जोहन 11

लाजर रआ गोनोच

1 # लूका 10:38,39 बयतनियाह हातु रे तहीः वनीः लाजर लुतूम मनवां हासु केनाय, मरियम अरो उनी रिई मिसी तेः मरथा रआ हातु बयतनियाह तहिकेना। 2#जोह 12:3नोय उनी मरियम तहिकेनाय, जे परभु रे सोः सुनूम ओजोः केते उनी रआ बका, अपन उप एते जोत लाःआय इनी रिई बोयहा तेः लाजर हासु केनाय। 3इनाते दाय तेः तिकिन ता ईसु ठिनुः खभेर कुल एताकिन, “परभु आम रिई दुलारा लाजर हासु एकानाय।” 4ईसु ता खभेर ओनाव केते मेताःकिनाय, “नुवां हासु गोजुः कथिर बङा, बलकी परमेसर रआ महिमा कथिर हेच्‍चेकाना, नियां दोवासते परमेसर रिई होपोन हेरेल रआ महिमा होयुःआ।” 5ईसु, मरथा अरो उनी रिई मिसी तेः मरियम अरो लाजर एते दुलार एकेनाय 6जोब ईसु ओनावेताय चि लाजर हासु एकानाय, रेहों गी जे ठांव रे उनी तहिकेनाय, ओन्डो बार हिलोः अरो तहिएनाय। 7मुदा इना तयोम ईसु ता अपन चेलाकु के मेताःकुवय, “हिजुःपे! अबु अरो जहुदिया पोरदेस सिनुःआबुन।” 8चेलाकु ता मेताःदेयाकु, “गुरु! होला मंहदेर गन गिचो आम के जहुदिकु दिड़ी एते चपात गोगोच कथिर वोः केनाकु अरो आम एंडेगी सिनुः चहाः कनाम?” 9ईसु जबाब एमाकुवाय, “चिलि सिंगी रआ बारो घंटा का होयुः काना? जे सिंगी रे सेन कनाय, उनी काय तोहोत वोःकानाय चिलिमेनचि उनी दुनिया रआ मसकल नेल कनाय, 10मुदा जे निदा सेन कनाय, उनी तोहोत वोःकानाय चिलिमेनचि उनी रे मसकल बनुःआं।” 11इना तयोम ईसु ता उनकु के मेताःकुवय, “इञ रिई गातिञ लाजर गितीच एकानाय, इञ उनी के चेहाव सिनुःकानिञ।” 12चेलाकु ता मेताःदेयाकु, “परभु! जदि उनी गितीच एकान रेदोय बुगी नोःओय।” 13ईसु ता लाजर रआ गोनोच रआ बबेत रे गाम लाःआय, लिकिन उनी रेन चेलाकु ता सोमझाव एनाकु चि उनी नींद रआ बबेत रे गाम एकेनाय। 14तोब ईसु ता उनकु के सफा-सफा गाम वाःकुवाय, “लाजर गोच एकानाय। 15इञ अपे रआ चलते खुस हेनाञा चि इञ ओन्डो काइञ तहिकेना, जेकर एते अपे बिसवास कराव दड़िवाःआपे, हिजुःपे अबु उनी ठिनुः सिनुःआबुन।” 16इनाते थोमा जे जुड़वा गमुःकेनाय, अपन गाति चेलाकु के मेताःकुवय, “देलाबुन अबु हों उनी लोः गोजुः सिनुःआबुन।”

