LWIKÖÖ 'BƆGƲ 12
12
A 'na-a glɩnɩ 'kwlɩsɔkangwa -nɩ
1-Bha -gömö, nɩkpa la'a -wa ji-e -bha Zezwi yawʋ zumanɩ wa zumanɩ-a tenyie yɛ, kplee 'bhë 'nɩ la sɛzʋde -ka. Wa 'bhuo su -bha, 'n Zezwi ji-a ɔ 'wʋbhlinɩngwa 'ji gö, ɔ nɛ naa: “A möna-a falizɩɛ 'fʋloplungakpɩɛ de 'mö, wa 'kwlɩsɔkakʋ 'mʋ n sa -bha. 2A -ji sɛ naa, -ɩ la'a 'bhuo nɩkpa ziza-a, -glodu'u ɩ ji-a 'ylɩ -bhlʋ pönɩɛ. -Ɩ la'a 'bhuo wa nʋnʋ-a 'wi 'mö 'pɩ ɩ ji-a 'wlʋɔ. 3Wʋ yɛ n gba-a naa, -ɩ la'a 'bhuo a gbanɩ-ɛ -ma 'misikpoko 'mö, zlɩga wa jiɩ-a 'nʋɔ. -Ɩ la'a a 'ngungwanɩ-ɛ -ma -buduo 'gbigbi 'ji 'mö, -ma -budie ylɩgömö wa jiɩ-a -sanɩɛ.”
Zezwi nɛ wa 'na-a panɩɔ nɩkpagu yɛ -gömö -nɩ
4'N Zezwi jua-a 'dɩ 'mö zʋ, ɔ nɛ naa: “'Tʋalɩbhangwayi, a 'na-a -gu -wa la'a -wa bhɛlɩ-a wa 'yɛ nɩkpɛ 'lɩbha 'bhë, -bha -gömö -wa 'nɩ-a -lu -mʋmʋ-ʋ bhɛlɩ 'sɔ -nɩ. 5-Ɔ a 'yɛ-a -gu, a 'nɩgbö n 'kaya -slʋnʋ. -Ɔ la'a -ɔ kaya-a 'lɩbha 'bhë, -ɔ bhɛlɩ-a ɔ 'kaya -kosu'u 'pa 'mɔ a 'yɛ-a -gu. 6Lɛtɛgwlɩ 'sɔ 'mö wa'a 'pa bhe-a -glɩglɩgwie -ngbï 'pɛlʋɔ? 'Mɩ -glɩglɩgwie la'a, -Lagɔ 'nɩ dlʋnʋ ɩ gla'aa -bhlʋ 'tɩɛ 'bhë 'wʋ. 7-Sɩbha a -wʋ -bha. Sa a 'wliyawʋkanyuko -di-a 'wʋ -Lagɔ -ji -sɩbhaa yɛ, a'a nganɩ -nɩ. -Bha -Lagɔɔ de a ka dlɩ yɛ a zi -glɩglɩgwiee -zakpa 'kada 'wʋ.
8Sa'a n gba-a sa'a a de naa, -bha nɩkpa 'ji 'klʋ -ɔ -yɛ nʋ naa na -lɔ ɔ glɩnɩ-a nʋ-ɔ, -bha na -Tɩbha -Lagɔ -yɛ ʋ zuzuku 'sɔɔ 'ji 'klʋ, sa'a Nɩkpɛɛ 'Gu ji 'yɛ-a -nɩ nʋ naa, ɔ -lɔ -bha nʋ. 9-Bha nɩkpa 'ji 'klʋ -ɔ -yɛ nʋ ɔ nɩ'ɩ -ji nʋ-ɔ, -bha na -Tɩbha -Lagɔ -yɛ ʋ zuzuku 'sɔɔ 'ji 'klʋ, sa'a n ji 'yɛ-ɛ na-a gba naa, n 'nɩɔ na-a -ji nʋ.
10-Ɔ -yɛ Nɩkpɛɛ 'Guo yɛ 'jinylɔwɛlɩ gba, -Lagɔ ji ɩ gbʋ 'ji 'tatinɩ. Nɩkpɛ -mɔ -yɛ Zuzu 'Wlawla ngli nyimanɩ, ɔ -nɩ 'jinyloli la'a, -Lagɔ 'na ɩ gbʋ 'ji 'tatinɩ 'lɩlɩlɩ.
