लूका 2

ईसु रआ जनम

(मती 1:18–25)

1उना हिलोः रे महाराजा अगुस्तुस कयसर रआ सोझ एते हुकूम उडुङएना चि सुबिन रोम राइज रेन होरकु रआ लुतूम ओलेपे। 2नुवां पहिल लुतूम ओओल उना समेय होयकेना, जोब किबिरिनयुस सीरिया रिई राजपाल तहिकेनाय। 3इनाते सुबिन होर लुतूम ओल इरीः कथिर अपन-अपन चट्टी रे सेन केनाकु।

4जुसूफ दाऊद रेन घराना अरो बोंस रिई तहिकेनाय इनाते उनी गलील रआ नासरत चट्टी एते जहुदिया पोरदेस रे दाऊद रआ जनम चट्टी बयतुलम रे तोराया।

5जुसूफ लुतूम ओल इरीः कथिर मरियम लोः तोराया जेकर सुतबन्धावनी उनी लोः होय केना अरो उनी भारी होड़मो तहिकेनाय।

6उनकिन रआ ओन्डो तहीः रिगी उनी के जनमव रआ समेय पुरावेना, 7अरो उनी अपन जेठा होपोन हेरेल के जनमाव एदेयाय अरो उनी के किचरीः रे उयु मुटम केते कठोत रे दोहो एदेयाकिन चिलिमेनचि उनकु के तहीः कथिर धरमसला रे ठांव का तहिकेना।

सोवारागदूत दूतकु अरो गोरखिवनकु

8अरो उना दिसुम रे भेड़ी गोरखिवानकु तहिकेनाकु। उनकु निदा टांड़ी रे तही केते अपन भेड़ी रआ गोहड़ा के पहरा कुकानकेनाकु। 9अरो परभु रिई दूत उनकु ठिनुः हेच तिंगु एनाय अरो परभु रआ महिमा रआ मसकल उनकु ठिनुः चइरो ओइर चमकावेना, अरो उनकु बेचोट बोरो वनाकु। 10तोब सोवारागदूत ता उनकु के गामवाःकुवाय, ओलोपे बोरोया, चिलिमेनचि नेलपे, इञ अपे के बेचोट आनाद रआ बुगिन खभेर ओनाव वपेकानिञ जे सुबिन होरकु कथिर होयुःआ, 11चि तिहिञ दाऊद रआ चट्टी रे अपे कथिर मिहोर उद्धार कराव वनीः जनम एकानाय, अरो नेय मसी परभु हेकेय। 12अरो नोय रआ अपे कथिर नुवां चिनहा हेनाःआं चि अपे मिहोर बलेच होपोन के किचरीः रे उयु मुटम अरो कठोत रे दोहो नमेयापे।

13तोब अचाका उनी सोवारागदूत लोः सोवारागदूतकु रआ दोल परमेसर रआ इसतुति कराव वते अरो नुवां गामवापे नेल इरी एनाकु,

14“सोवाराग रे परमेसर रआ महिमा अरो ओते रे

उनकु मनवां रे जेकर लोः परमेसर खुस हेनाया, सांति होयुःका!”

15जोब सोवारागदूत उनकु ठिनुः एते सोवाराग रे तोराया, दो गोरखी वनकु ता अकु-अकु रे गापाम हेलावेनाकु, “देलापे अबु बयतुलम सेन केते नुवां गानाम जे होय एकाना, अरो जे के परभु ता अबु के उदुः एकावाःबुनाय।”

16अरो उनकु ता एनेन गी सेन केते मरियम अरो जुसूफ के नमेःकिनाकु, कठोत रे उनी होपोन के गितीच केनाय नेलेःदेयाकु। 17उनकिन बनार होर के नोय होपोन रआ बबेत रे सोवारागदूतकु ता जे गाम लाःआकु उना सुबिन गानाम गाम्‍मेताय, 18सुबिन अयुम वनकु गोरखिवानकु रआ गानाम रे चकरीत एनाकु। 19मुदा मरियम नियां सुबिन गानाम अपन मोन रे दोहो केते सोंचाः तहिएनाय। 20अरो गोरखिवानकु के उनकु एते गामकेना, इनकागी सुबिन अयुम केते अरो नेल केते परमेसर रआ बड़ाय अरो सिरिञ वते रुवाड़ एनाकु।

