लूका 1
1
लूका थियुफिलुस कथिर ओल कनाय
1हुजूर थियुफिलुस,
परमेसर रआ कामि जे अबु रआ ताला रे बितावेकाना, उनी रआ बाखान बेचोट एते होर ओओल रे परयास एकाःआकु, 2जेलेका चि जे पहिल एते गी नुवां गानाम रआ नेनेलिकु अरो बचन रआ सुसारवान तहिकेनाकु अबुन तक तेबाः एताकु। 3इनाते, ए थियुफिलुस, इञ हों उना सुबिन गानाम रआ सुबिन हाल एटेच एते असली-असली जांचाव एकाःइञ, इनाते नुवां उचित अटकारेना चि उना गानाम आम कथिर मीः ओइर एते ओलिञ। 4नियां एते आम नुवां सरीकेम चि जे गानाम आम ता सीख नाम्मेकाःआम, उना सत हेके।
जोहन रआ जनम रआ आगमजानी
5 #
1 इति 24:10
जहुदिया पोरदेस रिई राजा हेरोदेस रआ समेय अबियाह रेन जाजक दोल रे जकरयाह लुतूम रिई मिहोर जाजक तहिकेनाय अरो उनी रिई एरा तेः हारुन जाजक बोंस रिई तहिकेनाय जेकर लुतूम इलिसिबा तहिकेना। 6उनकिन बनार परमेसर रआ नजेर रे धरमी तहिकेनाकिन अरो परभु रआ सुबिन हुकूम अरो नियम एते निरदोस सेसेन केनाकिन। 7मुदा उनकिन रेन मिहोर हों होपोन काकु तहिकेना, चिलिमेनचि इलिसिबा बांझी तहिकेनाय, उनकिन बनार हड़ाम-बुड़ही केनाकिन।
8नुंका होय्येना चि जोब जकरयाह आचरेन जाजक दोल रेन रआ पारी हिजुः रे परमेसर रआ मरंग बिनती ओड़ाः रे जाजक रआ कामिइ केनाय, 9दो जाजककु रआ रीति रआ लेकागी उनकु चिट्ठी सजों केते सला एदेयाकु परभु रआ मरंग बिनती ओड़ाः रे बोलो केते धुप उड़ावियाय। 10धुप उड़ाव घरीक सुबिन होरकु टांड़ी रे पराथनाय केनाकु। 11इमिताः परभु रिई मिहोर सोवारागदूत धुप उड़ाव रआ थान रआ जोम ती सोझ तिंगु उनी एते नेल इरिएनाय 12जकरयाह नेल केते घबराव एनाय अरो उनी रे मरंग भोय पेड़ेचेना। 13मगर सोवारागदूत ता उनी के गामवादेयाय, “ए जकरयाह!, ओलोम बोरोया, चिलिमेनचि आम रआ पराथना परमेसर अयुम एकाःआय अरो आम रिई एरा इलिसिबा एते आम कथिर मिहोर होपोन जनम वोःओय अरो आम उनी रआ लुतूम जोहन दोहोयमी। 14आम आनाद अरो रिझाव वोःओम अरो उनी रआ जनम रे बेचोट एते होर आनाद मनावियाकु, 15#लेखा 6:3चिलिमेनचि नोय परभु रआ नजेर रे महान होयुःआय। आर अंगुर रास अरो आरखी केहयो काय नुयाय अरो अपन माय ताय रआ होड़मो एते पबितर रावा एते भोरपुर वोःओय, 16अरो इसराइलिकु रे एते बेचोटकु के आच रिई परभु परमेसर रआ सोझ रुवाड़ कुवाय, 17#मला 4:5,6उनी एलियाह रआ रावा अरो सोमोर्थ रे होय केते परभु रआ लहा-लहा सेसेनाय आर आपुकु रआ मोन होन-होपोन सोझ रुवाड़ियाय अरो परमेसर के काकु मनाव वनकु के धरमिकु रआ सोमोझ रे अगु कुवाय अरो हिजुः वनीः परभु कथिर होर तेयार कुवाय।”