ईसु अरो जुवेत बिरीत कराव वनीः अरो का मुडूः जीवन एएम वनीः

17ओन्डो तेबाः ता ईसु के पाता लगावेना चि लाजर के मरघाटी रे दोहो केते चाइर हिलोः होय केना। 18बयतनियाह जरुसलेम एते मीः कोस लगेभगे संगिञ तहिकेना। 19बेचोट एते जहुदिकु मरथा अरो मरियम ठिनुः उनकिन रिई बोयहा तेः रआ गोनोच रे भोरसा एएम कथिर हेच केनाकु। 20जेंवगी मरथा ता नुवां अयुम्मेताय चि ईसु हिजुः कनाय मरथा ईसु लोः नपामवोः तोराया मरियम ओड़ाः रिगी दुरुप तहिएनाय। 21मरथा ता ईसु के मेताःदेयाय, “परभु! जदि आम नोन्डो तहिलेन रेदोम, अलिञ रिई बोयहा काय गोजुःआय होनांङ। 22अरो इञ सारीइ कनिञ चि आम निमीः हों परमेसर एते जे गी कोवेयाम परमेसर इनागी एमामाय।” 23ईसु ता मरथा के मेताःदेयाय, “अबेन रिई बोयहा जुवेत बिरीताय।” 24मरथा ता ईसु के मेताःदेयाय, “इञ सारीइ कनिञ चि मुडूः रआ हिलोः रे जुवेत बिरीतोः समेय उनी जुवेत बिरीताय।” 25ईसु ता मेताःकुवय, “जुवेत बिरीतोः अरो जीवन इञ गी हेकेञ, जे इञ रे बिसवास इयाय, उनी गोजुःआय रेहों जुवेतोःओय, 26जे इञ रे बिसवास कराव वते जुवेत वोः कनाय, उनी केहयो काय गोजुःआय। चिलि नुवां रे आम बिसवास कनाम?” 27मरथा ता जबाब एमाःदेयय, हें परभु! इञ बिसवास कनिञ चि आम उनी मसी परमेसर रिई होपोन हेरेल हेकेम, जे दुनिया रे हिजुःवानीः हेकेम।

ईसु ता इयाम्मेताय

28नुवां गाम केते मरथा तोराया, अरो अपन मिसी तेः मरियम के होहो केते हपे-हपे मेताःदेयाय, “गुरु नोन्डोय गिया अरो आम के होहो मिकानाय।” 29नुवां अयुम तागी मरियम एनेन गी बिरीत केते ईसु ठिनुः तोराया। 30ईसु निमीः तक हातु काय तेबाः केनाय, ईसु इना ठांव रे तहिकेनाय जे ठिनुः मरथा ईसु लोः नपाम केनाय। 31तोब जे जहुदिकु ता मरियम लोः ओड़ाः रे तहिकेनाकु, उनी के डिढ़ एमाय केनाकु, नुवां नेल केते एनेन गी टांड़ी तोराया, नुवां सोमझावेनाय चि उनी इयाम कथिर मरघाटी रे सिनुः कनाय तोरांङ, इनाते मरियम ईसु रआ तयोम एनाय, 32मरियम उना ठांव तेबाःएनाय, जे ठिनुः ईसु तहिकेनाय। ईसु के नेल तागी मरियम उनी रआ बका ठिनुः उकरुम केते मेताःदेयाय, “परभु! जदि आम नोन्डो तहिलेन रेदोम इञ रिई बोयहा काय गोजुःआय होनांङ।” 33जोब मरियम अरो उनी लोः हेच वन अरो जहुदिकु के इयाम नेल केते, ईसु ता रावा रे हेदयाव एनाय अरो बेचोट बेयाकुल एनाय। 34अरो गाम वाःकुवाय, “अपे उनी के कारे दोहो एकाःदेयापे” उनकु ता मेताःदेयाकु, “परभु! हिजुःमी अरो नेलेयमी।” 35ईसु इयाम्‍मेताय, 36तोब जहुदिकु गापाम हेलावेनाकु, “नेलेयपे ईसु लाजर के चिमीनुः दुलार एयकेनाय।” 37मुदा थोड़गन होर गाम एकेनाकु, “ईसु दो अंधरा रआ मेत रड़ा लाःआय चिलि ईसु लाजर के गोनोच एते काय बनचाव दड़िवायाय होनङ?”

ईसु लाजर के जुवेत बिरीत एदेयाय

38ईसु अरो बेयाकुल केते मरघाटी ठिनुः हेच्‍चेनाय। उना मरघाटी मियाः भुलकाः तहिकेना, उना रआ मुहानी रे मियाः मरंग दिड़ी एते हन्डेत लाःआकु। 39ईसु ता मेताःकुवय, “दिड़ी ओचोःएपे।” गोच वनीः रिई दाय तेः मरथा ता ईसु के मेताःदेयाय, “परभु! तिहिञ दो चाइर हिलोः होय्येना, सो हिजुः काना तोरांङ।” 40ईसु ता मरथा के जबाब एमाःदेयय, “इञ आम के नुवां काइञ गाम वाःमिकेना चि जदि आम बिसवास इयाम रेदो परमेसर रआ महिमा नेलाम?” 41तोब उनकु उना दिड़ी ता ओचोः कताकु। ईसु चेतान नेल केते गाम्‍मेताय, “ए आपुञ इञ आम के धेनयाबाद मिकानिञ चि आम इञ रआ ओनाव एताम, 42इञ सारीइ किनिञ चि आम इञ रआ सोबदिन ओनाव कनाम, मुदा इञ आसे-पासे रे तिंगु वनकु रआ चलते गी नुंका गाम्‍मीतिञ, जेकरते उनकु बिसवासियाकु चि आम इञ के कुल एकाःदेञाम।” 43इमिनुः गाम तयोम ईसु ता जोड़ राव एते होहो एदेयाय, ए लाजर टांड़ी उडुङ हिजुःमी! 44गोच वनीः टांड़ी उडुङ एनाय उनी रआ ती बका कफन एते तोल केना अरो उनी रआ मोचा रे गमछा एते लेपटाव लेदेयाकु ईसु ता मेताःकुवय, “नोय रआ तोनोल रड़ा कपे अरो नोय के सेन इरीवायपे।”

