NƲNƲLI 14
14
Pɔlʋngwa yɛ -ma Ikoniɔmö -Lagɔwɛlɩ gbanɩ
1Pɔlʋ -yɛ Banabasɩ 'sɔ nyini-e -ma Ikoniɔmö, 'n wa ji-e -ma 'zwiföaa -Lagɔbudu'u pla, 'n wa ji-e -ma -Lagɔwɛlɩ gbanɩ. Wa gbagbalɩɛ yɛ 'n 'zwiföaa -bɛ -yɛ -wa 'nɩ 'yɛ-a 'zwiföa 'sɔ ji-a Zezwie wɛlɩ 'wʋ nglu. 2-Ma ɩ 'mö, 'zwiföa -mʋa 'nɩ-a Zezwie wɛlɩ 'wʋ nglu ghlɩ-ɛ -bha -wa 'nɩ-a 'zwiföa glɩnɩ, 'n wa jua-a ghayɩ 'pa wa 'yɛ Pɔlʋngwa 'jinyloli 'ji nʋɔ yɛ. 3'N Pɔlʋ -yɛ Banabasɩ 'sɔ ji-a wa 'ylɩ -gömö 'pa, 'n wa ji-e -ma Ikoniɔmö gwlɛ. -Lagɔ wa ka-a dlɩ 'wʋ tenyie yɛ, 'n wa gba-a nyɩbhɛlʋswɩ'ɩ. 'N Nyininyɔɔ 'bhë glʋ-a wa wɛlɩ, 'n ɔ nyʋa-a 'mötɛnɔ, -ma ɔ 'nglɩ 'mö 'n wa nʋ-a bhatɩɛ -bɛ nɛ. 4Wa yɛ, 'n -glɔ la'aa 'möö nɩkpa ji-a 'mö dlinɩ. 'Zwiföa -wa 'jɩbha-a wa 'yɛ Zezwie tiatiangwa 'jinyloli 'ji nʋ, -mʋmʋa -wʋʋa nimï, 'n -mʋmʋa -wʋ-a Zezwie tiatiangwa nimï.
5-Wa 'nɩ-a 'zwiföa glɩnɩ -yɛ 'zwiföa 'sɔ, wa -yɛ wa 'yuganɩngwa 'sɔ, 'n wa ji-a wɛlɩ 'mö -ghöbhanɩ wa 'yɛ Zezwie tiatiangwa 'zwɩ zia, wa 'kʋa kpïaku 'mö 'lɩbhaa yɛ. 6-Mʋa la'a jɩblɩnɩ-a ɩ sɛ, 'n wa ji-a fito, -ma Lakaonie -gwlɩ 'sɔ wa la-a Lislɩ -yɛ Dɛlɩbö 'sɔɔ 'mö, 'n wa ji-e -ma -gunʋ. 7'N wa ji-e -ma Zezwie 'tɩtɩɛ -tɩtɩ bia.
