कुलवानकु.कामि 25
25
कयसर ठिनुः इञ रआ फयसाला इरी वपे
1इलाका रे तेबाः रआ पेय हिलोः तयनोम फेस्तुस कयसरिया चट्टी एते जरुसलेम तेबाःएनाय। 2-3इमिन रे मरंग जाजककु अरो जहुदी नेताकु ता फेस्तुस ठिनुः, पाउलुस के नालिस कराव कथिर हेच्चेनाकु। उनकु ता फेस्तुस एते नियां गोहराव एदेयाकु चि उनी पाउलुस के जरुसलेम अगु रआ दयायाकु, चिलिमेनचि उनकु होरा रे पाउलुस के गोगोच रआ उपाय एकेनाकु 4मुदा फेस्तुस ता नुवां जबाब एमाःकुवाय, “पाउलुस कयसरिया चट्टी रआ जेहेल ओड़ाः रे हेनाया। अरो इञ एनेन गी कयसरिया चट्टी सिनुःकानिञ, 5इनाते अपे रेन मुध एगवाकु इञ लोः सेनपे। जदि उनी होर ता जहन कसुर एकाःआय, रेदो अपे उनी रे नालिस एपे।” 6फेस्तुस ढेर एते ढेर आठ-दस हिलोः उनी ठिनुः तही केते कयसरिया तोराया अरो एटाः हिलोः नेयाय रआ गदी रे दुरुप केते पाउलुस के होहो कुलेःकुवाय। 7जोब पाउलुस हेच्चेनाय, दो जरुसलेम एते हेचवान जहुदी बेचोट मरंग नालिस लगाव वते उनी रआ चइरो ओइर तिंगुएनाकु, मुदा उनकु सबुद काकु एम दड़िवाता 8पाउलुस ता जबाब एमाःकुवाय, “इञ, न दो जहुदिकु रआ नियम रआ बिरोध रे जहन कसुर एकाःइञ, न मरंग बिनती ओड़ाः अरो न रोम रिई महाराजा कयसर रआ बिरोध रे।” 9मुदा फेस्तुस ता जहुदिकु के खुस कराव कथिर पाउलुस के कुलिदेयाय, “चिलि आम जरुसलेम सिनुः रआ तेयार मेनामा, जे ओन्डो इञ रआ लहा रे नियां गानाम रआ बबेत रे आम रआ फयसाला कराविञ?” 10पाउलुस ता जबाब एमाःदेयाय, “इञ रोम रिई महाराजा कयसर रआ नेयाय रआ गदी रे तिंगु कनिञ। इञ रआ फयसाला नेंडे गी होयुः चही। आम बुगिन एते सारी कनाम चि इञ जहुदिकु रआ बिरोध जहन्नाः काइञ कसुर एकाःआ 11जदि इञ ता जीव गवांव लेका जहन कसुर एकाःइञ, रेदो इञ के गोजेञपे, मुदा काइञ बोरोय काना। मुदा जदि नोकु रआ नालिस रे जहन सत बनुःआं, रेदो जहय इञ के नोंय रआ ती रे काकु सोंपाव दड़िवाञा। इञ रोम रिई महाराजा कयसर रआ मुध कछेरी रे सिनुः कथिर गोहराव कनिञ।” 12फेस्तुस ता पंचेत रे नधनी-गापम केते जबाब एमाःकुवाय, “आम रोम रिई महाराजा कयसर रआ मुध कछेरी रे सिनुः कथिर गोहराव एकानाम इनाते आम के रोमी महाराजा ठिनुः इदी मले।”
राजा अगरिपा ठिनुः पाउलुस
13आधा हिलोः रआ तयनोम राजा अगरिपा अरो बेरनिस कयसरिया तेबाःएनाकिन अरो फेस्तुस के सोवागत कथिर हेच्चेनाकिन। 14उनकु ओन्डो बेचोट हिलोः तहिनाकु, तोब मीः हिलोः फेस्तुस राजा एते पाउलुस रआ बबेत रे नुंका नधनी लाःआय चि नोन्डो मिहोर होर हेनाया, उनी के फेलिक्स ता जेहेल ओड़ाः रे बागी केते तोराया। 15जोब इञ जरुसलेम सेन किनिञ दो जहुदिकु रेन मरंग जाजककु अरो एगवाकु ता उनी रे नालिस एदेयाकु अरो अरजी एदेयाकु चि उनी के दंड एमायपे। 