ZAA 'BƆGƲ 15
15
Suo -su -ʋ tlʋ-a
1Glʋglʋsu la'a -ʋ tlʋ-a, ʋ 'gblʋ n glɩnɩ -bha, na -Tɩbha mɔ-ɔ -yɛ-a ʋ -lowli. 2Klia la'a 'bhuo -ɩ 'nɩ tlʋ-a, -bha ɔ dɩɩ -bha, 'n ɔ sa-a -ɩ tlʋ-a kpa yawʋ ɩ 'yɛ tlʋ tenyie yɛ. 3Wɛlɩ n 'nyɛya-a kaya kpa yawʋ -sa 'gamö 'bhë. 4Sa n -wʋ-ɔ -ma a 'mö, a -wʋ -sɩbha -ma na 'mö, sa sukle nɩ-a -da 'ji -wʋ 'n a 'nyize 'nɩ tlʋ-a, -sɩbha a nɩ-ɛ -ma na 'mö -wʋ, 'n a 'na-a tlʋ. 5-Amö-ö -yɛ-a tlʋtlʋsuo gblʋ, abha -yɛ-a ʋ klia. -Ɔ la'a -ɔ n -nyɔɔ 'sɔ -yɛ 'ji -wʋwʋnʋ mɔ-ɔ tlʋ-a 'bhïë -bebe. -Wʋʋ yɛ-a, ɛ nɩ na yɛ glɩnɩ a'a bhɛlɩ a 'yɛ -lu nʋ. 6-Ɔ nɩ -ma na 'mö -wʋ-ɔ, suklee swɩ 'kwla wa jio-a 'paa, 'n ɔ 'yɛ-a yɛ. Wa -yɛ 'mɩ suklia 'wlu 'titanɩ, 'n wa pɩ-a -kosu'u, 'n ɩ si -bha. 7'N a -yɛ -ma na 'mö -wʋ, na wɛlɩ kaya dlɩ zɔmö -wʋ-ɔ, -lu -mʋɔ 'bhëë gbʋ-ʋ kaya pla a 'jɩbhʋ, ghlɩɛ a jiʋ -bha. 8A -yɛ 'bhïë -bebe tlʋ, mɩ-ɩ 'ghlimanɩɛ na -Tɩbhaa 'nglɩ, 'n a 'yɛ-a na 'wʋbhlinɩngwaa -wʋbhlinɩngwa zʋ. 9Sa na -Tɩbha -jɩbha'a-a, -sɩbha n 'jɩbhaya 'yɛ-ɛ na-a. A nyɔnʋ na 'jɩbhajɩbhʋ cɛ. 10Sa n zʋ-ɔ la'a -bha na -Tɩbhaa wɛlɩ 'n n nyɔnʋ-a ɔ 'jɩbhajɩbhʋ cɛ, a -yɛ -sɩbha na wɛlɩ -bha zʋ, a ji na 'jɩbhajɩbhʋ cɛ nyɔnʋ.
11-Wʋʋ yɛ n gbɩ-a a de-e, a 'yɛ na 'mʋna ghlɩ 'bhë a 'mʋna 'yɛ 'ji mlinɩɛ yɛ -bha. 12Wɛlɩ n tɩya-a yawʋ mɩ-ɛ la'a: A 'jɩbhajɩbhanɩ sa n 'jɩbhaya-a. 13-Ɔ la'a -ɔ zʋ-a ɔjɩ ɔ 'tʋalɩbhangwa 'yɛ 'pʋɔ yɛ -ma ɔ nɩkpajɩbhajɩbhʋɔ nimï, nɩkpajɩbhajɩbhʋ -mʋmʋ 'nɩ -ma -wʋ. 14-Ɩ n nʋ-a a nʋ a -kɩɩ nʋ-ɔ, na 'tʋalɩbhangwa a glɩnɩ -bha. 15N 'na-a 'kaya-a 'mö nyɩgbajʋlʋɩ la 'sɔ, -wʋʋ yɛ-a, nyɩgbajʋlʋ 'nɩ ɔ 'bhitɩbhaa nʋnʋli -ji. -Ɩ la'a 'bhuo n 'nʋ-ɔ -ma na -Tɩbha ngli, 'mɩ n slʋnʋya -bhaa yɛ, na 'tʋalɩbhangwa n jiya-a laa. 16Abha nɩ'ɩ-ɛ -bha -sa, -amö-ö saya-a -bha, 'n n jiya-a 'bhli 'wʋ sɛ zʋ a 'yɛ mö, sa la'a suo su tlʋ-a a nʋnʋli 'yɛ -sɩbha 'ji nanɩ, 'bhë -ɩ la'a 'bhuo a ji-a na 'nglɩ 'mö na -Tɩbha 'jɩbhanɩɛ ɔ 'kaya 'nyɛ. 17-Ɩ n nʋ-a a nʋ-ɔ, mɩ-ɩ -yɛ-a naa a 'jɩbhajɩbhanɩ.
