जोहन 19

ईसु के गोगोच रआ हुकूम

1तोब पिलातुस ता ईसु के सापइरी केते कोड़रा एते सोड़ेच इरीवेःकुवाय। 2अरो पलटनकु ता जनुम डइर रआ मेंडरी बाय एताकु अरो ईसु रआ बोहोः रे होरोः कदेयाकु अरो मलमल किचरीः होरोः कदेयाकु, 3अरो ईसु ठिनुः हेच केते गागाम हेलावेनाकु, “जहुदिकु रिई राजा जोहार” अरो ईसु के चटाः हेलावेनाकु। 4पिलातुस ता उनकु के मेताःकुवाय, “नेलपे इञ अपे ठिनुः ईसु के अरो टांड़ी अगुइ कनिञ ताकि अपे सारी दड़िवाःआपे चि इञ उनी रे जहन खोट काइञ नाम दड़िवाता।” 5अरो ईसु टांड़ी हेच्‍चेनाय। उनी जनुम रआ मेंडरी अरो मलमल सोनोः होरोः केनाय। पिलातुस ता मेताःदेयाय, “नेलेयपे नोय हेरेल के।” 6जोब उनकु ता ईसु के नेलेःदेयाकु दो मुध जाजककु अरो मरंग बिनती ओड़ाः रेन सिपाहिकु ता कुर्री केते गाम्‍मेताकु, “उनी के कुरुस रे रकापिया! उनी के कुरुस रे रकापिया!” पिलातुस ता गामवाःकुवाय, “नोय के अपे गी इदिइपे अरो कुरुस रे रकापेयपे। इञ दो नोय रे जहन गुनाह काइञ नामकाना।” 7जहुदिकु ता पिलातुस के जबाब एमाःदेयाकु, “आले रआ मियाः नियम हेनाःआं, उना रआ मोताबिक नोय के गोनोच लाइख होयुः चही। चिलिमेनचि उनी अपन खुद के परमेसर रिई होपोन हेरेल गामुःकनाय।” 8पिलातुस ता उनकु के नुवां गाम वते अयुम वेःकुवाय दो बेचोट बोरो वनाय, 9पिलातुस अरो बंगला रआ भीतरी सेन केते ईसु के कुलिएदेयाय, “आम कारे रिई हेकेम?” मुदा ईसु ता पिलातुस के जबाब काय एमाःदेयाय। 10इना रे पिलातुस ता ईसु के मेताःदेयाय, “आम इञ एते चिलिमेन कम नधनिइ काना? चिलि नुवां आम कम सारीइकाना चि आम के इञ ठिनुः रिहा कराव रआ हों हक हेनाःआं अरो आम के कुरुस रे रकाप कथिर हों हक हेनाःआं” 11ईसु ता जबाब एमाःदेयाय, “जदि आम के चेतान एते हक का नाम लेन रेदो, आम रआ इञ रे जहन हक का होयुःआ होनांङ। इनाते जे ता इञ के आम रे सोंपाव एकाःदेञाय, उनी आम ते हों ढेर पापी हेनाया।” 12इना तयोम पिलातुस ता ईसु के बागी रआ उपाय दंड़ा चित तहिएनाय, मुदा जहुदी नुवां गाम वते कुर्री चित तहिएनाकु, “जदि आम नोय के रिहाय कनरेदोम, आम महाराजा कयसर रिई गाति बङ हेकेम। जे अपन के राजा गमुः कनाय, उनी कयसर रआ बिरोध कनाय।” 13जोब पिलातुस ता नुवां सबद ओनावेताय दो उनी ईसु के टांड़ी उना ठांव रे इदी एदेयाय जे “दिड़ी रआ चबुतारा हेके” (उना इबरानी भाखा एते “गबता” गाम एकाःआकु।) अरो ओन्डो उनी नेयाय रआ गदी रे दुरुपेनाय, 14उना पसका पोरोब हापता रआ तेयारी रआ हिलोः तहिकेना। लगेभगे दुपहरा होयुः केना, पिलातुस ता जहुदिकु के मेताःकुवाय, “नेलेयपे, नोय हेकेय अपे रिई राजा।” 15उनकु अरो कुर्री एताकु, “नोय के इदिइपे। नोय के इदिइपे। नोय के कुरुस रे रकाप एयपे।” पिलातुस ता उनकु के मेताःकुवाय, “चिलि अपे रिई राजा के इञ कुरुस रे रकापिञ?” इना रे मुध जाजककु ता जबाब एमाःदेयाकु, “कयसर के बगी केते आले रिई राजा जहय एटाः बङ कानीः!” 16अरो पिलातुस ता ईसु के कुरुस रे रकाप कथिर उनकु के एमाःकुवाय। उनकु ता ईसु के अपन कबजा रे एदेयाकु।

