जोहन 18

ईसु के सासप

(मती 26:47–56; मरकुस 14:43–50; लूका 22:47–53)

1ईसु नुवां गाम केते आचरेन चेला लोः किदरोन नाला ठिनुः मियाः बगेयचा रे तोराकुवा। 2ईसु के सासप वनीः जहुदा हों उना ठांव ता सरिइ केनाय चिलिमेनचि ईसु ओन्डो आचरेन चेला लोः नपाम ओः चित केनाय। 3तोब जहुदा पलटनकु रेन मीः दोल अरो मरंग जाजककु अरो फरीसिकु सोझ एते कुल वन अरो मरंग बिनती ओड़ाः रेन सिपाहिकु के लेयकेते ओन्डो तेबाःएनाकु। उनकु लालटेन, पोरो मसकल अरो हथयार साप केते ओन्डो हेच्‍चेनाकु। 4अरो ईसु जे सुबिन्‍नाः सरिइ केनाय चि उनी लोः चिलि-चिलि होयुः अनाः हेनाःआं, लहा हेच्‍चेनाय अरो उनकु के मेताःकुवय, “अपे ओकोय के दंड़ाय कनापे?” 5उनकु ता उनी के जबाब एमाःदेयाकु, “नासरत लुतूम चट्टी रिई ईसु के।” ईसु ता उनकु के मेताःकुवय, “उनी इञ गी हेकेञ।” तोब उनी के धोखा एते सासप इरीवानीः जहुदा हों ओन्डो तहिकेनाय। 6जोब ईसु ता उनकु के मेताःकुवय, “उनी इञ हेकेञ” दो उनकु तयोम ओचोः एनाकु अरो ओते रे उयुःएनाकु। 7इना रे ईसु ता अरो मिसा उनकु के कुलिवेःकुवाय, “अपे ओकोय के दंड़ाय कनापे?” उनकु मेताःदेयाकु, “नासरत लुतूम चट्टी रिई ईसु के।” 8ईसु ता जबाब एमाःकुवाय, “इञ अपे के गामवाःपिञ, उनी इञ गी हेकेञ। जदि अपे इञ के दंड़ाञ कनरेदोपे, नोकु होर के सेन इरीवाकुपे।” 9नुवां उनी ता इनाते गाम्‍मेताय चि जे उनी ता गाम लाःआय, उना पुराव ओःका, “इञ उनकु रे एते जहय केहों काइञ आत एकाःकुवा, जेके आम इञ के सोंपाव एकावादेञ केनाम।” 10अरो सिमोन पतरस ता जेकर ठिनुः तलवाइर तहिकेना, उना साप्पेताय अरो मुध जाजक रिई बन्धुवा रआ जोम ती लुतूर रे छेंव चलाव केते माः सीत कताय। उनी बन्धुवा रआ लुतूम मलखुस तहिकेना। 11#मती 26:39; मर 14:36; लूका 22:42अरो ईसु ता पतरस के मेताःदेयाय, “अपन तलवाइर ठोंघा रे संजोकाम। जे दुःख रआ डुभनी आपुञ इञ के एम एकावादेञाय, चिलि उना इञ काइञ नुयां?”

हन्‍ना रआ सामने ईसु

12रोमी सरकार रेन मीः दोल सिपाहिकु अरो उनकु रेन एगवाकु अरो जहुदिकु रआ मरंग बिनती ओड़ाः पहरा एएम वान ता ईसु के साप केते तोलेःदेयाकु। 13अरो उनी के तोल केते पहिल हन्‍नास ठिनुः इदिएदेयाकु जे उना साल रिई मुध जाजककु रिई मरंग जाजक कयफा रिई होञहार तेः तहिकेनाय। 14#जोह 11:49,50उनी कयफा इनी होर तहिकेनाय, जे जहुदी नेताकु के सलाह एमाःकु केनाय चि सुबिन होर कथिर मिहोर के गोजुः बुगिन हेनाःआं।

पतरस रआ मुकराः

(मती 26:69–70; मरकुस 14:66–68; लूका 22:55–57)

