कुलवानकु.कामि 23
23
1पाउलुस मरंग पंचेत रेन होर रे नजेर लगाव केते गामवाःकुवाय, “बोयहाकु! इञ नियां हिलोः तक परमेसर रआ नजेर रे बुगिन भीतरी मोन एते जीवन बितावितिञ।” 2मुदा मुध जाजक हनानियस ता पाउलुस रआ हेनात रे तिंगु होरकु के हुकूम एमाःकुवाय चि उनकु पाउलुस के चटाः इयाकु। 3#मती 23:27,28पाउलुस ता उनी के गामवादेयाय, “ए पोताव वनाः भीत! परमेसर आम के रुमाय। आम नियम रआ नियागी इञ रआ फयसाला कथिर दुरुप एकानाम अरो आम नियम रआ उलांघन केते इञ के गोगोच रआ हुकूम एमा कुकानाम।” 4हेनात रे तिंगु होर ता पाउलुस के गामवादेयाकु, “आम परमेसर रेन मुध जाजक रआ बेमाइन रआ डिढ़ कराव कनाम?” 5#उठ 22:28पाउलुस ता जबाब एमाःकुवाय, “बोयहा! इञ काइञ सारी केना चि नोंय मुध जाजक हेकेय। धरम पोथी रे ओल एकाना ‘अपन होरकु रिई परधान के निन्दा ओलोम कराविया।’” 6#कु.कामि 26:5; फिलि 3:5पाउलुस नुवां सारी केते चि मरंग पंचेत रे बार दोल हेनाकुवा, आधा सदुकिकु अरो आधा फरीसिकु, इनाते उनी ता जोड़ राव एते मेताःकुवाय। “ए बोयहा इञ फरीसी हेकेञ अरो फरीसी होपोन हेकेञ इञ बिसवास कनिञ चि गोच वनकु एते जुवेत बिरीत कनाकु इना रआ आसरा रआ चलते इञ रे केंस सेसेन काना।” 7पाउलुस रआ नियां राव रे फरीसिकु अरो सदुकिकु रे झामेला उपनेग एना, अरो उनकु रे फुट एनाकु, 8#मती 22:23; मर 12:18; लूका 20:27चिलिमेनचि सदुकी दो नुवां गाम कनाकु, चि ना जुवेत बिरीत, ना सोवारागदूत अरो ना रावा हेनाःआं; मुदा फरीसिकु ता नियां सुबिन मनाव कनाकु। 9नियां रकम एते ओन्डो ढिंढोरा एना। फरीसी गुट रेन आधा धरम पोथी सिखाविकु ता तिंगुवेनाकु, अरो झगराः हेलावेनाकु, “आले नोंय होर रे जहन दोस काले नामलाःआ। जदि जहय रावा चाहे सोवारागदूत उनी लोः जहन्नाः नधनी एकाःआय।” 10झमेला बढ़ाव इदीःकेना अरो पलटन रेन एगवा बोरोय केनाकु चि उनकु पाउलुस के ओलोकु खंडायका, इनाते उनी ता पलटनकु के हुकूम एमाःकुवाय चि उनकु पंचेत रे सेन केते पाउलुस के उनकु रआ ताला एते उडुङ एयपे, अरो छवनी रे इदिइ काकु। 11इना निदा परभु ता पाउलुस लोः नेल इरिएनाय, अरो गामवादेयाय ढिड़ दोहोयमी। आम जरुसलेम रे जे लेका इञ रआ बबेत रे गोवाही एम एकाःआम, आम के इना लेका गी रोम रेहों गोवाही एएम हेनाःआं।
पाउलुस के गोगोच रआ उपाय
12सिंगी होय्येना रे आधा जहुदी जमानाकु, अरो उनकु ता नुवां किरया जोम्मेताकु चि जोब तक पाउलुस के काले गोजेया, तोब तक काले जोम नुयां। 13उनकु रे एते चालीस होर एते ढेर होर पाउलुस के गोगोच रआ उपाय एताकु 14उनकु जाजककु अरो मुधकु रआ हेनात सेन केते गामवाःकुवाकु, आले ता किरया जोम्मेताले चि जोब तक आले पाउलुस के काले गोजेया, तोब तक जहन्नाः काले जोम्मा। 15अपे अरो मरंग पंचेत रेन होर बहना केते पलटनकु रिई मुध एगवा के नुवां खभेर कुल एपे चि अबु पाउलुस के अरो मिसा बुगिन एते जांचावियाबुन। इनाते लेयकेते हिजुःपे, पाउलुस रआ नोन्डो तेबाः एते पहिल गी आले उनी के गोगोच कथिर तेयार हेनालेया। 16पाउलुस रिई भेगना के नियां उपाय रआ पता लगावेना दो अरो उनी ता छवनी सेन केते पाउलुस के इना रआ खभेर एमाःदेयाय। 17पाउलुस ता मिहोर सुबेदार के होहोएदेयाय अरो उनी के गामवादेयाय, “नोंय धिंगाला के पलटनकु रिई मुध एगवा रआ हेनात इदिइपे। नोंय एते उनी के मियाः खभेर एएम हेनाःआं।” 