जोहन 14

परमेसर तक तेबाः वोः रआ होरा

1“अपे रआ मोन ओलो बेयाकुल वोःका। परमेसर रे बिसवास एपे अरो इञ रेहों बिसवास एपे! 2इञ रिई आपुञ रआ ओड़ाः रे बेचोट एते तहीः कथिर ठांव हेनाःआं। जदि नुंका का होयुः रेदो होनङ इञ अपे के उदुः वपेयिञ, चिलिमेनचि अपे कथिर ठांव तेयार सिनुःकानिञ। 3इञ ओन्डो सेन केते अपे कथिर ठांव तेयारीञ, इना तयोम अरो हिजुःइञ अरो अपे के अपन ठिनुः इदी पिञ, जेकर एते जे ठिनुः इञ हेनाञा, ओन्डो अपे हों तहीःआपे। 4इञ जे ठिनुः सिनुःकानिञ, अपे ओन्डो रआ होरा सारीइ कनापे।” 5थोमा ता ईसु के मेताःदेयाय, “परभु! आले नुवां हों काले सारीइकाना चि आम कारे सिनुः कनाम, दो ओन्डो रआ होरा चिलका ते सारी दड़िवाःआले?” 6ईसु ता उनी के मेताःदेयाय, “होरा अरो सचाय अरो जीवन इञ गी हेकेञ, इञ रआ बेगार जहय आपुञ ठिनुः काकु तेबाः दड़िवाःआ। 7जदि अपे इञ के सारिञकन रेदोपे, इञ रिई आपुञ केहों सरीयापे। निमीः दो अपे उनी के सारीइकानापे अरो नेलेयकानापे।” 8फिलिपुस ता ईसु के मेताःदेयाय, “परभु! आले केहों आपुम के देखावालेम। आले कथिर इमिनुः गी बेचोटा।” 9ईसु ता मेताःकुवय, “फिलिपुस! इञ इमिन तक अपे लोः तहिनिञ, रेहों अपे इञ के कपे सारिञकाना, जे इञ के नेल एकाःदेञाय, उनकु आपुञ केहों नेल एकाःदेयाकु। रेहों अपे नुवां चिलिमेन गाम कनापे चि ‘आपुम के देखावालेम?’ 10चिलि अपे कपे बिसवास काना चि इञ आपुञ रे हेनाञा अरो आपुञ इञ रे हेनाया? इञ जे गानाम गाम वकुकानिञ, उना इञ रआ सिख बङ कानाः इञ रे बोसाव ओः वनीः आपुञ, इञ दोवासते अपन कामिइ कनाय। 11इञ रआ नियां गानाम रे बिसवास एपे चि इञ आपुञ रेञा अरो आपुञ इञ रेयाय, बङ रेदो उना कामि रआ चलते गी नियां रे बिसवास एपे। 12इञ अपे एते सच गामवापेकानिञ चि जे इञ रे बिसवास दोहोय कनाकु, नुवां कामि जे इञ कराव कनिञ उना हों कराव इयापे, अरो नियां ते हों मरंग-मरंग कामि कराव इयापे चिलिमेनचि इञ आपुञ ठिनुः सिनुःकानिञ। 13जहन्‍नाः अपे इञ रआ लुतूम एते कोयियापे, इनागी इञ कराविञ, जेकर एते होपोन हेरेल रआ दोवासते आपुञ रआ महिमा होयुःआ। 14जदि अपे इञ रआ लुतूम लेयकेते इञ एते जहन्‍नाः हों कोयियापे, दो इञ इनागी एमापिञ।