Pɔlʋngwa yɛ 'kplakplanyɔ -bhlʋ göpö
8-Ma Lislɩ, nɩkpɛ -bhlʋ -wʋ la-a -ma, 'kpla ɔ 'kpla -bha. 'Wlʋ ɔ -yɛ nɩmɛlɛ 'wlʋ la -bha, ɔ'ɔ-ɔ -bhla takaswɩ'ɩ namö. 9'Ylɩ -bhlʋ, Pɔlʋ-ɔ -Lagɔwɛlɩ gba 'le, 'n ɔ -wʋɔ la-a 'yukwli pönɩ 'le. Pɔlʋɔ 'ji bhlinɩɔ-a 'wʋ, 'n ɔ jio-a jɩla. Ɔ jɩblɩnɩ-a sɛ naa, ɔ ka -Lagɔ dlɩ 'wʋ ɔ 'yɛ 'pʋ-ɔ, 10'n ɔ ji-a wɛlɩ ghayɩ 'pa, ɔ nɛ: “-Sɔ 'wʋ, 'nɩgbönɩ ghayɩ!” Ɔ 'nɩgbönɩ-a ghayɩ, ɔ -blu-a 'mö, 'n ɔ ji-a namö. 11Nɩkpa yɩlɩ-a -ɩ Pɔlʋ nʋ-ɔ la'a, 'n wa -zakpa ji-a wɛlɩ 'mö 'klanɩ lakaonigbʋ 'mö. Wa nɛ: “-Lagwɩ yɛ nɩkpaklʋɩ 'wʋ 'libhï ɩ yɛ ma'a -aa 'bhɛyɩ sɛ 'sibhë 'bhë!” 12'N wa ji-a Banabasɩ -yɛ Pɔlʋ 'sɔ 'nglɩ 'pa. Banabasɩ wa la-a “Zɔsʋ”, 'n wa la-a Pɔlʋ “Ɛlɩmɛsɩ”, -wʋʋ yɛ-a, mɔ-ɔ gba la -bha. 13-Budu wa bʋbɔnʋ-a Zɔsʋ la'a 'mö, -bha 'gbëë planɩde ʋ glɩ -bha. Ʋ bʋbɔnyɔ -su bhilia -ɩ 'bhlɩɔ-a -yʋkʋpɩ -blʋ'ʋ, 'n ɔ -nyɩɩ ji-e -bha 'mʋ -budu la'a a ngo'o ji. 'Mʋ -lagɔ la'aa bʋbɔnyɔ -yɛ nɩkpaa -bebe 'sɔ 'jɩbha la wa 'yɛ Pɔlʋngwa bhilia la'a bʋbɔnʋ. 14Zezwie tiatiangwa Pɔlʋ -yɛ Banabasɩ 'sɔ 'nʋɩ-a, wa ghlaghlanɩ-a wajɩɛ 'mökabanɩ 'mö, 'n wa ji-e -ma nɩkpaa -zakpa la'a nyɩdɩ 'ji -dɩ. 15Wa-a nyla 'le, wa nɛ: “-Abhɩayi, 'manɩɛ yɛ a -wʋ-a -ɩ -la nʋ 'le 'nɩ? A swɩ'ɩɛ nɩkpa -a glɩnɩ -bha, -aa -lɛ -lagwɩ. Zezwie 'tɩtɩɛ -tɩtɩ -a laya -bha, a 'yɛ kpakpakʋnɩ cɛ 'mö -sa, a 'yɛ -bhlɩbhlɩ -Lagɔ -ʋ nʋ-a -Lagɔtapɛ, dʋdʋkpata, gïnyi -yɛ ɛ 'möö -li 'bhuo 'sɔ nɛ 'ji göö yɛ. 16'Fawʋɔ do'o, -gwlɩ ʋ -sa-a cɛ yawʋ, 'n ɩ ji-a ɩjɩɛ dlɩɛ 'yuogblʋ bhli. 17Ʋ 'nʋa-a 'wʋ dlʋnʋ, -ma -lie -li ʋ nʋa-a 'jiee 'mö 'n ʋ tuluanʋa-a ʋjɩ 'ji, 'n ʋ lɩbha-a 'nyizako, 'n ʋ nyɛya-a -zʋɩɛ -zʋɩ, 'n a lili kpla -bha, 'n ʋ yenaya 'yɛ-a 'mʋna dlɩ zɔmö.” 18Zezwie tiatiangwa gba-a sa'a 'bhë-ë, wa nʋ-a wa 'yɛ nɩkpaa -zakpa 'wʋ köbha wa jua-a bhilia bʋbɔnʋ-ɔ, yʋlɔ wa yʋlɔ -bha.
