LWIKÖÖ 'BƆGƲ 2
2
Sa wa gwalɩgwalɩnɩ-a Zezwi 'mö
1-Bhaa do'o, dʋdʋnyininyɔ 'kadɔ wa la-a Ogwisɩ ɔ nɛ wa zɛlɩ dʋdʋkpata -gömöö nɩkpa 'bhuo. 2-Bhaa taka -gwlɩzɛlɩdo'o, nɩkpɛ -bhlʋ wa la-a Kilinwisɩ, mɔ-ɔ nyini la-a Silie dʋdʋ. 3'N nɩkpa 'bhuo ji-e -ma wa 'bhigwlɩ'ɩ mö wa 'kʋa 'bɔgʋɩ 'mö 'paa yɛ.
4Zozɛfö 'bhö-ö 'yɛ -nɩ -ma Galilee dʋdʋ -gömöö -glɔ wa la-a Nazalɛtɩ, 'n ɔ ji-e -ma Zwidee dʋdʋ -gömöö -glɔ wa la-a Bɛtɩlɛmö mö, -wʋʋ yɛ-a, -ma 'ma gbë la'a 'mö Davidɩ 'wlʋ -bha, 'n Zozɛfö glɩnɩ-a Davidɩɛ -kosu 'jie nɩkpɛ. 5Wa 'kɔ 'bɔgʋ 'mö 'paa yɛ ɔ mö-ö -ma, ɔ -yɛ ɔ bheyi Mali 'sɔ -bhlinɩ 'wʋ. -Bhaa do'o Mali-e 'jinanɩ yɛ.
6Wa-a -ma Bɛtɩlɛmö 'n Malie 'wlusade ji-a nyini. 7'N ɔ ji-a ɔ 'wʋkpɩanɩgu gwalɩ, nyɩbhɛlʋgu la-a -sɩbha. 'N ɔ jio-a -yʋkʋpɩ yawʋ 'pa, 'n ɔ jio-o -ma nɩmaa 'mölinɩkɩkɛ 'mö sɛ 'pua, wa'a -lɛ -ma lowlunɩkpaa 'mögʋbudu'u 'bhle ghlɩɛ yɛ.
Sa -Lagɔzuzuko -sasanɩ-a wliaa ngokʋngwa 'dɩ 'mö
8-Ma pɩa la'a -bhlʋ 'bɩɛ 'lagbli'ie, wliaa ngokʋngwa -yɛ wa wlia sɔ-ɔ gʋ la-a -ma. 9-Lagɔzuzuko -bhlʋ ghlanʋa-a 'wʋ, 'n -Lagɔɔ 'ghlinɔ jua-a -gömö ngöna. 'N nganɔ jua-a 'lɩbha tenyi. 10-Lagɔzuzuko nɛ -bha wa de naa: “A 'na-a nganɩ -nɩ, 'tɩtɩɛ -tɩtɩ n laya -bha. Tɩtɩ la'a -ɩ ji-a -gwlɩ 'bhuo 'mʋnaa -bebe dlɩ zɔmö 'paa mɩ -bha. 11'Mɩ 'tɩtɩ mɩ-ɩ -yɛ-a naa, -zɩnɩ'ɩɛ dʋdʋ, -ma Davidɩɛ 'bhiglɔ'ɔ wa yɛ -ma a Puanyɔ gwalɩ 'bhë, 'mɔ -Lagɔ -sa-a -bha, mɔ-ɔ -yɛ-a Nyininyɔ. 12-Ɩɩ 'mö a jio-a jɩblɩnɩɛ mɩ-ɛ la'a: A -yɛ mö, 'gugbëëpë la'a -ɔ 'pɔ-a -yʋkʋpɩ yawʋ, -ɔ pö-ö -ma nɩmaa 'mölinɩkɩkɛ 'mö mɔ -bha.”
13-Lagɔzuzuko gba-a sa'a, -bha -gaganɩlɩ'ɩ 'n -Lagɔzuzuku -mɩmɩɛ -bebe jia-a -gömö bhlinɩ, ɩ-ɩ -Lagɔ bhlɩnɩ 'le, ɩ nɛ naa:
14“-Lagɔ -ʋ -wʋ-ɔ -ma -Lagɔtapɛ'ɛ 'nglɩ 'ghlimanɩ,
ʋ -gömöwlonɔ ji dʋdʋkpata'aa nɩkpa -wa nanʋ-a dlɩ yawʋɔ -gömö.”