18जकरयाह ता सोवारागदूत एते कुलिएदेयाय, “नुवां इञ चिलका बिसवासिञ? चिलिमेनचि इञ दो हड़ामिञ अरो इञ रिई एरा हों बुड़ही एनाय।” 19#दानि 8:16; 9:21सोवारागदूत ता उनी के जबाब एमाःदेयाय, “इञ जिबराइल हेकेञ, जे परमेसर रआ हेनात तिंगु तहीः कनिञ अरो इञ आम एते नधनी कथिर अरो आम के नुवां खभेर ओनाव कथिर कुल एकाःदेञाय।” 20नेलमी, जे हिलोः तक नियां गानाम का पुराव ओ:वो, उना हिलोः तक आम गुड़ुम तहिनोःओम अरो गापाम कम दड़िवाःआ, इनाते चि आम ता इञ रआ गानाम रआ जे अपन रआ समेय रे पुराव ओ:वो, कम बिसवास लाःआ।
21होर जकरयाह रआ होरा नेनेल तहिएनाकु अरो चकरितोः हेलावेनाकु चि उनी के मरंग बिनती ओड़ाः रे इमिनुः देरी चिलिमेन लगावेना? 22जोब उनी टांड़ी हेच्चेनाय, दो उनी ता काय गापाम दड़िवाताय, इनाते उनकु सारी एताकु चि उनी एते मरंग बिनती ओड़ाः रे जहन इनीः दिसतार एकानाय। जकरयाह उनकु के इसारा एमाकुकन केनाय अरो गुड़ुम तहिएनाय।
23जोब उनी रआ सेवा-सुसार रआ हिलोः पुरावेना दो आच अपन ओड़ाः तोराया। 24इना हिलोः रआ तयनोम उनी रिई एरा इलिसिबा भारी होड़मो एनाय अरो पांच मेहना तक अपन के नुवां गाम केते उकु दोहो एनाय, 25चि “सामाज रे इञ रआ बेमाइन ओचोः कथिर परभु ता नेबरीक इञ रे दया केते इञ कथिर नुंका कामि एकाःआय।”
ईसु रआ जनम रआ बबेत उदुः
26जोब इलिसिबा के भारी होड़मोः छो मेहना सेसेन केना इमिन रे, परमेसर ता जिबराइल सोवारागदूत के गलील राइज रआ नासरत लुतूम चट्टी रे, मिहोर डिंडा कुरी ठिनुः कुलेःदेयाय, 27#मती 1:18उनी रआ सुतबन्धावनी जुसूफ लुतूम दाऊद ओड़ाः रिई मिहोर हेरेल लोः होयकेना उनी डिड़ा कुरी रआ लुतूम मरियम तहिकेना। 28सोवारागदूत ता उनी ठिनुः भीतरी हेचकेते गामवादेयाय, “जोहार! परमेसर रआ बेचोट दया आम रे होय्येकाना! परभु आम लोः हेनाया।”
29नुवां बचन ओनाव केते मरियम बेचोट घबराव एनाय अरो सोंचाः रे पोड़ावेनाय चि नुवां गानाम रआ चिलि ओरोथ हेके? 30सोवारागदूत ता उनी के गामवादेयाय, “ए मरियम! ओलोम बोरोया, चिलिमेनचि आम रे परमेसर रआ दया होय्येकाना। 31#मती 1:21नेलमी, आम भारी होड़मो नोःओम, मिहोर होपोन के जनमावियाम अरो उनी रआ लुतूम ईसु दोहोयाम। 32#2 समु 7:12,13,16; जसा 9:7उनी महान होयुःआय अरो परमपरधान रिई होपोन हेरेल गामुःआय अरो परभु परमेसर उनी के पुरखा आपु दाऊद रआ राइज गदी एमायाय। 33अरो जाकूब रेन बोंस रे सोबदिन राइजियाय, उनी रआ राइज का मुडू नोःओ।”
34मरियम ता सोवारागदूत के गामवादेयाय, “नुवां चिलका होयुःआ? इञ दो डिन्डागिञ।”