11Abha na -lʋa, wa 'kaya -zijli tunʋɔ yɛ -ma -Lagɔbudi'i wa jiya-a kwa, wa 'kaya 'yɛ -ma -gwlɩnyiningwa 'kadɩ dlɩ'ɩ kwa. Wa -yɛ nʋ wa 'kaya gbʋ köbha nʋ-ɔ, -ɩ la'a a 'yɛ-a gba a 'yɛ ajɩ gbʋ -gömö -sa, a 'na-a nimïnɩɩ dlɩ cɛ -nɩ. 12-Wʋʋ yɛ-a, -ɩ la'a a ji-a gba, Zuzu Wlawla-a jiya-a -bha -gaganɩlɩ'ɩ ngli 'paa a 'kɩ gba.”
Zezwi nɛ nɩkpɛ 'na-a 'tɛnɩ ɔ wʋlʋwʋlʋɛ dlɩ -nɩ
13Nɩkpa -wa su la-a -bha Zezwi yawʋ, 'n -ma wa gla'aa nɩkpɛ -bhlʋ ji-a gbʋ -dɩ. Ɔ nɛ -bha Zezwie de naa: “Nyininyɔ, n -yɛ na -dagu 'sɔ gugbë -aa -tɩbha -tɩya la-a yawʋ, 'nyɔ 'dɩ ɔ 'ka 'mö -dlinɩ, ɔ ka'a na -nɩ -la 'ye 'nyɛ.” 14Nɩkpɛ la'a gba-a sa'a, Zezwi nɛ -bha ɔ de naa: “-Abhiyi, a'a -mɔ zʋ'ʋ-a a -zijlitunyɔ -yɛ a -lie dlinɩnyɔ 'sɔ 'wʋ 'nɩ?” 15'Bhë ɔ nɛ -bha nɩkpaa de naa: “A möna 'mö, ma'a pɩ 'wʋɔ wʋlʋwʋlʋɛ 'tʋ 'na-a 'lɩbhaya -nɩ. -Wʋʋ yɛ-a, sa nɩkpɛ 'bhëë wʋlʋwʋlʋɛ ji 'wʋ -di, mɛ-ɛ 'nɩ 'nglɩ -ka ɔ 'yɛ -bhlɩ.”
Wʋlʋwʋlʋnyɔ -ɔ 'nɩ-a 'nagö -kaa 'nine
16'N Zezwi jua-a 'nine -bhlʋ 'panɩ, ɔ nɛ naa: “Glʋglʋnyɔ -bhlʋ mɔ-ɔ -wʋ la-a -bha, wʋlʋ ɔ wʋlʋ la-a tenyi. 'Ylʋba -bhlʋ 'mö ɔ lili zʋ-a, cɛ ɩ 'kplanɩɔ-a tenyi. 17Ɔ -yɛ 'mɩ lili la'a -gömö yɩlɩ-ɛ, 'n ɔ palɩpalɩnɩ-a dlɩ yɛ 'n ɔ nʋ-a: Sa n ji-a 'mö zʋzʋnʋɔ n 'yɛ na lili la'a sɛ zʋ 'nɩ? 18Ɔ 'pa-a dlɩ -daan, ɔ nɛ: N yɛ 'nagö ghlɩ 'bhë. Sa n ji-a zʋɔ -sɩbha la'a. Na -digbagbɩ n ji-a wlaa, n 'yɛ 'kadɩ 'sɩbha, n 'yɛ -ma na lili -yɛ na -li 'bhuo 'sɔ 'pa. 19-Bhaa do'o, n ji-a 'mö sɛ naa n yɛ libho nʋ 'bhëë yɛ, n ji li 'le -wʋ kplokplo 'ylʋböö -bebe ji 'plɩ. N ji 'jinanɩswɩ'ɩ nyɛpɛ, n ji 'mʋna li, n ji 'nɩma, sa n 'jɩbha-a n ji -sɩbha li.
