LWIKÖÖ 'BƆGƲ 6
6
Sa Zezwi gba-a 'zwiföaa -gwlɛnɩzlɩɛ gbʋ
1 -Gwlɛnɩzlɩ -bhlʋ 'mö, Zezwi -yɛ ɔ 'wʋbhlinɩngwa 'sɔ, wa-a -ma 'lagbli'ie 'plɩnɩ 'le 'n ɔ 'wʋbhlinɩngwa kplanɩ-a lilie 'jʋ ghayɩ 'n wa 'titlinʋa-a cɛ'ɛ 'n wa li -bha. 2Falizɩɛ -mʋmʋa yɩlʋa-a, 'n wa jua-a ngli 'jɩbha naa: “-Ɩ -aa gbö nʋ la-a -a 'na-a nʋ -gwlɛnɩzlɩ -nɩ, 'manɩɛ yɛ a -wʋɩ bhe nʋ 'le 'nɩ?” 3Zezwi nɛ naa: “-Ma -Lagɔwɛlɩɛ 'bɔgʋ 'mö -ɩ 'cɛlɩɔ-ɔ -ma Davidɩɛ yɛ a 'nɩɩ-ɩ zɛlɩ 'nɩ-ɩ? La ɔ -yɛ ɔ namöngwa 'sɔ ngɔmʋ 'lɩbhʋa-a, 4sa ɔ pla-a -ma -Lagɔbudu'u 'n ɔ ji-a -Lagɔbʋbɔnʋfʋlo 'wʋ 'libhï 'n ɔ jiʋ-a li, 'n ɔ jiʋ 'yɛ-a ɔ namöngwa 'ye 'nyɛ wa 'kʋ lie yɛ. 'Mʋ -sɩbhaa 'fʋlo la'a, -aa gböö do'o, -Lagɔbʋbɔngwaa 'nyizee lililu la -bha. 'Mʋ Davidɩ -yɛ ɔ namöngwa 'sɔ li-e -sɩbha. 5Sa'a n gba 'mö-ö sa'a a de naa: Nɩkpɛɛ 'Guo 'bhë-ë nyini-a -gwlɛnɩzlɩ.”
Zezwi yɛ -gwlɛnɩzlɩ nɩkpɛ -bhlʋ göpö
6 -Gwlɛnɩzlɩ -mɩmɛɛ 'mö, 'n Zezwi ji-e -ma -Lagɔbudu'u mö 'n ɔ ji-a -Lagɔwɛlɩ ngli 'pa. -Ma -Lagɔbudu la'aa 'mö, nɩkpɛ -bhlʋ -wʋ la-a -ma, ɔ linɩkpɛsɔ -kɔtɩkpa -yɛ a 'yɛɔ la -bha. 7-Lagɔɔ gböö nglipangwa -yɛ falizɩɛ 'sɔ -wʋɔ la'a 'ji 'namanɩ 'le, 'n ɔ -yɛ nɩkpɛ la'a -gwlɛnɩzlɩ göpöö jie yɛ, wa 'kɔ gbasanyɔ la wa 'kɔ gbʋ 'wʋ kwa. 8Zezwi -ji -nɩ wa dlɩpapɩɛ yɛ, ɔ nɛ -bha nɩkpɛ -ɔɔ kɔtɩkpa 'yɛɔ la-aa de naa: “-Sɔ 'wʋ 'nɩgbö -la wa 'bhuoo nyɩdɩ yɛ.” 'N ɔ ji-a ghayɩ 'nɩgbönɩ. 9Zezwi nɛ -bha wa de naa: “Ngli n jɩbhaya-a naa: -Gwlɛnɩzlɩ, wa bhɛlɩ wa 'yɛ -lie -li nʋ 'nɩɩ 'jinyloli wa bhɛlɩ-a wa yɛ nʋɔ? Wa pua 'yɛ nɩkpɛ 'nɩɩ wa lɩbhɔ-a?” 10Zezwi 'jɩbhʋa-a sa'a ngli 'bhë, 'n ɔ ji-a wa 'bhuo -gömö yɩlɩ. Ɔ nɛ -bha nɩkpɛɛ de naa: “Plu na kɔtɩkpa 'mö.” 'N ɔ jia-a 'mö plu 'n a ji-a 'pʋ. 11Wa 'bhuo, 'kalɛ ɩ palʋa-a 'mlɩ tenyi. 'N wa ji-a 'wlu 'titanɩ, -ɩ wa ji-a Zezwi 'ji nʋɔ 'n wa ji-a ɩ yɩlɩ pla.
