ZAA 'BƆGƲ 16
16
1A dlɩ ji-e -gömö panɩɛ yɛ n gba-a -ɩ la'a a de. 2-Ma -Lagɔbudi'i wa jiya-a kpëtie, la -ɔ kaya 'lɩbha 'yɛ-a dlɩ 'pa naa, ɔ kaya 'lɩbha -Lagɔlibho ɔ nʋ -bha nʋ-ɔ, -bha-a nyini 'le. 3-Wʋʋ yɛ wa jiɩ-a nʋɔ, wa'a na -Tɩbha -ji 'bhë wa ka'a la jɩblɩnɩɛ mö. 4-Wʋʋ yɛ n sanɩya-a 'dɩ-ɛ, -ɩ wa ji-a nʋɔ ɩ de -yɛ nyini-e, a dlɩ 'yɛ -bha bhlinɩ naa n kɩ la a de gba 'bhë. -Wʋʋ yɛ n 'nɩya-a -bha tɛnɩde 'dɩ -sanɩ-ɛ, n nyɛya 'sɔ -bhlinɩ la 'wʋɔ yɛ -bha.
Libho -ʋ -Lagɔɔ Zuzu ji-a nʋɔ
5-Sɩka'a-a 'mö, -ma -ɔ tia'a la-aa yawʋ n -wʋ-a mö 'le, -ma ɩ 'mö, a gla'aa -bɛɛ 'bhë 'nɩ -jɩbha'a ngli naa: Ma -n -wʋ-a mö 'le 'nɩ? 6-Ɩ n gba-a la'a a dee yɛ 'kalɛ yeya-a dlɩ zɔmö. 7-Mɩlado'o 'dɩɛ -dɩ n -wʋya-a la'a 'nyɛ 'le, n -yɛ mö mɩ-ɩ ka-a a 'bhïë de -lie -li 'mö. -Wʋʋ yɛ-a, n nɩ mö-ö, kwanɩnyɔ 'na ma'a a yawʋ ji. 'N n -yɛ mö-ö, n jiya 'mɔ kwanɩnyɔ 'yuo 'pa. 8Ɔ -yɛ ji-e, mɔ-ɔ ji-a 'pɩnɩkpa 'jinylolie de dlɩ 'mö slɛmanɩɛ, 'n ɔ 'kʋa-a 'möslɛnɔɔ de dlɩ 'mö slɛmanɩ, 'n ɔ 'kʋa 'yɛ-a -zijlee de dlɩ 'mö slɛmanɩ. 9Wa nɩ'ɩ dlɩ 'wʋ -kaa yɛ ɔ jua-a 'jinylolie de dlɩ 'mö slɛmanɩɛ. 10-Ma -Tɩbha yawʋ n -wʋ-a mö 'le a 'na ka'a-a 'mö yɩlɩ 'sɔɔ yɛ ɔ jua-a 'möslɛnɔɔ de dlɩ 'mö slɛmanɩɛ. 11Pɩ la'aa nyininyɔ yɛ -zijle 'tunʋɔ 'gamö 'bhëë yɛ ɔ jua-a -zijlee de dlɩ 'mö slɛmanɩɛ. 12N ka kïbhï -mɩmɩɛ -bebe n 'kaya la -sanɩ 'bhë-ë, la a -wʋ-ɔ 'mö-ö la'a -sɩka'a, a'a bhɛlɩ a 'kɩ 'mö 'nʋ. 13-Ma ɩ 'mö, 'dɛdɛɛgba -Zuzu -yɛ ji-e, ʋ jiya 'dɛdɛɛgbawɛlɩ 'bhuo ngli 'pa. -Wʋʋ yɛ-a, ʋ'ʋ -lɛ ʋ 'bhëë nglie wɛlɩ gbaa ji, -ɩ ʋ ji-a 'nʋɔ 'mɩ ʋ ji-a -saa. 'N ʋ 'kaya-a -ɩ bhuo-o ji-a jie 'dɩ -sanɩ. 14Mʋ la'a mʋ-ʋ ji-a na 'ghlinɔ tulua, -wʋʋ yɛ-a, na -lie de ʋ ji-a -saa ʋ 'kaya -sanɩ. 15-Ɩ la'a 'bhuo -Tɩbha -Lagɔ ka-a, na -li -bha. Wʋ yɛ n nʋ-a na -lie de ʋ ji-a -saa ʋ 'kaya -sanɩ.
