लूका 6

जहुदी रआ जिराः हिलोः रिई परभु

(मती 12:1–8; मरकुस 2:23–28)

1 # नियम 23:25 ईसु अरो चेलाकु जिराः हिलोः खेत होरा एते होयकेते सिनुः केनाकु। उनी रेन चेला गेले टोकेच केते अरो ती रे मेयसाव केते जोम इदिइ केनाकु। 2तोब आधा फरीसिकु ता गाम्‍मेताकु, “जे नियम मोताबिक जिराः हिलोः उचित बनुःआं, उना अपे चिलिमेन कराव कनापे।”

3ईसु ता उनकु के जबाब एमाःकुवाय, चिलि अपे नुवां कपे पोड़हावेकाना “चि जोब दाऊद अरो उनी रेन गाति रेंगेच एनाकु दो उनी चिलि लाःआय। 4#लेवी 24:9#1 समु 21:1–6दाऊद चिलका परमेसर रआ ओड़ाः रे तोराया अरो दान रकाप अनाः पिठा इदिकेते जोम्‍मेताय जेके जाजककु के बागी केते अरो जेके उचित का तहिकेना रेहों जोजोम कथिर अपन गातिकु के हों एमाःकुवाय?”

5अरो ईसु ता उनकु एते गामवाःकुवाय, “मनवा रिई होपोन तेः हेरेल जिराः हिलोः रिई हों परभु हेकेय।”

सोपोच ती वनीः होर के बुगिन एदेयाय

(12:9–14; मरकुस 3:1–6)

6नुंका एना चि ईसु जहुदी रआ जिराः हिलोः बिनती ओड़ाः रे सेन केते सिखाव हेलावेनाय अरो ओन्डो मिहोर होर तहिकेनाय जेकर जोमती सोपोच तहिकेना। 7धरम पोथी सिखाविकु अरो फरीसिकु ईसु रे दोस लगाव रआ मोका ननाम रआ, तक रे, तहिकेनाकु, चि नेलाबुन नुवां जिराः हिलोः बुगी एयकानायचि बङा 8मगर उनी उनकु रआ बिचार सरिइ केनाय इनाते उनी ता सोपोच ती वनीः होर के गामवादेयाय बिरितमी ताला रे तिंगुःमी। “उनी बिरीत तिंगु वेनाय।” 9ईसु ता उनकु के गामवाःकुवाय, “इञ अपे एते नुवां कुलि पेकानिञ चि जिराः हिलोः नियम चिलिकाः कराव उचित गामकानाय, बुगिन कराव चि बुराय कराव जीव ता बनचाव चि नास कराव?” 10तोब उनी ता चइरो ओइर उनकु सुबिन के नेल केते उनी मनवां के गामवादेयाय “आम रआ ती जिलिंगएम” उनी ता इनका गी करावेताय, अरो उनी रआ ती पहिल लेका बुगिनेना।

11नुवां नेल केते खिसावेनाकु अरो अकु-अकु रे गापाम हेलावेनाकु, चि अबु ईसु के चिलियाबुन?

बारहों कुलवानकु के बहाली

(मती 10:1–4; मरकुस 3:13–19)

12उना हिलोः ईसु पराथना कथिर मियाः टोंगरी रे देच एनाय अरो मीः निदा परमेसर एते पराथना रे बितावेताय। 13सिंगी होय्येना रे ईसु आचरेन चेलाकु के हेनात होहोवेःकुवाय अरो उनकु रे एते बारहों चेलाकु के सला केते उनकु रआ लुतूम कुलवानकु दोहोवेताय; 14अरो नोकु हेकेकु सिमोन जेकर लुतूम ईसु ता पतरस लुतूम दोहोवेताय अरो उनी रिई बोयहा अन्धरियास, जाकूब, जोहन, फिलिपुस अरो बरतुलमय, 15अरो मती अरो थोमा हलफइ रिई होपोन तेः हेरेल जाकूब, सिमोन जे दिसुम भक्‍त गामुःकनाय, 16अरो जाकूब रिई होपोन जहुदा इसकोरोती, जे ईसु के सापइरिएदेयाय।

सिख एएम अरो बुगी कराव

(मती 4:23–25)

17तोब ईसु कुलवानकु लोः टोंगरी एते अरगु केते समथेर ठांव रे बेचोट चेलाकु रआ ताला रे हेच्‍चेनाय। अरो सुबिन जहुदिया पोरदेस, जरुसलेम अरो सूर अरो सयदा रआ समुदर आतोम एते बेचोट होर जमा एनाकु। 18उनकु ओन्डो ईसु रआ अयुम अरो अपन हासु एते बुगीः कथिर जमा केनाकु। अरो घिन रावा एते सतावान होर हों ओन्डो बुगिनोः कथिर हेच केनाकु। 19सुबिन उनी के जोटेत कथिरोः केनाकु, चिलिमेनचि उनी एते सोमोर्थ उडुङ केते सुबिन के बुगिन कुकनकेनाय।

