LWIKÖÖ 'BƆGƲ 3
3
Za Badizɩ yɛ -Lagɔlibho tɛ-ɛ
1-2Zakalie 'gu Za glɩ -bhla -ma 'mïsekpa 'klʋ 'n -Lagɔ jio-a tia. -Bhaa do'o, dʋdʋnyininyɔ 'kadɔ wa la-a Tibɛlɩ, ɔ nyininyiniee 'ylʋbö kugbïa -ngbï -la mö la-a -sɩbha. Pɔsɩ Pilatɩ glɩnɩ Zwidee dʋdʋ -gömöö -gwlɩnyininyɔ 'kadɔ, Elodɩ nyini Galilee dʋdʋ, ɔ -dagu Filipö nyini -nɩ Yitilee dʋdʋ -yɛ Tlakonɩtɩɛ dʋdʋ 'sɔ. Lizaniasɩɛ -nɩ-ɛ, dʋdʋ -mʋ wa la-a Abilɛnɩ, 'mʋ ɔ nyini la-a -nɩ. Nɩkpa wa la-a Anɩ -yɛ Kayifö 'sɔ mʋa-a glɩnɩ la-a 'zwiföaa -Lagɔbʋbɔngwa 'kadɩ. -Bhaa do'o -Lagɔ tia-a Za.
3'N Za ji-a 'wʋ -sɔ, 'nyi wa la-a Zludɛ, 'n ɔ ji-a ɛ yawʋɔ -gwlɩ bie mö. 'N ɔ gba-a -bha nɩkpa 'bhuoo de naa: “A ligba a 'yɛ a 'jinyloli cɛ 'mö -sa. 'Bhë a 'yɛ ji n 'kaya badize, -Lagɔ 'yɛ a 'jinylolie gbʋ 'ji 'tatinɩ.” 4Zaa yɛ -Lagɔɔ 'mögbanɩnyɔ Ezayi 'cɛlɩ-ɛ sa'a -ma ɔ -Lagɔbɔgʋ 'mö naa:
“Nɩkpɛ -bhlʋ kpö-ö -ma 'mïsekpa 'klʋ 'mö,
ɔ nɛ naa: A -sa -aa Nyininyɔɔ 'yuogblʋɩ,
a slɛmanɩɩ 'mö ɔ-ɔ ji 'le.
5A 'su 'bhʋkɔ 'bhuo 'wʋ,
a nyinianɩ -gɔgɔgbɩ 'bhuo yɛ,
a slɛmanɩ 'mökikinɩyuogblʋɩ 'mö,
a mlianɩ pʋpʋɔ 'wʋkayuogblʋɩ 'wʋ.
6-Bhaa do'o 'pʋpʋɛ -Lagɔ -la-a yɛ,
nɩkpa bhuo-o jiɛ-a yɩlɩɛ.”
7'N nɩkpaa -zakpöö -bebe ji-e -bha Za ghlɩ ɔ 'kʋa badizee yɛ. Ɔ nɛ -bha wa de naa: “'Mʋtɩmabhönɩkpayi, -Lagɔɔ -zijle 'kada -aa de-e -wʋ-a nyini 'le, -mɔ 'paya-a 'nagö dlɩ'ɩ naa a fitonʋa ngli 'nɩ? 8A nʋ -li la'a -ɩ tulua naa a yɛ ligba a yɛ a 'jinyloli cɛ 'mö -sa 'bhë. A'a 'pa dlɩ -nɩ naa Ablaamöö ngëyi a glɩnɩ-aa yɛ -ɩ la'a 'nɩya-a 'wʋ yɩlɩ -nɩ. Sa'a n gba-a sa'a a de naa: Tɩkpaku a jɩnɩ-ɛ -la 'wʋ, -Lagɔ bhɛlɩ ʋ 'kɩ 'wʋ 'libhï ʋ 'kɩ Ablaamöö ngëyi 'wʋ zʋa. 9A jɩblɩnɩ sɛ naa wa yɛ 'gbïpa -bha swie gu yawʋ sɛ zʋ 'bhë wa 'kɩ 'klaa yɛ, swi la'a -ɩ 'nɩ tlʋ-a 'bhïë bhï, glu wa jiɩ-a 'klanɩɛ wa 'kɩ sia.”
-Ɩ tulua naa nɩkpɛ yɛ ɔ dlɩ 'mö 'bhɩla
10'N wa jio-a ngli 'jɩbha naa: “Ɩ -yɛ sa'a 'mö -wʋ sa -a ji-e 'mö-a zʋɔ 'nɩ?” 11Ɔ nɛ naa: “-Ɔ -yɛ -banɩ 'sɔ -ka, -mɔ 'nɩ-a -lu -ka ɔ 'nyɔ -bana -bhlʋ. -Ɔ -yɛ lili -ka ɔ -dlinɩɩ 'mö -mɔ 'nɩ-a -lu -ka ɔ 'kɔ 'nyɛ.”