ईसु के कुरुस रे रकाप

(मती 27:32–44; मरकुस 15:21–32; लूका 23:26–43)

17अरो ईसु अपन कुरुस गोः केते उना ठांव तोराया जे “खपरोही रआ ठांव” गाम कनाकु। इना इबरानी भाखा एते गुलगुता गाम कनाकु। 18ओन्डो उनकु ता ईसु के अरो बार होर के कुरुस रे रकाप काःकुवाकु मिहोर के लेंगा ती ताय सोझ रे अरो मिहोर के जोम ती ताय सोझ अरो ईसु के ताला रे। 19पिलातुस ता पाटी रे पहचान पतर ओल इरी केते कुरुस रे ठोकाव इरीवेःकुवाय। उना नुवां लेका तहिकेना, “नासरत लुतूम चट्टी रिई ईसु जहुदिकु रिई राजा।” 20बेचोट एते जहुदिकु उना पहचान पतर ओल अनाः ता पड़हावेनाकु चिलिमेनचि जे ठिनुः ईसु के कुरुस रे रकाप लेदेयाकु, उना ठांव चट्टी रआ हेनात तहिकेना। अरो उना इबरानी भाखा, जूनानी अरो लातिनी भाखा एते ओल लाःआकु। 21तोब मुध जाजककु ता, पिलातुस एते गापाम हेलावेनाकु, “‘जहुदिकु रिई राजा’ ओलोपे ओलिया, बलकी ‘नोय गी गाम लाःआय चि इञ जहुदिकु रिई राजा हेकेञ।’” 22पिलातुस ता जबाब एमाःकुवाय, “इञ जे ओल्‍लीतिञ दो ओल्‍लीतिञ।”

23जोब सिपाहिकु ता ईसु के कुरुस रे रकाप एदेयाकु इना तयोम, उनकु ता ईसु रआ किचरीः अगु केते चाइर हिस रे हटिञ एताकु। अरो हरेक हिस मिमियाः सिपाही कथिर। उनकु ता सोनोः हों अरगु वनाकु। चिलिमेनचि उना सोनोः बिन रोः अनाः लतार एते चेतान बिनाव वनाः तहिकेना। 24#सिरिञ 22:18इनाते उनकु अकु-अकु रे गाम्‍मेताकु, “नुवां ओलोपे ओड़ेचिया, बलकी उना ओकोय इदियापे, नुवां कथिर गागत खेचाः रे लुतूम ओल केते संजोयाबु अरो जेकर लुतूम उडुङओःओ, इनिगी इदियाय” उनकु ता इनाते कराव एताकु चि पबितर पोथी रआ उना बचन पुरावोःका,

“उनकु ता इञ रआ किचरीः अकु-अकु रे हटिञ वनाकु

अरो इञ रआ किचरीः कथिर परची संजो एताकु।” सिपाहिकु ता इनका गी करावेताकु।

25ईसु रआ कुरुस ठिनुः, उनी रिई एंगातेः अरो मोसी तेः, कलोसपा रिई एरा तेः मरियम अरो मरियम मगदलना हातु रिई तिंगुकेनाकु। 26ईसु ता जोब अपन एंगातेः अरो अपन दुलारा चेला के आच रआ हेनात गी तिंगु नेलेःकिनाय दो अपन एंगातेः के मेताःदेयाय, “नोय हेकेय आम रिई होपोन हेरेल।” 27अरो अपन चेला के मेताःदेयाय, “नोय हेकेय आम रिई एंगाम” अरो इमिन एते गी उनी चेला उनी के अपन ओड़ाः इदी एदेयाय।

ईसु रआ गोनोच

(मती 27:45–56; मरकुस 15:33–41; लूका 23:44–49)

