कुलवानकु.कामि 12
12
पतरस रआ जेहेल एते उडुङओः
1इमिन रे राजा हेरोदेस ता कलीसिया रेन हुडिञगन होर के सताव वेःकुवाय 2उनी ता जोहन रिई बोयहा जाकूब के तलवाइर एते माः गोच इरीवेःकुवाय 3अरो जोब उनी ता नेलेःकुवाय चि नियां रे जहुदी रिझाव एनाकु, दो उनी ता पतरस के हों साप इरीवेःकुवाय। बिन जोजो पिठा रआ पोरोब हिलोः रे होयकेना। 4#उठ 12:1–27उनी ता पतरस के सापइरी केते जेहेल ओड़ाः रे सन्जो इरीवेःकुवाय, अरो पतरस के चाइर-चाइर सिपाही के चाइर दोल होरहो कथिर दोहोवेःकुवाय उनी पसका पोरोब रआ तयनोम उनी के होर रआ ताला रे हाजिर कराव कथिर वोःकेनाय 5जोब पतरस रे नुवां लेका जेहेल ओड़ाः रे होरहो दुरुप केनाकु दो कलीसिया उनी कथिर मीः चित केते परमेसर एते पराथनाय केनाकु 6जे हिलोः हेरोदेस उनी के होर रआ ताला रे हाजिर कराव तहिकेनाय, उना पहिल निंदा पतरस के बनार ती रे बेरी एते तोल केते, बार होर सिपाही रआ ताला गितीच केनाय अरो दुवेर रआ हेनात हों सिपाही होरहोय केनाकु 7परभु रिई सोवारागदूत अचाका उनी ठिनुः हेच केते तिंगु वेनाय अरो कोठरी रे मरसल चमकावेना। उनी ता पतरस रआ होड़मो थापथापाव केते उनी के चेहाव एदेयाय अरो मेताःदेयाय, “हारदेन बिरीतमी!” इमिताः गी पतरस रआ ती एते बेरी रड़ा उयुःएना। 8तोब सोवारागदूत ता उनी के मेताःदेयाय, “डांडा तोलेम खरपा होरोः कोःमी।” उनी ता इनका एताय। सोवारागदूत ता अरो मेताःदेयाय, “किचरीः होरोः केते इञ तयनोम देलाम।” 9पतरस जेहेल ओड़ाः एते उनी तयनोम-तयनोम टांड़ी उडुङ एनाय। उनी काय सारीकेनाय चि जहन्नाः सोवारागदूत दोवासते होयुः काना, उना सच गी हेके। उनी सोमझाः केनाय चि इञ कुकमु नेल कनिञ। 10उनकिन मीः अंटल पहरा एएम वन के परोम केते अरो मीः अंटल पहरा एएम वन के पारोम केते उना लोहा रआ केवांर तक तेबाःएनाकिन जे चट्टी सोझ इदी कनाय। उना उनकिन कथिर आच-आच तिगी निच्चेना। उनकिन टांड़ी उडुङ एनाकिन अरो छेउर रआ अतोम तक हेच्चेनाकिन चि सोवारागदूत अचाका उनी के बागी केते तोराया। 11तोब पतरस होस रे हेच केते गापाम बिरीत एनाय, “निमीः इञ निचित इनिञ चि परभु ता आचरेन सोवारागदूत के कुल केते इञ के हेरोदेस रआ ती एते छोड़ाव एदेञाय अरो जहुदी होर जे पतरस के गोगोच कथिर ओःकेनाकु उना सुबिन सोंचाव टुटाव कताय।” 12जोब उनी अपन परिसथिति बुगिन एते सारीएताय, दो उनी मरियम रआ ओड़ाः सिनुः केनाय, जे जोहन रिई एंगातेः तहिकेनाय, जोहन के मरकुस मेताय केनाकु। ओन्डो बेचोट एते होर जमा केते पराथनाय केनाकु। 