ, yuonyɔ -ɔ la-a ɔjɩ -Lagɔɔ 'mögbanɩnyɔ, 'mɔ wa la-a Balɩzezwi, 'zwiföyi la-a -sɩbha. 7-Gwlɩnyininyɔ -bhlʋ wa la-a Sɛlɩzwisɩ Polwisɩ, gbɩjinyɔ 'kadɔ ɔ glɩnɩ la -bha, ɔ -yɛ -zliinyɔ la'a 'sɔ glɩ -bha, 'n ɔ ji-a Banabasɩ -yɛ Sɔlʋ 'sɔ wɔzɩ, ɔ 'jɩbha ɔ 'yɛ la -Lagɔwɛlɩ 'yukwli pönɩ tenyi. 8-Ma ɩ 'mö Elimasɩ -ɔɔ 'nglɩɛ zɔmö -yɛ-a -zliinyɔ, ɔ 'nʋa-a 'wʋ nglu, ɔ 'jɩbha la ɔ 'yɛ -gwlɩnyininyɔɔ 'wlu 'mö 'ji nyimanɩ ɔ ji-e -Lagɔ dlɩ 'wʋ -kaa yɛ. 9Ɩ yɛ Sɔlʋ, wa la 'yɛ-a Pɔlʋ, Zuzu 'Wlawla yeo-a dlɩ zɔmö ɔ jɩla-a nɩkpɛ la'a, ɔ nɛ -bha ɔ de: 10“Nɩkpɛ -ɔ ka -dabhli -yɛ gwla 'sɔ, 'kuëë 'gu, -ɔ -lie -li -nyu dlɩ yawʋ, -n 'naa cɛ -Lagɔɔ 'möslɛnɩyuogblʋɔ 'mökimanɩgbʋ 'wʋ -gɔ 'nɩ-ɩ? 11-Sɩka'a-a 'mö, Nyininyɔɔ -kɔta -wʋmö -gömö, 'lɔkpɔ -n ji -bha, la ɔ -dɩ-a -bha na nyini 'bhë -n 'yɛ-a zlɩ yɩlɩ.” -Bha -gaganɩlɩ'ɩ, 'n 'misikpoko jio-a 'ji köbha, ɔ-ɔ la'a -ɔ 'kɔ-a -suo yɛ bhöbhlɩnɩ 'le. 12-Gwlɩnyininyɔ la'a yɩlɩ-a -ɩ 'plɩ-a, 'n ɔ ji-a Zezwie wɛlɩ 'dɛdɛ'ɛ la. -Wʋʋ yɛ-a, Nyininyɔɔ wɛlɩ-ɩ nʋɔ la-a libho yawʋ.
Pɔlʋ yɛ -ma Pisidie Atiɔsɩ -Lagɔwɛlɩ gbanɩ
13Pɔlʋ -yɛ ɔ namöngwa 'sɔ 'libhïnɩ-ɛ -ma Pafɔsɩ bato 'wʋ, dʋdʋ wa la-a Pafilie -glɔ wa la-a Pɛlɩzɩ, 'n wa ji-e -ma nyini. -Ma Za 'bhönʋa-a 'bɩ 'n ɔ ji-a Zelwizalɛmö nimï mö. 14Pɔlʋngwaa -nɩ, wa 'yuogblʋ wa zʋ-a 'ji, dʋdʋ wa la-a Pisidie -gömö -glɔ wa la-a Atiɔsɩ, 'n wa ji-e -ma nyini. -Gwlɛnɩzlɩ nyini-a, 'n wa ji-e -ma -Lagɔbudu'u pla 'n wa ji-a sɛ glɩ-ɩ. 15-Lagɔɔ gbö -yɛ -Lagɔɔ 'mögbanɩngwaa 'bɔgʋɩɛ 'mözɛlɩzɛlɩɛ 'bhɩɔ-a 'ji, -Lagɔbuduo nyiningwa nɛ -bha wa de naa: “-Dagwieyi, a -yɛ nɩkpa 'bhuoo 'dɩmözʋwɛlɩ 'mlɩ -ka, a gba.”