20Ɔ kɩ -sɩbha dlɩ 'wʋ, -Lagɔ nɛ -bha ɔ de naa: 'Mödɔnyɔ, -zɩnɩ'ɩɛ dʋdʋɔ 'bhë -bha -n -ji-a tlɩɛ. Ɩ yɛ, -li la'a 'bhuo -n nʋ-a -n 'yɛ -digbagbɩ 'mö 'pa, -mɔɔ -li ɩ ji-e 'mö-a zʋɔ 'nɩ? 21-Ma ɩ 'mö, -ɔ -yɛ ɔ 'nyizee yɛ -li 'kplɔnʋ 'bhë -ɔɔ gbʋ-ʋ nɩ -Lagɔ 'mö -wʋ, -sɩbha ɔ gbʋ -wʋ-a 'mö. -Bha -Lagɔɔ 'ji 'klʋ ɔ'ɔ wʋlʋ.”
A 'tɛnɩ -Lagɔ dlɩ, a 'na-a kplenɩ -nɩ
22Zezwi 'pa-a 'nine la'a 'bhë, ɔ nɛ -bha ɔ 'wʋbhlinɩngwaa de naa: “-Ɩ la'aa yɛ n gba-a naa: -Ʋ a 'yɛ-a li a 'yɛ -bhlɩ, a 'na-a nimï ʋ yɛ dlɩ -nɩ. -Ʋ a 'yɛ-a 'mö 'pa a 'na-a nimï 'yɛ ʋ yɛ dlɩ -nɩ. 23-Wʋʋ yɛ-a, -bhlɩbhlɩɛ ka dlɩ yɛ ɛ zi lilie 'wʋ, nɩkpɛɛ ku ka 'yɛ dlɩ yɛ ʋ zi 'möpalu 'wʋ. 24A yɩlɩ -lɛ -kaamlɩ, ɩ'ɩ glʋ ɩ'ɩ -dɩ, ɩ'ɩ -digbagbɩ -ka, 'n a -Tɩbha -Lagɔ nyɩ-a lili. A 'bhï a'aa cɛ dlɩ sɛ -ka tenyi a 'yɛ 'zɩ 'wʋ zi 'nɩ-ɩ? 25-Mɔ bhɛlɩ-a -ma ɔ dlɩnimïnimie 'mö ɔ 'yɛ 'ylɩ ɔ ji la-a ma'a dʋdʋkpata'a -saa -gömö 'pa 'nɩ? 26A dlɩnimïnimie 'nɩ-ɛ la'a bhɛlɩ ɛ 'yɛ wɛlɩkikie 'bhïë 'fʋ göganɩ-ɛ, 'manɩɛ yɛ a nimïnɩ-ɛ 'mö-a -mɩbha 'bhuo dlɩ cɛ 'nɩ? 27A yɩlɩ -lɛ -ma 'kwla 'möö -titi -ɩɩ 'bowle nanɩ-a 'ji. Ɩ'ɩ nʋ libho, ɩ'ɩ -dɩ -banɩ 'n ɩ nanɩ-ɛ -sɩbha 'ji. -Ma ɩ 'mö, sa'a n gba-a sa'a a de naa: -Benyido'oo dʋdʋnyininyɔ 'kadɔ Salomɔɔ 'bhë, -ma ɔ wʋlʋwʋlʋɛ 'bhuo 'mö -banɩ ɔ 'pa-a 'mö, ɩ'ɩ 'ji nanɩ ɩ 'yɛ 'mɩ -titi la'aa 'bowle 'wʋ zi. 28-Titi -ɩ -wʋ-ɔ -ma -zɩnɩ'ɩ 'kwla 'mö, 'bhë -ɩ wa ji-a -kosu'u 'paa -Lagɔ -wɩɩ la'a -sa -nɩ bʋlʋa 'le-e, e 'kë zi abha kʋ-a dlɩ yɛ, abhaa cɛ ʋ 'na-a 'möpali 'nyɛɛ 'nɩ-ɩ? A -Lagɔɔ dlɩwʋkakʋ 'nɩ -zu lɛɛ! 29-Ɩ la'aa yɛ n gba-a naa: Sa a 'yɛ-a 'mö zʋzʋnʋ a 'yɛ li, a 'yɛ 'nɩma, a 'na-a nimï ɩ dlɩ -nɩ. 30-Wʋʋ yɛ-a, 'mɩ -ɩ -la 'bhuo, ma'a 'pɩ 'wʋɔ nɩkpa -wa 'nɩ-a -Lagɔ -ji, mʋa-a yɩlɩɩ-a yɛ. Abhaa -nɩ-ɛ, -lu -ʋ a'a-a -ka a -Tɩbha -Lagɔ -ji ʋ sɛɛ yɛ, 31a yɩlɩ -ma a 'pɩ 'mö ʋ nyininyinie yɛ, ʋ kaya-a 'mö nyini-e, -li la'a 'bhuo -ɩ tʋ-a 'wʋ, ʋ 'bhë jiya 'nyɛ.
