LWIKÖÖ 'BƆGƲ 13
13
A ligba a 'yɛ a 'jinyloli cɛ 'mö -sa
1-Bhaa do'o, 'n nɩkpaa 'jaja ji-a Zezwi 'dɩ -la, Galilee nɩkpa -wʋ-a nɩma bʋbɔnʋ 'le, -gwlɩnyininyɔ Pilatɩ tia-a ɔ 'slʋja 'wʋ wa 'lɩbha-a, -waa dlu ɔ 'slonʋ-a bʋbɔnʋnɩmaa dlu 'wʋ, ɩ 'dɩ wa ji-a Zezwi -sanɩ kwla'a. 2Wa -sanɩɔ-a 'mɩ 'dɩ-ɛ, Zezwi nɛ naa: “A -yɛ dlɩ 'pa a -tɔnʋ naa, nɩkpa la'a wa 'lɩbha-a -sɩbha nyanɩklaswɩ'ɩ mʋa-a glɩnɩ-a 'jinylolie nʋnʋngwa 'kadɩ mʋa-a zi-a -ma Galilee nɩkpa 'bhuo 'wʋɔ yɛ wa 'lɩbhʋa-a? 3'Bhëbhë, ɛ'ɛ -lɛ mɩ-ɩ, sa'a n gba-a sa'a a de naa: A 'bhï a nɩ ligba, a 'yɛ a 'jinyloli cɛ 'mö -sa, -sɩbha a ji 'yɛ-a -nɩ tlɩɛ. 4-Ma Zelwizalɛmöö 'pɩa wa la-a Silowe, -budu 'kadʋ -ʋ bhli-e -ma, nɩkpa kugbïa -ngbɔta la'a ʋ 'lɩbha-a, mʋa-a nʋ-a 'jinyloli mʋa-a zi-a Zelwizalɛmöö nɩkpa -mʋabha 'bhuo 'wʋ 'nɩ-ɩ? 5'Bhëbhë, ɛ'ɛ -lɛ mɩ-ɩ, sa'a n gba-a sa'a a de naa, a 'bhï a nɩ ligba a 'yɛ a 'jinyloli cɛ 'mö -sa, -sɩbha a ji 'yɛ-a -nɩ tlɩɛ.”
Zezwi yɛ figösu -ʋ 'nɩ tlʋ-aa 'nine 'pa
6Zezwi gba-a sa'a wa de 'bhë-ë, 'n ɔ ji-a 'nine la'a 'pa. Ɔ nɛ naa: “Nɩkpɛ -bhlʋ mɔ-ɔ glʋ-ɔ -ma ɔ 'lagblɛ'ɛ figösu. Ɔ mö-a su la'aa 'bhï -sa kwla'a, ɔ'ɔ -lɛ -ma ʋ 'wlu 'bhë -bhlʋ 'tɩɛ 'bhë ghlɩ. 7'N nɩkpɛ la'a ji-a ɔ libhonʋnyɔ 'dɩ 'nyɛ, ɔ nɛ naa: Yie, su -la 'ylʋbö ta 'mö n jinʋ-a 'wlu -yɩlɩ kwla'a, ʋ'ʋ tlʋ. Ɩ yɛ 'klʋ, kpakpaswɩ'ɩ ʋ -wʋ-a 'bhle bhɩa 'le. 8Libhonʋnyɔ nɛ naa: -Abhitɩbha -sʋʋ -bhla 'ylʋba la'a 'mö cɛ yawʋ n 'kʋ yawʋ 'wlu, n 'kʋ -klokodu yawʋ palɩ. 9Na dlɩ naa 'ylʋba -ma ji-a jie 'mö ʋ ji tlʋ, mʋ-ʋ nɩ-a 'mö tlʋ 'bhë -n 'kʋ 'kla.”