35सोवारागदूत ता उनी के जबाब एमाःदेयाय, “पबितर रावा आम रे अरगु नोःओ अरो परमपरधान परमेसर रआ सोमोर्थ आम रे हिजुःआ, इनाते उनी पबितर जे जनामोः वनीः हेनाया, परमेसर रिई होपोन हेरेल गामुःआय। 36नेलमी, आमरेन कुटुम इलिसिबा केहों बुड़ही रे होपोन हेरेल होयुः वनीः हेनाया, इलिसिबा जे बांझी गामुः केनाय, भारी होड़मो एकानाय उना छो मेहना होयुःकाना। 37#एटे 18:14चिलिमेनचि परमेसर रआ बचन बेकामा का होयुःकाना।”
38मरियम ता गाम्मेताय, “इञ परभु रिई धंगरीन हेकेञ, आम रआ बचन इञ रे पुरावोःका।” तोब सोवारागदूत उनी ठिनुः एते तोराया।
मरियम इलिसिबा एते नपाम्मोः तोराया
39उना तयोम जहां हिलोः, मरियम जहुदा दिसुम रे टोंगरी पोरदेस रआ मियाः हातु सोझ हरे-फरे चइल्लेताय, 40उनी जकरयाह रआ ओड़ाः सेन केते इलिसिबा के जोहार एदेयाय। 41जेंवगी इलिसिबा ता मरियम रआ जोहार अयुम्मेताय, उनी रआ लहिच रे होपोन उकुस-पुकुस एनाय अरो इलिसिबा पबितर रावा एते भोरपुर एनाय। 42अरो उनी जोड़ राव एते गाम्मेताय, “आम सुबिन एराकु रे एते धेनया हेनामा, अरो धेनया हेनाया आम रआ लहिच रिई होपोन हों! 43नुवां इञ कथिर चिमिनुः मरंग गानाम हेके, चि इञ रिई परभु रिई एंगातेः इञ ठिनुः हेच एनाय? 44नेलमी, जेंवगी आम रआ जोहार इञ रआ लुतूर रे ओनावेना, तेंवगी होपोन ता इञ रआ लहिच रे रिझ एते उकुस-पुकुस एनाय। 45धेनया हेनाया, उनी जे ता नुवां बिसवास एताय, चि परभु ता उनी एते जे गाम्मेताय, उना पुराव ओ:वो!”
मरियम रआ इसतुति सिरिञ
46तोब मरियम ता गाम्मेताय,
“इञ रआ जीव परभु रआ गुनाः कनाय,
47इञ रआ रावा अपन उद्धार कराव वनीः परमेसर रे आनाद मनाव कनाय;
48 #
1 समु 1:11
चिलिमेनचि उनी ता आच रिई नमर धंगरीन के लाइख बयेःदेञाय;
इनाते नेलपे, नेबरीक एते सुबिन जुग-जुग रेन होर इञ के धेनया मेताञाकु,
49चिलिमेनचि सुबिन एते बोलगार परमेसर इञ कथिर महान कामि एकाःआय
उनी रआ लुतूम पबितर हेनाःआं
50जे उनी एते बोरोय कनाकु उनी उनकु रे खुटी पर खुटी दया कराव चित तहिनोःओय
जे उनी एते बोरोय कनाकु खुटिकु एते खुटिकु तक बाय तहीः काना।
51परमेसर ता आच रआ बोलगार ती एते मरंग-मरंग कामि उदुःवाःकुवाय,
अरो जे अपन-अपन एते मोन रे मरंग सोमझाः केनाकु, उनकु के छितिर-बितिर वेःकुवाय।
52 #
अयू 5:11; 12:19 उनी ता हाकिम वनकु के उनकु रआ राइज गदी एते उयुः वेःकुवाय,
अरो नमर वनकु के बिरीत वेःकुवाय।
53उनी ता रेगेंच वनकु के बुगिन जिनिस एते बी वेःकुवाय,
अरो धनगार वनकु के एकेन ती उडुङ काःकुवाय।
54उना दया ता ओयहर कराव वते
उनी ता आचरेन धंगोर इसराइल के सम्भराव वेःकुवाय,
55 #
एटे 17:7
#
1 समु 2:1–10
जे करार नियां हेके चि अबराहम अरो उनी रेन बोंस रे सोबदिन दया देखाविञ,
जे लेका उनी ता अबु रेन आपु-आजाकु एते गाम लाःआय!”
