LWIKÖÖ 'BƆGƲ 7
7
Zezwi yɛ 'slʋjaa 'bhitɩbha -bhlʋɔ nyɩgbajʋlʋ göpö
1Zezwi gba-a wɛlɩ la'a 'bhuo nɩkpaa de 'bhë-ë, 'n ɔ ji-a 'wʋ -sɔ, 'n ɔ ji-e -ma Kapɛnaɔmö mö. 2-Ma Kapɛnaɔmö, 'slʋjaa 'bhitɩbha -bhlʋ -wʋ la-a -ma, ɔ nyɩgbajʋlʋ -bhlʋ kɔ la-a dlɩ yɛ tenyi, 'mɔ gu -wʋ la-a 'lɩbha 'le, -bha tʋ-ʋ 'wʋ -sɛ ɔ 'yɛ tlɩ. 3Ɔ 'nʋ-a Zezwie 'dɩ-ɛ, 'n ɔ jio-a 'zwiföaa 'kadɩ 'wʋ tia, wa 'yɛ Zezwi -bɛlɩ 'pa ɔ 'yɛ ji, ɔ 'yɛ ɔ nyɩgbajʋlʋ göpö. 4'N nɩkpa la'a ji-a mö, wa ghlɩ-ɛ -ma Zezwi, 'n wa jio-a nɩkpɛɛ 'nglɩ 'mö -bɛlɩ 'pa, wa nɛ naa: “-A -bhiamö yawʋ nɩkpɛ -la cɛ ɔ -ga -bha, jio 'wʋ. 5-Abha 'zwiföa 'jɩbha ɔ -jɩbhaya -bha, -aa -Lagɔbudu ɔ 'sɩbha -bha.” 6Wa gba-a sa'a, 'n Zezwi -nyʋa 'sɔ ji-a mö. Wa 'yɛ -bha 'slʋjeyie 'ligbë yawʋ nyinie mö, 'n 'slʋjeyi ji-a ɔ 'tʋalɩbhangwa tia, 'n wa ji-a Zezwi 'yuo mö, ɔ nɛ naa: “A -yɛ mö a 'nyɛ Nyininyɔ 'dɩ naa: -N 'na-a yʋlʋa kpakpaswɩ'ɩ -najɩ -nɩ, -n 'yɛ ma'a na 'ligbë'ë pla n 'nɩɩ 'wʋ -ngwa. 7Wʋ yɛ na 'bhë 'nɩ-a 'wʋ -sɔ n 'yɛ -ma -na 'ji 'klʋ mö. Ɩ yɛ gba wɛlɩköbhë -bhlʋ 'tɩ na nyɩgbajʋlʋ 'yɛ 'pʋ. 8-Wʋʋ yɛ-a, na 'bhë n -ji nyininyinie bhle'e, la n glɩ-ɛ la'a, n ka 'bhitɩbhangwa, 'n n nyini 'yɛ-ɛ na-a -mʋmʋa, na -lʋa n nyini-a, n -yɛ -bhlʋ 'dɩ 'nyɛ naa mö, mö ɔ mö-a bhleemö, n -yɛ -mʋmɔ 'dɩ 'nyɛ naa: Nʋ sa'a, -sɩbha ɔ nʋ -bha.”
9'N wa ji-e -sɩbha Zezwi 'dɩ kwa, ɔ 'nʋɩ-a, 'n ngli jio-a möna, ɔ gö-a nɩkpa -wa -ganɩɔ la-a 'ji, ɔ nɛ -bha wa de naa: “Sa nɩkpɛ -la ka-a -Lagɔ dlɩ 'wʋ, -ma Izlayɛlɩɛ ngëyi 'mö n'n -lɛ -bhla -sɩbhaa nɩkpɛ yɩlɩ.” 10Zezwi gba-a sa'a, 'n 'slʋjeyie tiatiangwa ji-a 'wlu 'mö 'bhɩla 'n wa ji-e -ma ɔ 'ligbë'ë nimï mö. Wa nyini-e -ma, ɔ nyɩgbajʋlʋ -ɔ gu -wʋ la-a 'lɩbha 'le, ɔ 'pʋɔ 'n wa jio-o -bha ghlɩ.