Wliaa ngokʋngwa yɛ -ma Bɛtɩlɛmö mö
15-Lagɔzuzuku tɩ-ɛ -bha wliaa ngokʋngwa la'a, ɩ mö-ö -ma -Lagɔ 'wʋ nimï-ë, 'n wa ji-a 'dɩ 'nyɛnyɛnɩ, wa nɛ naa: “A-a -sɔ 'wʋ -a 'yɛ -ma Bɛtɩlɛmö mö, -ɩ -aa Nyininyɔ -Lagɔ -tuluanɩya-a la'a 'ji a 'kɩ yɩlɩ.” 16'Wʋ -gaganɩlɩ'ɩ 'n wa ji-e -ma mö. Wa nyini-e -ma, Mali -yɛ Zozɛfö 'sɔ glɩ -bha 'n wa jua-a -bha ghlɩ. 'Gugbëëpë pö -ma nɩmaa 'mölinɩkɩkɛ 'mö. 17Wa yɩlɩ-a 'gugbëëpë-ë, wɛlɩ -ɩ -Lagɔzuzuko gba la-a ɔ yɛ wa de 'n wa jiɩ-a -sa. 18Nɩkpa bhuo -wa wliaa ngokʋngwa -sanɩ-a 'dɩ, wa 'nʋɩ-a ngli ɩ mönʋa -bha. 19Dlɩ zɔmö Mali zʋnʋ-a 'mɩ wɛlɩ la'a yɛ, ɔ -yɛ -bha glɩ 'n ɔ pɩ-a dlɩ 'wʋ 'kɔmʋʋ. 20'N wliaa ngokʋngwa ji-a nimï mö. -Ɩ la'a wa yɩlɩ-a, sa 'bhë -Lagɔzuzuko gbɩ la-a 'wʋ ɩ 'wlenɩ-aa yɛ, wa-a -Lagɔɔ 'nglɩ 'ghlimanɩ 'le 'n wa ji-a mö.
21'Ylɩ -ngbɔtazlɩ -ɛɛ 'mö wa ji la-a 'guo zɔmö 'wʋ -dɩ-ɛ, 'n ɛ ji-a nyini. Wa -dɩ-a ɔ zɔmö 'wʋ 'bhë, 'n wa jio-a 'nglɩ 'pa. La Mali 'nɩ-ɛ -bhla ɔ nɩkplako yɩlɩ, Zezwinglɩ -ɩ -Lagɔzuzuko nʋ la-a ɔ 'pɔ 'mɩ wa 'pɔ -bha.
Wa yɛ Zezwi -ma -Lagɔbudu 'kadʋ 'mö tulua kwla'a mö
22-Mɩ la'a 'plɩ-a 'bhë-ë, wa -yɛ 'gu gwalɩ sa Moyizɩɛ gbö nʋ la-a wa nʋ, wa 'yɛ -bha -Lagɔɔ 'ji 'klʋ 'wlawla zʋ, 'n Zozɛfö -yɛ Mali 'sɔɔ -sɩbhanʋde ji-a nyini. 'N wa -yɛ 'gu 'sɔ ji-e -ma Zelwizalɛmö mö, wa 'kɔ -Lagɔ 'ji tuluanɩɛ yɛ. 23-Lagɔɔ gbö mɩ-ɩ gba-a naa: 'Wʋkpɩanɩnyɩbhɛlɩgwie 'bhuo wa 'nyʋa -Lagɔ 'ye. 24'Mɩ gbö mɩ-ɩ gba 'yɛ-a naa: Wa bʋbɔnʋ 'gblɩa 'sɔ, ɛ nɩ mɩ-ɩ glɩnɩ -kpakʋɩ 'sɔ, 'n wa ji-a -sɩbha nʋ kwla'a mö.
Simeɔ yɛ Zezwie -gbëëpë yɩlɩ
25-Ma Zelwizalɛmö nɩkpɛ -bhlʋ -wʋ la-a -ma, ɔ nglɩ-ɩ -yɛ-a Simeɔ, -Lagɔnɩkpɛ -ɔ zʋ-ɔ -bha -Lagɔ tenyi 'mɔ ɔ glɩnɩ -bha. Puanyɔ -ɔ -Lagɔ -sa-a -bha, ɔ jijie ɔ -wʋ la-a 'yɛ-a -nɩ -kʋ 'le. 'N Zuzu 'Wlawla -wʋɔ la-a -gömö. 26Mʋ-ʋ 'nyɔ-a 'dɩ naa, Puanyɔ -ɔ -Lagɔ -sa-a -bha, ɔ 'na 'kɔ yɩlɩ 'bhë ɔ 'yɛ-a tlɩ. 27Zuzu 'Wlawla nyɛ-a Simeɔ 'dɩ naa, ɔ mö -ma -Lagɔbudu 'kadʋ 'mö, 'n ɔ ji-e -ma mö. Ɔ glɩ -ma 'n Zezwie -lowlengwa -nyɔɔ ji-e -ma mö, sa -Lagɔɔ gbö nʋ la-a wa nʋ ɔ de wa 'kɩ nʋɔ yɛ. 28Simeɔ yɩlɩ-a 'gu 'n ɔ jio-a 'wʋ 'libhï. 'N ɔ ji-a -Lagɔ bhalɩ. Ɔ nɛ naa:
29“-Atʋ -Lagɔ, -na dlɩɛ 'wʋtamanɩwɛlɩ -n gba la-a na de,
ɩ yɛ 'wʋ 'wlenɩ 'bhë.
