कुलवानकु.कामि 22
22
1“बिसवासी बोयहा-मिसी अरो आपुकु! इञ रआ पछ जहन्नाः गाम कनिञ उना अयुम एपे। 2जोब होरकु ता अयुम एताकु चि पाउलुस ता उनकु के इबरानी भाखा एते नधनी केनाय, दो उनकु अरो हपेनाकु तोब पाउलुस ता मेताःकुवाय, चि 3#कु.कामि 5:34–39इञ दो जहुदी हेकेञ, इञ रआ जनम दो किलिकिया रआ तरसुस चट्टी रे होयकेना। मुदा इञ रआ असुल हरा, नोन्डो नियां चट्टी रे गी होय्येना। गमलियेल ठिनुः तहिकेते अबुन रेन आपु-आजाकु रआ नियम रआ सिख बुगिन रीति एते एम वदेञकेनाकु। इञ परमेसर रिई इनकागी उत्साह वनीः तहिकिनिञ, जे लेका तिहिञ अपे सुबिन हेनापेया। 4#कु.कामि 8:3; 26:9–11इञ नियां होरा रेन होर के इमिनुः सताव लेःकुञ चि उनकु रआ जीव तक उडुङएना अरो इञ ता हेरेलकु अरो एराकु के तोल केते जेहेल ओड़ाः रे संजो एकाःकुञ। 5अरो मुध जाजक अरो सुबिन मुध पंचेत रेन इञ रे नियां गानाम रआ गोवाही हेकेकु, नोंकु रे एते चिट्ठी इदिकेते इञ दमिसक रेन बोयहाकु ठिनुः सिनुः किनिञ, जे ओन्डो रेन होर केहों तोल केते जरुसलेम इदी कुञ अरो दंड एमइरिकुञ। 6जोब इञ सेनसेन लोः गी दमिसक ठिनुः तेबाः इनिञ दो, दुपहरा रआ लगेभगे एकाएक सिरमा रे मियाः मरंग मरसल इञ रआ चइरो ओइर चमकावेना 7इञ ओते रे उयुःइनिञ अरो नुवां सबद ओनावितिञ, ‘ए साउल, ए साउल, आम इञ के चिलिमेन सताव एञकानाम?’ 8इञ कुलिएदेयिञ, ‘ए परभु आम ओकोय हेकेम?’ उनी ता इञ के गामवादेञाय, ‘इञ नासरत लुतूम चट्टी रिई ईसु हेकेञ, जे के आम सताव वेञकानाम।’ 9इञ रेन गातिकु ता मरसल दो नेलएताकु, मुदा इञ एते नधनी कराव वनाः, नधनी ता काकु ओनावलाःआ, 10अरो इञ कुलिएदेयिञ, ‘परभु इञ के चिलि कराव चही?’ परभु जबाब एमाःदेयाय, ‘बिरीतमी अरो दमिसक सिनुःमी, आम के जे कराव कथिर ठहराव एकावाःमिञ, उना सुबिन आम के ओन्डो उदुःवामिञ।’ 11उना मरसल रआ चमकाः रआ चलते इञ के जहन्नाः का सुझावकेना, इना एते इञ रेन गातिकु इञ के ती साप केते डोरयाव इदी देञाकु अरो नियां लेका एते इञ दमिसक तेबाःइनिञ। 12ओन्डो हनानियस लुतूम भक्त इञ लोः नपाम्मोः हेच्चेनाय। उनी नियम रे सेसेन वनीः अरो ओन्डो तहीः वन सुबिन जहुदिकु रे एते नामी होर तहिकेनाय। 13उनी ता इञ हेनात तिंगु केते गाम्मेताय, ‘बोयहा साउल! अरो नेनेलमी।’ इमिन रिगी इञ रआ मेत रआ मरसल रुवाड़ हेच्चेना अरो इञ उनी के नेलेःदिञ। 14तोब उनी ता गाम्मेताय, ‘आले रेन आपु-आजाकु रिई, परमेसर ता आम के इनाते सला एकाःमाय चि आम परमेसर रआ हिछा ता सरीयाम, अरो उनी धरमी होर के नेलेयाम अरो उनी रआ मोचा एते बचन ता ओनावियाम। 15चिलिमेनचि आम के परमेसर रआ सोझ एते सुबिन होरकु रआ सामने उना सुबिन गानाम रआ गोवाही एएम हेनाःआं, जे आम ता नेल एकाःआम अरो अयुम एकाःआम उना। 16निमीः आम चिलिमेन देरीयाम? बिरीत केते बतिसमा अगुइमी अरो उनी रआ लुतूम एते पराथना केते अपन पाप एते छोड़ाव कोःमी।’ 