कुलवानकु.कामि 27
27
पाउलुस के रोम चट्टी रे कुकुल
1जोब नुवां निचित एना चि अबुन दाः जहाज एते इटली दिसुम सिनुः अबुन, दो पाउलुस अरो एटाः जेहेल ओड़ाः वनकु के अगुस्तुस पलटन रिई जुलियुस लुतूम मरंग अधिकारी रआ ती रे सोंपाव कदेयाकु। 2आले एसिया रआ अतोम-अतोम सिनुः आनाः अदनामुतियुस चट्टी रआ मियाः दाः जहाज रे देच केते चइल्लेताले। मकिदुनिया दिसुम रआ थिस्सलुनिके चट्टी रिई तहीः वनीः अरिस्तर्खुस लुतूम मिहोर बिसवासी हों आले लोः तहिकेनाय 3एटाः हिलोः आले सयदा तेबाः एनाले, जुलियुस ता पाउलुस एते बुगिन बेवहार एकेनाय, इनाते उनी ता पाउलुस रेन गातिकु एते नपाम्मेनाय अरो उनी रआ सेवा-सतकार कराव रआ हुकूम एमाःदेयाय। 4आले ओन्डो एते कुपरुस टापू रआ अतोम-अतोम होयकेते तोरालेया चिलिमेनचि अंधगुंधाव होयो तहिकेना। 5इना तयनोम आले किलिकिया इलाका अरो पमफुलिया इलाका रआ हेनात समुदर एते होयकेते लुकिया इलाका रआ मीरा बंदरगाह लुतूम चट्टी तेबाःएनाले। 6ओन्डो सुबेदार के सिकन्दरिया चट्टी रआ मियाः दाः जहाज इटली दिसुम सिनुः वनाः नाम्मेना अरो उनी ता आले के उना रे देच काःलेयाय। 7आले बेचोट हिलोः तक असतिर एते लहा बड़हाव वते मसकिल एते कनीदुस चट्टी तेबाःएनाले। अंधगुंधाव होयो तहिकेना, इनाते आले सलमोने चट्टी रआ हेनात एते होयकेते केरेते रआ दछिन रआ अतोम-अतोम एते तोरालेया 8मसकिल एते लसया चट्टी रआ हेनात बुगिन एते दाः जहाज घाट लुतूम ठांव तेबाःएनाले। 9बेचोट समेय बिताव चुकाव केना अरो समुदर रे यातरा इमिताः खतरा तहिकेना। अरो उपास रआ हिलोः हों बिताव चुकाव केना, इनाते पाउलुस ता उनकु के नुवां गाम केते सोमझाव वेःकुवाय, 10“ए बोयहाकु! इञ नुवां सारी कनिञ चि निमीः दाः जहाज लहा बड़हाव बेचोट मसकिल गिया। सिरीफ समान अरो दाः जहाज बङा, मुदा अबुन रआ जीव हों नास्सोःओ।” 11मुदा सुबेदार के पाउलुस रआ गानाम रआ अलावे कप्तान अरो दाः जहाज रेन मुवार रआ गानाम ता बाइढ़ केते मनाव वेनाकु। 12उना दाः जहाज घाट रे रबंङ बिताव कथिर उपाय हों का तहिकेना, इनाते बेचोट होर ओन्डो एते सेन जोन रआ फेरा रे तहिकेनाकु। उनकु के जहां लेका ते फिनिक्स तक तेबाः रआ अरो ओन्डो रबंङ एते बनचाः रआ आसरा तहिकेना। फिनिक्स केरेते रआ दाः जहाज घाट हेके, जे दछिन-पछिम अरो उतर पछिम रआ सोझ एते होयो सेसेन केना।
समुदर रे आंधी
