LWIKÖÖ 'BƆGƲ 5
5
Zezwi yɛ ɔ taka -wʋbhlinɩngwa wɔzɩ
1'Ylɩ -bhlʋ Galilee dʋdʋ -gömöö -bada wa la-a Zenezalɛtɩ, Zezwi 'nɩgbö -bha a yawʋ 'n nɩkpaa -zakpa jio-a 'wʋ binɩ wa 'yɛ -Lagɔwɛlɩ 'nʋɔ yɛ. 2-Bha -bada la'aa 'kïkë yawʋ ɔ yɩlɩ -bha 'gɔlɩ 'sɔ. 'Mɩ gɔlɩ la'aa -lowlengwa -dadɩpangwa la -bha. -Ma ɩ 'mö wa kwli-a 'n wa ji-a wa -dadɩ wɔlʋ kwla'a mö. 3-Bha ɩ 'sɔ gla'aa 'gɔlʋ -bhlʋ glɩnɩ la-a Simoo -lu. Zezwi -gbla-a -ma ʋ 'mö-ö, ɔ nɛ -bha Simoo de naa: “Wla -lɛ 'nyie 'kïkë yawʋ go sɛ.” Zezwi glɩ -ma gɔlʋ la'aa 'mö 'n ɔ ji-a nɩkpaa -zakpö -Lagɔwɛlɩ ngli 'pa.
4Ɔ bhɩa-a gbagbʋ 'ji, ɔ nɛ -bha Simoo de naa: “-N -yɛ 'gɔlʋ nyini -ma 'nyibhle 'klʋ -n -yɛ -na namöngwa 'sɔ a 'yɛ a -dadɩ 'pa.” 5Simo nɛ: “-Abhitɩbha, -a-a -dadɩ -pa 'le 'n zlɩ -jiya-a la'a zɩnɩ, -aa -lɛ -lu ghlɩ. -Na 'bhë -nmö gba 'mö-ö -sɩbhaa yɛ pa -a jiɩ -bha.” 6Wa 'pa-a -ma -dadɩ zibhï ɩ ye-a 'möö yɛ, wa'a la -ma 'nyi 'mö ɩ -sasɩɛ bhɛlɩ, ɩ 'likpï nɛ ɩ 'yɛ do. 7Ɩ yɛ 'n wa ji-a wa 'bhɩa -wa -wʋ la-a -ma gɔlʋ -mʋbhaa 'mö wɔzɩ wa 'kʋa 'kwanɩɛ yɛ. 'N wa -yɛ wa 'gɔlʋ ji-a ji. Wa 'plianɩ-ɛ -ma 'gɔlɩ 'sɔ -kpɔ 'mö zibhï, ye ɩ ye-a -dɛdɛ, -bha tʋ-ʋ 'wʋ -sɛ ɩ 'yɛ 'möna. 8Simo wa la 'yɛ-a Piɛlɩ yɩlɩ-a Zezwie nʋnʋli 'wʋ-ɔ, 'n ɔ ji-e -bha ɔ dlɩ'ɩ -kokomunigbö glu 'pa, ɔ nɛ naa: “Nyininyɔ, n -bhiamö yawʋ, 'pa -bha na yawʋ -najɩ nimï, 'jinylolie nʋnʋnyɔ n glɩnɩ -bha.” 9Simo 'nɩ-ɛ -sɩbha 'soko 'wʋ gba. Ɔ -yɛ ɔ namöngwa 'sɔ wa yɩlɩ-a zibhïë -zunɔ -kakö-ö bhlinʋa-a -gömö. 10Zakö -yɛ Za 'sɔ -wa glɩnɩ-a Simoo namöngwa, -sɩbha -kakö bhlɩnʋa 'yɛ-a -nɩ -gömö. Nɩkpɛ -bhlʋ wa la-a Zebede ɔ gwie la -bha. -Kakö bhlinɩ-ɛ sa'a Simo -gömö, Zezwi nɛ -bha ɔ de naa: “Simo, -n na-a nganɩ -nɩ sa -n köbha la-a zibhï-ë, -sɩbha -n ji-a nɩkpaa -bɛ 'tɩtlɩɛ.” 11'N wa -yɛ wa 'gɔlɩ 'sɔ ji-e -bha 'nyie 'kïkë yawʋ nyini, wa tɩ-ɛ -bha -li 'bhuo, 'n wa ji-a Zezwi 'bɩ mö.