ईसु के गोगोच रआ उपाय

(मती 26:1–5; मरकुस 14:1,2; लूका 22:1,2)

45जे जहुदिकु मरियम ठिनुः हेच केनाकु, उनकु चकरीत कामि नेल केते उनकु रे एते बेचोट एते होर ईसु रे बिसवास एताकु। 46मुदा उनकु रे एते आधा होर ता सेन केते फरीसिकु के उदुःवाःकुवाकु चि ईसु ता चिलिकाः कराव लाःआय। 47तोब मुध जाजक अरो फरीसिकु ता मरंग पंचेत होहो केते गाम्‍मेताकु, “अबु चिलियाबु? उनी मनवां बेचोट एते चिनहा-चकरीत कामि देखाव कनाय। 48जदि अबु ईसु के नुंका गी बागी काय रेदोबुन, सुबिन होर उनी रे बिसवासियाकु अरो रोमन रेन होर हेच केते अबुन रआ ठांव अरो अबु रआ जाइत ता नठाव इयाकु।” 49उनकु रे एते मिहोर ता, जेकर लुतूम कयफा तहिकेना अरो उना बरीस मुध जाजककु रिई मरंग जाजक तहिकेनाय, उनकु के मेताःकुवाय, “अपे जहन्‍नाः कपे सारीइकाना, 50अपे नुवां कपे सोमझाःकाना चि अबुन रआ भलाय नोय रे हेनाःआं चि होरकु कथिर मिहोर मनवां गोजुःआय अरो सुबिन जाइत ओलोकु नठाव वोःका।” 51जाजक ता नुवां गानाम अपन सोझ एते काय गाम। उनी ता उना बरीस मुध जाजककु रिई मरंग जाजक रआ रुप रे आगमजानी एताय चि ईसु जहुदिकु रआ जाइत कथिर गोजुःआय, 52अरो ना सिरीफ जाइत कथिर बलकी इनाते चि ईसु, परमेसर रेन छितिर-बितिर वन होपोन के जमा कुवाय। 53इना हिलोः एते गी उनकु ईसु के गोगोच रआ उपाय एताकु।

54इनाते ईसु ता इमिन एते जहुदिकु रआ ताला रे दिसतार रुप एते हिजुः-सिनुः बोंध एताय। ओन्डो एते टोंगरी हेनात पोरदेस रआ इफराइम लुतूम मियाः चट्टी तोराया। अरो अपन चेलाकु लोः एंडेगी तहीः हेलावेनाय।

55जहुदिकु रआ पसका पोरोब हेनात तेबाः केना, बेचोट एते होर पसका पोरोब एते पहिल सुधिकरन#11:55 सुधिकरन परमेसर रआ नजेर रे सुध केते पसका पोरोब मनाव कथिर थोड़ हिलोः पहिल जरुसलेम मरंग बिनती ओड़ाः सिनुः केनाकु, अरो अपन के रिति बिधी रआ मोताबिक सुध वोः केनाकु। रआ रिति-रिवाज कराव कथिर हातु एते जरुसलेम हेच्‍चेनाकु। 56-57मुध जाजककु अरो फरीसिकु ता ईसु के सासप रआ मोतलोब एते नुवां हुकूम एमाःकु केनाकु चि जदि जहय होर ईसु कारे मेनायां, उना उदुःएकाय। इनाते होर ईसु के दंड़ाय केनाकु अरो मरंग बिनती ओड़ाः रे अकु-अकु गाम एकेनाकु, “आम रआ चिलि बिचार हेनाःआं? चिलि ईसु पोरोब मनाव काय हिजुः कनाय?”

Currently Selected:

जोहन 11: BIY

Highlight

Copy

Compare