-Ɩ -yɛ-a lɩɛ -lɩ, sa Zezwi gba-a ɩ gbʋ
32Abha na -lʋa, a'a -zu 'bhë-ë a 'na-a gu -nɩ. -Wʋʋ yɛ-a, a -Tɩbha -Lagɔ mʋ-ʋ saya-a -bha a 'yɛ -ma ʋ nyininyinipɩ 'wʋ mö. Ʋ 'bhë mʋ-ʋ 'jɩbhɩ-ɛ -sɩbha.
33-Ɩ la'a 'bhuo a ka-a, a 'pɩ 'pɛlʋ a 'yɛ ɩ mëni 'pʋangwa cɛ dlinɩ. -Ma -Lagɔɔ nyininyinipɩ 'wʋ, -ɩ ʋ jiya-a -ma 'nyɛɛ ɩ 'na sɛ yɩla 'lɩlɩlɩ, 'wingwa 'na 'kɩ 'wi ghli, 'klɩmö 'na 'kɩ li. Mɩ-ɩ -yɛ-a lɩɛ -lɩ. 34-Wʋʋ -yɛ-a, ma nɩkpɛ lɩ -wʋ-a, -ma ɔ dlɩ su -bha.
A pö ajɩ 'wʋ a 'yɛ -bha glɩ
35A pö ajɩ 'wʋ, a nyʋnanɩ yawʋ, a -dɩ a 'napö 'ji. 36A -wʋ nɩkpa -wa -wʋ-a wa 'bhitɩbha -kʋnʋ 'lee swɩ. Nɩkpa la'a, ma wa kwa-a 'nglɔ 'n wa -wʋɔ-a 'wʋ 'bhli 'le, -ma wa 'bhitɩbha 'mö -bha. Wa -wʋɔ -kʋnʋ 'le ɔ -yɛ dʋdʋnyɩdɩ nimï ji, ɔ -yɛ -bha -buduo de bhɔtɔ wa 'yɛ -bha kalɩɛ yɛ. 37'Mʋa nyɩgbajʋlʋɩ la'a wa 'bhitɩbha ghlɩ-ɛ -sɩbha -gagalɩ'ɩ 'mʋna 'lɩbhʋa. 'Dɩɛ -dɩ n nyɛya-a naa, yawʋ wa 'bhitɩbha ji-a nyʋnanɩɛ, ɔ -kʋa -bha lili go sɛ zʋ 'bhë ɔ 'kʋa-a lili cɛ dlinɩ. 38Ɔ -yɛ dʋdʋ -nyɩdɩ jinɩ, ɔ -yɛ 'yɛ zlɩ ngo'o jinɩ, ɔ -kʋa -sɩbha -gagalɩ'ɩ ghlɩ 'mʋna 'lɩbhʋa. 39Wɛlɩ n ji-e la'a gbaa, a 'nʋɩ 'mö 'jinanɩswɩ'ɩ. 'Glie -mɛɛ 'mö 'winyɔ jio 'wi 'wʋ -ghli kwla'a ji, -budulowli -kɛɛ la -ji, ɔ -budu ɔ ji la-a -kʋɔ ɔ 'na la 'winyɔ 'ji 'tati ɔ 'kʋ 'mö pla. 40-Ɩ la'aa yɛ n gba-a a de naa: Abha na -lʋa, a pö ajɩ 'wʋ 'kɔmʋʋ a 'yɛ -bha glɩ. -Wʋʋ yɛ-a, 'glie a'a-a 'wʋ pö, ɛ 'mö Nɩkpɛɛ 'Gu ji-a jie.”