Zezwi yɛ 'lalʋlɩbhanyɔ -bhlʋ -göpö
12'Ylɩ -bhlʋ, -ma Galilee dʋdʋ -gömöö -glɔ -bhlʋ 'mö Zezwi-e -ma, 'n 'lalʋlɩbhanyɔ -bhlʋ -ɔ 'lalʋ ye-a ku 'mö jio-a 'wʋ ji. 'N ɔ ji-e -bha ɔ dlɩ'ɩ 'wlu glu 'pa, ɔ nɛ naa: “Nyininyɔ, n -bhiamö yawʋ -göpö'ö, n -ji sɛ -n bhɛlɩ n ka'a göpö.” 13Ɔ gba-a sa'a, 'n Zezwi ji-a sɔ 'mö plu 'n ɔ jio-a cɛ zʋ. Ɔ nɛ: “N yɛ nglu 'bhë, 'pʋ!” Zezwi gba-a sa'a, -bha -gaganɩlɩ'ɩ nɩkpɛ la'a lalʋ-ʋ bhɩɔ-a ku 'mö. 14'N Zezwi jio-a 'dɩ 'nyɛ naa: “-N -yɛ mö, -n 'na-a -sanɩ -na 'pʋpʋdɩ -bɛ -nɩ. Mö -n 'yɛ -najɩ -Lagɔbʋbɔnyɔ 'ji tuluanɩ, sa -n -wʋ-ɔ 'mö-ö -sɩka'a ɔ -kɩɩ yɩlɩ 'bhë, bʋbɔnʋli Moyizɩ nʋ la-a naa 'lalʋlɩbhanyɔ -yɛ 'pʋ ɔ bʋbɔnʋɩ ɔ 'yɛ -bha -Lagɔ 'ji 'klʋ 'wlala zʋ, -n 'kɩ bʋbɔnʋ nɩkpa 'bhuo 'yɛ sɛ jɩblɩnɩ naa -n yɛ 'pʋ 'bhë.”
15Zezwi 'nyɔ-ɔ -sɩbha 'dɩ 'bhë, 'n ɔ 'nglɩ ba la-aa 'nyize. 'N nɩkpaa -zakpö ghlɩɔ-ɔ -bha wa 'yɛ -Lagɔwɛlɩ 'nʋ ɔ 'kʋa 'yɛ göpöö yɛ. 16Ɔ -yɛ nɛ nʋ-ɔ, la-a 'do-a yawʋ -bha ɔ mö -bha, 'n ɔ 'panɩ-ɛ -bha -Lagɔ -bɛlɩ.
Zezwi yɛ 'kplakplanyɔ -bhlʋ göpö
17'Ylɩ -bhlʋ, Zezwi-e -Lagɔwɛlɩ ngli 'pa 'le, -Lagɔɔ gböö nglipangwa -mʋmʋa -yɛ 'zwiföaa -zakpa -ma wa la-a falizɩɛ gla'aa -mʋmʋa 'sɔ glɩ -bha. Nɩkpa la'aa gla'aa -mʋmʋa 'bhönɩ -ma Galile -yɛ Zwide 'sɔɔ dʋdʋ -gömöö -gwlɩ 'bhuo 'mö, -mʋmʋa 'bhönɩ -ma Zelwizalɛmöö 'bhë. Wa 'bhuo, -sɩbha wa binɩ-a Zezwi 'wʋ n wa -wʋɔ la-a 'yukwli pönɩ 'le. -Lagɔɔ 'mötɛnɔ-ɔ Zezwi -gömö 'n ɔ -wʋ la-a guzungwa göpö 'le.
18Nɩkpa -mʋmʋa ji-a, wa -su -bha -gbatʋ 'wʋ 'kplakplanyɔ -bhlʋ. -Budu -ʋʋ 'mö Zezwi -wʋ la-a wa 'jɩbha wa 'kɔ la -ma 'pa wa 'kɔ -bha ɔ 'ji 'klʋ sɛ zʋ. 19Nɩkpaa -zunʋ yɛ, la wa 'yɛ la planɩ wa'a -bha de -ji. Wa -gbla-a -ma -budu -gömö, 'n wa ji-e -ma -fle -dɩ, wa palɩ-a 'kplakplanyɔɔ -gbatʋ 'likpï, 'n wa jio-o -bha nɩkpa -nyɩdɩ sɛ 'sibha, -bha Zezwi dlɩ'ɩ. 20Zezwi yɩlɩ-a sa wa kɔ-a dlɩ 'wʋ-ɔ, ɔ nɛ -bha 'kplakplanyɔɔ de naa: “'Tʋalɩbha, -na 'jinylolie gbʋ yɛ bhɩa 'bhë.”