16Ɩ yɛ, 'n Pɔlʋ ji-a 'wʋ -sɔ, ɔ 'pa-a sɔ ghayɩ ɔ bhalʋa-a 'bhë, ɔ nɛ naa: “Abha Izlayɛlɩɛ ngëyi 'möö nɩkpa -yɛ abha ka-a -Lagɔɔ nganɔ -gömö 'sɔ, a pönɩ 'yukwli. 17-Aa 'bhuoo -Lagɔ, Izlayɛlɩɛ -Lagɔ mʋ-ʋ -sa-a -bha -aa -lowlengwaa -lowlengwa, la wa -wʋ-ɔ -ma Ezipötɩɛ dʋdʋ -gömö, mʋ-ʋ zumanʋa -bha, 'n ʋ jua-a ʋ 'mötɛnɩsɔ nya -ma -sanɩ. 18-Ma 'mïse 'klʋ, 'n ʋ jua-a 'ylʋböö gwlɩ 'sɔ mö lilie 'nyɛnɩ. 19'Bhë -ma Kanaa dʋdʋ -gömö, ʋ -sa -maa -gligbï -ngbisɔ yɛ, 'n ʋ jua-a ɩ dʋdʋkpata cɛ dlinɩ wa 'ka nyini.
20-Mɩ la'a 'plɩ-a 'bhë, 'ylʋböö gwlɩ kugbïaa 'dwi 'sɔ 'ylʋböö gwlɩ 'sɔ 'ylʋbö kugbïa 'mö, ʋ -wʋʋa -sɩbha 'yuganɩngwa 'nyɛ 'le 'kɔmʋʋ, 'n ʋ ji-a -Lagɔɔ 'mögbanɩnyɔ Samiɛlɩ 'wʋ nyini. 21'N wa ji-a -Lagɔ wa dʋdʋnyininyɔ 'jɩbhanɩ. Bezamɛɛ -gligbï yawʋɔ nɩkpɛ -bhlʋ wa la-a Kisɩɛ 'gu Sawilɩ, 'n -Lagɔ jio-o -bha -sa, ɔ nyinɩnʋa 'ylʋböö gwlɩ 'sɔ 'mö. 22-Lagɔ -sɔɔ-ɔ -bha 'ye, 'n ʋ ji-e -bha ɔ 'bhle 'wʋ Davidɩ sɛ zʋ. Ɔ 'dɩ ʋ -sa-a sa'a naa: Izayie 'gu Davidɩ n -sa-a -bha. Nɩkpɛ -ɔ -nanɩ'ɩ-a dlɩ yawʋ mɔ -bha. Mɔ-ɔ ji-e na dlɩɛ -li 'bhuo nʋɔ. 23Sa -Lagɔ gbɩ la-a naa, -ma Davidɩɛ ngëyi 'mö ʋ ji-a Puanyɔ -saa, 'n ʋ ji-e -sɩbha 'dɛdɛ'ɛ -ma Zezwi -sa, mɔ-ɔ -yɛ-a Izlayɛlɩɛ Puanyɔ. 24Zezwi 'yɛ jie ji, -Lagɔnɩkpɛ Za Badizɩ 'nyɛ-a Izlayɛlɩɛ nɩkpa 'bhuo 'dɩ naa, 'jinyloli wa nʋ la-aa yɛ, wa ligba wa 'kɩ cɛ 'mö -sa, wa 'kʋa badize. 25La Za -wʋ-a ɔ libho 'ji bhɩa ji 'le, ɔ nɛ -bha nɩkpa 'bhuo de naa: -Ɔ a -tɔnʋ'ʋ-a 'mɔ n'n -lɛ glɩnɩ. -Ɔ -ga-a -ma na nimï ɔ-ɔ ji 'le, n'n bhɛlɩ n 'yɛ ɔ -gbabʋakplee 'likpë bulonʋ. 26-Dagwieyi, abha Ablaamöö ngëyi, abha ka 'yɛ-a -Lagɔɔ nganɔ -gömö sa'a n gba-a a de naa, a yɛ 'pʋpʋwɛlɩ la'a ji -bha. 27-Ma ɩ 'mö, Zelwizalɛmöö nɩkpa -yɛ wa 'kadɩ 'sɔ 'nɩ-ɛ Zezwi jɩblɩnɩ naa, Puanyɔ -bha. -Lagɔɔ 'mögbanɩngwaa wɛlɩ wa 'cɛlɩ la-a Zezwie yɛ, sa -gwlɛnɩzlɩ nyini-a -sɩbha wa zɛlɩɩ -bha. Wa 'nɩɩ-ɩ 'mö 'nʋ, wa 'lɩbhɔ-a, 'mɩ wa 'wlenɩ-a 'wʋ. 28Wɛlɩköbhë -maa yɛ wa 'kɔ-a 'lɩbha wa 'nɩa-a ghlɩ. 'N wa ji-a -gwlɩnyininyɔ Pilatɩ 'dɩ 'nyɛ naa, ɔ 'lɩbhɔ ɔ yɛ tlɩ. 29'Bhë wa kʋnʋɔ-ɔ -bha su 'klʋ, -ɩ bhuo-o 'cɛlɩɔ-ɔ la-a ɔ yɛ, 'mɩ wa 'wlenɩ-a 'wʋ. Wa -sɔɔ-ɔ -bha su 'klʋ, 'n wa jio-a zʋɔ mö. 30-Ma ɩ 'mö, 'n -Lagɔ jio-o -ma 'kudungwa 'gbamö -sa. 31'Ylɩɛ -bebe 'mö, -wa ɔ -nyʋa 'bhönɩ la-a -ma Galile, 'n wa ji-a Zelwizalɛmö nyini, 'n ɔ jua-a 'wʋ ghlanɩ, mʋa-a -yɛ-a 'mö-ö -sɩka'a -bha nɩkpa 'bhuoo de ɔ 'dɩɛ -sasangwa.