A 'kalɛlɩbhalɩbhɩɛ ji 'mʋna 'mö ghlanɩ
16'Bie -lɛ -yɛ 'mö gwlɛ -sɛ, a 'na ka'a-a 'mö yɩlɩ. -Bha -gömö 'bie -lɛ -yɛ 'yɛ 'mö gwlɛ -sɛ, 'n a ka'a 'yɛ-a yɩlɩ 'sɔ.” 17Ɔ gba-a -sɩbha, -ma ɔ 'wʋbhlinɩngwa gla'aa nɩkpa ja nɛ -ma wa 'bhïë 'nyizee nyɩdɩ naa: “'Manɩgbʋ ɔ -wʋya-a -la 'ji gba 'le naa: 'Bie -lɛ -yɛ 'mö gwlɛ -sɛ, a 'na ka'a-a 'mö yɩlɩ, -bha -gömö 'bie -lɛ -yɛ 'yɛ 'mö gwlɛ -sɛ, 'n a ka'a-a yɩlɩ 'sɔ, 'bhë -ma na -Tɩbha yawʋ n -wʋ-a mö 'le 'nɩ?” 18Wa nɛ naa: “Ɔ -yɛ nʋ 'bie -lɛ -yɛ 'mö gwlɛ -sɛ nʋ -aa 'nʋ-a 'mö -nɩ ɩ zɔmö 'mö, 'manɩluo 'bhëë gbʋ ɔ gba -a 'nʋ -ji.” 19Zezwi jɩblɩnɩ-a sɛ naa wa 'jɩbha wa 'kɔ ngli 'jɩbha-a, ɔ nɛ -bha wa de: “Wɛlɩköbhë n gba-a naa, 'bie -lɛ -yɛ 'mö gwlɛ -sɛ a 'na ka'a yɩlɩ, 'bhë 'bie -lɛ -yɛ 'yɛ 'mö gwlɛ -sɛ 'n a ka'a 'yɛ-a yɩlɩ, a yɛ a -wʋ-a ngli 'jɩbhajɩbhanɩ 'lee? 20'Dɩɛ -dɩ n nyɛya-a sa'a naa: Wie a ji -bha, 'n a 'yɛ-a ngazɩli nʋ, 'n 'pɩnɩkpa 'yɛ-a -nɩ 'mʋna li. Kalɛ-ɛ jiya-a 'lɩbhaa, -ma ɩ 'mö a 'kalɛlɩbhalɩbhɩɛ 'mʋna 'mö ɛ ji-a ghlanɩɛ. 21'Nglɔɔ 'wlusade -yɛ nyini-e, ɔ yʋlɔyʋlɔde nyini -bhaa yɛ kalɛ-ɛ lɩbhɔ -bha. Ɔ -yɛ-a 'mö 'wlu -sa-a, nɩkpɛ ɔ -la-a 'pɩɛ yɛ 'mʋna -wʋɔ 'lɩbha 'le 'n ɔ dlɩ 'mönɔnʋ-a ɔ -gbaapögbaapɩɛɛ de 'wʋ. 22Abhaa -nɩ 'yɛ, -sɩbha 'kalɛ wʋya-a -la -sɩka'a 'lɩbha 'le. -Ma ɩ 'mö, yɩlɩɛ n jiya-a 'sɔ 'n a 'yɛ-a 'mʋna li, 'ma 'mʋna la'a -bɛ 'nɩ bhɛlɩ ɔ 'kaya dlɩ zɔmö -sa. 23'Mɛ zlɩ la'aa 'mö, a 'na ka'a-a 'mö 'köbhë -bhlʋɔ 'bhëë yɛ ngli 'jɩbha. 'Dɩɛ -dɩ n nyɛya -bha naa, -ɩ la'a 'bhuo a -yɛ -Tɩbha -Lagɔ 'jɩbhanɩ, na 'nglɩ 'mö 'nyɛɛ ʋ jiya -bha. 24N nyɛya 'sɔ -yɛ la 'wʋbhlinɩbhlinɩɛ tɛ-ɛ, a'a-a -bhla na 'nglɩ 'mö -lu 'jɩbhanɩ. A 'jɩbha a 'yɛ ghlɩ, a 'mʋna 'yɛ 'ji mlinɩ.
