कुलवानकु.कामि 13
13
बरनाबस अरो साउल रआ बहाली अरो कुकुल
1अन्ताकिया चट्टी रआ कलीसिया रे चिमिनोः परमेसर सोझ एते नधनी वनकु अरो गुरु तहिकेनाकु, जे लेका बरनाबस अरो सिमोन जे हेंदेया गमुःकेनाय, कुरेन चट्टी रिई तहीः वनीः लुकियुस अरो साउल अरो मनाहेम तहिकेनाकु। ससाक हेरोदेस रिई एंगा-आपु ता काठ होपोन हेरेल बाय केते मनाहेम के असुल हरा लेदेयाकिन। 2जोब उनकु उपास कराव वते परभु एते उपासनाय केन गियाकु रिगी पबितर रावा ता मेताःकुवाय, “इञ कथिर बरनाबस अरो साउल के उना कामि कथिर अलग ककिन जेकर कथिर इञ उनकिन के होहो एकाःकिनिञ।” 3तोब उनकु ता उपास अरो पराथना केते अरो साउल अरो बरनाबस रे ती दोहो केते उनकिन के बिदा वेःकिनाय।
कुपरुस रे साउल अरो बरनाबस
4पबितर रावा दोवासते कुल एकिन बरनाबस अरो साउल सिलुकिया चट्टी तोराकिना अरो ओन्डो एते उनकिन दाः जहाज रे कुपरुस टापू तोराकिनका 5सयपरास टापू रआ उतर पुराब रआ कोना रआ बंदरगाह चट्टी रआ सलमिस तेबाः केते उनकिन जहुदिकु रआ बिनती ओड़ाः रे परमेसर रआ बचन रआ परचार चित तहिएनाकिन। जोहन मरकुस हों उनकिन रिई सुसारवानीः होय केते उनकिन के देंगा चित तहिएनाय। 6उनकु सुबिन टापू रे होनोर तयनोम दछिन-पछिम रआ कोना रआ बंदरगाह चट्टी पाफुस हेच्चेनाकु! ओन्डो बरयेसु लुतूम मिहोर जहुदी जादु वनीः अरो परमेसर सोझ एते नधनी वान मेन केते बेदा कनाकु उनकु एते उनकु नपाम एनाकु, 7जे राजपाल सरजियुस पाउलुस, बरयेसु रिई गाति तहिकेनाय। राजपाल बुधिमान तहिकेनाय अरो बरनाबस अरो साउल के होहो केते परमेसर रआ बचन ओनाव चहाः केनाय। 8बरयेसु जेकर लुतूम एलीमास मने जादु वनीः तहिकेनाय, उनकु रआ बिरोध एकेनाय अरो राजपाल के बिसवास एते एटाः सोझ मोड़ाव चहाः केनाय। 9लिकिन साउल ता जे पाउलुस हों गमुःकेनाय, पबितर रावा एते भोरपुर केते उनी रे नजेर गड़ाव एताय, 10अरो गाम्मेताय आम सयतान रिई होपोन चतुर अरो छल-कपट अरो बुराय एते पेड़ेच वनीः अरो सुबिन रकम रआ धरम रिई बइरी हेकेम चिलि आम परभु रआ सोझ होरा टेड़हो कथिर कम बगिया, 11निमीः नेल परभु रआ ती आम के रु मिकानाय आम अंधरा केते हुडिञगन कथिर सिंगी रआ मरसल कम नेला। तोब एनेन गी उनी धुंधरा एनाय अरो लुबाः उनी रे हेच्चेना, अरो उनी थमहाय-थुमहुइ वते आनते-नोनतो दंड़ा हेलावेनाय चि जहय ती साप केते उनी के इदियाकु 12राजपाल ता नुवां नेल केते अरो परभु रआ सिखाव एते चकरीत केते बिसवास एताय।
पिसिदिया रआ अन्ताकिया चट्टी रे पाउलुस