Na dlɩ yɛ-a 'mö 'mö ji 'bhëë yɛ,
-sɩka'a-a 'mö n -yɛ tlɩ ɩ -nanɩ'ɩ dlɩ yawʋ.
30-Wʋʋ yɛ-a, na 'jie 'sɔ -kpɔ yɛ -na 'pʋpʋɛ yɩlɩ 'bhë.
31'Mɛ 'pʋpʋɛ la'a -n -la-a yɛ,
'pɩnɩkpa 'bhuo 'kɛ yɩlɩɛ yɛ.
32-Gwlɩ 'bhuo ɛ ji-a -gömö ngönaa.
Izlayɛlɩɛ -zakpa -n -sa-a -bha, a 'nglɩ 'yɛ mö.”
33Simeɔ gba-a sa'a 'guo -gömögbʋ, ɔ -tɩbha -yɛ ɔ -da 'sɔ ngli ɩ mönʋa -bha. 34'N Simeɔ jua-a 'nyu ngwla, 'bhë ɔ nɛ -bha -ɔ -da Malie de naa: “Gu la'a -ɔ -Lagɔ -sa-a la'a -bha, ɔ yɛ Izlayɛlɩɛ nɩkpaa -bɛ ji-a -Lagɔ jɩblɩnɩɛ, 'bhë ɔ yɛ -mʋmʋaa -bɛ ji 'yɛ-a -Lagɔ -gömö panɩɛ wa 'yɛ 'mʋnɔ. Ɔ wɛlɩ -ɩ 'bhönɩ-ɛ -ma -Lagɔ 'wʋ, -ma nɩkpaa -bɛ jiɩ-a 'sunʋɔ. 35Ɩ yɛ -nmö Malie -nɩ-ɛ, ngazɩ 'kadɛ -jimö-a 'lɩbhaa, -na dlɩ-ɩ ji-a 'cɩla tenyi, nɩkpa -bebee dlɩpapʋ 'yɛ zɩkpa pönɩɛ yɛ.”
-Lagɔɔ 'mögbanɩnglɔ Anɩ yɛ -Lagɔ bhlɩnɩ
36-Lagɔɔ 'mögbanɩnglɔ -bhlʋ -wʋ la 'yɛ-ɛ -ma Zelwizalɛmö, 'mɔ wa la-a Anɩ. -Glɩgbɔ wa la-a Azɛlɩɛ -glɩgbɔ 'jie nɩkpɛ -bhlʋ wa la-a Faniɛlɩ, ɔ gu la -bha. 'Mɔ nglɔ la'a -gɔ ɔ 'gɔ-ɔ la-a tenyi. La ɔ -wʋ la-a -gbɔta 'wʋ ɔ'ɔ la-a nyɩbhɛlʋ -ji 'luwli ɔ kwa-a, ɔ ka -bha ɔ yawʋ 'ylʋbö -ngbisɔ 'n 'luwli ji-a tlɩ. 37Ɔ 'luwli tlɩ-a ɔ'ɔ-a 'mö ghlɩ -mɩmɛ mö 'n ɔ ji-a gɔ, 'n ɔ ji-a 'ylʋböö gwlɩ -mʋna 'ylʋbö -mʋna ghlɩ. -Ma -Lagɔbudu 'kadʋɔ -kʋkwa 'mö ɔ glɩnɩ la -bha. Sa zlɩ zɩ-a sa sɛ julu-a, -sɩbha ɔ bʋbɔ-a -Lagɔ, 'n ɔ sʋ-a lɔlɔ 'n ɔ pa-a -Lagɔ -bɛlɩ. 38Zezwie -lowlengwa -nyɔɔ -ma -Lagɔbudu'u, 'n nglɔ la'a ji-e -bha ghlanɩ. Ɔ yɩlɩ-a Zezwi 'n ɔ ji-a ɔ yɛ -Lagɔ bhalɩ. Nɩkpa la'a 'bhuo, zlɩ -ɛɛ 'mö -Lagɔ ji-a Zelwizalɛmöö nɩkpa gïyikwla 'mö -saa, -wa -wʋɛ la-a -kʋnʋ 'le-e, 'n ɔ jua-a Zezwie 'dɩ -sanɩ.