12Nɩkpa -wa ghlɩ-ɛ -sɩbha -bha Za ɔ 'kʋa badizee yɛ, -ma wa gla'aa lepoo mëniköbhangwa -wʋ la-a -ma, wa nɛ naa: “-Abhitɩbha, sa -a ji-a -nɩ zʋɔ 'nɩ?” 13Ɔ nɛ -bha wa de naa: “Lepoo mëni la'a wa nʋ-a a köbha, sa ɛ -di-a 'wʋ a köbhɛ -sɩbha. A 'na-a 'pɛ -gömö -nɩ.”
14'N 'slʋja jio-a -nɩ ngli 'jɩbha, wa nɛ: “-Abhaa -nɩ 'na-a? Sa -a ji-a -nɩ zʋɔ nɩ?” Ɔ nɛ -bha wa de naa: “A 'na-a köbha nɩkpɛ -glaswɩ'ɩ -nɩ, a 'na-a li nɩkpɛ -bi 'wliyawʋ -nɩ, a 'pɛnɩmëni playa 'ji.”
15Nɩkpa 'bhuo, Puanyɔ -ɔ -Lagɔ -sa-a -bha ɔ jijie wa -wʋ la-a -kʋ 'lee yɛ, 'n wa pa-a dlɩ naa: “Za -la, ɛ'ɛ -lɛ la'a -aa Puanyɔ mɔ-ɔ?” 16-Sɩbha wa -wʋ-a ngli 'jɩbhajɩbhanɩ 'lee yɛ, Za nɛ -bha wa 'bhuo -kpöö de naa: “-Amöö -nɩ-ɛ, 'nyu nya n wʋya na-a badizenɩ 'le. Nɩkpɛ -ɔ -ga-a ma na nimï, n -nyɔɔ 'sɔ 'nɩ mlinɩ, ɔ 'tɛ-ɛ 'mö ɔ zi'i. N 'yɛ sɛ nyinie 'bhëë 'fʋ n 'yɛ ɔ 'sikplie 'likpï bulonʋ n 'nɩɩ 'wʋ -ngwa. Ɔ -yɛ -nɩ ji-e, Zuzu 'Wlawla -yɛ -kosu 'sɔ ɔ jiya-a badizenɩɛ. 17Ɔ -su ɔ bötɛ cɛ'ɛ ɔ 'yɛ 'sɩka 'mö pʋɔ yɛ, ɔ -kaa 'mö pʋ-ɔ, -a -yɛ-a -laa -la 'ma ɔ ji-a -digbagbʋ 'mö 'paa, 'sɩkaflɩɛ -nɩ-ɛ, -kosu -ʋ 'nɩ 'ngïmo-a -ma ʋ 'mö ɔ jiɩ-a 'paa.”
18Sa'a Za 'nyʋa-a sa'a 'tɩtɩɛ -tɩtɩ. 'N ɔ ji 'yɛ-a -bha 'dɩɛ 'mözʋkïbhï -mɩmɩɛ -bebe -gömö zʋ.
Elodɩ yɛ Za Badizɩ -die 'mö 'pa
19'Ylɩ -bhlʋ, 'n Za ji-e -ma -gwlɩnyininyɔ Elodɩ ghlɩ 'n ɔ jio-a 'dɩ 'nyɛ, ɔ nɛ naa: -Ɩ ɔ nʋ-a ɩ'ɩ 'ji nanɩ, ɔjɩɛ -daguo 'nglɔ Elodiadɩ ɔ -sɔɔ-a yawʋ 'ji ɩ -nyu -bha, ɔ 'jinyloli ɔ nʋ-a, -zu ɩ zu-a tenyi. 20Ɔ 'nyɔ-ɔ -sɩbha 'dɩ-ɛ, 'n Elodɩ ji-a ɔ 'jinyloli 'wʋ zumanɩ 'sɔ, -wʋʋ yɛ-a, ɔ köbha-a Za -die 'mö ɔ 'pɔ -bha.
Za yɛ Zezwi badize
21La do'o wa'a la-a -bhla Za -die 'mö 'pa, ɔ-ɔ nɩkpa badizee 'le 'n Zezwi jio-o -ma ghlɩ, 'n ɔ jio-a badize. Ɔ badize-a Zezwi, -mɔ la'a-a -Lagɔ -bɛlɩ 'pa 'le, 'n ngönagatapɛ ji-a ngo walɩ. 22'N Zuzu 'Wlawla jio-a -gömö sɛ 'sibhë, -n -kʋʋ yɩlɩ e -bhlee 'gblɩ. -Ma -Lagɔtapɛ'ɛ 'n wɛlɩ ji-e -ma 'bhönɩ ɩ nɛ naa: “Na dlɩɛ sɛkagu -n glɩnɩ -bha, 'jɩbha n -jɩbhamö-a tenyi tenyi.”
