जोहन 15

इञ सत अंगुर नाड़ी हेकेञ

1“इञ सचा अंगुर नाड़ी हेकेञ, अरो इञ रिई आपुञ खेतयार हेकेय। 2जे नाड़ी इञ रेया अरो का जोःकाना, उना, उनी माः कनाय, अरो जे नाड़ी रे जोःकाना उना छंटाव कनाय ताकि अरो जो नोःओ। 3इञ अपे के, जे सिख एम एकावाःपिञ, उना रआ चलते अपे पहिल गी सुध एकानापे। 4अपे इञ रे बाय तहीःपे अरो इञ अपे रे बाय तहिनोःओञ। जे लेका नाड़ी जदि अंगुर नाड़ी रे बनाल का तहीः रेदो अपन एते का जो नोःओ इना लेका गी अपे हों जदि इञ रे बनाल कपे तहिनोःओ रेदो अपे हों, जो कपे अगु दड़िवाःआ 5इञ अंगुर नाड़ी हेकेञ अरो अपे नाड़ी हेकेपे, जे इञ रे बनाल तहीः कनाकु अरो इञ जेकर रे बाय तहीः कनिञ, उनकु गी बेचोट फलाः कनाकु, चिलिमेनचि इञ एते अलगे तही केते अपे जहन्‍नाः हों कपे कराव दड़िवाःआ। 6जदि जहय इञ रे बनाल काकु तहीः कनरेदो, उना रोहोड़ नाड़ी लेका गिड़ी ककानाकु अरो रोहोड़ कोःकाना इमिन रे नुंकन नाड़ी, हविर जमा केते ओन्डोर ककानाकु। 7जदि अपे इञ रे बाय तहीः कन रेदोपे अरो अपे रे इञ रआ बचन बाय तहीः कन रेदो जे चहाःआपे कोयइयापे, उना अपे के एमापिञ। 8इञ रिई आपुञ रआ महिमा नियां एते होयुःआ चि अपे बेचोट फोल अगुयापे, तोब अपे इञ रेन चेला बनाल तहीः दड़िवाःआपे, 9जे लेका आपुञ इञ के दुलार एदेञाय, इना लेका गी इञ हों अपे के पेयार वेःपिञ। अपे इञ रआ दुलार रे बाय तहीःपे। 10जदि अपे इञ रआ हुकूम दोहोय रेदोपे इञ रआ दुलार रे बाय तहीःआपे। इञ हों आपुञ रआ हुकूम दोहोतिञ अरो उनी रआ दुलार रे बाय तहीः कनिञ। 11इञ अपे के नुवां इनाते गाम्‍मेकावाःपिञ चि इञ रआ आनाद अपे रे बाय तहीःका, अरो अपे रआ आनाद पुराःका।

12 # जोह 13:34; 15:17; 1 जोह 3:23; 2 जोह 1:5 “इञ रआ हुकूम नुवां हेके, जे लेका अपे के इञ दुलार पेकानिञ इना लेका गी अपे हों अनी-नोय के दुलार कुपे। 13नुवां एते मरंग दुलार जहय रआ बनुःआं चि जहय अपन गाति कथिर अपन जीव एम्‍माय। 14जदि अपे इञ रआ हुकूम मनाः कन रेदोपे अपे इञ रेन गाति हेकेपे। 15निमीः एते अपे के इञ बन्धुवा काइञ मेतापेया। बन्धुवा काय सारीइ कनाय चि उनी रिई मुवार चिलिकाः कराव वनीः हेनाचा। इञ अपे के गातिञ गाम एकावाःपिञ चिलिमेनचि इञ अपन आपुञ एते जे-जे ओनाव एकाःइञ उना सुबिन अपे के उदुः एकावाःपिञ। 16अपे इञ के कपे सला एकाःदेञा, बलकी इञ अपे के इनाते सला एकाःपिञ अरो बहाली एकाःपिञ चि अपे सेन केते फोल अगुइपे, अपे रआ फोल बाय तहिनोःओ ताकि अपे इञ रआ लुतूम अगु केते आपु एते जे गी कोवेयापे, उनी अपे के इनागी एमापेयाय 17इञ अपे के नुवां हुकूम एमा पेकानिञ अनी-नोय के दुलार कुपे।

दुनिया रआ बाइर

18“जदि दुनिया रेन होर अपे के बाइर पेयाकु दो ओयहर दोहोयपे चि अपे एते पहिल उनकु, इञ एते बाइर दोहोवेताकु। 19जदि अपे दुनिया रेन होर तहिलेन रेदोपे दुनिया रेन होर अपे के अपन सोमझाव केते दुलार पेयाकु होनङ, मुदा अपे दुनिया रेन होर बङ हेकेपे, चिलिमेनचि इञ अपे के दुनिया रे एते सला एकाःपिञ। इनाते दुनिया रेन होर अपे एते बइर दोहोय कनाकु। 20#मती 10:24; लूका 6:40; जोह 13:16इञ अपे के जे गानाम मेताःपिञ, उना ओयहर दोहोयपे, बन्धुवा अपन मुवार एते मरंग बनुः इचा। जदि उनकु ता इञ के सताव एदेञाकु, दो उनकु अपे केहों सताव पेयाकु। जदि उनकु ता इञ रआ गानाम मनावियाकु दो उनकु अपे रआ गानाम हों मनाव ओःओकु। 21इञ रआ लुतूम रआ चलते अपे लोः नुवां सुबिन्‍नाः करावियाकु चिलिमेनचि उनकु जे इञ के कुल एकाःदेञाय, उनी के काकु सरिइ काना। 22जदि इञ काइञ हेच लेन, आर उनकु के सिख काइञ एमालेःकु रेदो होनङ उनकु जहन पाप रआ दोसी काकु होयुःआ होनांङ। मुदा निमीः अपन पाप कथिर उनकु ठिनुः जहन बहना बनुःआं। 23जे इञ एते बाइर दोहोय कनाकु, उनकु इञ रिई आपुञ ते हों बाइर दोहोय कनाकु। 24जदि इञ ता उनकु रआ सामने उना महान कामि काइञ कराव लेः रेदो, जे जहय अरोहों केहयो काकु कराव, रेदो उनकु पापी काकु ठहरावोःओ होनांङ। मुदा नेबरीक दो उनकु नेल केते हों इञ एते अरो इञ रिई आपु एते बाइर एताकु। 25#सिरिञ 35:19; 69:4नुवां इनाते होय एकाना चि उनी रआ नियम रआ नुवां बचन पुराकोःका, जे उनकु रआ नियम रे ओल्‍लेकाना, ‘उनकु इञ एते बेमोतलोब बइर एदेञाकु।’ 26मुदा जोब देंगा वनीः हिजुःआय, जे अपे ठिनुः आपुञ सोझ एते कुलेयिञ मने सचाय रिई रावा जे आपु रआ सोझ एते हिजुःआय, दो उनी इञ रआ बबेत रे गोवाही एमुःआय। 27अरो अपे हों गोवाही एम्‍मापे चिलिमेनचि अपे एटेच एते गी इञ लोः गाति-गाति तहिकेनापे।

Currently Selected:

जोहन 15: BIY

Highlight

Copy

Compare