Zezwi yɛ 'kuzlenglɔɔ nyɩbhɛlʋgu ɔ tlɩ la-a gala
11'Ylɩ -bhlʋ 'plɩ-a, 'gbë -bhlʋ wa la-a Nayinɩ, 'n Zezwi ji-e -ma mö. Ɔ -yɛ ɔ 'wʋbhlinɩngwa -yɛ nɩkpaa -bebe -mʋmʋa 'sɔ namö 'n wa ji-a mö. 12Wa nyini-e -bha 'gbë ngo'o, 'n wa -yɛ -gazɛzʋngwa 'sɔ ji-a gbënɩ. -Ma gbë la'a 'möö 'kuzlenglɔ -bhlʋɔ nyɩbhɛlʋgu tlɩ la -bha, -maa nɩkpaa -bebe -yɛ 'kuzlenglɔ 'sɔ namö 'n wa -wʋ-ɔ -ma lesikpa yawʋ mö 'le. 13Zezwi yɩlɩɔ-a, 'n ngazɩ jio-a ɔ 'bɩ 'mö 'lɩbha tenyi. 'N ɔ jio-a dɛpö, ɔ nɛ: “-Gɔ 'wʋ, -n 'na-a wi -nɩ.” 14Ɔ gba-a sa'a 'bhë, 'n ɔ ji-a -gazɛsungwa yawʋ nyini. Ɔ zʋ-a -gazɛlokwli cɛ, -wa -swie la-a 'n wa ji-a 'nɩgbö, ɔ nɛ: “Nyɩgbɔtagu, -nmö n nyɛ-a 'dɩ, -sɔ 'wʋ!” 15Zezwi gba-a sa'a, nyɩgbɔtagu glɩnɩ-a go 'n ɔ ji-a gbʋ -dɩ, 'n Zezwi jio-a ɔ -da 'ye 'nyɛ. 16'N nɩkpa 'bhuo -kakö jua-a köbha, wa-a la'a -Lagɔɔ 'nglɩ 'ghlimanɩ 'le, wa nɛ: “-Lagɔɔ 'mögbanɩnyɔ 'kadɔ -kaya 'gbamö ghlanɩ 'bhë. Ngëyi -Lagɔ -sa la-a -bha ʋ kɛ 'wʋ ji 'bhë.” 17'N Zezwie 'dɩɛ dɩ ji-e -ma Zwidee dʋdʋ -yɛ -gwlɩ -mɩbha 'bhuo 'sɔɔ -gömö ba.
Za Badizɩ yɛ -ma Zezwie 'bhɛyɩ nɩkpa tia
18-Ɩ la'a 'bhuo -ɩ 'plɩ-a, 'n Za Badizɩɛ 'wʋbhlinɩngwa jio-a -sanɩ. 19'N ɔ ji-e -ma wa gla'aa nɩkpa 'sɔ wɔzɩ, 'n ɔ jua-a -ma Zezwie 'bhɛyɩ tia, ɔ nɛ: “A -yɛ mö-ö, a 'jɩbhɔ ngli naa, Puanyɔ -a -wʋ la-a -kʋnʋ 'le, mɔ -n glɩnɩ-a 'nɩɩ, bhlɩ'ɩ -a -kʋnʋ -mʋmɔ-a?” 20'N nɩkpa la'a ji-a mö, wa ghlɩ-ɛ -bha Zezwi, wa nɛ: “Za Badizɩ -tiaya -bha, ɔ nɛ -a -jɩbhamö ngli naa Puanyɔ -a -wʋ la-a -kʋnʋ 'le, mɔ -n glɩnɩ-a 'nɩɩ, bhlɩ'ɩ -a -kʋnʋ -mʋmɔ-a?” 21Wa gba-a sa'a, -bha -gaganɩlɩ'ɩ, 