Zezwi yɛ -gwlɛnɩzlɩ 'nglɔ -bhlʋ göpö
10 -Gwlɛnɩzlɩ -bhlʋɔ 'mö, Zezwi-e -ma -Lagɔbudu -bhlʋ 'mö -Lagɔwɛlɩ ngli 'pa 'le, 11'nglɔ -bhlʋ -wʋ la-a -ma -Lagɔbudu la'aa 'mö 'jinylozuzuko ɔ ka-a -gömö, a -sɔɔ 'ylʋbö kugbïa -ngbɔta -gömö. A yɛ ɔ'ɔ 'pluo 'mö, 'möö 'nyize ɔ 'kimanɩɔ-a 'n ɔ namö -bha. 12Zezwi yɩlɩɔ-a, 'n ɔ jio-a wɔzɩ ɔ nɛ -bha ɔ de naa: “'Nglɔ, -na gu yɛ -zɩkazɩnɩ'ɩ bhɩa 'bhë.” 13'N ɔ jio-a cɛ -gömö zʋ, -bha -gaganɩlɩ'ɩ 'n nglɔ la'a ji-a 'mö 'pluo, 'n ɔ ji-a -Lagɔɔ 'nglɩ 'ghlimanɩ. 14-Gwlɛnɩzlɩ Zezwi göpö-a 'mɔ nglɔ la'aa yɛ, dlɩ yawʋ ɩ -nyu la-a -Lagɔbuduo nyininyɔ. 'N ɔ ji-e -ma -Lagɔbudu'uo nɩkpa 'ji gö. Ɔ nɛ -bha wa de naa: “-Ma 'pɛlʋwlu -bhlʋ 'mö a ka 'ylɩ -ngbʋpʋlʋ -ɩɩ 'mö a nʋnʋa libho, a ji 'mɩ ylɩ la'a 'mö wa 'kaya göpö, a 'na-a ji -gwlɛnɩzlɩ -nɩ.” 15Ɔ gba-a sa'a wa de, 'n Zezwi jio-a ngo'o palɩ, ɔ nɛ -bha ɔ de naa: “'Kwlɩsɔkangwayi, -gwlɛnɩzlɩ -yɛ nyini, a bhilia -yɛ a -sʋkʋfalɩ sɔ -ɩ 'glɔ-ɔ -ma -gbʋ 'mö, n -tɔnʋ bulonʋ a bulonʋɩ 'n a kʋɩ 'nɩma kwla'a? 16E 'kë zi nglɔ la'a -ɔ glɩnɩ-a Ablaamöö ngëyi, -ɔ -sa-a -ma Sataa 'likpï ngli 'ylʋbö kugbïa -ngbɔta, 'manɩɛ yɛ wa'a-a bhɛlɩ wa 'kɔ -gwlɛnɩzlɩ bulonʋ 'nɩ?” 17Zezwi gba-a sa'a, -wa la'a -waa bhï-ï 'panɩɔ la-a yʋlʋ yawʋ zʋ-ʋ 'lɩbhʋa -bha. Nɩkpa -mʋabha -wa -wʋ 'yɛ la-a -ma -nɩ -Lagɔbudu'u, Zezwie -lie -li 'kadɩ ɔ nʋ-a, wa yɩlɩɩ-a 'wʋ, 'mʋna-a 'lɩbhʋa -bha.
Zezwi yɛ su wa la-a mutadɩɛ 'nine 'pa
18Zezwi nɛ: “'Manɩ -Lagɔɔ nyininyinipɩ -nyɛɛ 'wlʋnʋ-a 'nɩ? 'Manɩ n jiɛ-a 'wʋ palɩɛ 'nɩ? 19Ɛ -yɛ su wa la-a mutadɩɛ 'jeyi 'sɔ 'wlʋnʋ -bha. Nɩkpɛ -kɛɛ -ma ɔ 'lagblɛ'ɛ glʋ, ɛ -yɛ mi su ɛ zʋ -bha, 'n -ma ghayɩɛ 'zɩ 'sɩbhanʋ-a 'wlu.”
'Fʋloplungakpɔɔ 'nine
20Ɔ nɛ 'yɛ naa: “'Manɩ n ji-a -Lagɔɔ nyininyinipɩ 'wʋ palɩɛ 'nɩ? 21Ɛ -bhlee 'fʋloplungakpɔ 'nglɔ palɩ -ma 'fʋlobhʋbhʋɔ kwili -ngbï 'mö 'n ʋ jiʋ 'plua.”
A 'tamanɩ 'ji yawʋ a ji-e -Lagɔɔ nyininyinipɩ 'mö bɔ
22Zezwi -wʋ-ɔ -ma Zelwizalɛmö mö 'le, -ma -gwlɩ 'bhuo 'mö ɔ 'plɩnɩ -bha. 'Kadɩ oo, 'kikie oo, -ma ɩ 'bhuo 'mö ɔ 'pa-a -Lagɔwɛlɩ ngli.
