1 कुरुन्थी 3
3
परमेसर रेन सेवक
1ए बिसवासी बोयहा-मिसी, इञ जोब पहिल अपे लोः तहिकिनिञ दो जे लेका पबितर रावा नाम इकु लोः गापाम तहिकेना उनका काइञ नधनी लाःआ। इञ केदो नुंका नधनी पोड़ावेना जे लेका दुनिया रेन होर बिचार कनाकु, उनकु होर लेका नधनी इतिञ। अपे मसी सिख रे होपोन लेका हेनापेया इनाते अपे लोः इनका गी नधनी इतिञ। 2#इबरा 5:12,13तोवा, नुनू वन होपोन जे निमीः नुनूः कनाकु, उनकु कथिर बेरयार जोजोम वनाः एएम बुगिन बनुःआं, इनका गी अपे कथिर हों मसकिल सिख काइञ एम एकावाःपेया, चिलिमेनचि अपे उना कथिर तेयार कपे तहिकेना, हें निमीः हों तेयार बनुःपेया। 3चिलिमेनचि निमीः हों होड़मो रआ हिछा रे हेनापेया, जदि अपे रे हिसंगा अरो झागड़ा हेनाःआं रेदो चिलि अपे संसार रआ हिछा रे बनुःपेया? अरो चिलि उनकु लेका सेसेन कनापे जे परमेसर रेन बङ हेकेकु। 4#1 कुरु 1:12जोब अपे गाम कनापे चि आले पाउलुस रेन हेकेले, अरो एटाः होर गाम कनाकु आले अपुलोस रेन हेकेले, दो निचित गी उनकु लेका हेनापेया जे परमेसर के मनाव वन बङ हेकेकु। 5दो पाउलुस ओकोय हेकेय? अरो अपुलोस ओकोय हेकेय? अलिञ दो सिरीफ परभु रिई धंगोर हेकेलिञ। अलिञ रआ दोवासते अपे मसी रे बिसवास एतापे। अलिञ दो इनागी कामि एकाःआलिञ, जे परभु अलिञ के सोंपाव वाःलिञकेनाय। 6#कु.कामि 18:4–11; कु.कामि 18:24–28 इञ गी बिहेन ता हेर इतिञ, अरो अपुलोस ता दाः पटाव एताय, मुदा परमेसर हरा-बुरु एताय। 7नियां रकम ते ना दो हेहेर वनीः रआ महत्वा हेनाःआं अरो ना दाः पटाव वनीः रआ महत्वा हेनाःआं, मुदा हरा-बुरु वनीः रआ हेनाःआं मने चि परमेसर रआ गी महत्वा हेनाःआं।
8हेहेर वनीः अरो दाः पटाव वनीः, बनार होर रआ उदेस मीः गिया, परमेसर उनकिन होर के अपन-अपन कामि रआ मोताबिक परतिफोल एमाकिनाय। 9चिलिमेनचि अलांङ बनार होर परमेसर कथिर संघे कामि वन हेकेलांङ, अपे परमेसर रेन बारगी अरो बंगला हेकेपे। 10परमेसर ता जे दया ता इञ के एम एकावाःदेञाय, उना दया एते इञ मिहोर बुगिन अरो मुध करीगार रआ रुप रे नेंव उर इतिञ, मुदा उना नेव रे एटाः होर रादा रकप कनाकु। मुदा सुबिन होर के होसियार ते कामि कराव चही। 11जे नेंव बाय एकाःआय, उनी के बागी केते जहय एटाः होर नेंव काकु उरिया, उना नेव ईसु मसी गी हेकेय। 12जदि होर उना नेव रे भीत बबाय कथिर कयेक रकम रआ जिनिस लगाव अरो कामि अगुइ कनाकु, नियां रे सोना, चांदी, अरो हिरा लेका बुगिन जिनिस हेनाःआं अरो रटा घांस, तोम्बा, बुसूः, हेरे लेकन जिनिस जे बुगिन बनुःआं इनका गी हेनाःआं। 13मुदा जोब परभु सुबिन होर रआ नेयाय कराव हिजुःआय, दो उना दिसतार ओ:वो चि सुबिन होर चिलका कामि एकाःआकु। चिलिमेनचि सुबिन होर रआ कामि सेंगेल ते परखावियाय। 14जदि उना नेंव रे जहय मनवां रआ कामि बाय तहिनोःवो, उनकु कथिर परतिफोल नमुःआं। 15मुदा बबाय वनीः रआ कामि उना सेंगेल रे भसाम वोःओ, दो उनी के परतिफोल का नमुःआ, मुदा रेहोंगी उनी अपन ते बनचाव उडुङ वोःओय। मुदा सेंगेल एते बनचाव उडुङओः लेकन होर। 16#1 कुरु 6:19; 2 कुरु 6:16चिलि अपे कपे सारीइकाना चि अपे ओड़ाः लेका हेनापेया, जेकर रे परमेसर तहीः कनाय, अरो परमेसर रआ रावा अपे रे तहीः कनाय। 17जदि जहय परमेसर रआ ओड़ाः ता नठावियाकु दो परमेसर उनकु के नठाव कुवाय। चिलिमेनचि परमेसर रआ ओड़ाः दो पबितर हेनाःआं, उना ओड़ाः अपे गी हेकेपे।
18अपन-अपन तिगी धोखा रे ओलोपे तहिनोओ। जदि अपे रे ते जहय नुवां सोंचाः कनाकु चि नियां जुग रआ मोताबिक उनी बुधिमान सोमझाव ओःकनाय, रेदो उनी दुनिया रेन होर रआ नजेर रे मुर्खाहा बयुः चही; ताकि उनी परमेसर रआ नजेर रे बुधिमान होयुःआय। 19#अयू 5:13चिलिमेनचि दुनिया रआ गेयान परमेसर रआ नजेर रे मुरुखता हेके, परमेसर रआ बचन रे ओल एकाना, “परमेसर बुधिमानकु के उनकु रआ चलक चतुर रे फंसाव केकु कनाय।” 20#सिरिञ 94:11नुंका हों ओल एकाना चि, “गेयान इकु रआ बिचार बेकामा हेनाःआं” उना परभु सारीइ कनाय। 21इनाते अपे के नुवां जरुरेत हेनाःआं चि जहय होर रे हों ओलोकु घमंड एका। परमेसर सुबिन्नाः अपे कथिर गी एम एकावाःपेयाय। 22चहे पाउलुस चहे अपुलोस चहे कयफा चहे नुवां दुनिया चहे जीवन चहे गोनोच चहे तिहिञ रआ समेय चहे हिजुः आनाः समेय सुबिन जिनिस अपे कथिर गी हेनाःआं। 23अरो अपे मसी रेन हेकेपे, अरो मसी परमेसर रिई हेकेय।
Currently Selected:
1 कुरुन्थी 3: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0