'n Zezwi ji-a guzungwaa -bebe göpö, 'n -wa ka la-a nɩmalɩ ji-a 'pʋ, -mʋa ka-a 'jinylozuzuku -gömö 'n ɔ jua-a -gömö kpëti, 'n ɔ ji-a 'lɔkpɔlɔkpɔngwaa 'jie kalɩ. 22Ɔ nɛ -bha Za Badizɩɛ tiatiangwaa de naa: “A -yɛ mö -ɩ a yɩlɩ-ɛ la'a, a -sanɩɩ Za Badizɩ. 'Lɔkpɔlɔkpɔngwaa 'jie-e 'kaluo 'le, bhɩgbökangwa-a 'jinanɩswɩ'ɩ namö 'le, 'lalʋlɩbhangwa-a 'pʋ 'le, 'yukwliagbʋgbɔkangwa-a 'nʋ 'le, tlɩtlɩngwa-a galɔ 'le, -Lagɔɔ 'tɩtɩɛ -tɩtɩ-ɛ ngazɩngwa ghlɩ 'le. A -yɛ mö-ö, a 'nyɛ -ɩ la'a bhuo 'tɩtɩ Za. 23Ɩ yɛ -ɔ ka'a dlɩ 'wʋ -ka -ɔ nɩ'ɩ -gömö panɩ, 'mʋna 'lɩbhɔ.”
Sa Zezwi gba-a Za Badizɩɛ gbʋ
24Zezwi gba-a sa'a Za Badizɩɛ tiatiangwaa de, 'n wa ji-a nimï mö. Wa mö-a 'bhë-ë, nɩkpa -wa su la-a -bha, 'n ɔ jua-a Za Badizɩɛ 'dɩ -sanɩ, ɔ nɛ naa: “'Manɩ a 'bhö-ö bhe -ma 'mïsekpa 'klʋ jɩla kwla'a 'nɩ? 'Gakova nyɔmʋ -wʋ-a 'mö zika 'le ma-a 'nɩ-ɩ? 25'Manɩ a 'bhö-ö bhe -ma jɩla kwla'a 'nɩ? Nɩkpɛ -ɔ ka-a wʋlʋwʋlʋbanɩ 'mö mɔ-a 'nɩ-ɩ? A -ji sɛ naa -wa la'a -wa ka-a wʋlʋwʋlʋbanɩ, -wa ka-a lɩ, -ma wʋlʋwʋlʋbudi'i wa glɩ -bha. 26A -sanɩ'ɩ 'dɩ, 'manɩ a 'bhö-ö -ma jɩlaa 'nɩ? -Lagɔɔ 'mögbanɩnyɔ-a 'nɩ-ɩ? Köön! Sa'a n gba-a sa'a naa, ɔ zi -Lagɔɔ 'mögbanɩnyɔɔ 'bhë 'wʋ. 27-Wʋʋ yɛ-a, Za a jɩnɩ-ɛ -la 'wʋ, ɔ yɛ wa 'cɛlɩ-ɛ -ma -Lagɔwɛlɩɛ 'bɔgʋ 'mö naa:
-Lagɔ nɛ -na 'dɩkwanyɔ n tia-a -ma -na 'yu,
ɔ 'yɛ -na 'yuogblʋ -sa.
28Sa'a n gba-a sa'a a de naa, ma'a 'pɩnɩkpa 'bhuoo gla'a, -ɔ 'yɛ 'ghli-i -ɔ 'yɛ Za Badizɩ 'wʋ zi ɔ'ɔ -bhlɩ. -Sɩbha ɩ -wʋ-a 'bhë-ë, -ma -Lagɔɔ nyininyinipɩ 'wʋ, -ɔɔ bhë-ë -yɛ-a -maa 'kikeyi mɔ-ɔ 'ghli-a mɔ-ɔ zi-a Za Badizɩ 'wʋ.
