लूका 3

जोहन बतिसमा एमुः वनीः रआ खभेर

(मती 3:1–12; मरकुस 1:1–8; जोहन 1:19–28)

1तिबिरियुस रोम रिई महाराजा कयसर रआ राइज रआ पोंदरोवां बरीस रे जोब पिन्तीयुस पिलातुस जहुदिया पोरदेस रिई राजपाल तहिकेनाय। अरो गलील रे हेरोदेस, इतुरैया अरो तारखोनीतिस रे उनी रिई बोयहा फिलिपुस अरो अबिलेने रे लिसानियास राइज एकेनाय। 2अरो जोब हन्‍नास अरो कयफा मुध जाजक तहिकेनाकिन, उना घरीक परमेसर रआ बचन टोंगरी रे जकरयाह रिई होपोन हेरेल जोहन ओनावेताय। 3आर जरदन गाड़ा रआ हेनात-जपाः रआ सुबिन पोरदेस रे सेन केते, होरकु के परचार वकुकेनाय, “अपे, अपे रआ पाप एते मोन रुवाड़ केते बतिसमा अगुइपे जेकर एते परमेसर अपे रआ पाप ता छमायाय।” 4#जसा 40:3–5जेलेका जसायाह परमेसर सोझ एते नधनी वनीः रआ पोथी रे ओल्‍लेकाना,

“टोंगरी रे मिहोर होहो वनीः रआ राव ओनावोः काना चि,

‘परभु रआ होरा तेयारेपे,

उनी रआ होरा सोझ एपे।

5सुबिन गाड़हा डीपा पेड़ेच केते साम्‍मेपे

अंका-बंका होरा सोझ एपे,

अरो बेढांग रआ होरा ता साम बायेपे।

6अरो सुबिन होर परमेसर एते नमुःवानाः उद्धार नेल्‍लाकु।’”

7 # मती 12:34; 23:33 जे भीड़ के भीड़ उनी एते बतिसमा अगु कथिर हिजुः केनाकु, उनकु के उनी नुवां गामवाकुकेनाय, “ए बिञ रेन होपोन! परमेसर एते हिजुः वनाः कोरोध एते बनचावोः कथिर ओकोय चेतावेःपेयाय? 8#जोह 8:33इनाते नेबरीक अपे रआ कामि एते नुवां पाता लगावोः चही चि अपे ता पाप एते मोन रुवाड़ एकाःआपे, अरो अपन-अपन मोन रे नुवां ओलोपे सोंचाःआं, चि अबु रिई आपु अबराहम हेकेय, चिलिमेनचि इञ अपे के गामवापेकानिञ चि परमेसर नियां दिड़ी एते अबराहम कथिर संतान जनमाव दड़िवाःआय! 9#मती 7:19निमीः दो दाड़ु रआ रेहेत रे टेंगला दोहो एकाना। ताकि जे दाड़ु बुगिन जो का जो नोःओ, उना माः केते सेंगेल रे संजोयाय।”

10होरकु उनी एते कुलिइ केनाकु, “दो आले चिलियाले?”

11उनी ता उनकु के जबाब एमाकुकन केनाय, “जेकर ठिनुः बरीया सोनोः हेनाःआं उना मियाः एमाकुम जेकर ठिनुः बनुःआं, अरो जेकर ठिनुः जोजोम वनाः हेनाःआं उना हों निंकायपे।”

12 # लूका 7:29 मालगुजारी अगु वनकु हों बतिसमा अगु कथिर हेच्‍चेनाकु अरो उनकु ता कुली एदेयाकु “ए गुरु आले चिलियाले?”

13उनी ता उनकु के गामवाःकुवाय, “जे अपे कथिर ठहराव एकाना, उना एते ढेर ओलोपे अगुया।”

14पलटनकु तहों उनी एते कुलिइ केनाकु, “आले चिलियाले?”

उनी ता उनकु के गामवाकुकेनाय, “टका अगु कथिर जहय के ओलोपे सताव कुवा, अपन तनखा रे सबुर तहीःपे, अरो जहय रे एकेन-मेकेन दोस ओलोपे लगावकुवा।”

15(जोब होर बेचोट आसरा लगाव केते होरा जोहाव वेकेनाकु अरो जोहन रआ बबेत रे अपन मोन रे नुवां सोंचाः केनाकु चि नेयगी दो मसी बङ हेकेय) 16तोब जोहन सुबिन के गामवाःकुवाय इञ दो अपे के दाः एते बतिसमा एमा पेकानिञ, मुदा मिहोर हिजुः वनीः मेनायां जे इञ एते महान हेनाया इञ उनी रआ खरपा रआ तोनोल राड़ा लाइख हों बनुःइञा, उनी अपे के पबितर रावा अरो सेंगेल एते बतिसमा एमापेयाय। 17उनी रआ हाटाः उनी रआ ती रेया अरो उनी अपन खेरयान रे अतुर केते पेटेच तेः अलग कनाय अरो गोहोम ता कोठा रे मीः ठिनुः जमायाय अरो भुसा तेः उना सेंगेल रे जे का इड़िचोः काना ओन्डोर इयाय।