16इञ जबाब एमापेकानिञ, जोब तक कसुरवार के मुदेय रआ सामने काकु तिंगु कुवा अरो उनकु के कसुरवार रआ बबेत रे सफाइ एएम रआ मोका का नमुःआ, तोब तक कसुरवार के उनी रआ ती रे सोंपव कथिर रोमन रेनकु रआ परथा बनुःआं 17इनाते जोब उनकु नोन्डो हेच्चेनाकु, दो इञ काइञ देरी कराव रिगी एटाः हिलोः गी नेयाय रआ गदी रे दुरुप केते उनी होर के होहो कुलेःदिञ। 18मुदा कसुरवारकु ता उनकु रआ बिरोध रे नुंकन जहन बुराइ काकु लगाव लाःआ जे इञ सोंचाव किनिञ। 19उनी के सिरीफ अपन धरम एते मिल-जुल केते जहन गानाम रे अरो ईसु लुतूम होर रआ बबेत रे उनी के झामेला तहिकेना। अरो ईसु जे गोच चुकाव केनाय, मुदा पाउलुस मेताय केनाय चि उनी जुवेत गियाय। 20इञ नियां रेनाटेटा अयुम केते काइञ सोमझावकेना। इनाते इञ पाउलुस के कुलिदेयिञ चि चिलि आम जरुसलेम सिनुः रआ तेयार हेनामा, जे ओन्डो नियां गानाम रआ बबेत रे आम रआ फयसालायिञ। 21मुदा पाउलुस ता गोहराव वेःकुवाय चि रोम रिई महाराजा कयसर रआ फयसाला होयुः तक उनी के जेहेल ओड़ाः रे तही इरीवायपे। इनाते इञ ता हुकूम एमाः कुविञ चि जोब तक इञ उनी के रोमी राजा ठिनुः काइञ कुलेया तोब तक उनी जेहेल ओड़ाः रिगी तहीःकाय 22अगरिपा ता फेस्तुस के गामवादेयाय, “इञ हों उनी होर रआ गानाम ओनाव चहाः कनिञ।” फेस्तुस ता मेनताय, “आम गापा ओनाव इगियाम।” 23एटाः हिलोः अगरिपा अरो बेरनिस ता बुगिन एते साम्पार केते हेच्चेनाकिन, अरो पलटन रेन मरंगकु अरो चट्टी रेन मुध होरकु लोः कछेरी रे बोलोनाकिन। फेस्तुस रआ हुकूम एते पाउलुस के हजिर एदेयाकु। 24फेस्तुस ता मेन्नेताय, “महाराजा अगरिपा अरो ओन्डो हजिर होर! अपे नोंय होर के नेलेयपे, जेकर बबेत रे जरुसलेम रेहों अरो नोन्डो हों सुबिन जहुदी सामाज उनी रआ खोनोस रे सिकेत एदेयाकु अरो जोड़ राव एते कुर्री ताकु चि नोंय होर निमीः जुवेत तहीः लाइख बनुः इचाय। 25मुदा इञ ता नोंय के गोगोच रआ लेका जहन कसुर काइञ नामलाःआ अरो जोब नोंय ता रोमी महाराजा एते फयसाला कराव इरी कथिर गोहराव एनाय दो, इनाते इञ ता नोंय के कुकुल कथिर निचित इतिञ। 26मुवार के नोंय रआ बबेत रे जहन ओओल रआ जहन निचित गानाम इञ ठिनुः बनुःआं इनाते इञ नियां रआ आसरा एते अपे रआ लहा, अरो राजा अगरिपा बिसेस रुप एते आम रआ लहा नोंय के हजिर एकाःदिञ, जे नोंय के कुली तयनोम इञ के जहन ओओल कथिर जहन्नाः नमुःआं। 27चिलिमेनचि मिहोर कयदी के जहन बेगुनाह रआ खोनोस लगाव रे, कयसर ठिनुः कुकूल इञ के उचित का अटकारेना।”
Currently Selected:
कुलवानकु.कामि 25: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