A nyʋnanɩ -ma dlɩ
25'Mɩ -ɩ la'a 'bhuo, 'nini 'mö n gbanɩɩ-a a de. -Bha-a nyini 'le la n 'na 'mö-a a de 'nini 'mö gbanɩ, 'n n 'yɛ-a vaa -Tɩbha -Lagɔɔ gbʋ a de gba. 26'Mɛ zlɩ la'aa 'mö, na 'nglɩ 'mö a ji-a -Tɩbha -Lagɔ 'jɩbhanɩɛ, n'n -lɛ nʋ naa a 'bɩ 'mö n ji-a -Tɩbha -Lagɔ 'jɩbhanɩɛ nʋ. 27-Wʋʋ yɛ-a, -Tɩbha -Lagɔɔ 'bhë, 'jɩbha ʋ 'jɩbhaya -bha, sa a -jɩbha'a-a 'bhë, 'n a kɩ-a dlɩ 'wʋ naa, -ma -Lagɔ yawʋ n 'bhö-öa yɛ. 28-Ma -Tɩbha -Lagɔ yawʋ n 'bhö-ö -bha 'n n ji-e ma'a 'pɩ 'wʋ ji, -sɩka'a-a 'mö ma'a 'pɩ 'wʋ n -wʋ-a 'bhö-ö 'le n 'yɛ -ma ɔ yawʋ mö.” 29Ɔ gba-a -sɩbha, ɔ 'wʋbhlinɩngwa nɛ -bha ɔ de: “Yie, -na gbagbagbʋ -gbakaka -n -wʋʋ-ɔ 'mö-ö -la 'pua 'le, -nn gbanɩ-a 'mö -sɩka'a 'nini 'mö. 30-Sɩka'a-a 'mö -a -ji sɛ naa, -n -ji -li 'bhuo, nɩkpɛ 'nɩ-a 'mö mlinɩ ɔ -kamö -luo yɛ ngli 'jɩbha, ɩ yɛ -a kɩ-a dlɩ 'wʋ naa -ma -Lagɔ yawʋ -n 'bhö-ö -bha.” 31Zezwi nɛ: “A kɩ-a 'mö -sɩka'a dlɩ 'wʋ? 32A jɩblɩnɩ sɛ, -bha -wʋ-ɔ la'a nyini 'le, -bha yɛ nyini 'gamöö 'bhëë 'bhë, la a ji-a -dɩdɩnɩɛ -bhlʋ -bhlʋ 'n a 'yɛ-ɛ la'a na -bhlʋ tɩ. -Ma ɩ 'mö n'n -bhlʋ -wʋ, -wʋʋ yɛ-a, n -yɛ na -Tɩbha -Lagɔ 'sɔ -bhlinɩ 'wʋ. 33-Wʋʋ yɛ n gba-a -ɩ la'a a de-e, a 'yɛ -ma na 'mö -gömöwlonɔ ghlɩnɩɛ yɛ -bha. Ma'a 'pɩ 'wʋ yʋlɔyʋlʋ a ji-a ghlɩɛ, -ma ɩ 'mö, a kamanɩ 'mö, n yɛ pɩ la'a lu 'bhë.”
Currently Selected:
ZAA 'BƆGƲ 16: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