ईसु पबितर रावा एएम रआ वदाय कनाय

15“जदि अपे इञ के दुलार एञ रेदोपे, इञ रआ हुकूम पालन इयापे। 16इञ आपुञ एते कुलियिञ अरो उनी अपे कथिर, मिहोर देंगा वनीः के एमापेयय, उनी अपे लोः सोबदिन तहिनोःओय। 17उनी सचाय रिई रावा हेकेय, जेके दुनियादारी रेन होर काकु गरहन दड़िवाया, चिलिमेनचि उनकु उनी के ना दो नेलेय कनाकु अरो ना सारीइ कनाकु। अपे उनी के सरिइ कनापे, चिलिमेनचि उनी अपे लोः तहीः कनाय अरो अपे रे बोसाव वोः कनाय। 18इञ अपे के एकला काइञ बगिपेया, इञ अपे ठिनुः हिजुःइञ। 19थोड़ घरीक गन रआ तयोम इञ के दुनिया रेन काकु नेलेञा, अपे इञ के नेलेञापे चिलिमेनचि इञ जुवेत तहिनोओञ अरो अपे हों जुवेत तहिनापे। 20इना हिलोः अपे सारी केयापे चि इञ आपुञ रे हेनाञा, अपे, इञ रेपेया अरो इञ अपे रे, 21जे इञ रआ हुकूम सारीइ कनाकु अरो उना रआ पालन कनाकु, उनकु गी इञ के दुलार एञ कनाकु अरो जे इञ के दुलार एञ कनाकु, उनकु के इञ रिई आपुञ दुलार कुवाय, अरो उनकु के इञ हों दुलार कुञ, उनकु रे इञ अपन के दिसतार वोःओञ।” 22जहुदा ता जे इसकोरोती काय तहिकेनय उनी एते गामवादेयाय, “परभु! चिलिना चि आम आले रे, अपन-खुद के दिसतार वोः चहाः कनाम अरो दुनिया रेन होर रे बङा?” 23ईसु ता उनी के जबाब एमाःदेयय, “जदि इञ के जहय दुलार इञाय दो, उनी इञ रआ सिख रे सेसेन्‍नाय। इञ रिई आपुञ उनी के दुलार इयाय अरो अलिञ उनी ठिनुः हेच केते उनी लोः तहिनोःओलिञ। 24जे इञ के काय दुलार एञकाय, उनी इञ रआ सिख रे काय सेन कनाय। जे सिख आम ओनाव कनाम, उना इञ रआ बङ कानाः, बलकी आपुञ रआ हेके, जे इञ के कुल एकाःदेञाय। 25आम लोः तहीः घरीक, इञ अपे के नियां गानाम गी उदुः एकावाःपिञ। 26मुदा उनी देंगा वनीः, मने पबितर रावा, जेके आपुञ, इञ रआ लुतूम एते कुलेयाय, अपे के सुबिन्‍नाः सिखाव पेयाय। इञ अपे के जहन्‍नाः उदुः एकावाःपिञ, उनी, उना सुबिन ओयहर वपेयाय। 27इञ अपे ठिनुः सांति ता बगी वपेकानिञ। इञ रआ सांति अपे के एमापेकानिञ, जे लेका दुनिया एमापेकानाय, इञ अपे के काइञ एमापेकाना अपे रआ मोन ओलो बेयाकुल वोःका अरो ओलोपे बोरोया। 28अपे इञ के नुवां गाम वते ओनाव एकाःदेञापे, इञ सिनुःकानिञ आर अपे ठिनुः हिजुःइञ। जदि अपे इञ के दुलार एञ रेदोपे होनङ अनादित वोःओञ होनङ चि इञ आपुञ ठिनुः सिनुःकानिञ, चिलिमेनचि आपुञ इञ एते महान्‍नाय। 29इञ पहिल गी अपे के नुवां उदुः एकावाःपिञ, जेकर एते नुवां होयकोः रे अपे बिसवास एपे। 30निमीः इञ अपे लोः ढेर काइञ नधनियां, चिलिमेनचि नियां दुनिया रिई हाकिम हिजुः कनाय। उनी के इञ रे जहन हक बनुःआं, 31मुदा जे लेका आपुञ हुकूम एम एकावादेञाय इनका गी कराव कनिञ। ताकि दुनिया सरिकेयय चि इञ आपु के दुलार एय कनिञ, बिरितपे अबुन नोन्डो एते चइलियाबुन।

Currently Selected:

जोहन 14: BIY

Highlight

Copy

Compare