23'N nɩkpɛ -bhlʋ jio-a ngli 'jɩbha, ɔ nɛ naa: “Nyininyɔ, 'manɩɛ yɛ nɩkpa -wa ji-e -ma -Lagɔɔ nyininyinipɩ 'wʋ möö wa 'na-a -zu 'nɩ?” Zezwi nɛ: 24“A 'tamanɩ 'mö, a 'yɛ -bha ngwlele 'kikeyi ngli planɩ. -Wʋʋ yɛ-a, 'dɩɛ -dɩ n nyɛya-a naa, nɩkpaa -bɛ ji-e -bhaa planɩplanɩɛ 'mö jɩla 'bhë wa 'na bhɛlɩ. 25'N a nɩ 'ji yawʋ 'tamanɩ, -budulowli -yɛ 'wʋ -sɔ, ɔ -yɛ -bha -gba, -ma 'pɩ a ji-a tʋ-ʋɔ. -Bhaa do'o, a 'nɩgbö -ma 'pɩ 'n a 'yɛ-a -bha -buduo de bhɔtɔ, 'n a 'yɛ-a nʋ: Nyininyɔ, -a -bhiamö yawʋ, kalɩ -bha -a 'yɛ pla. A -yɛ -sɩbha gba, sa'a ɔ ji-a a de gba naa: N'n a 'bhönɩdee 'bhë -ji. 26'N a 'yɛ-a gba naa: -A -nyɛmö 'sɔ 'n -a ji-a debhlʋ linɩ, 'n -a ji-a debhlʋ 'nɩmanɩ, 'n -n ji-e -ma -aa 'gbï 'mö -Lagɔwɛlɩ ngli 'pa. 27'N ɔ 'yɛ-ɛ sa'a a de gba naa: La 'bhë a 'bhönɩ n nɛ n'n -bha de ji, abha ka-a 'jinylolie nʋnʋlibho, a 'pa ajɩ nimï, n 'nɩya -ji. 28-Bhaa do'o Ablaamö, Izakö, Zakɔpö -yɛ -Lagɔɔ 'mögbanɩngwa 'bhuo 'sɔ, a -kʋa -ma -Lagɔɔ nyininyinipɩ 'wʋ yɩlɩ 'bhë, a -yɛ -ma -nɩ 'pɩ 'nɩgbö, 'mö a ji-a 'kpöö a 'yɛ-a wi a 'yɛ-a gla 'mö li. 29Sa'a n gba-a sa'a naa: -Ma dʋdʋkpataa këti 'bhuoo -gömö, -ma nɩkpa ji-a 'bhönɩɛ wa 'yɛ -ma -Lagɔɔ nyininyinipɩ 'wʋ pla, wa -yɛ -Lagɔ 'sɔ 'yɛ debhlʋ linɩ. 30-Wa -ga-a -zɩkazɩnɩ'ɩ nimïë gla'aa -mʋmʋa-a ji-a 'yu 'plɩnɩɛ, 'n -wa -ga-a 'yuo gla'aa -mʋmʋa-a 'yɛ-a nimï 'plɩnɩ.”
Zezwi yɛ Zelwizalɛmöö gbʋ 'mö wi
31'Mɛ zlɩ la'a -bhlʋɔ 'mö, 'n falizɩɛ gla'aa -mʋmʋa ji-e -bha Zezwi ghlɩ, wa nɛ naa: “'Bhö-ö ma'a -n 'yɛ kaböbhɛyɩ mö, -wʋʋ yɛ-a, dʋdʋnyininyɔ Elodɩ 'jɩbha ɔ -kamö 'lɩbha.” 32Wa gba-a sa'a Zezwie de, ɔ nɛ: “A -yɛ 'mö a 'nyɛ -dabhlinyɔ -la 'dɩ naa: Ylɩ la'a 'sɔɔ 'mö-ö, 'jinylozuzuku n -wʋ-a nɩkpa -gömö kpëti 'le, 'n n -wʋ 'yɛ-a guzungwa göpö 'le, 'ylɩɛ ta -leyi 'mö n ji-a 'ji bhɩa. 33-Ma ɩ 'mö, -zɩkazɩnɩ'ɩ-ɛ, zɩgbadlɩ'ɩ -yɛ -maanimï 'sɔ, Zelwizalɛmöö 'yuogblʋ n ji-a bhlie, -wʋʋ yɛ-a, -Lagɔɔ 'mögbanɩnyɔ 'nɩ bhɛlɩ ɔ 'yɛ kaböbhɛyɩ tlɩnɩ 'n ɛ nɩ -ma Zelwizalɛmö glɩnɩ.
34Yie! Zelwizalɛmö, -nmö lɩbha-a -Lagɔɔ 'mögbanɩngwa 'kɔmʋʋ, nɩkpa wa -tiamö-a 'wʋ -nmö 'lɩbhanʋa-a kpöaku, sa nunu 'nɩ-ɛ la'a ʋ 'gwie -këpï zɔmö fa, -sɩbha na dlɩ 'jɩbha-a 'kɔmʋʋ n 'yɛ na 'gwie 'wlu 'titanɩ 'bhë, a 'nɩɩ-ɩ 'wʋ nglu. 35Tɛnɩ-a 'mö la'a, -Lagɔ kaya ylanɩ 'bhë, a 'na ka'a-a 'mö yɩlɩ, zlɩ -ɛɛ mö a ji-a nʋɔ: -Ɔ jinɩ-ɛ la'a -aa Nyininyɔ -Lagɔɔ 'nglɩ 'mö, -Lagɔ 'pɔ 'nyupalɩ nʋ 'n ɛ 'yɛ-a nyini.”
Currently Selected:
LWIKÖÖ 'BƆGƲ 13: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