सुख दुख बचन

(मती 5:1–12)

20तोब उनी ता अपन चेला सोझ नेलकेते गामवाःकुवाय,

“धेनया हेनापेया जे रेंगेच-रबंङ अपे,

परमेसर रआ राइज अपे रआ हेके।

21धेनया हेनापेया अपे जे रेगेंच अपे,

बी केपेयाय।

धेनया हेनापेया जे निमीः इयाम कनापे,

चिलिमेनचि लंदायापे।”

22 # 1 पत 4:14 धेनया हेनापेया अपे, जोब मनवा रिई होपोन तेः हेरेल रआ तयोम सेसेन रआ चलते होर अपे एते बाइर पेयाकु, अरो बेमाइन अरो बुराय केते उडुङ पेयाकु। 23#2 इति 36:16; कु.कामि 7:52 इमिन रे अनादित होयकेते चुड़ीरोःपे चिलिमेनचि नेलपे, अपे कथिर सोवाराग रे मरंग इनाम हेनाःआं उनकु रेन आपु-आजाकु परमेसर सोझ एते नधनी वनकु लोः हों इनका गी कराव कुकनकेनाकु।

24मुदा हाय अपे जे निमीः धनगार हेनापेया,

अपे अपन सुख-चइन नाम चुकाव एतापे।

25हाय अपे रे जे निमीः बीः अपे,

अपे रेगेंच ओःओ।

हाय अपे रे, जे निमीः लन्दाय कनापे,

चिलिमेनचि दुख ओओपे अरो इयामापे!

26“हाय अपे रे जोब सुबिन मनवां अपे के सहराव पेकानाकु, चिलिमेनचि उनकु रेन आपु-आजाकु परमेसर सोझ एते नधनी वान मेन केते बेदा कनाकु उनकु लोः हों नुंका गी करावे केनाकु।”

बाइरिकु एते दुलार

(मती 5:38–48; 7:12)

27मगर इञ अपे अयुमइकु एते गामवापेकानिञ चि अपन बइरिकु एते दुलार कुपे, जे अपे एते बिरोध इयाकु उनकु रआ भलायेपे। 28जे अपे के सरफाव पेकानाकु उनकु के आसरीबाद एमाकुपे। जे अपे के आपमान पेयाकु उनकु कथिर पराथनायपे। 29जे अपे रआ मियाः जोहा रे चटाः रु पेकानाकु, एटाः अनाः जोहा हों उनकु सोझ वकुपे। जे अपे रआ पेछोरी रेच पेकानाकु, उनकु के अपे रआ सोनोः इदी रे ओलोपे रोकावकुवा। 30जे आम एते कोय मिकानाकु उनकु के एमाकुम अरो जे आम एते आम रआ अपन रेचकानाकु उना ओलोम कोय रुवाड़ कुवा। 31#मती 7:12 जे बेवहार अपन कथिर एटाः होर एते चहाः कनापे, इनका गी बेवहार अपे हों एटाः होर के कराव कुपे।

32जदि आम अपन दुलार दोहो वनीः एते दुलार दोहोयाम दो आम रआ चिलि फयदा? चिलिमेनचि पापी हों आच रिई दुलार दोहो वनीः लोः दुलार दोहोयकानाकु। 33जदि अपे अपन बुगिन कामि कराविकु लोः बुगिन कामि यापे दो, अपे के चिलि फयदा? चिलिमेनचि पापी हों नुंका गी कराव कनाकु। 34जदि आम उनकुके एमाकुकानाम जेकर एते रुवाड़ ननाम रआ आसराय कनाम दो नियां रे आम रआ चिलि फयदा, चिलिमेनचि पापी पापिकु के रीन एमाकुनाकु चि इमिनुः गी अरो नमाय। 35मुदा आमरेन बइरिकु के दुलार कुम उनकु के बुगिन कुम। जहन्‍नाः रुवाड़ अगु रआ आसरा ओलोम दोहोया अरो रीन एमाकुम। तोबे आम कथिर परतिफोल होयुःआ अरो आम परमपरधान परमेसर रिई होपोन बयुःआम, चिलिमेनचि उनी बुराय करावान के अरो धेनयाबाद का एएम वनकु के माया कुकानाय। 36जे लेका अपे रिई सोवारागदूत आबा माया एते पेड़ेच हेनाया, इनका गी अपे हों माया एते पेड़ेच बयुःपे।