मरंग बिनती ओड़ाः रे ईसु के सोंपाव

21 # लेवी 12:3; लूका 1:31 जोब आठवारा हिलोः होय्येना अरो उनी रआ खतना रआ समेय हेच्‍चेना, दो उनी रआ लुतूम ईसु दोहोवेताकु जे सोवारागदूत ता उनी रआ लहिच रे हिजुः एते पहिल गाम लाःआय।

22जोब मूसा रआ नियम रआ मोताबिक उनकिन रआ छुतका#2:22 छुतका छुतका जहुदी होरकु रआ रिति रे चबाः रआ हिलोः पुरावेना दो जुसूफ अरो मरियम उनी के जरुसलेम रे इदी एदेयाकिन चि परभु रआ लहा एमेयाकिन, 23#उठ 13:2,12जेलेका चि परभु रआ नियम रे ओल एकाना “सुबिन होर रेन जेठा होपोन हेरेल परभु कथिर पबितर होयुःआकु।” 24#लेवी 12:6–8अरो परभु रआ नियम रआ मोताबिक मीः जोड़ा पड़की बङ रेदो मीः जोड़ा पेरवां अगु केते बलिदान कथिर अगुकुपे।

सिमोन रआ सिरिञ

25उना समेय जरुसलेम रे सिमोन लुतूम मिहोर मनवां तहिकेनाय, उनी मनवां धरमी अरो परमेसर एते भोय दोहो वनीः तहिकेनाय; इसराइल के छोड़ाव कथिर आसराय केनाय, पबितर रावा उनी रे तहिकेना। 26अरो पबितर रावा ता उनी के गामवादेयाय चि जोब तक उनी परभु रिई मसी के काय नेल केयाय तोब तक उनी काय गोजुःआय। 27उनी पबितर रावा रआ एगवाय एते मरंग बिनती ओड़ाः रे हेच्‍चेनाय; इमिताः गी ईसु रेन एंगा-आपु तेः उनी होपोन ईसु के भीतरी अगु एदेयाकिन, चि उनी कथिर नियम रआ रिति रआ मोताबिक करावेकाय, 28दो सिमोन ता ईसु के हथलाव केते अरो परमेसर के धेनयाबाद एम केते गाम्‍मेताय

29“ए परभु निमीः आम बन्धुवा रे अपन बचन पुरा एकाःआम

इनाते निमीः इञ सांति एते गोच सकाः काइञ

30चिलिमेनचि इञ रआ मेत ता आम रआ दोवासते उद्धार वनीः के नेलेःदिञ,

31जेकरते आम ता सुबिन दिसुम रेन होरकु रआ लहा कुल एकाःदेयाम

32 # जसा 42:6; 49:6; 52:10 गइर-जहुदिकु कथिर बनचाव वोः अरो होरा उदुः रआ मसकल हेकेय

अरो आमरेन इसराइली होरकु कथिर महिमा हेकेय।”

33उनी रिई एंगा-आपु तेः नियां गानाम एते जे उनी रआ बबेत रे गाम्‍मेकेनाकु चकरीत एनाकिन, 34तोब सिमोन ता उनी के आसरीबाद एम केते, उनी रिई एंगातेः मरियम के गामवादेयाय “नेलमी नोय होपोन दो इसराइल रे बेचोटकु के उयुः, बिरीत कथिर, परमेसर रआ चिनहा होयुः कथिर ठहराव एकाःदेयाय, जेकर खोनोस रे नधनियाकु। 35उनी बेचोट होरकु रआ जीव रआ बिचार दिसतारियाय, आम के बेचोट दुख होयुःआ जे लेका बनार अंग लसेर तलवाइर एते आम रआ हिरदय नुवांकार अनाकार भुः एकाःआय।”

हन्‍ना रआ गोवाही

36असेर रेन गोतोर रे ते हन्‍ना लुतूम फनुएल रिई होपोन तेः एरा मिहोर परमेसर सोझ एते नधनी वनीः तहिकेनाय। उनी बेचोट बुड़ही तहिकेनाय, बपला होय तयनोम सात बरीस तक आच रिई हेरेल ताय लोः तहिकेनाय अरो इना तयोम रड़ियाही एनाय।