A nʋ 'jinanɩswɩ'ɩ -Lagɔlibho
41Zezwi gba-a sa'a, Piɛlɩ nɛ naa: “Nyininyɔ, -aa 'nyizee yɛ -n 'pa-a 'nine -la 'nɩɩ? Nɩkpa 'bhuoo yɛ-a?” 42Ɔ nɛ naa: “Nɩkpɛ -yɛ nyɩgbajʋlʋɩɛ -bɛ -ka, ɔ -yɛ lowlu'u möö ji-e, -ma wa gla'aa nyɩgbajʋlʋ -ɔ ɔ 'tɛnɩ-a dlɩ, -ɔ nʋ-a 'jinanɩswɩ'ɩ libho -ɔ ka-a 'nagö, 'mɔ ɔ tɩ-a ɔ libho yawʋ. Lilide -yɛ nyini, ɔ 'yɛ ɔ linyɩgbajʋlʋɩ lili cɛ dlinɩ wa 'yɛ lie yɛ. 43'Mɔ nyɩgbajʋlʋ la'a ɔ 'bhitɩbha -yɛ lowlu'u 'bhö-ö, ɔ -yɛ ji ɔ -kɔɔ -sɩbhaa nʋnʋlɩ'ɩ ghlɩ-ɛ, 'mʋna 'lɩbhɔ. 44'Dɩɛ -dɩ n nyɛya-a naa, 'mɔ nyɩgbajʋlʋ la'a, -ma ɔ 'bhitɩbha ji-a ɔ -li 'bhuo -saa ɔ 'kɔ 'mö palɩ ɔ 'kɩ nyini. 45'N nyɩgbajʋlʋ la'a ɔ 'bhitɩbha -kɔɔ -gömö panɩ ɔ -yɛ gba naa: N -ji sɛ naa, na 'bhitɩbha -ma ɔ ji-a gwlɛɛ ɩ yɛ na gbʋ 'nɩ -ma -wʋ. Ɔ -yɛ ɔ linyɩgbajʋlʋɩ 'wʋ gblo ɔ -kʋa 'sɛlɩ, ɔ -bhlʋ -yɛ lili li, ɔ -yɛ nʋ 'wʋ lʋ ɔ -yɛ -bha glɩ, 46'ylɩ -bhlʋ ji-a jie, la ɔ dlɩ 'nɩ-ɛ -bha pö 'lɩlɩlɩ, -bha ɔ 'bhitɩbha ji-a jinɩɛ. Ɔ -yɛ ji-e, ɔ nyɩgbajʋlʋ la'a gbʋ ɔ jio-a cɛ ghlɩnɩɛ. -Wa la'a -wa sa-a -bha wa 'bhitɩbhangwaa wɛlɩ -ɩ wa nʋʋa-a 'ji ɔ 'kɔ-a 'ji nʋ. 47Sa'a n gba-a sa'a naa: Nyɩgbajʋlʋ -ɔ -ji-a -ɩ ɔ 'bhitɩbha 'jɩbha-a, ɔ -yɛ libho 'ji nyimanɩ, 'mɔ nyɩgbajʋlʋ la'a -bɛ 'wʋ wa jio-a 'sɛlɩɛ. 48Ma ɩ 'mö, nyɩgbajʋlʋ la'a -ɔ 'nɩ-a -ɩ ɔ 'bhitɩbha 'jɩbha-a -ji 'bhë -ɔ nʋ-a 'sɛlɩsɛlɩli-e, -sɛ wa jio-a 'sɛlɩɛ. -Ɔ wa 'nyɛ-a -bebe 'ye, -bebe wa jio-a ngli 'jɩbhanɩɛ. -Ɔ wa 'nyɛ-a 'kikie 'ye, 'kikie wa jio-a ngli 'jɩbhanɩɛ.