13पाउलुस अरो उनी रेन गाति दाः जहाज एते सेन केते पाफुस चट्टी एते पमफुलिया दिसुम रआ पेरगे चट्टी तेबाःएनाकु। ओन्डो जोहन मरकुस उनकिन के बागी केते जरुसलेम चट्टी रुवाड़ हेच्चेनाय 14पाउलुस अरो बरनाबस पेरगे चट्टी एते लहा बड़हाव केते पिसिदिया दिसुम रआ अन्ताकिया चट्टी तेबाः एनाकिन। उनकिन जिराः हिलोः बिनती ओड़ाः रे सेन केते दुरुप एनाकिन। 15मूसा रआ नियम अरो परमेसर सोझ एते नधनी वनकु रआ पाठ पोड़हाव तयनोम, बिनती ओड़ाः रेन मुधकु ता उनकिन एते नुवां गामकुल एताकु, “बोयहाकु जदि अपे ढढस रआ रुप रे होरकु एते जहन्नाः गागाम कथिर वोः रेदोपे गामपे।” 16नुवां रे पाउलुस तिंगु एनाय अरो ती एते उनकु के हपे तहीः कथिर मेताःकुवाय। “ए इसराइलिकु अरो परमेसर एते बोरोय वन गइर-जहुदिकु सुबिन होर ओनावेपे।
पाउलुस रआ भासान
17 #
उठ 1:7;
उठ 12:51
“इसराइली होरकु रिई परमेसर ता अबु रेन पुरखाकु के सलावेःकुवाय। जोब उनकु मिसर दिसुम रे पोरदेसी तहिकेनाकु इमिन रे उनी उनकु के बड़हाव वेःकुवाय, अरो परमेसर अपन महान ती एते उनकु के ओन्डो एते उडुङ अगुवेःकुवाय 18#लेखा 14:34; नियम 1:31परमेसर ता चालीस बरीस तक टोंडाङ टिलहा बुरु रे उनकु रआ सहावेताय। 19#नियम 7:1; जहुसू 14:1इना तयनोम परमेसर ता कनान दिसुम रे सात जाइतकु के नास वेःकुवाय अरो उनकु रआ ओते परमेसर ता अपन होरकु रआ हक रे एमाःकुवाय। 20#नेयायि 2:16; 1 समु 3:20नुवां सुबिन बिताव कथिर साढ़े चाइर साव बरीस लगावेना इना तयनोम परमेसर सोझ एते नधनी वनीः समुवेल रआ समेय तक उनकु के एगवाइ कराव कथिर नेयाय वनकु के बहाली वेःकुवाय। 21#1 समु 8:5; 1 समु 10:21तोब उनकु ता अकु कथिर मिहोर राजा के मंगाव वनाकु अरो परमेसर ता उनकु के बिनजामिन गोतोर कीस रिई होपोन हेरेल साउल के एमाःकुवाय, जे चालीस बरीस तक राइज चित तहिएनाय। 22#1 समु 13:14; 1 समु 16:12; सिरिञ 89:20इना तयनोम परमेसर ता साउल के ओचोः केते दाऊद के राजा बयेःदेयाय, नियां रआ बबेत रे परमेसर ता नुंका गोवाही उदुःएताय चि नेबरीक इञ के इञ रआ हिरदय लेका मिहोर मनवां, इसाय रिई होपोन तेः हेरेल दाऊद रआ रुप रे, इञ कथिर नाम एकानाय। इञ जे चहाः कनिञ उनी सुबिन्नाः पुरावियाय। 23परमेसर ता आच रआ वादा रआ मोताबिक इनी दाऊद रेन बोंस रे इसराइल कथिर मिहोर उद्धार कराव वनीः मने ईसु के बयेःदेयाय। 24#मर 1:4; लूका 3:3ईसु अपन कामि एटेच एते पहिल जोहन ता सुबिन इसराइल रेन होर के पाप एते मोन रुवाड़ रआ, अरो बतिसमा रआ परचार एताय, 25#जोह 1:20; मती 3:11; मर 1:7; लूका 3:16; जोह 1:27 अपन जीवन रे कामि पुराव समेय जोहन ता गाम्मेताय, ‘अपे इञ के जे सोमझाः कनापे, इञ उनी बङ हेकेञ। मुदा नेलपे, इञ तयनोम उनी हिजुः वनीः मेनायां, जेकर बाका रे, होरोः खरपा रआ तोनोल राड़ा लाइख हों बनुःइञा।’ 