13जोब दछिन एते सुलसुली होयो हिजुःहेलावेना, दो उनकु सोमझाव एनाकु चि अबु रआ कामि बाय्येना अरो लंगर#27:13 लोहा, डोरी एते तोल केते समुदर रे उयुः ककानाकु, उनागी लंगर हेके उठाव केते केरेते टापू रआ अतोम-अतोम लहा बड़हावेनाकु 14मुदा एनेन गी टापू सोझ एते “उतर पुरुब” लुतूम मरंग आंधी होयो चलावेना। 15आंधी होयो हेच केते दाः जहाज रे तकिच्चेना, अरो उना बेचोट जोड़ आंधी तहिकेना चि आंधी रआ चलते लहा सिनुः बेचोट मसकिल तहिकेना। इनाते जाने आंधी होयो इदिइ केनाय इना सोझ गी सेनइरी वताकु। 16आले कलोदा लुतूम रआ मियाः हुडिञ टापू रआ छेका-छेका अतु वते बेचोट मसकिल एते जीव बनचाव केते आर डोंगा तहों हुडिञ गी तहिकेना, उना सम्भराव एताले। 17उनकु उना चेतान ओर एताकु अरो जहाज ता लतार एते चेतान तक बरही एते सकताव केते तोल कताकु। सुरतीस टापू रआ गितिल रे गेड़यावेना ते बोरोय एते उनकु ता तिरपाल अरगु केते, जहाज ता दाः एते अतु इरीवाताकु। 18एटाः हिलोः आंधी आले के जोड़ एते झाकझोराव वेःलेयाय, इनाते जे समान, दाः जहाज रे तहिकेना उना समुदर रे लेबदा गिड़ी हेलावेनाले, 19अरो पेय हिलोः हों उनकु ता जहाज रे बबय वनाः समान हों ती एते लेबदा गिड़ी हेलावेनाकु। 20बेचोट हिलोः तक सिंगी बोंगा काय नेल केनाय, अरो इपिल हों, अरो अंधगुंधाव आंधी होयो हिजुः चित तहिना, दो आले रआ बनचाव वोः रआ आसरा चबाउतार केना। 21उनकु ढेर घरीक एते जहन्नाः हों काकु जोम लाःआ, इनाते पाउलुस ता उनकु रआ ताला रे तिंगु केते गाम वाःकुवाय, “ए होरकु अपे के इञ रआ गानाम मनाव केते केरेते टापू एते सिनुः का तहिकेना। तोब अपे कपे तकलिब वोःओ होनांङ। 22निमीः हों इञ अपे के डिढ़ बयुः रआ अरजी पेकानिञ। अपे रे एते जहय रआ जीव का नास ओःओ, बलकी दाः जहाज नास ओःओ; 23चिलिमेनचि इञ जे परमेसर रिई हेकेञ, अरो जेकर सेवा-सुसार वेयकानिञ, उनी रिई सोवारागदूत बिताव निदा इञ एते नेल इरिएनाय 24अरो उनी ता इञ के गामवादेञाय, पाउलुस ओलोम बोरोया, आम के कयसर रआ लहा हजिर वोः हेनाःआं, अरो परमेसर ता अपन किरपा एते एम एकावाःमाय, जे आम लोः सेसेनकानाकु, उना दया परमेसर ता एमका वाःपेयाय। 25इनाते ए बोयहा डिढ़ दोहोयपे। इञ के परमेसर रे बिसवास हेनाःआं चि जेलेका इञ के गाम्मेकावादेञाय इना लेका गी होयुःआ, 26मुदा अबु रआ दाः जहाज सरिगी जहन टापू रआ हेनात रे तकिच केते हुचाः जोना।”
दाः जहाज रआ हुचाःवोः
27अरो जोब चोवदा निदा हेच्चेना, अबु अदरिया टापू रआ समुदर रे अनते-नोनतो अतु इदीः केनाबुन। लगेभगे आधा निदा झोराकु अटकार एताकु, चि अबु गितिल रआ हेनात तेबाः वोः कनाबुन। 28उनकु ता ठहावेताकु दो, बीस पुरसा गाड़हा नाम्मेताकु, अरो मीःजंग लहा बड़हाव, केते अरो ठहावेताकु दो, पोंदरो पुरसा गाड़हा नाम्मेताकु। 