15सिमोन पतरस अरो मिहोर एटाः चेला ईसु रआ तयोम एनाकिन। मुध जाजक नोय चेला के बुगिन एते सरिइ केनाय इनाते उनी ईसु लोः मुध जाजक रआ राचा रे बोलो एनाय। 16मुदा पतरस टांड़ी दुवेर ठिनुः गी तहिएनाय। अरो मुध जाजक रिई जान चिनहार वनीः एटाः चेला टांड़ी तोराया अरो दुवेर रे पहरावानीः कुरी होपोन एते गाम केते पतरस केहों भीतरी इदी एदेयाय। 17इना रे उनी धंगरीन ता जे दुवेर रे पहरावानीः तहिकेनय मेताःदेयाय, “आम हों ईसु रिई चेला रे ते मिहोर बङ हेकेम?” पतरस ता जबाब एमाःदेयय, “इञ बङ हेकेञ।” 18चिलिमेनचि रबंङ बेचोट तहिकेना इनाते बन्धुवा अरो मरंग बिनती ओड़ाः, सिपाहिकु पसंगी धराव केते ओन्डो तिंगु केते जुरुः वोःकेनाकु। पतरस हों उनकु लोः एंडेगी तिंगु केनाय अरो जुरुः केनाय।

मुध जाजक ता ईसु के पुछताछ एदेयाकु

(मती 26:59–66; मरकुस 14:55–64; लूका 22:66–71)

19मुध जाजक ता ईसु एते उनी रेन चेलाकु अरो इनी रआ सिख रआ बबेत कुलिएदेयाय। 20ईसु ता जबाब एमाःदेयय, “इञ दुनिया रआ सामने दिसतार रुप एते गाम एकाःइञ। इञ सोबदिन पंचेत ओड़ाः अरो मरंग बिनती ओड़ाः रे, जे ठिनुः सुबिन जहुदी जमाः केनाकु सिख एम एकावाःकुञ इञ उकु केते जहन्‍नाः हों काइञ गाम एकावाःकुवा। 21रेहों अपे इञ एते चिलिमेन कुलिञ कनापे? इञ चिलिकाः गाम एकाःइञ, उनकु एते कुलिकुपे जे इञ रआ सिख ओनाव एकाःआकु। उनकु सारीइ कनाकु चि इञ चिलि-चिलि गाम एकावाःकुञ” 22जोब ईसु ता नुंका गाम्‍मेताय दो मरंग बिनती ओड़ाः रिई सिपाही ता जे एंडेगी तिंगु तहिकेनय, ईसु के मीः चटाः रुवेःदेयाय अरो मेताःदेयाय, “आम के मुध जाजक के नुंकन जबाब एएम रआ हिम्‍मत चिलका एते होय्येना?” 23ईसु ता उनी के जबाब एमाःदेयय, “जदि इञ गलत गाम्‍मीतिञ दो गलती रआ गोवाही उदुःवायञमी, अरो जदि बुगिन गी गाम्‍मीतिञ दो इञ के चिलिमेन रुवेञ कनाम?” 24अरो हन्‍नास ता ईसु के तोल गवेंय गी मुध जाजक कयफा ठिनुः कुल इरीवेःकुवाय।

पतरस ता ईसु के दोबोरा मुकराव एनाय

(मती 26:71–75; मरकुस 14:69–72; लूका 22:58–62)

25सिमोन पतरस उना घरीक तिंगु केते सेंगेल जुरुः केनाय। आधा होरकु ता पतरस के मेताःदेयाकु “चिलि आम हों उनी रिई चेला बङ हेकेम?” पतरस ता मुकराव वते मेताःकुवय, “बङ हेकेञ।” 26मुध जाजक रिई मिहोर बन्धुवा ता उनी होर रिई कुटूम रे ते तहिकेनय, जेकर लुतूर पतरस ता माः सित लाःआय। उनी ता मेताःकुवाय, “चिलि इञ आम के ईसु लोः बगेयचा रे काइञ नेल लेःमा?” 27पतरस ता अरो मुकराव एनाय अरो इमिताः एनेन गी सिम सांड़ी ता कोकरोचोः राःएताय।