32-Aa -nɩ 'bhï 'yɛ, 'mɩ 'tɩtɩɛ -tɩtɩ -ɩ -a wʋya-a la'a -sanɩ 'le, -ɩɩ gbʋ -Lagɔ gba la-a -aa -lowlengwaa -lowlengwaa de, 33mɩ-ɩ 'wlenɩ-ɛ la'a -abha wa 'gwie gwiee de 'wʋ. 'N ʋ ji-a Zezwi glu -sa, sa ɩ 'cɛlɩɔ-ɔ la-a -ma -Lagɔɔ bhlɩnɩlʋɩɛ 'bɔgʋɔ -gɔpaa 'sɔ -la 'mö naa:
-Nmö -yɛ-a na gu,
-zɩkazɩnɩ'ɩ -amö-ö -lamö-a 'pɩ.
34-Lagɔɔ 'bhë kɩ la gba 'bhë naa: Zezwi -yɛ tlɩ, ʋ jio glu -sa, ɔ 'na-a 'mö tlɩ 'sɔ. -Sɩbha ʋ gbɩ la -bha. Ʋ nɛ naa:
-Lie -li n nʋ la-a n ji Davidɩ 'ye 'nyɛɛ,
'mɩ n jiya-a 'ye 'nyɛɛ.
35Wʋ yɛ ɔ gba 'yɛ-ɛ -ma -Lagɔwɛlɩɛ 'bɔgʋɔ kïbhï -mɩmɩ 'mö 'sɔ naa:
-N 'na -ɔ glɩnɩ-ɛ -na 'nyizee -lɔ 'ji yawʋ -sa
ɔ 'yɛ zɛ.
36Davidɩ, -ma ɔ 'pɩ 'mö sa -Lagɔ nʋ-a ɔ nʋ ʋ libho -sɩbha ɔ nʋʋ-a 'tɩ, ɔ tlɩ-a -bha ɔ -tɩbhatɩbhangwa yawʋ 'n wa jio-o -bha zʋ, 'n ɔ ji-a zɛ. 37-Ma ɩ 'mö -mɔ -Lagɔ -la la'a 'pɩ 'wʋ nimï, ɔ'ɔ -lɛ zɛ. 38-Dagwieyi, a jɩblɩnɩ sɛ naa: Zezwi 'mö -Lagɔ 'titlinɩ-a -aa 'jinyloli 'wʋ. 39Gbʋ a ka la-a -gömö, -ʋ Moyizɩɛ gböö -bhazʋzʋɛ 'na 'kaya la-a -gömö -sa-a, nɩkpɛ -mɔ -yɛ Zezwi dlɩ 'wʋ -ka mʋ-ʋ bhöɔ-a -gömö. 40A möna-a 'mö, -Lagɔɔ 'mögbanɩngwaa wɛlɩ wa gba la-a jiya-a köbha: 41-Lagɔ nɛ naa:
A yɩlɩ-ɩ ma'a, abha vunʋa-a 'dɩɛ dɩ 'mlɛ,
'kwi 'bhöya -gömö, 'bhë a 'yɛ sɛ yɩla.
-Wʋʋ yɛ-a, a -bhlɩ 'n n 'yɛ-a bhata nɛ nʋ,
wa kaya a 'dɩ -sanɩ a 'na 'kɩ 'dɛdɛ'ɛ la.”
