लूका 5

पहिल चेलाकु होहो एनाकु

(मती 4:18–22; मरकुस 1:16–20)

1 # मती 13:1,2; मर 3:9,10; 4:1 मीः हिलोः ईसु गनेसरत रआ समुदर रआ अतोम रे तिंगु केनाय। इमिन रे भीड़ परमेसर रआ बचन ओनाव कथिर ईसु के तुंदरा लेदेयाकु, 2चि उनी ता समुदर रआ अतोम बरीया डोंगा नेल्‍लेताय, अरो हाकु ददाःइकु डोंगा एते अरगु केते झाली सोकोय केनाकु। 3ईसु सिमोन रआ डोंगा रे देच केते उना अतोम एते हुडिञगन संगिञ इदी कथिर गोहराव एदेयाय, इना तयोम ईसु डोंगा रे दुरुप केते जनता के सिखाव हेलावेनाय।

4जोब उनी सिख एम मुडू एताय तोब सिमोन के गामवादेयाय “गाहिड़ रे डोंगा इदिइमी अरो हाकु ददाः कथिर झाली ओडावेम।”

5 # जोह 21:3 सिमोन ता उनी के जबाब एमाःदेयाय “ए मालिक आले दो मीः निदा मेहनेत एताले रेहों आले जहनकु काले साप दड़िवाःकुवा, रेहोंगी आम रआ गानाम ते इञ झाली ओडाव कनिञ।” 6#जोह 21:6नुंका कराव रे बेचोट ढेर हाकु दाः एनाकु अरो उनकु रआ झाली ओड़ेचोः लेकाना। 7एते उनकु ता एटाः डोंगा रेन अकु रेन गाति के गाविच वेःकुवाकु चि हेच केते आले के देंगा लेयाकु उनकु हेच्‍चेनाकु अरो उनकु ता बनार डोंगा रे हाकु एते इमिनुः पेड़ेच वेःकुवाकु चि डोंगा डुबावोः लेकाना। 8नुवां नेल केते सिमोन पतरस ईसु रआ बका ठिनुः उकरुम केते गामवादेयाय “ए परभु इञ ठिनुः एते सेन जोनमी इञ दो पापी मनवां हेकेञ।”

9झाली रे इमिनुः हाकु दाः एनाकु इना रआ चलते सिमोन अरो उनी रेन गाति चकरीत एनाकु, 10अरो इनकागी जबदी रिई होपोन हेरेल तेः जाकूब अरो जोहन केहों जे सिमोन रेन देंगावन तहिकेनाकु चकरीत एनाकु। तोब ईसु ता सिमोन एते गामवादेयाय “ओलोम बोरोया नेबरीक एते आम मनवांकु के परमेसर रआ राइज रे अगु वनीः बयुःआम।”

11अरो उनकु डोंगा ता अतोम रे इदिकेते अरो सुबिन्‍नाः बागी केते उनी रआ तयोम एनाकु।

कोढ़ रोगी के बुगी एदेयाय

(मती 8:1–4; मरकुस 1:40–45)

12जोब ईसु मियाः चट्टी रे तहिकेनाय दो ओन्डो कोढ़ एते पेड़ेच वनीः मिहोर होर तहिकेनाय, अरो उनी ईसु के नेल एदेयाय अरो उकरुम केते गोहराव वेदेयाय, “ए परभु अगर आम चहाः रेदोम इञ के बुगिन कराव दड़िवाञाम।”

13ईसु ता अपन ती बड़हाव केते कोढ़ रोगी के जोटेत केते मेताःदेयाय, “इञ चहाः कनिञ आम बुगिन कोःमी।” अरो उनी रआ कोढ़ एनेनगी तोराःआ। 14#लेवी 14:1–32तोब उनी ता उनी के हुकूम एमाःदेयाय, जहय के ओलोम उदुःवाकुवा, मगर सेन केते अपन तीगी जाजक के नेल इरीःमी अरो अपन सुध होयुः रआ बबेत रे जहन्‍नाः मूसा ता दान रकाप ठहराव एकाःआय उना रकाप्पेम, जेकर एते होरकु आम रआ कोढ़ बुगिनोः रआ गोवाही होयुःका।

15मगर ईसु रआ चरचा अरोगी फयलाव इदिना अरो भीड़ के भीड़ उनी रआ अयुम कथिर अरो अपन हासु एते बुगीः कथिर जमाः केनाकु। 16मगर उनी टोंगरी रे एकला सेन केते पराथनाय केनाय।

ईसु लकवा रोगी के बुगी एदेयाय

(मती 9:1–8; मरकुस 2:1–12)

17मीः हिलोः नुंका होय्येना चि ईसु सिख एमाकुकन केनाय, अरो फरीसी अरो मूसा रआ नियम सिखावविकु ओन्डो दुरुप केनाकु जे गलील अरो जहुदिया पोरदेस अरो जरुसलेम इलाका रेन सुबिन हातु एते हेच केनाकु, अरो हासु वनकु के बुगी कराव कथिर परभु परमेसर रआ सोमोर्थ ईसु रे तहिकेना। 18उना घरीक, थोड़गन होर, मिहोर मनवां के, जे लकवा रोगी तहिकेनाय, परकोम रे अगुएदेयाकु अरो उनकु उनी के भीतरी इदी केते ईसु रआ हेनात दोहो कथिर उपाय दंड़ाय केनाकु। 19जोब भीड़ रआ चलते उनी के भीतरी काकु इदी दड़िवादेया दो उनकु ता छनमिन रे देच केते अरो खपरा उतुर केते उनी के परकोम लोः ईसु रआ लहा रे अरगु कदेयाकु। 20ईसु उनकु रआ बिसवास नेल केते उनी के गामवादेयाय “ए मनवां आम रआ पाप छमाना।”

21तोब धरम पोथी सिखाविकु अरो फरीसिकु सोंचाः हेलावेनाकु, नोय ओकोय हेकेय, जे परमेसर रआ निन्दा सिकेत कनाय? परमेसर के बागी केते ओकोय पाप माफ कराव दाड़ी वाःआय?