17जरुसलेम रुवाड़ रआ तयनोम इञ मरंग बिनती ओड़ाः रे पराथनाय किनिञ रे दरसन नेलतिञ, 18अरो परभु इञ एते नुवां गामवादेञाय, उसराव एम, आम जरुसलेम एते उसराव केते उडुङ जोनमी चिलिमेनचि उनकु इञ रआ बबेत रे आम रआ गोवाही काकु मनाव वोःकाना। 19इञ मेताःदिञ, ‘परभु! उनकु सारी कनाकु चि इञ आम रे बिसवास कराव वनकु के सासप कथिर अरो कोड़रा एते रु इरी कथिर सुबिन बिनती ओड़ाः रे सेनकिनिञ 20#कु.कामि 7:58अरो जोब आम रिई गोवाही स्तेफनुस के गोजेय केनाकु, दो इञ उनी रआ सहमत कराव केते ओन्डो तिंगु किनिञ अरो उनी रेन गेत गोगोच इकु रआ किचरीः पहराय केनाय।’ 21नियां रे परभु ता इञ के गामवादेञाय, ‘सिनुःमी! आम के गइर-जहुदिकु रआ ताला रे कुलमिञ।’” 22उनकु कुर्री बिरीत एनाकु, “दुनिया एते नोंय के गोच उतर कयपे। नोंय जुवेत तहीः लाइख बनुःइचाय।” 23जोब उनकु कुर्री वते अरो किचरीः गीड़ी केते अरो सिरमा सोझ धुड़ी ओटांङ एकेनाकु, 24दो पलटन रेन मुध एगवा ता उनी के छवनी रे इदी अगुवेदेयाकु अरो कोड़रा लगाव केते उनी रआ जचांव कथिर हुकूम एमाःकुवाय, जे नुवां पता चलाव वोःओ चि होर पाउलुस रआ बिरोध नियां लेका चिलिमेन कुर्रीइ कनाकु। 25जोब उनकु कोड़रा एते सोड़ेच कथिर उनी के तोनोल एते तोलेय केनाकु, दो पाउलुस ता तिंगुकेनाकु उनकु पलटन रिई एगवा के कुलिदेयाय, “चिलि आम के कानून रआ मोताबिक एते उचित हेनाःआं चि मिहोर रोमन रिई होर के कोड़रा एते सोड़ेच इयापे, जे जहन दोस हों का नामकेना?” 26नुवां अयुम केते सुबेदार पलटन रेन मुध एगवा के नुवां रआ खभेर एएम तोराया अरो गामवादेयाय, “आम नुवां चिलि कराव चहाः कनाम? नोंय होर रोमन रिई हेकेय।” 27पलटनकु रिई एगवा ता पाउलुस ठिनुः हेचकेते कुलिदेयाय, “इञ के नुवां उदुः वयञमी, चिलि आम रोमन रिई हेकेम?” उनी ता गामवादेयाय, “हें इञ रोमी हेकेञ।” 28नियां रे पलटनकु रिई एगवा ता गामवादेयाय, “आम के नुवां रोमी बयुः कथिर बेचोट पोयसा एम केते नामएकाःआम” पाउलुस ता जबाब एमाःदेयाय, “इञ दो जनम एते गी रोमन बंसीदा हेकेञ।” 29इनाते जे होर पाउलुस रआ पुछ-ताछ कराव वनकु ता तहिकेनाकु, उनकु एनेनगी ओचोः एनाकु अरो पलटनकु रिई एगवा हों नुवां सारी केते बोरो वनाय चि इञ मिहोर रोमन रिई होर के बेरी एते तोलइरी एकाःकुञ।
मरंग पंचेत रे पाउलुस
30एटाः हिलोः पलटनकु रिई एगवा ता पाउलुस रआ तोल वनाः रड़ा कताय अरो मुध जाजककु अरो सुबिन मरंग पंचेत रे मीः ठिनुः जमाः कथिर हुकूम एमाःकुवाय, चिलिमेनचि उनी नुवां बुगिन रुप एते सारी कथिर वोःकेनाय चि जहुदी पाउलुस रे चिलि दोस लगाव कनाकु। तोब उनी ता पाउलुस के लातार इदिकेते मरंग पंचेत रआ लहा रे तिंगु कदेयाकु।
Currently Selected:
कुलवानकु.कामि 22: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