Zezwi yɛ ɔ tiatiangwa kugbïa 'sɔ -bha -sa
12-Mɩ la'a 'plɩ-a, 'n Zezwi ji-e -ma -gɔgɔgbʋ -bhlʋ 'klʋ mö. Ɔ-ɔ -Lagɔ -bɛlɩ 'pa 'le 'n zlɩ jio-o -ma zɩnɩ. 13Zlɩ zɩ-a, 'n ɔ ji-a ɔ 'wʋbhlinɩngwa wɔzɩ, 'n ɔ ji-e -ma wa gla'aa nɩkpa kugbïa 'sɔ -sa, 'mʋa ɔ la-a ɔ tiatiangwa. Wa nglɩ-ɛ la'a: 14Simo -ɔ Zezwi 'pa-a Piɛlɩ-ɛ, ɔ -dagu Adle-e, Zakö-ö, Za-a, Filipö-ö, Batlemi-e, 15Matie-e, Toma-a, nɩkpɛ wa la-a Alɩfee 'gu Zakö-ö, 'bhë Simo -ɔ glɩnɩ la-a -zakpa wa la-a zelɔtɩ 'möö nɩkpɛ. 16Nɩkpɛ -bhlʋ wa la-a Zakö, ɔ 'gu Zwidɩ-ɛ, 'bhë Zwida Isɩkaliɔtɩ -ɔ ji-a Zezwi -ma ɔ tʋngwa cɛ'ɛ 'pɛlʋ 'paa wa 'kɔ 'lɩbha.
17Zezwi -nyʋa 'sɔ kwli-a -gɔgɔgbʋ, 'n wa ji-a 'wʋmlinɩde nyini. Ɔ 'wʋbhlinɩngwa -yɛ nɩkpa -mʋmʋaa -bebe 'sɔ su -bha 'n wa jua-a -bha ghlɩ. Nɩkpa la'aa gla'aa -mʋmʋa 'bhönɩ -ma Zwidee dʋdʋ -gömö, -mʋmʋa 'bhönɩ Zelwizalɛmö, gïnyie -kʋkʋngɔyawʋɔ -gwlɩ wa la-a Tilɩ -yɛ Sidɔ 'sɔ -mʋmʋa 'bhönɩ -ma ɩ 'mö. 18Wa 'bhuo wa ji-e -sɩbha, wa 'yɛ Zezwi 'yukwli pönɩ, ɔ 'kʋa 'yɛ göpöö yɛ -bha. Nɩkpa -wa 'jinylozuzuku -wʋ la-a yʋlʋa 'le 'n wa ji-a 'pʋ. 19Nɩkpa 'bhuo 'jɩbha naa wa 'kɔ la cɛ zʋ. -Wʋʋ yɛ-a, -Lagɔɔ 'mötɛnɔ -wʋ-a Zezwi -gömöö yɛ, -wa -kɔɔ cɛ zʋ 'pʋ wa 'bhuo pʋ -bha.
Zezwi yɛ nɩkpa 'nyupalɩɛ -nyupalɩ -slʋnʋ
20Zezwi yɩlɩ-a ɔ 'wʋbhlinɩngwa -gömö ɔ nɛ: “Abha 'pʋangwa, 'mʋna 'lɩbhaya, -wʋʋ yɛ-a, abha ji-e -ma -Lagɔɔ nyininyinipɩ 'wʋ möö.