22ईसु ता उनकु रआ मोन रआ गानाम सारी केते उनकु एते गामवाःकुवाय, “अपे अपन मोन रे चिलिमेन सोंचाः कनापे? 23सेबा चिलिकाः हेनाःआं? चिलि नुवां गानाम चि आम रआ पाप माफिना, बङ रेदो नुवां गागाम चि बिरीत अरो सेन बेरायमी? 24मुदा अपे सारी केपे चि मनवा रिई होपोन तेः हेरेल केहों ओते रे पाप छमा रआ हक हेनाःआं” ईसु उनी लकवा रोगी एते गामवादेयाय, “इञ आम के गाम वामकानिञ हें, तिंगुःमी अपन परकोम रिमकेते अपन ओड़ाः सेन जोनमी।”

25उनी एनेन गी उनी रआ लहा एते बिरीत एनाय अरो जे परकोम रे पोड़ाव केनाय उना गोः केते परमेसर रआ बड़ाय कराव वते आच रआ ओड़ाः तोराया। 26तोब सुबिन चकरीत एनाकु, अरो परमेसर रआ बड़ाय कराव तहिएनाकु अरो बेचोट बोरो केते, गापाम हेलावेनाकु, तिहिञ आले चकरीत कामि नेल एकाःआले।

मालगुजारी अगु वनीः के होहो एदेयाय

(मती 9:9–13; मरकुस 2:13–17)

27नुवां तयनोम उनी टांड़ी उडुङ एनाय अरो लेवी लुतूम मिहोर मालगुजारी अगु वनीः के मालगुजारी ओड़ाः परकोम रे दुरुप एते नेलेःदेयाय, अरो उनी एते गामवादेयाय “इञ रआ तयनोम कोःमी,” 28तोब उनी सुबिन्‍नाः बागी केते बिरीत एनाय अरो उनी रआ तयनोम एनाय।

29तोब उनी लेवी लुतूम होर अपन ओड़ाः रे ईसु कथिर मियाः मरंग भोज तेयार एताय अरो उना भोज रे मालगुजारी अगु वनकु अरो एटाः होरकु रआ मियाः मरंग भीड़ तहिकेनाकु जे ईसु लोः जोजोम कथिर दुरुप केनाकु। 30#लूका 15:1,2नुवां रे फरीसी अरो उनकु धरम पोथी सिखाविकु उनी रेन चेलाकु एते नुवां गाम केते कुड़कुड़ाः हेलावेनाकु, अपे मालगुजारी अगुइकु अरो पापिकु रआ गाति रे चिलिमेन जोम-नुय कनापे?

31ईसु ता उनकु के जबाब एमाःकुवाय, बैध बुगिन होर कथिर बङा, मगर हासु इकु कथिर दरकार हेनाःआं। 32इञ धरमी होरकु रआ मोन ता बङा मुदा पापिकु रआ मोन पाप एते मोन रुवाड़ केते परमेसर लोः जुटाव कथिर हेच्‍चेकानिञ।

उपास रआ बबेत कुली

(मती 9:14–17; मरकुस 2:18–22)

33उनकु ता उनी के गामवादेयाकु, “जोहन रेन चेला दो बराबोइर उपास दोहोय कनाकु अरो पराथनाय कनाकु, अरो इनका गी फरीसिकु रेन चेला हों, मगर आमरेन चेला दो, जोम-नुय कनाकु।”

34ईसु ता उनकु के गामवाःकुवाय “जोब तक बोरबाबु उनकु लोः हेनाया, चिलि अपे बारातिकु के उपास दोहो दाड़ी वकुवापे, 35मगर उना हिलोः हिजुःआ जे रे बोरबाबु उनकु एते अलगेयाकु, तोब उनकु उना हिलोः उपास दोहोयाकु।”

36उनी ता मियाः कहनी उदुः केते उनकु के गामवाःकुवाय, “जहय हों नवां सोनोः एते किचरीः ओड़ेच केते मरी नाः सोनोः रे काकु टिपोन काना जदि जहय नुंकाय कनरेदोकु नवां नाः सोनोः हों ओड़ेचोःओ अरो उना टिपोन मरी वनाः रे बुगिन हों का अटकारोःओ। 37अरो जहय नवां अंगुर रास मरी हारता रआ भुतकी रे काकु पेड़ेच काना बङ रेदो नवां अंगुर रास, हारता रआ भुतकी ता ओड़ेच केते आतु नोःओ अरो हारता रआ भुतकी हों नास ओ:वो, 38मुदा नवां अंगुर रास नवां हारता रआ भुतकी रे पेड़ेच कनाकु। 39जहय होर मरी अंगुर रास नु केते नवां अंगुर रास काकु चहाः काना, चिलिमेनचि उनी गामकानाय चि मरी गी बुगिन अटकारोः काना।”

Currently Selected:

लूका 5: BIY

Highlight

Copy

Compare