Zezwie -tɩbhatɩbhangwaa 'nglɩ mɩ-ɛ la'a
23Zezwi ka 'ylʋböö kugbïtaa swɩ 'n ɔ ji-a ɔ -Lagɔlibho tɛ-ɛ. 24-38-Aa -tɩbha -Lagɔ mʋ-ʋ -la-a Adaa 'pɩ. Adaa mɔ-ɔ gwalɩ-a Sɛtɩ, Sɛtɩ gwalɩ-a Enosɩ, Enosɩ gwalɩ-a Kayina, Kayina gwalɩ-a Maleleɛlɩ, Maleleɛlɩ gwalɩ-a Zalɛdɩ, Zalɛdɩ gwalɩ-a Enɔkö, Enɔkö gwalɩ-a Matusala, Matusala gwalɩ-a Lamɛkö, Lamɛkö gwalɩ-a Nowe, Nowe gwalɩ-a Sɛmö, Sɛmö gwalɩ-a Alɩfasadɩ, Alɩfasadɩ gwalɩ-a Kayinamö, Kayinamö gwalɩ-a Sala, Sala gwalɩ-a Ebɛlɩ, Ebɛlɩ gwalɩ-a Falɛkö, Falɛkö gwalɩ-a Ghlago, Ghlago gwalɩ-a Selukö, Selukö gwalɩ-a Nakɔlʋ, Nakɔlʋ gwalɩ-a Tala, Tala gwalɩ-a Ablaamö, Ablaamö gwalɩ-a Izakö, Izakö gwalɩ-a Zakɔpö, Zakɔpö gwalɩ-a Zwida, Zwida gwalɩ-a Falɛsɩ, Falɛsɩ gwalɩ-a Eslɔmö, Eslɔmö gwalɩ-a Alɩni, Alɩni gwalɩ-a Adɩmɛ, Adɩmɛ gwalɩ-a Aminadabö, Aminadabö gwalɩ-a Nasɔ, Nasɔ gwalɩ-a Sala, Sala gwalɩ-a Bɔzɩ, Bɔzɩ gwalɩ-a Zobɛdɩ, Zobɛdɩ gwalɩ-a Izayi, Izayi gwalɩ-a Davidɩ, Davidɩ gwalɩ-a Nata, Nata gwalɩ-a Matata, Matata gwalɩ-a Mena, Mena gwalɩ-a Melea, Melea gwalɩ-a Eliakimö, Eliakimö gwalɩ-a Zonamö, Zonamö gwalɩ-a Zozɛfö, Zozɛfö gwalɩ-a Zwida, Zwida gwalɩ-a Simeɔ, Simeɔ gwalɩ-a Levi, Levi gwalɩ-a Matatɩ, Matatɩ gwalɩ-a Zolimö, Zolimö gwalɩ-a Eliezɛlɩ, Eliezɛlɩ gwalɩ-a Zezwi, Zezwi gwalɩ-a Eli, Eli gwalɩ-a Elɩmadamö, Elɩmadamö gwalɩ-a Kosamö, Kosamö gwalɩ-a Adi, Adi gwalɩ-a Mɛlɩsi, Mɛlɩsi gwalɩ-a Neli, Neli gwalɩ-a Salasɩɛlɩ, Salasɩɛlɩ gwalɩ-a Zolobabɛlɩ, Zolobabɛlɩ gwalɩ-a Ghleza, Ghleza gwalɩ-a Zoana, Zoana gwalɩ-a Zoda, Zoda gwalɩ-a Zozɛkö, Zozɛkö gwalɩ-a Semɛ, Semɛ gwalɩ-a Matatiasɩ, Matatiasɩ gwalɩ-a Matɩ, Matɩ gwalɩ-a Nagayi, Nagayi gwalɩ-a Esɩli, Esɩli gwalɩ-a Naɔmö, Naɔmö gwalɩ-a Amɔsɩ, Amɔsɩ gwalɩ-a Matatiasɩ, Matatiasɩ gwalɩ-a Zozɛfö, Zozɛfö gwalɩ-a Zanayi, Zanayi gwalɩ-a Mɛlɩki, Mɛlɩki gwalɩ-a Levi, Levi gwalɩ-a Matatɩ, Matatɩ gwalɩ-a Zozɛföö -tɩbha Eli 'n Eli ji-a Zozɛfö gwalɩ. 'Mɔ Zozɛfö la'a 'mɔ wa -tɔnʋ-ɔ la'a Zezwie -tɩbha.
Currently Selected:
LWIKÖÖ 'BƆGƲ 3: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