21Abha ngɔmʋ -wʋ-a -zɩnɩ'ɩ 'lɩbha 'le 'mʋna 'lɩbhaya, -wʋʋ yɛ-a, zʋma -yɛ ji a ji lʋ. Abha -wʋ-a -zɩnɩ'ɩ wi 'le 'mʋna 'lɩbhaya, -wʋʋ yɛ-a, zʋma -yɛ ji a ji nya.
22Nɩkpa kaya 'jɛbhɛlɩ, wa kaya wajɩ yawʋ kpëti, wa kaya 'jinylɔwɛlɩ gbanɩ, a 'nglɩ -yɛ 'ji nyimonʋ Nɩkpɛɛ 'Guo yɛ, 'mʋna 'lɩbhaya. 23-Sɩbha wa -lowlengwa nʋ la-a -Lagɔɔ 'mögbanɩngwa, ɩ yɛ wa kaya -sɩbha nʋ, 'mʋna 'lɩbhaya tenyi, -wʋʋ yɛ-a, a yʋlɔyʋlɔ yɛ -Lagɔ jiya-a -ma ʋ yawʋ -lie -lie -bebe 'nyɛɛ.
24Abha 'wʋlʋwʋlʋngwa, a nʋ ngazɩli, -wʋʋ yɛ-a, a yɛ-a 'mö -nɩ a dlɩpalɩde ghlɩ 'gamö 'bhë. 25Abha lʋ-a, a nʋ ngazɩli, -wʋʋ yɛ-a, ngɔmʋ-ʋ jiya-a 'lɩbhaa. Abha -wʋ-a -zɩnɩ'ɩ nya 'le a nʋ ngazɩli, -wʋʋ yɛ-a, ngazɩ jiya-a 'lɩbhaa 'n 'mɩɔ 'kaya-a 'ji kwli.
26Nɩkpa -yɛ a 'dɩɛ dɩ -sa 'le -wʋ, a nʋ ngazɩli, -wʋʋ yɛ-a, -benyido'oo yuongwa -wa la-a wajɩ -Lagɔɔ 'mögbanɩngwa, sa wa -lowlengwa sa la-a wa 'dɩɛ dɩ -sɩbha -bha.
Zezwi nɛ -wa nɩya 'jɩbha, a 'jɩbhʋa
27Abha wʋ'ʋ-ɔ la'a 'yukwli pönɩ 'le, sa'a n gba-a sa'a a de naa, a 'jɩbha a tʋngwa, a nʋ a 'jɛbhɛlɩngwa -lie -li 'ji. 28Nɩkpa kaya gwie zʋ, a ngʋnʋa 'nyu, nɩkpa kaya 'jinyloli 'ji nʋ-ɔ, a 'pa wa 'wlumö -Lagɔ -bɛlɩ. 29Nɩkpɛ -kamö 'yukwli wla, tuluanɩɔ -mɛbha 'ji ɔ 'yɛ -ma 'pa. Nɩkpɛ -kamö -na 'möpalokwi cɛ'ɛ -sa, -nn 'tʋtɔnʋɔ -na -bana cɛ'ɛ -nɩ. 30Nɩkpɛ -kamö 'jɩbhanɩ, 'nyɔ. Ɔ-ɔ -na -lu 'wʋ 'libhï -n 'na-a 'jɩbhanɩɔ ngli -nɩ. 31-Ɩ la'a a 'jɩbha-a nɩkpa 'kaya 'ji nʋ, a nʋa 'yɛ -nɩ 'ji. 32Sa'a n gba-a naa, nɩkpa -wa 'jɩbhaya-a a -yɛ wa 'nyize 'jɩbha, a 'na-a 'pa dlɩ -nɩ naa -Lagɔ jiya ɩ 'wlumö 'pɛnɩ -nɩ, 'jinylolie nʋnʋngwa, -wa 