56मरियम लगेभगे पेय मेहना इलिसिबा लोः तही केते आच रआ ओड़ाः रुवाड़ेनाय।
जोहन बतिसमा एएम वनीः रआ जनम
57जोब इलिसिबा के होपोन जनमव रआ समेय पुरावेना, तोब उनी ता कोरा होपोन के जनमव एदेयाय। 58उनी के हेनात-जपाः रेन अरो कुटुम ता नुवां अयुम केते चि परभु ता उनकु रे बेचोट दया एकाःआय, उनी उनकु लोः आनाद मनावेताय।
59 #
लेवी 12:3
अरो नुंका होय्येना चि आठवारा हिलोः उनकु होपोन के खतना#1:59 खतना कोरा होपोन रआ लहा हिस रआ हारता गेत कनाकु। कराव हेच्चेनाकु अरो उनी रआ लुतूम उनी रिई आपु तेः रआ लुतूम एते जकरयाह दोहो कथिरोः केनाकु। 60नियां रे उनी रिई एंगातेः ता जबाब एमाःकुवाय, “बङा; उनी रआ लुतूम जोहन दोहोयाबुन।”
61उनकु ता उनी के गामवादेयाकु, “आमरेन कुटुम रे नुवां लुतूम दो जहय रआ हों बनुःआं।” 62तोब उनकु ता उनी रिई आपु तेः के इसारा एते कुलिएदेयाकु “आम उनी रआ चिलि लुतूम दोहो कथिरोः कनाम?”
63उनी ता पाटी अगु इरी केते ओल्लेताय, “नोय रआ लुतूम जोहन हेके।” इना रे सुबिन चकरीत रे पोड़ावेनाकु। 64तोब जकरयाह रआ मोचा अरो अलांङ रड़ाना अरो उनी गापाम अरो परमेसर रआ धेनयाबाद कराव हेलावेनाय 65उनी रआ हेनात-जपाः रेन सुबिन तहीः वनकु होर रे भोय पेड़ेचेना अरो उना सुबिन गानाम रआ चरचा जहुदिया पोरदेस रआ सुबिन टोंगरी पोरदेस रे फयलावेना। 66अरो सुबिन अयुम वनकुता अपन-अपन मोन रे बिचार केते गाम्मेताकु, “नोय होपोन चिलका बयुःआय?” चिलिमेनचि परभु रआ ती उनी लोः तहिकेना।
जकरयाह रआ इसतुति सिरिञ
67उनी रिई आपु तेः जकरयाह पबितर रावा एते भोरपुर एनाय अरो आगमजानी कराव हेलावेनाय,
68“इसराइल रिई परभु परमेसर रआ इसतुति होयुःका!
उनी ता आचरेन होरकु के देंगा कुवाय अरो उनकु के छुटकारा वेःकुवाय,
69उनी ता आच रिई धंगोर दाऊद रआ ओड़ाः एते
अबु कथिर मिहोर सुबिन एते बोलगार अरो उद्धार कराव वनीः जनमाव एकाःदेयाय।
70परमेसर सोझ एते नधनी वनीः दोवासते पबितर होरकु रआ मोचा एते नंङ-सेदाय एते नुवां गाम अगु एकाःआय,
71चि उनी ता अबुन रेन बइरिकु एते अरो बइरिकु रआ ती एते,
अरो जे अबुन एते घिनाः केनाकु, उनकु एते अबुनके उद्धार बुनाय,
72उनी ता अबु रेन आबा-आजाकु रे दया लाःआय उनी रआ
पबितर करार ता ओयहर एकाःआय,
73अरो नुवां किरया उनी ता अबु रिई आपु अबराहम एते जोम लाःआय,
74-75चि उनी अबु के अपन बइरिकु रआ ती एते छोड़ाव केते,
उनी रआ लहा पबितरता अरो धरमिकता लोः
जुवेत भोइर निडर तही केते उनी रआ सुसार चित तहीःपे।
76 #
मला 3:1
“इञ रिई होपोन, परमपरधान परमेसर सोझ एते नधनी वनीः गामुःआय,
चिलिमेनचि परभु रआ होरा
तेयार कथिर उनी रआ लहा-लहा सेसेनाय,
77अपे होरकु एते नुवां उदुः वपेयिञ चि,
पाप रआ छमा नमुः एते उनकु उद्धार ओःओकु।
78अबु रिई परमेसर रआ बेचोट दया दोवासते;
बनचावोः रआ अबुन चेतान रे सोवाराग एते सिंगी बोंगा लेका मसकल चमकाव ओःवोय।
79 #
जसा 9:2
नुवां मसकल लुबाः अरो गोनोच रआ उम्बुल रे दुरुप वनकु के चमकाव ओ:वो,
अरो अबु रआ बका तके सांति रआ होरा नमुःका।”
80अरो उनी होपोन हरा इदिएनाय अरो रावा रे बोलगार इदी एनाय, इसराइल रे दिसतारोः रआ हिलोः तक टोंगरी रे तहिएनाय।
Currently Selected:
लूका 1: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