21Zezwi gba-a sa'a tɔngʋ, -Lagɔɔ gböö nglipangwa -yɛ falizɩɛ 'sɔ -ma wa dlɩa zɔmö wa nɛ naa: “Ma -nɩkpɛ nyimanɩ-ɛ -sa -Lagɔ ngli 'nɩ? Nɩkpɛ -mɔ bhɛlɩ-a ɔ 'yɛ 'jinylolie gbʋ bhɩa 'n ɛ nɩ -Lagɔɔ 'bhëë 'nyize glɩnɩ 'nɩ?” 22Zezwi jɩblɩnɩ-a wa dlɩpapʋ, 'n ɔ jua-a ngli 'jɩbha naa: “'Manɩɛ yɛ a pa bhe -sɩbha dlɩ 'nɩ? 23N 'yɛ nʋ naa: 'Kplakplanyɔ -na 'jinylolie gbʋ yɛ bhɩa 'bhë, n 'yɛ 'yɛ ɔ de nʋ naa: -Sɔ 'wʋ -n 'yɛ namö nʋ-ɔ, ɩ 'sɔɔ gla'a -mɩɛ gbagbʋ-ʋ jɔnʋ-a 'wʋ 'nɩ? 24A 'yɛ sɛ jɩblɩnɩ naa: -Lagɔ yɛ Nɩkpɛɛ 'Gu 'gba 'nyɛ 'bhë, ma'a dʋdʋkpata'a ɔ bhɛlɩ ɔ 'yɛ 'jinylolie gbʋ bhɩaa yɛ, 'kplakplanyɔ, -nmö n nyɛ-a 'dɩ, -sɔ 'wʋ, 'libhï -na -gbatʋ 'wʋ -n 'yɛ 'ligbë'ë mö.”
25Zezwi gba-a sa'a tɔngʋ, -bha nɩkpa 'bhuoo 'ji 'klʋ 'n 'kplakplanyɔ ji-a 'wʋ -sɔ, -gbatʋ -ʋʋ -gömö ɔ pö la-a, 'n ɔ jiʋ-a 'wʋ 'libhï, ɔ-ɔ -Lagɔɔ 'nglɩ 'ghlimanɩ 'le 'n ɔ ji-e -ma ɔ 'ligbë'ë mö. 26-Wa bhuo-o su la-a -bha, ngli-i mönʋa-a 'n -kakö jua-a -gömö bhlinɩ. 'N wa ji-a -Lagɔɔ 'nglɩ 'ghlimanɩ, wa nɛ: “'Wuë! -A yɛ -zɩnɩ'ɩ nganɔɔ 'wʋbhïli yɩlɩ.”
Zezwi yɛ Levi wɔzɩ ɔ -nyɔɔ 'yɛ 'wʋ -bhlinɩɛ yɛ
27-Mɩ la'a 'plɩ-a 'bhë, 'n Zezwi ji-a 'pɩ 'wlʋ, ɔ-ɔ 'plɩ 'le, 'n ɔ ji-a lepoo mëniköbhanyɔ -bhlʋ yɩlɩ, ɔ nglɩ-ɩ -yɛ-a Levi, ɔ glɩ -ma lepopɛnɩbudu'u, Zezwi yɩlɩɔ-a, ɔ nɛ, “Levi, ji'i 'bɩ.” 28Ɔ gba-a sa'a ɔ de, Levi -sɔ-a 'wʋ, -bha ɔ tɩ-a ɔ -li 'bhuo 'n ɔ jio-a 'bɩ mö.