'jɩbhʋa-a 'mʋa wa 'jɩbha 'yɛ-a -nɩ 'gamö. 33-Wa -nʋya-a -lie -li 'ji, a -yɛ wa 'nyize lie -li 'ji nʋ, a 'na-a 'pa dlɩ -nɩ naa -Lagɔ jiya ɩ 'wlumö 'pɛnɩ -nɩ, 'jinylolie nʋnʋngwa -sɩbha wa nʋ 'yɛ-a -nɩ 'gamö. 34Nɩkpa -wa 'yɛ-a gagbɩ -sa a -yɛ wa 'nyize gagbɩ 'pa, a 'na-a 'pa dlɩ -nɩ naa -Lagɔ jiya ɩ 'wlumö 'pɛnɩ -nɩ. 'Jinylolie nʋnʋngwa, wa lijinylolie nʋnʋngwa wa pa-a gagbɩ wa 'kɩ 'kwla -saa yɛ. 35Wʋ yɛ n gba-a sa'a a de naa, a 'jɩbha a tʋngwa, a nʋa lie -li 'ji, a -yɛ nɩkpa gagbɩ 'pa, a 'na-a 'pa ɩ 'kwlasade dlɩ -nɩ, a -yɛ -sɩbha nʋ -Lagɔ jiya -lie -bɛ 'nyɛ, ʋ jiya ʋ 'gwiee gwie la, -wʋʋ yɛ-a, -Lagɔ cɛ ʋ -ga-a -bha nɩkpa -wa 'nɩ jɩblɩnɩ-a ʋ -lie -li -yɛ nyanɩklangwa 'sɔɔ de.
36-Ɩ la'aa yɛ sa a -Tɩbha -Lagɔ pa-a nɩkpa 'bhuoo de ngazɩdlɩ-ɛ, a 'pa 'yɛ -sɩbha -nɩ wa de ngazɩdlɩ.
A 'na-a tu -mʋmʋa -nɩ
37A 'na-a tu a linɩkpa -nɩ, -Lagɔ jiya-a 'yɛ -nɩ tu. A 'na-a nʋ nɩkpaa de -nɩ naa, a 'jinylolie gbʋ 'na 'kaya -gömö 'bhö-ö -nɩ, -Lagɔ ji-e -sɩbha a de nʋ. A 'tatinɩ a linɩkpaa 'jinylolie gbʋ 'ji, 'mɩ -Lagɔ ji a -nɩ -lie gbʋ 'ji 'tatinɩ. 38A 'nyɛ a linɩkpa, 'mɩ -Lagɔ jiya-a 'nyɛɛ, sa wa -yɛ la'a -lɛjɛ kʋ kplokplo wa -kɛɛ 'wʋ -gba, 'n ɛ kwlinɩ-a yawʋ-ɔ, -Lagɔ kaya 'nyɛɛ ji -sɩbha ʋ ji-a zʋɔ, a -yɛ a linɩkpa 'nyɛɛ ji sa a wɔkɔ-a, -Lagɔ kaya 'nyɛɛ ji -sɩbha ʋ ji 'yɛ-a -nɩ wɔkɔɔ.”
39'N Zezwi jua 'yɛ-a 'nine 'panɩ, ɔ nɛ: “'Lɔkpɔlɔkpɔnyɔ ji bhe ɔ lilɔkpɔlɔkpɔnyɔ sɔ köbhanɩ? Wa 'sɔ -kpɔ wa 'na bhe 'bhʋkwa 'mö bhlinɩ?
40-Sukugu wa -wʋ-ɔ -bhla -slʋnʋ 'le, ɔ'ɔ bhɛlɩ ɔ 'yɛ ɔ 'bhitɩbha 'wʋ zi, mɔ-ɔ -yɛ tenyi 'kpɩa ɔ -yɛ ɔ 'bhitɩbha 'sɔ ji 'mö mlinɩ.