-Ɩɩ yɛ Zezwi ji-a
49-Kosu n ji-e ma'a dʋdʋkpata'a 'ji -dɩ kwla'a, na dlɩ 'jɩbha ʋ 'yɛ -sɩka'aa 'bhë 'ji do. 50Zwɩ 'kadɛ -ɛ -ga-a nimï, -ɛ ji'i-a zie, ɛ nɩ -bhla 'wʋ 'wlenɩ na dlɩ-ɛ -kɔngʋʋ. 51A 'pa-a dlɩ a nɛ nɩkpaa -ghöbhanɩ yɛ n ji-e ma'a 'pɩ 'wʋɔ? 'Bhëbhë, 'dɩ n nyɛya-a naa, nɩkpa -sla kwla'a n ji -bha. 52-Sɩka'a-a 'mö, 'ligbë -bhlʋ 'wʋɔ nɩkpa -yɛ -ngbï -wʋ-ɔ, -sɔnʋɔ wa ji -bha, 'sɔ 'yɛ-a -mʋmʋa taa yɛ go 'panɩ, 'n -mʋabha ta 'yɛ-a 'sɔɔ yɛ go 'panɩ. 53-Tɩbha -yɛ ɔ nyɩbhɛlʋgu sɔ-ɔ ji-a -sɔnʋɔ, nyɩbhɛlʋgu -yɛ ɔ -tɩbha 'sɔ 'yɛ-a -sɔnʋ. -Da -yɛ ɔ nglugu sɔ-ɔ ji-a -sɔnʋɔ, nglugu -yɛ ɔ -da 'sɔ 'yɛ-a -sɔnʋ. 'Luwlida -yɛ ɔ 'guo nglɔ sɔ-ɔ ji-a -sɔnʋɔ, 'guo nglɔ -yɛ ɔ 'luwlida 'sɔ 'yɛ-a -sɔnʋ.”
54Ɔ nɛ 'yɛ -wa suo-o -bhaa de naa: “A -yɛ -ma ghayɩ yɩlɩ, -ma -yɛ julumanɩ, 'n a nʋ-a: 'Nyizako ji-a lɩbha, 'dɛdɛ'ɛ 'n a lɩbha -bha. 55'Ylʋzalʋ -yɛ bhʋ-ʋ zlɩ -yɛ 'ji nanɩ, 'n a nʋ-a 'bhubhuko-o ji-a -zɩnɩ'ɩ jie, 'n a ji-a 'dɛdɛ'ɛ. 56'Kwlɩsɔkangwayi, a -ji 'nyizako -yɛ 'bhubhuko 'sɔɔ jinɩde, 'bhë -sɩkanɩɛ -li la'a bhuo -ɩ -wʋya-a 'ji 'klʋ 'plɩnɩ 'le, 'manɩɛ yɛ a'a jɩblɩnɩ-a ɩ zɔmö 'nɩ?
57'Manɩɛ yɛ a 'bhï 'nɩ jɩblɩnɩ-a -li la'a -ɩ slɛnɩ-a 'mö 'nɩ? 58-N -yɛ nɩkpɛ 'sɔ -yɛ wɛlɩ nyɩdɩ -ka, a -yɛ -ma -zijlitungwa dlɩ'ɩ mö 'le -wʋ-ɔ, bhla a namö 'yuogblʋ'ʋ, 'pa nɩkpɛ la'a -bɛlɩ a 'yɛ -ghöbhanɩ. -N nɩ -sɩbha nʋ, gbʋ la'a -yɛ -ma -zijlitunyɔ dlɩ'ɩ nyini, ɔ -jimö-ö -zijle tunʋ 'bhë, ɔ -jimö-ö -die 'mö 'pa. 59Sa'a n gba-a sa'a -na de naa: Mëni wa -dɩnɩmö-a -n nɩ -lɛ ɛ 'bhuo 'pɛnɩ 'bhë, -n 'na 'mɛ -die la'a 'mö 'wlʋ 'lɩlɩlɩ.”
Currently Selected:
LWIKÖÖ 'BƆGƲ 12: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