29Levi pi-a lili -bebe, 'n ɔ ji-a Zezwi -ma ɔ 'ligbë'ë wɔzɩ wa 'yɛ lie yɛ. Levie linɩkpa -mʋmʋaa -bebe -wa ɔ -nyʋa köbha-a lepoo mëni, 'bhë nɩkpa -mʋmʋa 'yɛ, wa 'bhuo 'mʋa Zezwi -nyʋa linɩ-a debhlʋ. 30Falizɩɛ -yɛ -Lagɔɔ gböö nglipangwa 'sɔ yɩlɩ-a -ɩ la'a, dlɩ yawʋ ɩ -nyua -bha. Wa nɛ -bha ɔ 'wʋbhlinɩngwaa de naa: “'Manɩɛ yɛ a -yɛ lepoo mëniköbhangwa -yɛ nɩkpa -waa nglɩ-ɩ nyimonʋ-a 'ji 'sɔ -wʋ-a debhlʋ linɩ 'le 'n a -wʋ-a debhlʋ 'nɩmanɩ 'le 'nɩ?” 31Zezwi 'nʋ-a, 'n ɔ jua-a 'nine 'panɩ, ɔ nɛ naa: “-Ɔ la'a -ɔ -ja-a, mɔ-ɔ 'nɩ mö -dɔtʋlʋa 'mö, guzunyɔ mö-a -dɔtʋlʋa 'mö. 32Ɩ zɔmö-ö -yɛ-a naa: N'n -lɛ -wa -wʋ-a -kpöön yɛ ji. -Wa la'a -wa glɩnɩ-a 'jinylolie nʋngwa, wa 'yɛ ligba wa 'yɛ wa 'jinyloli cɛ 'mö -saa yɛ n ji -bha.”
Sa Zezwi gba-a lɔlɔsʋsʋɛɛ gbʋ
33'Ylɩ -bhlʋ, 'n nɩkpa -mʋmʋa ji-e -bha Zezwi ghlɩ, 'n wa jio-a ngli 'jɩbha naa: “Zaa 'wʋbhlinɩngwa -yɛ falizɩɛ 'sɔ, wa sʋ lɔlɔ, wa pa -Lagɔ -bɛlɩ, na -lʋaa -nɩ 'na-a? Manɩɛ yɛ wa'a 'sʋ bhe -nɩ lɔlɔ 'nɩ?” 34Zezwi nɛ: “Nɩkpɛ -yɛ 'nglɔ kwa, ɔ -yɛ ɔ 'tʋalɩbhangwa wɔzɩ wa 'yɛ nglɔ la'a 'wʋ 'bhlie yɛ, ɔ 'tʋalɩbhangwa -yɛ ji-e, nglʋkwanyɔ la'a -kʋa 'gbamö -wʋ, wa ji bhe lɔlɔ 'sʋ? 35'Ylɩ -bhlʋ ji ji la nglʋkwanyɔ 'na 'kʋa-a 'gbamö -wʋ, -bhaa do'o wa ji lɔlɔ 'sʋ.”
Nʋ -lulu -yɛ 'kplabhë -sakasa 'sɔɔ 'nine
36'N Zezwi jua-a 'nine 'panɩ. Ɔ nɛ naa: “-Bɛ 'nɩ bhɛlɩ ɔ 'yɛ -bana -lilee 'pɩa 'wʋ -sa wa 'ka -bana -sakasa 'ji 'pɛnɩ. Wa -yɛ -sɩbha nʋ-ɔ, -bana 'lile wa nyimanɩ-a 'ji. -Wʋʋ yɛ-a, -yʋkʋpɩa -lile 'nɩ -bana -sakasa 'ji -ngwa. 37-Bɛ 'nɩ 'yɛ bhɛlɩ ɔ 'yɛ -ma 'kplabhë -sakasa 'mö nʋ -lulu palɩ. Wa -yɛ -sɩbha nʋ-ɔ, wʋlɔ 'kplabhë wʋlɔ -bha 'n nʋ 'suluo-a yɛ 'n 'kplabhë nyimonʋ-a 'ji. 38Wʋ yɛ wa palɩ-a nʋ -lulu 'kplabhë -lile 'mö. 39Nɩkpɛ -yɛ nʋ -sakasʋ 'nɩma, nʋ -luluo gbʋ 'nɩ plɔ-a 'mö 'sɔ. -Wʋʋ yɛ-a ɔ nɛ nʋ -sakasʋ-ʋ nanɩ-a ngli.”
Currently Selected:
LWIKÖÖ 'BƆGƲ 5: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