18उनी ता धिंगाला के पलटनकु रिई मुध एगवा रआ हेनात इदिकेते मेताःदेयाय, “साप वनीः पाउलुस ता इञ के होहो एकाःदेञाय, अरो नोंय धिंगाला के आम ठिनुः इदी रआ गोहराव एदेयाय। नोंय के आम एते जहन्नाः गागाम हेनाःआं।” 19पलटनकु रिई मुध एगवा ता उनी रआ ती साप एताय अरो उनी के एकला रे इदिकेते कुलिदेयाय, “आम इञ एते चिलिकाः गागाम चहाःकानाम?” 20धिंगाला ता गामवादेयाय, “जहुदिकु ता नियां गानाम रे मीः मत एनाकु चि उनकु पाउलुस के अरो बुगिन एते कुलियाकु, इना रआ बहना, गापा मरंग पंचेत रे पाउलुस के अगु कथिर आम के गोहराव माकु। 21आम उनकु रआ गानाम ओलोम मनाव वोःओ। उनकु चालीस होर एते ढेर होर पाउलुस रआ तक रे दुरुप एकानाकु। उनकु ता किरया जोम एकाःआकु चि उनकु जोब तक पाउलुस के काले गोजेया तोब तक काले जोम नुयां मेन एकाःआकु, इनाते निमीः उनकु तेयार हेनाकुवा, अरो आम रआ वादा रआ आसरा रे हेनाकुवा।” 22पलटनकु रिई मुध एगवा ता नुवां हुकूम एम केते धिंगाला तके सेनइरी वदेयाय आर आम जहय केहों नुवां ओलोम उदुःवाकुवा चि आम नुवां खभेर इञ के एम एकावादेञाम।
पाउलुस के कयसरिया कुकूल
23तोब पलटनकु रिई मुध एगवा ता बार होर सूबेदार के होहोवेःकिनाय अरो गाम वाःकिनाय, निदा रआ नो बजे तक कयसरिया सिनुः कथिर बार साव पलटन, सतर गो सदोम गाड़ी, अरो बार साव बलम चलाव वनकु के तेयार दोहो कुबेन। 24पाउलुस कथिर हों सदोम जोगाड़ कुपे, जे अपे उनी के बुगिन एते राजपाल फेलिक्स ठिनुः इदी तेबाःएयपे। 25पलटन रिई मुध एगवा ता निया लेका चिट्ठी हों ओल्लेताय 26महामहिम राजपाल फेलिक्स के, कलाउदियुस लुसियास सोझ एते जोहार 27जहुदिकु ता नोंय होर के साप लेदेयाकु अरो उनकु नोंय के गोगोच कथिर वोः केनाकु; मुदा इञ ता अपन पलटानकु लोः ओन्डो तेबाः केते नोंय के छोड़ावेदेयिञ, चिलिमेनचि इञ के पता होय्येना चि नोंय रोमन रिई होर हेकेय। 28इञ नुवां सारी कथिर वोः किनिञ चि नोंय रे चिलकन दोस लगाव कनाकु, इनाते इञ नोंय के उनकु रआ मरंग पंचेत इदिएदेयिञ, 29तोब इञ सोमझावनिञ चि दोस उनकु रआ नियम रआ मोताबिक एते सोबोंध दोहोय कनाय अरो नोंय रे नुंकन जहन आरोप काकु लगाव काना, जे गोगोच बङ रेदो तोलुः लेका हेनाःआं। 30इञ के नुवां खभेर नाम्मेना चि नोंय के गोगोच रआ उपाय कनाकु, इनाते इञ नोंय के एनेनगी आम ठिनुः कुलेयकानिञ। इञ ता नोंय रेन मुदेय केहों हुकूम एम एकावाःकुञ चि उनकु आम रआ हेनात नोंय रआ बिरोध रे अपन गुनाह उदुःएपे। 31हुकूम रआ मोताबिक पलटन ता पाउलुस के इदी एदेयाकु अरो उनी के इना निदा अन्तीपतरिस चट्टी इदी तेबाःएदेयाकु। 32एटाः हिलोः पयदल सेसेन वनकु पलटन ता, सदोम गाड़ी एते पाउलुस के सेनइरी वदेयाकु अरो उनकु छावनी रुवाड़ हेच्चेनाकु। 33सदोम गाड़ी एते कयसरिया चट्टी तेबाः केते, राजपाल के उना चिट्ठी एमाःदेयाय अरो पाउलुस के उनी रआ ती रे सोंपाव कदेयाय 34राजपाल ता चिट्ठी पोड़हाव केते पाउलुस के कुलिदेयाय चि आम करा राइज रिई हेकेम उनी सारीएताय चि उनी किलिकिया इलाका रिई हेकेय, 35दो उनी ता गामवादेयाय, “जोब आमरेन मुदेय हों तेबाःआकु, तोब आम रआ ओनाविञ।” अरो उनी ता पाउलुस के हेरोदेस रआ बंगला रे पलटनकु के पहरा एएम कथिर हुकूम एमाःकुवाय।
Currently Selected:
कुलवानकु.कामि 23: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