29-Wa la'a 'bhuo -wa 'nʋ-a Za Badizɩɛ wɛlɩ 'mö, wa -yɛ lepoo mëniköbhangwa 'sɔ -Lagɔ wa nglunʋ -bha, 'n wa ji-a wa 'jinyloli jɩblɩnɩ 'n wa jio-o -ma ghlɩ ɔ 'kʋa badizee yɛ. 30Falizɩɛ -yɛ -Lagɔɔ gböö nglipangwa 'sɔ 'nʋɩ-a, wa'a -lɛ nglu Za 'kʋa badize, wʋ yɛ -lie -li -Lagɔ ji la-a wa de nʋɔ wa'a -lɛ ɩ gbʋ nglu.
31-Sɩka'aa nɩkpa, -mʋa n 'kʋa bhe 'wʋ palɩ 'nɩ, -mʋa wa -nyʋa 'wlʋnʋ-a 'nɩ? 32E -bhlee gwie -wa -wʋ-a 'du 'mö 'bhli 'le 'mʋa wa glɩnɩ, mʋa-a nʋ wa ligwiee de naa, a yɛ -a bhlɩ-a -klɩmö 'bhë a'a -lɛ jɩ. -A -dɩ-a wijogu a'a -lɛ 'yɛ wi. 33-Wʋʋ yɛ-a, Za Badizɩ ji-a, ɔ'ɔ li lilie -lili, ɔ'ɔ 'nɩma nʋ. A yɩlɩɔ-a 'wʋ a nɛ: Nɩkpɛ -la 'jinylozuzuko ɔ ka-a -gömö. 34Nɩkpɛɛ 'Gu ji-a, ɔ li lilie -lili, 'n ɔ nɩma-a nʋ, a -kɔɔ 'wʋ yɩlɩ, 'n a nʋ-a: Nɩkpɛ -mɔ -la, lililibho -yɛ nʋnɩmalibho 'sɔɔ 'nyize ɔ ka -bha. Lepoo mëniköbhangwa -yɛ 'jinylolie nʋnʋngwa 'sɔɔ 'tʋalɩbha ɔ glɩnɩ -bha. 35Sa'a ɩ -wʋ-a 'bhë, -wa la'a -wa nglu-a ɔ wɛlɩ 'wʋ, mʋa-a 'jɩblɩnɩ-a -Lagɔɔ gbajinɔ.”
Zezwi yɛ 'jinylolie nʋnʋnglɔ -bhlʋɔ 'jinylolie gbʋ bhɩa
36'Ylɩ -bhlʋ, falizɩɛyi -bhlʋ wɔzɩ-a Zezwi ɔ -nyɔɔ 'sɔ 'yɛ lie yɛ. 'N Zezwi ji-e -ma nɩkpɛ la'aa 'ligbë'ë mö. Wa glɩ -bha lili go wa-a li 'le, 37'n 'nglɔ -bhlʋ ji-a ji. 'Mɔ nglɔ la'a, 'jinylolie nʋnʋnglɔ ɔ glɩnɩ -bha. Ɔ 'nʋ-ɔ naa, Zezwi-e -ma falizɩɛyi la'aa 'ligbë'ë li 'le, ɔ -su palɩfɛɛ 'kpla 'n ɔ jio-o -ma ghlɩ. 38Ɔ nyini-e -ma, -ma Zezwi nimï ɔ 'tʋnʋ-a 'wʋ, ɔ 'pa-a -bha ɔ kpli yawʋ -kokomunigbö glu, 'n ɔ ji-a wiwie tɛ-ɛ, 'n ɔ 'mɩɔ ji-e -bha Zezwie kpli -gömö sɛ 'suluo. Ɔ sɔnʋ-ɔ -bha ɔ nyuko nya, ɔ gblɩnɩ-a ɔ kpli-e, 'n ɔ jiɩ-a palɩfɛ 'pa. 39Falizɩɛyi -ɔ wɔzɩ la-a Zezwi lili yɛ, ɔ yɩlɩ-a nglɔ la'aa nʋnʋli 'wʋ-ɔ, ɔ nɛ -ma ɔ dlɩ zɔmö naa: “Nɩkpɛ -la -yɛ la -Lagɔɔ 'mögbanɩnyɔ glɩnɩ-ɛ, nglɔ -ɔ zʋ-ɔ -la ɔ kpli cɛ sa ɔ -wʋnʋ-a 'mö, sa ɔ glɩnɩ-a 'jinylolie nʋnʋnglɔ ɔ jiɩ la jɩblɩnɩ.” 