दोस ओलोपे लगाविया

(मती 7:1–4)

37जहय केहों भला-बुरा गामकेते ओलोपे नेयाय कुवा, जेकर एते परमेसर अपे केहों काय नेयाय पेयाय अरो दोस ओलोपे लगावकुवा, जेकर एते परमेसर अपे रेहों दोसी काय ठहरावपेयाय। माफ कुपे, जेकर एते परमेसर अपे केहों माफ पेयाय। 38एमाकुपे अरो अपे केहों परमेसर एमापेयाय। ओता-ओता केते, हिलाव-हिलाव केते पेड़ेच वनाः चेतान चुगचुगाव वनाः, जे सुबिन के सुबिन सोंग परमेसर अपे रआ कोजोङ रे दुल वपेयाय, चिलिमेनचि जे सोंग वनाः एते सोंग कनापे इना सोंग तिगी अपे केहों एमापेयाकु।

39 # मती 15:14 अरो उनी ता उनकु एते मियाः कहनी ओनावाःकुवाय “चिलि अंधरा, अंधरा के होरा उदुः दड़िवाकुवाय? चिलि बनार गाड़हा रे ककिन उयुःवो?” 40#मती 10:24,25; जोह 13:16; 15:20चेला गुरु एते मरंग काकु होयुःका पुरापुरी सिखाव नाम केते, तयोम एते उनी आच रिई गुरु लेका बाय दड़िवाःआय।

41अपे बोयहा रआ हुडिञ गलती तदो एनेनगी साप केकानापे, अपन खुद रआ मरंग गलती ता अनदेखा ककानापे? 42अपे के अपन खुद रआ गलती दो का नेलुःकाना अरो चइल एतापे बोयहाकु रआ गलती सुधराव, ए कपटाहा पहिल खुद अपन रआ मरंग-मरंग गलती ता सुधरावेपे तोब जहां रे सेन केते अरो होर रआ हुडिञ-हुडिञ गलती ता चिनहाव रे अरो उना सुधराव रे अरो होर रआ देंगा दड़िवाःआपे, दो चिलका गाम दड़िवाःआपे हिजुः बोयहा आम रआ गलती ता सुधराविञ।

जे लेका दाड़ु इनका जो

(मती 7:16–20; 12:33–35)

43बुगिन दाड़ु बुगिन जो एमुः कनाय, अरो कठिक दाड़ु कठिक जो एमुः कनाय। 44#मती 12:33इनाते सुबिन मिमियाः दाड़ु अपन जो एते चिनहाव कोःकाना, चिलिमेनचि होर गजार एते अंजीर काय गोत कनाय अरो जनुम झुड़ एते अंगुर जो। 45#मती 12:34बुगिन मनवां, जे बुगिन गानाम उनी रआ मोन रे जमा एकाना, इना रे एते गी बुगिन गानाम उडुङ कनाय अरो कठिक मनवां, जे बुराय उनी रआ मोन रे हेनाःआं, इना रे एते गी कठिक-कठिक गानाम उडुङ कनाय। चिलिमेनचि जे मोन रे पेड़ेच एकाना, इनागी मोचा एते उडुङओः काना।

ओड़ाः बबय वनकिन बार होर

(मती 7:24–27)

46“जोब आम इञ रआ गानाम कम मनावोः कन रेदो चिलिमेन इञ के ए परभु ए परभु मेताञकानाम?” 47जहय इञ ठिनुः हिजुःआय अरो इञ रआ गानाम अयुम केते उनकु मनावोः कनाकु इञ अपे के उदुः वपेकानिञ चि उनकु ओकोय रआ लेका हेनाःकुवा। 48नोय उनी होर रआ लेका हेनाया, जे ता ओड़ाः बबाय घरीक ओते गहिड़ उर केते चटाइन रे नेव दोहोवेताय अरो जोब बाइड़ हेच्‍चेना दो दाः उना ओड़ाः रे ताकिच्‍चेना मुदा दाः ता उना ओड़ाः काय हिलाव दड़िवाताय चिलिमेनचि उना ओड़ाः बेचोट बेरयार बाय केना। 49मुदा जे इञ रआ गानाम ओनाव कनाय अरो उना रे काय सेन कनाय, उनी, उनी होर लेका हेनाया जे बिन नेव उर ते ओते रे अपन ओड़ाः बायकानाय। बाइड़ धका अरो तकिच वोःकाना दो उना ओड़ाः एनेन गी धसाव कोःकाना।

Currently Selected:

लूका 6: BIY

Highlight

Copy

Compare