Zezwie -lowlengwa yɛ -ma Nazalɛtɩ nimï mö
39-Ɩ la'a 'bhuo -ɩ -Lagɔɔ gbö nʋ la-a wa nʋ, wa bhɩɩa-a 'ji 'bhë-ë, Zozɛfö -yɛ Mali 'sɔ -su 'gu 'n wa ji-e -ma Galilee dʋdʋ -gömö nimï mö. Nazalɛtɩɛ -glɔ -ʋʋ 'mö wa glɩ la-a, -ma wa mö-a nimï. 40-Ma wa glɩ-a, 'gu 'ghlimanɩ yaa, ɔ yɛmanɩ 'ji yaa, -ma -Lagɔwɛlɩ 'mö ɔ gbajinɔ zumanɩ yaa, 'n -Lagɔɔ 'nyupalɩ -wʋɔ 'yɛ-a -gömö.
Zezwi ka 'ylʋbö kugbïa 'sɔ ɔ yɛ -ma -Lagɔbudu 'kadʋ 'mö mö
41Sa 'ylʋba bhɩa-a, 'zwiföaa 'pɩpɩ 'kadɛ wa la-a gïyikwlaa 'möwlʋpɩpɩ ɛ 'bhlibhli yɛ Zezwie -lowlengwa mö-ö -ma Zelwizalɛmö.
42Zezwi ghlɩ-a 'ylʋbö kugbïa 'sɔ, wa -wʋɛ-a 'bhlie mö 'le 'n ɔ -nyʋa 'sɔ ji-a mö. 43Wa bhɩa-a 'bhlibhlie 'ji, 'n wa ji-a 'wʋ -sɔ wa 'yɛ -ma Nazalɛtɩ nimï möö yɛ. Zezwie -nɩ, -ma Zelwizalɛmö ɔ tʋ-ʋ -bha. Ɔ -tɩbha -yɛ ɔ -da 'sɔ 'nɩ-ɛ sɛ jɩblɩnɩ, 'n wa ji-a 'yuogblʋ 'wʋ 'libhï. 44Wa -tɔnʋ la -ma wa 'yuobhlingwa gla'a ɔ -wʋ la, 'n wa ji-a 'ylɩ -bhlʋ 'mö namönɩ, 'n sɛ ji-a julu. Wa 'nɩɔ 'mö-a yɩlɩ 'le -wʋ, 'n wa ji-e -ma wa nyʋa -yɛ wa -jijingwa 'sɔ gla'a ɔ 'namanamɩɛ tɛ-ɛ. 45Wa 'nɩɔ-ɔ yɩlɩɛ yɛ, 'n wa ji-e -ma Zelwizalɛmö nimï mö wa 'kɔ -ma 'namanɩ. 46'Ylɩɛ tazlɩ 'mö, 'n wa jio-o -ma -Lagɔbudu 'kadʋ 'mö ghlɩ, ɔ glɩ -ma -Lagɔɔ gböö nglipangwa nyɩdɩ. Wa -yɛ gba 'n ɔ pönʋa-a 'yukwli, 'n ɔ jɩbhʋa 'yɛ-a ngli. 47Nɩkpa la'a 'bhuo -wa 'nʋ-a ɔ 'mösanɩwɛlɩ, ɔ gbʋjijie -yɛ ɔ wɛlɩɛ -gömösasʋ 'sɔ ngli ɩ mönʋa -bha. 48Ɔ -lowlengwa yɩlɩɔ-a, wa 'sɔ -kpɔ ngli-i mönʋa -bha. Ɔ -da nɛ -bha ɔ de naa: “Na 'gu, 'manɩli -n -nʋya-a sa'a 'ji 'nɩ? Yie, n -yɛ -na -tɩbha 'sɔ -a -wʋmö-a 'nama 'le -aa dlɩa-a sa'a -kɔngʋ.” 49Ɔ gba-a sa'a Zezwi nɛ naa: “'Manɩɛ 'bhëë yɛ a wʋ'ʋ la-a -sɩbha 'nama 'le 'nɩ? A'a sɛ -ji naa na -Tɩbha -Lagɔɔ libhoo gbʋ-ʋ wʋ'ʋ-a pla 'le tenyi?” 50Ɔ gba-a -ɩ la'a, ɔ -lowlengwa 'nɩɩ-ɩ 'mö 'nʋ. 51'N ɔ -nyʋa 'sɔ ji-e -ma Nazalɛtɩ nimï mö, 'n ɔ zʋa-a -bha 'kɔmʋʋ. Malie -nɩ 'mɩ -li la'a 'bhuo dlɩ zɔmö ɔ zʋnʋɩ-a yɛ.
52Wa glɩ -ma Nazalɛtɩ 'n Zezwi 'ghlimanɩ -bha, 'n ɔ gbajinɔ zumanɩ -bha. 'N ɔ nʋnʋli -bhï-a -Lagɔ -yɛ nɩkpa 'sɔ 'mʋna 'wʋ.
Currently Selected:
LWIKÖÖ 'BƆGƲ 2: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