13पतरस ता टांड़ी दुवेर ठोकठोकावेताय अरो रुदे लुतूम धंगरीन नेनेल हेच्चेनाय चि ओकोय हेकेय 14उनी पतरस रआ राव सारी केते रिझ एते भीतरी निर इदी एताय अरो उदुःवाःकुवाय चि पतरस दुवेर ठिनुः तिंगु एकानाय। 15होर ता उनी के मेताःदेयाकु, “आम बालुएकानाम” मुदा जोब उनी बेरयार एते गाम इदी एताय चि गानाम इनका गिया दो उनकु गाम्मेताकु, “उनी पतरस रिई सोवारागदूत होय सकाःकाय।” 16रेहों गी पतरस ठोकठोकाव ठोकाव चित तहिएनाय। जोब उनकु दुवेर निच एताकु अरो पतरस के नेलेःदेयाकु दो उनकु बेचोट चकरीत एनाकु। 17उनी ता ती रआ चुंडूल अंगुर मोचा रे दोहो केते हपे तहीः कथिर इसारा वेःकुवाय अरो उनकु के उदुःवाःकुवाय चि चिलका एते परभु इञ के जेहेल ओड़ाः एते टांड़ी उडुङ अगु देञाय अरो उनी ता गाम्मेताय, “जाकूब अरो बोयहा-मिसी के नुवां गानाम रआ खभेर एम्मापे” तोब उनी ओड़ाः बागी केते जहन एटाः ठिनुः तोराया। 18जोब अंगाना, दो नुवां गानाम रे सिपाही ता बेचोट बोरो एताकु चि अखीर पतरस चिलि एनाय। 19हेरोदेस ता पतरस के बेचोट दंड़ा इरीवेःकुवाय अरो जोब उनी रआ जहां ठिनुः गी पाता का लगावेना दो उनी ता पहरा वन एते जांचव इरीवेःकुवाय इना तयनोम पहरा दार किगी गोगोच कथिर हुकूम एमाःकुवाय। तोब उनी जहुदिया पोरदेस बागी केते कयसरिया तोराया अरो एन्डे तहीः हेलावेनाय।
हेरोदेस रआ गोनोच
20सूर चट्टी अरो सयदा चट्टी रेन होर रआ खिलाप, हेरोदेस राजा बेचोट खिंस वकुकेनाय इनाते उनकु हेरोदेस रआ दरबार रिई देखभाल कराव वनीः बलास्तुस ठिनुः तोराकुवा, अरो मनाव-बुझाव केते उनी एते मेल-मिलाप एताकु ताकि हेरोदेस एते नपाम कथिर देगाःआय। चिलिमेनचि हेरोदेस रआ दिसुम एते गी उनकु के अनाज अरो जोजोम नुनू वनाः जिनिस नमुः केना। 21निचित हिलोः हेरोदेस राजा, राजाकु होरोः वनाः किचरीः होरोः केते राइज गदी रे दुरुपेनाय अरो होर के भासान एएम हेलावेनाय। 22तोब होर उसुल राव एते गागाम हेलावेनाकु, “नुवां दो होर रआ बङा परमेसर रआ राव हेके।” 23इमिताः गी परभु रिई मिहोर सोवारागदूत ता एनेन गी गोजेः देयाय चिलिमेनचि उनी ता परमेसर के काय महिमा लेदेयाय अरो उनी तिजु पोड़ाव केते गोच्चेनाय।
24अरो बेचोट एते होर परमेसर रआ बचन ओनाव एताकु अरो बिसवास कराव वते बड़हाव इदी एनाकु। 25बरनाबस अरो साउल अकिन रआ सेवा-कामि पुराव केते जरुसलेम एते रुवाड़ केते अन्ताकिया चट्टी हेच्चेनाकिन। अरो अकिन लोः जोहन के अगु एदेयाकिन जे मरकुस गामुः केनाय।
Currently Selected:
कुलवानकु.कामि 12: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