37उनी चौरासी बरीस रिई रड़ियाही तहिकेनाय अरो मरंग बिनती ओड़ाः ता काय बगीई केनाय, मुदा उपास अरो पराथना केते परभु के सुसार चित तहीः केनाय। 38अरो उनी उना घरीक ओन्डो हेच केते परमेसर रआ धेनयाबाद एएम हेलावेनाय, अरो उनकु सुबिन एते जरुसलेम रेन छुटकारा रआ होरा जोहावेकेनाकु, हन्‍ना उनी होपोन रआ बबेत रे उदुः हेलावेनाय।

जुसूफ अरो मरियम नासरत रुवाड़ेनाकिन

39 # मती 2:23 जोब उनकिन परभु रआ नियम रआ मोताबिक सुबिन्‍नाः पुरावेताकिन उना तयोम उनकिन गलील सिमाना रआ नासरत चट्टी रुवाड़ एनाकिन। 40अरो होपोन हरा इदिएनाय अरो बोलगार इदिएनाय बुधि एते पेड़ेच इदिएनाय अरो परमेसर रआ दया उनी रे तहिकेना।

ईसु मरंग बिनती ओड़ाः रे

41 # उठ 12:1–27; नियम 16:1–8 ईसु रेन एंगा-आपु तेः हर बरीस पसका पोरोब रे जरुसलेम सिनुः केनाकिन। 42जोब ईसु बारो बरीस रिई होय्येनाय दो उनकु पोरोब रआ रिति रआ मोताबिक जरुसलेम तोराकुवा, 43जोब उनकु पोरोब मनाव केते रुवाड़ केनाकु, दो धिंगाला ईसु जरुसलेम रिगी तहिएनाय; अरो नुवां उनी रेन एंगा-आपु तेः ककिन सारीइ केना 44उनकिन नुवां सोमझाः केनाकिन चि उनी हिजुः वनकु लोः हेनाया। इनाते उनकिन मीः हिलोः रआ होरा पुराव तयोम गी उनी के अपन कुटुमकु अरो जन चिनहार ठिनुः दंड़ा हेलावेनाकिन। 45अरो जोब उनी काय नामकेनाय दो दंड़ा-दंड़ा एते जरुसलेम गी अरो रुवाड़ एनाकिन 46अरो पेय हिलोः रआ तयोम उनकिन ता उनी के मरंग बिनती ओड़ाः रे धरम पोथी सिखाविनीः रआ ताला रे दुरुप केते उनकु रआ अयुम अरो उनकु एते कुली कुकनकेनाय रिगी नमेः एदेयाकिन 47जेतना उनी रआ अयुम एकेनाकु, उनकु सुबिन उनी रआ सोमोझ अरो उनी रआ जबाब एते चकरितोः केनाकु। 48तोब एंगा-आपु तेः उनी के नेल केते चकरीत एनाकिन अरो उनी रिई एंगातेः उनी के गामवादेयाय “ए होपोन, आम ता अलिञ एते चिलिमेन नुंका एताम? नेलमी, आम रिई आपुम अरो इञ दुख उठाव केते आम के दंड़ाम केनालिञ।”

49ईसु ता आचरेन एंगा-आपु तेः के गामवाःकिनाय, “इञ के दंड़ा रआ चिलि दरकार तहिकेना? चिलि अबेन नुवां कबेन सारीइ केना चि इञ के निचितगी अपन आपु रआ ओड़ाः रे तहीः हेनाःआं?” 50मुदा ईसु रआ उना गानाम, एंगा-आपु तेः ककिन सोमझावकेना।

51तोब ईसु उनकिन लोः नासरत रे हेच्‍चेनाय, उनकिन रआ हुकूम रे तहिएनाय; उनी रिई एंगातेः ता नुवां सुबिन गानाम आच रआ मोन रे दोहोवेताय। 52#1 समु 2:26; बु.बचन 3:4 अरो ईसु बुधि अरो होड़मो रे पहगार इदी एनाय अरो परमेसर अरो मनवांकु रआ दया रे हरा इदिएनाय।

Currently Selected:

लूका 2: BIY

Highlight

Copy

Compare