26ए बोयहा! अबराहम रेन बोंसकु, अरो परमेसर एते बोरोय वन! उद्धार रआ नुवां संदेस अबु सुबिन ठिनुः कुल एकाना।” 27जरुसलेम रेन तहीः इकु अरो उनकु रेन मुध ता ईसु के काकु चिनहाव लेदेया चि ईसु गी मसी हेकेय। अरो हार हापता जिराः हिलोः जे पोड़हाः केनाकु उनी परमेसर सोझ एते नधनी वनीः रआ गानाम ता हों काकु सोमझावकेना मुदा ईसु के दोसी ठहराव केते उना गानाम पुराव एताकु। 28#मती 27:22,23; मर 15:13,14; लूका 23:21–23; जोह 19:15उनकु गोगोच लाइख जहन दोस ईसु रे काकु नामलाःआ, रेहों गी उनकु ता पिलातुस एते गोहराव एदेयाकु चि उनी के गेत गोजेयगियाले। 29#मती 27:57–61; मर 15:42–47; लूका 23:50–56; जोह 19:38–42उनकु ता उनी रआ बबेत रे जहन्नाः ओल एकाना सुबिन पुराव तयनोम उनी के कुरुस एते अरगु एदेयाकु अरो मरघाटी रे दोहो एदेयाकु। 30मुदा परमेसर ता उनी के गोच रे एते जुवेत एदेयाय। 31#कु.कामि 1:3अरो उनी बेचोट हिलोः तक उनकु होर के नेनेल इरी चित तहिएनाय, जे उनकु लोः गलील एते जरुसलेम हेच केनाकु। निमीः उनकु गी जानता रआ लहा रे उनी रेन गोवाही हेकेकु। 32#सिरिञ 2:7आले अपे के नुवां बुगिन खभेर ओनाव वपेकानाले, जे परमेसर ता अबु रेन पुरखाकु एते वादा लाःआय, 33चि परमेसर ता ईसु के जुवेत केते, इना परतिगेया अबुन कथिर पुराव एताय। जे लेका सिरिञ पोथी दु रे हों ओल्लेकाःआकु,
आम इञ रिई होपोन हेकेम,
तिहिञ एते इञ आम रिई आपुम हेकेञ।
34 #
जसा 55:3
परमेसर ता ईसु के गोच वनकु रे एते जुवेत एदेयाय, अरो नेबरीक अरो केहयो उनी काय सेया नोःवोय। नुवां गानाम रआ सबुद रे परमेसर ता नुवां गाम लाःआय,
इञ दाऊद एते जे पबितर अरो का टलाव वोःआनाः परतिगेया लाःआय,
उना अपे कथिर पुरावियाय।
35 #
सिरिञ 16:10
इनाते उनी मियाः एटाः ठांव रे उदुः कनाय,
आम, आम रिई पबितर होर के मरघाटी रे कम सेया इरिवाया।
36दाऊद दो आच रआ समेय रे परमेसर रआ चहाव वनाः सेवा-कामि पुराव रआ तयनोम गोच एनाय। उनी आचरेन पुरखाकु ठिनुः मेसा एनाय मरघाटी रे दोहो एदेयाकु अरो सेया एनाय, 37मुदा परमेसर ता जे के गोनोच रे एते जुवेत एदेयाय उनी काय सेया केनाय, 38-39बोयहाकु! अपे बुगिन एते सोमझाव कोःपे चि जे खभेर अपे के ओनावापे कनिञ, उना नुवां हेके चि ईसु एते गी अपे के पाप रआ छमा नमुःआं, जे उनी रे बिसवास कनाकु, उनकु के परमेसर सुबिन पाप एते निरदोस ठहरावकुवाय, जे अपे के मूसा रआ नियम दोवासते का नाम दड़ी नोःओ। 40चेम्पोर तहीःपे जहां नुंका ओलो होयुःका चि परमेसर सोझ एते नधनी वनकु ता जे गाम एकाःआकु, अपे रे ओलो हिजुःका,