29उनकु बोरोय केनाकु चि जहन ठिनुः अबु चटाइन रे ओलो तकिच वोःकाबुन; इनाते उनकु तयनोम हिसा रे चाइर गो लंगर दाः रे उयुः एताकु, अरो जहां लेका एते आंगाः रआ चहाः हेलावेनाकु। 30झोराकु दाः जहाज एते निनिर कथिर वोः केनाकु, इनाते उनकु ता दाः जहाज रआ लहा हिसा, आधा लंगर लगाव कथिर रआ बहना एते जीव बनचाव वनाः डोंगा ता दाः रे अरगु कताकु 31नियां रे पाउलुस ता पलटनकु रिई एगवा अरो पलटनकु के गामवाःकुवाय, “जदि नोंकु दाः जहाज रे काकु तहिलेन रेदो, अपे हों कपे बनचाव ओःओ।” 32नियां रे पलटनकु ता दाः जहाज रे तोल खुंटाव वनाः डोंगा रआ डोरी माः सीत केते उना समुदर रे अतु इरी वताकु। 33जोब मसकल इदीःकेना रे पाउलुस ता सुबिन एते गोहराव वेःकुवाय, चि “अपे के आसरा नेल-नेल रआ अरो रेगेंच एते तही केते चोवदा हिलोः होय्येना। 34इनाते इञ अपे के जोजोम कथिर गोहराव पेकानिञ। चि नियां रे अपे रआ उद्धार होयुःआ। अपे जहय रआ मियाः उप हों का बंका नोःओ।” 35पाउलुस ता इमिनुः गाम केते अरो पिठा साप एताय आर सुबिन होर रआ सामने परमेसर के धेनयाबाद एमाःदेयाय, अरो पिठा खेचाः केते जोजोम हेलावेनाय, 36तोब उनकु सुबिन रआ हिम्मत बड़हावेना अरो उनकु ता हों जोजोम आनाः जोम्मेताकु, 37जहाज रे आले सुबिन मिलाव केते बार साव छेहातर होर तहिकेनाले। 38जोब सुबिन जोम केते बी एनाकु, दो उनकु ता जहाज लवार वोः कथिर अनाज ता समुदर रे लेबदा गिड़ी कताकु।
दाः जहाज ता तबाह चबाएना
39जोब अंगाना रे उनकु उना दिसुम काकु चिनहाव दड़िवाता, मुदा समुदर रआ अतोम गितिल नेल केते उनकु बिचार कराव हेलावेनाकु चि जदि होय दड़ीः रेदो दाः जहाज ता इना अतोम रे टेकावियाबुन। 40इनाते उनकु लंगर रआ डोरी ता खंडा केते समुदर रे बागी कताकु। अरो इमिताः गी डपठु रआ बरही डोरी हों रड़ा कताकु। अरो होयो ता दाः जहाज लहा इदी कथिर, दाः जहाज रआ लहा रआ तिरपाल रिम काताकु, अरो अतोम सोझ चइल एताकु। 41मुदा दाः जहाज गितिल रे गेड़यावेना अरो लहा हिसा नुंका फंसावेना चि तयनोम हिसा दाः हलका एते तकिच केते हुचाः वोःहेलावेना। 42नुंका ओलो होयुःका चि कयदी पयराव वते निर जोनाकु, इनाते पलटनकु उनकु के गोगोच रआ जोजना बायेताकु। 43मुदा पलटनकु रिई सूबेदार ता पाउलुस के बनचाव रआ बिचार एते उनी के रोकाव एदेयाय, अरो हुकूम एमाःदेयाय, चि जे पयराव दड़िवाःआकु, उनकु पहिल समुदर रे जेहेत केते अतोम रे पवराव उडुङ ओःओकु। 44अरो बनचाव होर ता पटरा अरो जहाज रआ जहन एटाः जिनिस रआ देंगा ते अतोम हेच जोनपे। नियां रकम सुबिन बुगिन एते अतोम तेबाःएनाकु।
Currently Selected:
कुलवानकु.कामि 27: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