40Ɔ -wʋɩ dlɩ 'wʋ 'pa 'le, 'n Zezwi ji-a gbʋ -dɩ, ɔ nɛ naa: “Simo, n ka wɛlɩköbhë -bhlʋ n 'ka -na de gba.” Simo nɛ: “-Abhitɩbha, gba.” 41Zezwi nɛ naa: “Nɩkpɛ -bhlʋ mɔ-ɔ 'pa-a nɩkpa 'sɔ gagbɩ. -Bhlʋ ka 'wlie gwlɩ -ngbï -ngbïë -gɔpö -ngbï, -mʋmɔ ka 'wlie gwlɩ 'sɔ 'wli kugbïa. 42Wa 'sɔ -kpɔ 'nɩ la mëni -ka wa 'yɛ gagbɩ la'a -saa yɛ, ɔ nɛ wa'a -sɛɛ 'kwla -nɩ. -Bha wa 'sɔɔ gla'a, -mɔ ji-a nɩkpɛ la'a 'jɩbhaa tenyi 'nɩ?” 43Simo nɛ: “N 'pa-a na-a dlɩ-ɛ, -ɔ ka la-a mëni -bebe 'wlumö, mɔ -bha.” Zezwi nɛ: “-Ɩ -n gba-a mɩ -bha.” 44Ɔ gö-a nglɔ la'a 'ji-e, ɔ nɛ -bha Simoo de naa: “-N jɩnɩ nglɔ la'a 'wʋ? N pla-a ma'a -na -budu'u, -n nɩ'ɩ-ɛ 'nyu 'nyɛ n 'yɛ kpli yawʋ 'pa, nglɔ la'a mɔ-ɔ suluo-o na kpli 'mɩɔ -gömö 'n ɔ jiɩ-a ɔ nyuko nya yawʋ sɔnʋ. 45-N nɩ'ɩ-ɛ gblɩnɩ, ɔ -yɛ la -nɩ ma'a pla la ɔ -wʋ la-a na kpli gblɩnɩ 'le -bha ɔ -wʋɩ-ɛ la'a gblɩnɩ 'le. 46-N nɩ'ɩ-ɛ 'kpö 'wliyawʋ 'pa, la ɔ -wʋ la-a na kpli palɩfɛ 'pa 'le -bha ɔ -wʋɩ-ɛ la'a 'pa 'le. 47Ɩ yɛ n gba-a -na de naa: Ɔ -Lagɔjɩbhajɩbhʋ 'kadʋ ɔ tuluaa yɛ -Lagɔ yɛ ɔ 'jinyloli -bebee gbʋ 'ji 'tatinɩ 'bhë. -Ɔ la'a -ɔ ka-a 'jinyloli 'kikie -ɩɩ gbʋ -Lagɔ 'tatinɩ-a 'ji-e, mɔ-ɔ tulua-a 'kikie 'wʋ ɔ -Lagɔjɩbhajɩbhʋ.” 48Zezwi gba-a sa'a 'bhë ɔ nɛ -bha 'nglɔɔ de naa: “-Na 'jinylolie gbʋ yɛ bhɩa 'bhë.” 49-Wa ɔ -nyʋa 'sɔ -wʋ la-a debhlʋ linɩ 'le wa nɛ -ma wa dlɩa zɔmö naa: “Nɩkpɛɛ -mɔ -la-a -ɔ bhɩa-a nɩkpaa 'jinylolie gbʋ 'nɩ?” 50Zezwi -ji wa dlɩpapʋɔ yɛ, ɔ nɛ -bha 'nglɔɔ de naa: “-Na dlɩwʋkakʋ -kamö pua 'bhë, sulu dlɩ yɛ n 'yɛ mö.”
Currently Selected:
LWIKÖÖ 'BƆGƲ 7: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