41 #
हब 1:5
“‘नेलपे, निन्दा कराव वन चकरीत केते, नठाव वोःपे।
इञ अपे रआ समेय रे उना कामि कराव वनीः हेनाञा,
जेकर बबेत रे जदि जहय अपे के उदुः वपेकानाय
दो अपे उना रे केहयो कपे बिसवासिया।’”
42जोब पाउलुस अरो बरनाबस बिनती ओड़ाः एते उडुङओः केनाकिन, दो होर ता उनकिन एते गोहराव एताकु चि उनकिन हिजुः आनाः जिराः हिलोः नुवां गानाम दोबोरा उदुः इयाकिन। 43अरो बिनती ओड़ाः रआ सभा चबाः तयनोम बेचोट एते जहुदिकु अरो जहुदी धरम मनाव वान भक्तकु रे ते बेचोट ता पाउलुस अरो बरनाबस रआ पालन एताकु। पाउलुस अरो बरनाबस ता उनकु एते नधनी एताकिन अरो सोमझाव वेःकुवाकिन चि अपे परमेसर रआ दया रे बाय तहीःपे।
पाउलुस सोझ एते गइर-जहुदी रे परचार रआ एटेच
44हिजुः आनाः जिराः हिलोः, चट्टी रेन पराया सुबिन होर परभु रआ बचन ओनाव कथिर जमाएनाकु 45जहुदी ता बेचोट ढेर भीड़ नेल केते हिसंगा एते जलाः केनाकु अरो पाउलुस रआ निन्दा कराव वते उनी रआ गानाम रआ बिरोध एकेनाकु, 46तोब पाउलुस अरो बरनाबस ता निडर केते गाम्मेताकिन, “नुवां जरुरी तहिकेना चि पहिल अपे के परमेसर रआ बचन ओनाव वपेयालिञ मुदा अपे बचन ता अनसुनिइ कनापे अरो अपन के का मुडूः जीवन लाइख कपे ठहराः काना, इनाते अलिञ नेबरीक दो गइर-जहुदिकु ठिनुः सिनुः कनालिञ। 47#जसा 42:6; 49:6 परभु ता अबु के नुवां हुकूम एम एकावाःबुनाय,
“‘इञ आम के गइर-जहुदिकु कथिर दीया बयेःमिञ,
ताकि दुनिया रेन सुबिन होर उद्धार नाम्माकु।’”
48गइर-जहुदिकु नुवां अयुम केते अनादित एनाकु अरो परभु रआ बचन रआ बड़ाय हेलावेनाकु जेतना होर के का मुडूः जीवन कथिर सला लेःकुवाय, उनकु ता बिसवास एताकु। 49अरो सुबिन पोरदेस रे परभु रआ बचन फयलावेना 50मुदा जहुदिकु ता, मुध भक्त एराकु अरो चट्टी रेन नेताकु के उसकाव वेःकुवाकु, पाउलुस अरो बरनाबस रआ बिरोध रे झामेला तिंगु एताकु अरो उनकिन के अकु रआ इलाका एते उडुङ काःकिनाकु 51#मती 10:14; मर 6:11; लूका 9:5; 10:11तोब पाउलुस अरो बरनाबस उनकु के चेतोवन एएम कथिर अकिन रआ बाका रआ धुड़ी झाराव केते इकोनियुम चट्टी तोराकिना। 52रेहोंगी पिसिदिया दिसुम रआ अन्ताकिया चट्टी रेन चेलाकु आनाद अरो पबितर रावा एते पेड़ेच इदिएनाकु।
Currently Selected:
कुलवानकु.कामि 13: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