41'Manɩɛ yɛ -n yɩlɩ bhe -ma -na linɩkpɛɛ 'ji 'möö -ganylakpʋ 'n -nn yɩlɩ bhe -ma -na -nɩ 'bhëë 'ji 'möö suköbhë 'nɩ? 42-Nmö ka-a suköbhë 'ji 'mö a gbʋ -nɩmö-ö la'a pla-a, samɩ -n ji-e -na linɩkpɛɛ de 'mö gbagbanɩ naa, -abhiyi, ji n 'yɛ -ma -na 'ji 'mö -ganylakpʋ -sa 'nɩ? 'Kwlɩsɔkanyɔ, -sa -lɛ -ma -na 'bhëë 'ji 'mö suköbhë, -n -yɛ 'jinanɩswɩ'ɩ sɛ jɩnɩ-ɛ, -n ji -ma -na linɩkpɛɛ 'ji 'mö -ganylakpʋ -sa.
Su -yɛ ʋ 'bhï 'sɔ
43Suo su 'nɩ tlʋ bhï -zoku, su -zoko 'nɩ tlʋ 'bhïë bhï. 44Swie -gɔpö 'bhuo ɩ 'bhï 'mö wa jɩblɩnɩɩ -bha, wa'a-a -bhla -ma -kpaka 'wlu 'ngwɛ -sa, wa'a-a -bhla -ma -dagla 'wlu -popowle -sa. 45-Sɩbha 'pɩnɩkpɛ -wʋ -bha, -ɔɔ dlɩ-ɩ nanɩ-a 'ji-e, -ma ɔ dlɩ zɔmö -lie -li -wʋ-ɔ -ma 'mɩ ɔ nʋ -bha, -ɔɔ dlɩ-ɩ -nyu-a 'ji-e, -ma ɔ dlɩ zɔmö 'jinyloli -ɩ -wʋ-ɔ -ma 'mɩ ɔ nʋ -bha. -Wʋʋ yɛ-a, -ɩ ye-e -ma nɩkpɛɛ dlɩ zɔmö mɩ-ɩ ghlanɩɔ-a ngli.
-Budi 'sɔɔ 'nine
46'Manɩɛ yɛ a la'a bhe 'kɔmʋʋ a Nyininyɔ 'bhë -ɩ n nʋ-a a nʋ 'n a'a nʋɩ-a 'nɩ? 47Nɩkpɛ -ɔ ji-e -bha na de -ɔ pönɩ-a na wɛlɩ 'yukwli, sa ɩ gba-a ɔ nʋ-ɔ -sɩbha, -ɔ ɔ -nyɔɔ 'wlʋnʋ-a 'mɔ n jiya-a la'a -slʋnʋɔ. 48Nɩkpɛ -bhlʋ nʋ-a ɔ 'yɛ ɔ -budu 'sɩbha, pʋpʋdʋdʋkpata ɔ 'wlu-a tenyi 'n ɔ jiʋ-a glu palɩ, ɔ 'sɩbhʋ-a ɔ bhɩʋ-a 'ji-e, 'n -podienyizako ji-a lɩbha, 'n 'nyudadlɩ ji-a 'plɩ, 'n ɩ ji-a -budu ngo sɩbha, glu ʋ 'nyʋnanɩɔ-aa yɛ, ʋ'ʋ-ʋ 'mö gbʋgbɔ. 49Nɩkpɛ -mʋmɔ -wʋ-a -nɩ ɔ -budu 'sɩbhaa 'ji 'le-e, -bha -bösɛdʋdʋkpata 'klʋ ɔ 'sɩbhʋ -bha. Ɔ 'nʋ-ʋ 'yɛ glu nyinianɩ, -podienyizako lɩbha-a, 'nyudadlɩ sɩbhʋ-a ngo ʋ'ʋ -lɛ ghayɩ tʋ-ʋ, ʋ 'bhuo sɛ ʋ 'suluo -bha. -Ɔ pönɩ-ɛ na wɛlɩ 'yukwli 'bhë, sa ɩ gba-a -ɔ 'nɩ nʋ-ɔ -sɩbha, nɩkpɛ la'a 'mɔ ɔ -nyɔɔ 'wlʋnʋ -bha.”
Currently Selected:
LWIKÖÖ 'BƆGƲ 6: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