42Wa bhɩa-a -Lagɔɔ -bɛlɩpapɩɛ 'ji, wa 'wlʋ-ɔ -ma -Lagɔbudu'u, 'n nɩkpa 'bhuo ji-a Pɔlʋ -yɛ Banabasɩ 'sɔ -bha ghlɩ, 'n wa jua-a -bɛlɩ 'pa naa, wa ji -gwlɛnɩzlɩ -ɛ ji-a jie zlɩ nimï, wa 'yɛ 'mɩ wɛlɩkïbhï la'a -bhlʋ -gömö jinɩ. 43Wa -sɔnʋ-a yawʋ, 'zwiföaa -bɛ -yɛ -wa 'nɩ-a 'zwiföa glɩnɩ 'bhë -wa bʋbɔ-a -Lagɔ 'zwiföaa swɩ'ɩ, 'n wa ji-a Pɔlʋ -yɛ Banabasɩ 'sɔ 'bɩ bhlinɩ. Wa-a 'dɩ -sa 'le, 'n -mʋa la'a 'sɔ jua-a 'dɩ 'mö zʋ naa: -Lagɔɔ 'nyupalɩ a ghlɩ-a, a nyɔnʋʋ cɛ.
Pɔlʋ -yɛ Banabasɩ 'sɔ yɛ -wa 'nɩ-a 'zwiföa glɩnɩɛ de gba
44 -Gwlɛnɩzlɩ -mɛbha nyini-a nɩkpa -wa ji-a -Lagɔwɛlɩ 'yukwli -pönɩ kwla'a, -bha tʋ-ʋ 'wʋ wa 'wʋdilɩ 'yɛ 'gbë bhë 'bhuo nyini. 45'Zwiföa yɩlɩ-a nɩkpaa -zunɔ 'wʋ, nglʋnyinye bhlinʋa-a dlɩ zɔmö. Pɔlʋ -yɛ -Lagɔwɛlɩ gba 'le -wʋ, 'n wa sɔ -bha. 46'N Pɔlʋ -yɛ Banabasɩ 'sɔ jua-a nyɩbhɛlʋswɩ'ɩ 'dɩ 'nyɛ naa: “Abhaa 'bhïë de -Lagɔwɛlɩ ji la-a 'gbɔɔ -tɩtɛ-ɛ. A 'bhï nɛ a'a 'kɔgwlɛpɩ 'wʋ -ngwa, a nɛ a 'na-a nglui 'wʋɔ yɛ -wa 'nɩ-a 'zwiföa glɩnɩ mʋa -a jiɩ-a 'nyɛɛ. 47-Wʋʋ yɛ-a, -sɩbha -Lagɔ -nyɛya-a 'dɩ naa:
-Gwlɩ 'bhuoo yʋlokpë n -zʋamö-a 'wʋ
-n 'yɛ dʋdʋkpataa këti 'bhuoo -gömö 'pʋpʋwɛlɩ kwa.”
48Pɔlʋ gba-a sa'a, nɩkpa -wa 'nɩ-a 'zwiföa 'mʋna-a 'lɩbhʋa -bha, 'n wa ji-a -Lagɔwɛlɩ 'wʋ nglu. -Wa -Lagɔ -sa la-a -bha 'kɩ wa 'yɛ 'kɔgwlɛpɩ ghlɩɛ yɛ, 'n wa ji-a -Lagɔwɛlɩ 'wʋ nglu.
49-Sɩbha Nyininyɔɔ wɛlɩ -wʋ la-a -gwlɩ 'bhuo 'ji bhɩa 'le. 50-Ma ɩ 'mö, 'nglɩmöngwlɩ -wa -wʋ la-a -Lagɔ bʋbɔ 'le -yɛ wa nɩkpa 'kadɩ 'sɔ, 'n 'zwiföa ji-a wa dlɩa ghayɩ 'pa, 'n wa ji-a Pɔlʋ -yɛ Banabasɩ 'sɔ 'zwɩ zia, 'n wa jua-a -ma wa dʋdʋ -gömö kpëti. 51Pɔlʋ -yɛ Banabasɩ 'sɔ -wʋ-ɔ -ma -glɔ la'a 'mö 'wlʋɔ ji 'le, 'n wa ji-a -maa nɩkpa wa kplɩzɔmöö -badɩ cɛ gbɔtɔnʋ. -Glɔ -bhlʋ wa la-a Ikoniɔmö, 'n wa ji-e -ma mö. 52Zezwie 'wʋbhlinɩngwa -mʋa tʋ-ɔ -ma, 'n 'mʋna -yɛ Zuzu 'Wlawla 'sɔ jua-a dlɩ zɔmö ye.
Currently Selected:
NƲNƲLI 13: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