Sa 'pɩnɩkpa 'jɛbhɛlɩ-a Zezwi -yɛ ɔ 'wʋbhlinɩngwa 'sɔ
18'Pɩnɩkpa kaya 'jɛbhɛlɩ-ɛ, a jɩblɩnɩ sɛ naa, -amö wa 'jɛbhɛlɩ-a a bhla -tɩtɛ-ɛ. 19A -yɛ la ma'a 'pɩ 'wʋɔ 'bhëë 'nyizee -lʋa glɩnɩ-ɛ, wa 'bhɩa a glɩnɩ-aa yɛ, wa jiya la 'jɩbha. -Ma ɩ 'mö, -amö-ö saya-a ma'a 'pɩ 'wʋɔ -lʋa 'gbamö a 'yɛ na -lʋa glɩnɩɛ yɛ, a'a-a 'mö ma'a 'pɩ 'wʋɔ 'nyizee -lʋa, ɩ yɛ wa 'jɛbhɛlɩya -bha. 20Wɛlɩ n gba la-a a de a dlɩ bhlinɩ -bha ɩ de, sa'a naa: Nyɩgbajʋlʋ 'nɩ 'ghli-i ɔ 'yɛ ɔ 'bhitɩbha 'wʋ zi. 'Pɩnɩkpa ka'a 'zwɩ zia, 'zwɩ wa jiya 'yɛ-a -nɩ ziaa. Wa -yɛ na wɛlɩ -bha zʋ, a -nɩ -li -bha wa jiɩ 'yɛ-a -nɩ zʋɔ. 21'Mɩ -ɩ la'a 'bhuo, na 'nglɩ a -su-aa yɛ wa jiya-a 'ji nʋɔ. -Wʋʋ yɛ-a, -ɔ tia'a-a wa 'nɩɔ -ji. 22N nɩ la ji n 'yɛ wa de gba, wa 'na la 'jinyloli 'wlumö -ka. -Sɩka'a-a 'mö, wa'a bhɛlɩ wa 'yɛ wajɩ gbʋ -gömö -sa wa 'jinylolie yɛ. 23-Ɔ ka'a 'jɛbhɛlɩ, na -Tɩbha ɔ 'jɛbhɛlɩ-a 'gamö. 24Libho kabönɩkpɛ 'nɩ-a nʋ n nʋ la -ma wa gla'a nʋnʋ, wa 'na la 'jinyloli 'wlumö -ka. -Sɩka'a-a 'mö -li n nʋ-a wa yɩlɩɩ-a 'bhë, n -yɛ na -Tɩbha 'sɔ 'n wa -jiya-a 'jɛbhɛlɩ. 25-Ma gbö -Lagɔ 'nyʋa-a 'mö, wɛlɩköbhë -a 'cɛlɩɔ-ɔ -ma -a nʋ-a:
Wa ka'a 'loloswɩ'ɩ 'jɛbhɛlɩ 'bhë,
a 'yɛ 'wʋ 'wlenɩɛ yɛ -bha. 26Kwanɩnyɔ n jiya-a -Tɩbhaa 'nglɩ 'mö 'yuo 'paa, 'dɛdɛɛgba -Zuzu -ʋ 'bhö-ö -ma -Tɩbha yawʋ, ʋ -yɛ ji-e, ʋ ji na 'dɩ -sa. 27A -nɩ 'bhï 'yɛ 'gamö, tɛnɩ -bha tɛnɩde n nyɛya 'sɔ -bhlinɩ-a 'wʋɔ yɛ a ji 'yɛ -nɩ na 'dɩ -sa.
Currently Selected:
ZAA 'BƆGƲ 15: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