19'Zwiföa 'bhönɩ -ma Atiɔsɩɛ -glɔ wa la-a Pisidi -yɛ Ikoniɔmö 'sɔ 'n wa ji-e -ma ghlanɩ. 'N wa ji-a nɩkpaa -zakpa la'a ghayɩ 'pa 'n wa ji-a Pɔlʋ kpïaku 'mö 'lɩbha. Wa -tɔnʋ tlɩ ɔ tlɩ la, wa tutlunʋɔ-a yɛ, 'n wa jio-a 'gbë 'mö -sa. 20Zezwie 'wʋbhlinɩngwa binɩɔ-a 'wʋ, 'n ɔ ji-a 'wʋ -sɔ, 'n wa -nyɔɔ 'sɔ ji-e -ma 'gbë 'mö nimï mö. Zlɩ zɩ-a, 'n ɔ -yɛ Banabasɩ 'sɔ ji-e -ma -glɔ wa la-a Dɛlɩbö mö.
Pɔlʋngwa yɛ -ma Atiɔsɩ nimï mö
21-Ma -glɔ la'a 'mö 'n Pɔlʋ -yɛ Banabasɩ 'sɔ ji-e -ma Zezwie 'tɩtɩɛ -tɩtɩ bia, 'n nɩkpaa -bɛ jiɩ-a 'wʋ nglu, 'n wa ji-a Zezwie -lʋa zʋ. -Ma Lislɩ, -ma Ikoniɔmö -yɛ Atiɔsɩ 'sɔ, 'n wa ji-e -ma nimï mönɩ. 22-Ma -gwlɩ la'a 'bhuoo 'möö -Lagɔgwie -sɩbha wa zʋa-a dlɩ 'mlɩ, 'n wa zʋa-a 'dɩ 'mö naa, la wa ka-a yɛ wa nyɔnʋ -bha cɛ. Sa'a wa gba la 'yɛ-a wa de naa: “-A -yɛ nʋ -a 'yɛ -Lagɔɔ nyininyinipɩ 'wʋ 'mö nʋ-ɔ, 'zwɩɛ -bɛ mö -a ji-a 'plɩnɩɛ 'bhë -a 'yɛ-a -ma mö.” 23-Ma -Lagɔzakpö 'mö -bhlʋ -bhlʋ, 'n wa ji-a ɩ 'yuganɩngwa -bha -sa. Wa bhɩa-a -Lagɔɔ -bɛlɩpapɩɛ -yɛ lɔlɔsʋsʋɛ 'sɔ 'ji, 'n wa jua-a Nyininyɔ -ɔ wa zʋa-a dlɩ -gömö yɛ 'mö palɩ. 24Wa -dɩ-a Pisidie -gwlɩ 'mö, 'n wa ji-a -glɔ wa la-a Pafili nyini. 25-Glɔ wa la-a Pɛzɩ wa 'nyɛ-ɛ -maa nɩkpa -Lagɔwɛlɩ, wa 'plɩ-a, 'n wa ji-a -glɔ wa la-a Atali mö. 26-Ma wa 'libhïnɩ-a bato 'wʋ, 'n wa ji-e -ma Atiɔsɩ nimï mö, -ma wa ghlɩnɩ la-a -Lagɔɔ 'nyupalɩ wa 'yɛ libho -ʋ wa bhɩa-a la'a 'ji nʋɔ yɛ.
27Wa nyini-e -ma Atiɔsɩ, 'n wa ji-a -Lagɔzakpa 'wlu 'titanɩ, -lie -li -Lagɔ nʋʋa-a 'ji 'n wa ji-a libho nʋ, 'n wa jiɩ-a -sa. -Wa 'nɩ-a 'zwiföa glɩnɩ sa ʋ kalɩ wa 'yuogblʋ 'n wa ji Zezwie -lʋa zʋ, 'n wa jiɩ-a -sa. 28'N wa ji-e -bha Zezwie 'wʋbhlinɩngwa yawʋ 'ylɩɛ -bebe -sa.
Currently Selected:
NƲNƲLI 14: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