पिलातुस रआ सामने ईसु

(मती 27:1,2,11–14; मरकुस 15:1–5; लूका 23:1–5)

28तोब उनकु ईसु के कयफा ठिनुः एते राजपाल रआ बंगला इदी देयाकु। अरो सेताः रआ घरीक होय केना। इनाते उनकु बंगला रआ भीतरी काकु सेन केना चि ओलो असुध वोःका बलकी पसका रआ भोज ता जोम दड़िवाःआकु। 29पिलातुस जे राजपाल हेकेय टांड़ी हेच केते उनकु लोः नपाम केते मेताःकुवय, “अपे नोय मनवां रे चिलि गानाम रआ दोस लगाव कनापे?” 30उनकु जबाब एमाःदेयाकु, जदि नोय गुनाहगार काय तहिलेन रेदोय आले नोय के आम रआ ती रे काले सोंपाविया होनङ, 31पिलातुस ता उनकु के मेताःकुवाय, “अपे नोय के इदिइपे अरो अपे रआ नियम मोताबिक नोय रआ नेयाय एपे।” जहुदिकु ता जबाब एमाःदेयाकु, “आले के जहय के गोगोच रआ हुकूम बनुःआं।” 32#जोह 3:14; 12:32नुवां इनाते होय्येना चि ईसु रआ उना गानाम पुरावोःका, जे उनी ता पाता वते गामलाःआय चि उनी रआ गोनोच चिलका ते होयुःआ। 33तोब पिलातुस राजपाल रआ बंगला सेन केते ईसु के होहो केते उनी के कुलिएदेयाय, “चिलि आम जहुदिकु रिई राजा हेकेम?” 34ईसु ता जबाब एमाःदेयाय, “चिलि नुवां आम सोझ एते गाम कनाम चि एटाः होर ता आम एते इञ रआ बबेत रे नुवां गाम एकाःआकु?” 35पिलातुस ता मेताःदेयाय, “चिलि इञ जहुदी हेकेञ? आमरेन जाइतकु अरो मुध जाजककु ता आम के इञ रआ ती रे सोंपाव एकाःमाकु। आम चिलिकाः चिलका एकाःआम?” 36ईसु जबाब एमाःदेयय, “इञ रआ राइज नुवां दुनिया रआ तहिलेन रेदो इञ रेन सुसारवान लड़ायाकु होनङ, अरो जहुदी रआ ती रे काकु सेनइरी वञा होनङ, मुदा इञ रआ राइज नोन्डो रआ बङ कानाः” 37पिलातुस ता ईसु के मेताःदेयाय, “दो चिलि आम राजा हेकेम” ईसु ता जबाब एमाःदेयाय, “आम गाम कनाम चि इञ राजा हेकेञ, इञ इनाते जनम अगु एकाःइञ अरो इनाते दुनिया रे हेच एकानिञ चि सतया रआ बबेत रे गोवाही एमिञ। जहय सतया रेकुवा, उनकु इञ रआ बचन ओनावियाकु।” 38पिलातुस ता ईसु के मेताःदेयाय, “सतया चिलिकाः हेके?”

ईसु रआ गोजुः दंड

(मती 27:15–31; मरकुस 15:6–20; लूका 23:13–25)

पिलातुस नुवां गाम केते अरो टांड़ी तोराया अरो जहुदिकु ठिनुः हेच केते मेताःकुवय, “इञ दो उनी रे जहन दोस काइञ नामलाःआ, 39लिकिन अपे कथिर पसका पोरोब रआ मोका रे मिहोर कयदी के रिहा कराव रआ रिवाज हेनाःआं, चिलि अपे चहाः कनापे चि अपे कथिर जहुदिकु रिई राजा के रिहा काइञ?” 40नियां रे उनकु ता कुर्री एताकु, “नोय के बङा बराबस के।” बराबस डाकुत तहिकेनाय।

Currently Selected:

जोहन 18: BIY

Highlight

Copy

Compare