18तोब उनी बेचोट गानाम एते सोमझाव केते होरकु के बुगिन खभेर ओनाव वकुकेनाय। 19#मती 14:3,4; मर 6:17,18मुदा जोब जोहन ता हेरोदेस राजा के, उनी रिई बोयहा रिई एरा हेरोदियास के बपला एदेयाय अरो बुराय लाःअय इना रआ चलते डपटाव लेदेयाय। 20इनाते हेरोदेस ता उना सुबिन बुराय कामि रआ चलते जोहन के जेहेल ओड़ाः रे सन्जो इरीवेःकुवाय।

ईसु रआ बतिसमा

(मती 3:13–17; मरकुस 1:9–11)

21जोब सुबिन होर ता बतिसमा अगुवेताकु अरो ईसु हों बतिसमा अगु केते पराथनाय केनाय दो सिरमा रड़ाना 22#एटे 22:2; सिरिञ 2:7; जसा 42:1; मती 3:17; मर 1:11; लूका 9:35 अरो पबितर रावा होड़मो रआ रुप रे पेरवां लेका उनी रे अरगुना अरो सिरमा एते सबद ओनावेना “आम इञ रिई दुलार होपोन हेरेल हेकेम इञ आम एते बेचोट खुस मेनाञा।”

ईसु रेन बोंस

(मती 1:1–17)

23-24लगेभगे तीस बरीस रे ईसु सेवकाइ कामि एटेच एताय, होर उनी के जुसूफ रिई होपोन तेः हेरेल सोमझाः केनाकु। जुसूफ एली रिई होपोन तेः तहिकेनाय, एली मतात रिई अरो मतात लेवी रिई अरो लेवी मलकी रिई अरो मलकी जन्‍ना रिई, जन्‍ना जुसूफ रिई, 25जुसूफ मतियस रिई, मतियस आमोस रिई, आमोस नाहुम रिई, नाहुम एसली रिई अरो एसली नगाइ रिई होपोन तेः तहिकेनाय, 26नगाइ मात रिई, मात मतियस रिई, मतियस सिमी रिई सिमी जोसेख रिई, जोसेख जुदा रिई होपोन तेः तहिकेनाय, 27जुदा जोनान रिई, जोनान रेसा रिई, रेसा जरुबाबेल रिई, जोरोबाबेल सालतिएल रिई, सालतिएल नेरी रिई होपोन तेः तहिकेनाय, 28नेरी मलकी रिई, मलकी अदी रिई, अदी कोसम रिई, कोसम एलमादाम रिई, एलमादाम हेर रिई 29हेर जहोसु रिई, जहोसु इलयाजर रिई, इलयाजर जोरिम रिई, जोरिम मतात रिई, मतात लेवी रिई होपोन तेः तहिकेनाय, 30लेवी सिमोन रिई, सिमोन जहुदा रिई, जहुदा जुसूफ रिई, जुसूफ जोनान रिई, जोनान इलयाकिम रिई, 31इलयाकिम मेलया रिई, मेलया मेना रिई, मेना मतात रिई, मतात नथान रिई, नथान दाऊद रिई होपोन तेः तहिकेनाय, 32दाऊद इसाय रिई, जेसे ओबेद रिई, ओबेद बोवाज रिई, बोवाज सलमोन रिई, सलमोन नहसोन रिई, 33नसोन अमिनादाब रिई, अमिनादाब अदमिन रिई, अदमिन अरनी रिई, अरनी हिसरोन रिई, हिसरोन फिरिस रिई, फिरिस जहुदा रिई होपोन तेः तहिकेनाय, 34जहुदा जाकूब रिई, जाकूब इसहाक रिई, इसहाक अबराहम रिई, अबराहम थारा रिई, थारा नहोर रिई, 35नहोर सेरुख रिई, सेरुख रगव रिई, रगव फलेक रिई, फलेक एबेर रिई, एबेर सिला रिई होपोन तेः तहिकेनाय, 36सिला केनान रिई, केनान अरपकछद रिई, अरपकछद सेम रिई, सेम नूह रिई, नूह लेमेख रिई, 37लेमेख मथुसला रिई, मथुसला हनोक रिई, हनोक जारेत रिई, जारेत महलेल रिई, महलेल केनान रिई, 38केनान एनोस रिई, एनोस सेत रिई, सेत आदम रिई अरो आदम परमेसर रिई होपोन तेः हेरेल तहिकेनाय।

Currently Selected:

लूका 3: BIY

Highlight

Copy

Compare