28 # सिरिञ 69:21; 22:15 इना तयोम ईसु ता सरिएताय चि सुबिन्‍नाः पुराव चुकावेना। इनाते पबितर पोथी रआ ओल अनाः गानाम पुराव कथिर गाम्‍मेताय, “इञ तेताङिञ।” 29ओन्डो जोजो अंगुर रास बसन रे दोहो लाःआकु। होर उना रे मियाः दाः सोखावनाः जे दाड़ु रआ सेकाम महमाहवोः सोः काना उना दाड़ु रआ ठेंगा रे तोल केते जोजो अंगुर रास रे जोबे केते ईसु ठिनुः अगु केते चेपेच कथिर मोचा रे ठेकाव वदेयाकु। 30अरो ईसु ता जोजो अंगुर रास चखा केते गाम्‍मेताय, “पुरावेना।” तोब ईसु ता बोहोः कुयडूः केते जीव आड़ाः एताय।

बरछा एते सोबोः एदेयाकु

31उना पसका भोज कथिर तेयारी रआ हिलोः तहिकेना। जहुदिकु नुवां काकु चहाः केना चि जिराः हिलोः कुरुस रे मुरदा तही जोनाय, चिलिमेनचि उना जिराः हिलोः मरंग पोरोब पोड़ाव वोःकेना। जहुदिकु ता पिलातुस के गोहराव एदेयाकु चि ईसु रआ नरहाड़ा हुचाः काःआ अरो गोच-होड़मो ता ओचोः काःआ। 32इनाते पलटनकु ता हेच केते ईसु लोः कुरुस रे रकप वन पहिल मनवां रआ नरहाड़ा हुचाः एताकु, अरो एटाः इनीः रआ हों, 33जोब उनकु ईसु ठिनुः हेच केते नेलेःदेयाकु दो ईसु गोच चुकाव केनाय, दो उनकु ईसु रआ नरहाड़ा काकु हुचाःएता, 34लिकिन मिहोर पलटन ता ईसु रआ पंजरा रे बरछा एते सोबोः एदेयाय, अरो उना रे एते एनेन गी मयम अरो दाः अतु उडुङएना। 35जे नुवां नेल एकाःआकु, इनकुगी नोय रआ गोवाही एम्मेताकु अरो उनी रआ गोवाही सचा हेके। उनी सारीइ कनाय चि उनी सचा गाम कनाय, जेकर एते अपे हों बिसवास एपे। 36#उठ 12:46; लेखा 9:12; सिरिञ 34:20नुवां इनाते होय्येना चि पबितर पोथी रआ नुवां बचन पुराव वोःका, उनी रआ मियाः हों जंग ताय काकु हुचाःइया, 37#जक 12:10; दि.बचन 1:7पबितर पोथी रआ अरो मियाः बचन नुवां लेकाःआ, उनकु ता जेके सोबोः लेदेयाकु, उनकु, उनी सोझ गी नेल्‍लाकु।

ईसु के तोपा एदेयाकु

(मती 27:57–61; मरकुस 15:42–47; लूका 23:50–56)

38इना तयोम अरमतिया रिई जुसूफ ता जे जहुदिकु रआ बोरोय एते उकु-कुमरु ईसु रिई चेला तहिकेनाय, उनी पिलातुस एते ईसु रआ गोच-होड़मो इदी कथिर अरजी एदेयाय। पिलातुस ता गोहराव ओनावेताय, इनाते जुसूफ हेच केते ईसु रआ लास तके इदी एदेयाय, 39#जोह 3:1,2निकुदिमुस हों तेबाःएनाय, जे पहिल ईसु लोः निदा नपाम्‍मोः हेच केनाय, उनी लगेभगे तीस किलो रआ गंधरस अरो सोः जिनिस लेयकेते हेच्‍चेनाय, 40उनकिन ईसु रआ गोच-होड़मो इदी एताकिन अरो जहुदिकु रआ मरघाटी रे दोहो रआ रिति रआ मोताबिक उनी ता सोः जिनिस लोः दफन किचरीः रे पोतराव कदेयाकिन। 41जे ठिनुः ईसु के कुरुस रे रकाप लेदेयाकु, ओन्डो मियाः बगेयचा तहिकेना अरो उना बगेयचा रे मियाः नवां भुलकाः मरघाटी तहिकेना, जेकर रे जहन मुरदा केहों काकु दोहो लेःकुवा। 42उनकिन ता ईसु के एंडेगी दोहो कदेयाकिन, चिलिमेनचि उना जहुदिकु कथिर तेयारी रआ हिलोः तहिकेना अरो उना मरघाटी हेनात रिगी तहिकेना।

Currently Selected:

जोहन 19: BIY

Highlight

Copy

Compare