मरकुस 16
16
ईसु रआ जुवेत बिरितोः
(मती 28:1–8; लूका 24:1–12; जोहन 20:1–10)
1जोब जिराः हिलोः बितावना, दो मगदलना हातु रिई मरियम अरो जाकूब रिई एंगातेः मरियम अरो सलोमी ता सोः सुनूम किरीञ एताकु, चि हेचकेते ईसु रआ लास रे ओजोःइयाकु। 2एतवार हिलोः बेचोट सेताः जोब सिंगी बोंगा उडुङ ओःकेनाय, उनकु मरघाटी रे हेच्चेनाकु। 3अरो अकु-अकु गापाम केनाकु, “अबुन कथिर मरघाटी रआ दुवेर एते दिड़ी ओकोय पेलहोयाय?” 4जोब उनकु बोहोः रीम केते नेल्लेताकु, दो दिड़ी पेलहो केना, उना बेचोट मरंग दिड़ी तहिकेना। 5मरघाटी रआ भीतरी सेन केते उनकु मिहोर जवान के जिलिंग-जिलिंग पुन्डी किचरीः होरोः वनीः जोम ती सोझ दुरुप नेलेःदेयाकु अरो बेचोट चकरीत एनाकु।
6उनी उनकु एते गामवाःकुवाय, “ओलोपे चकरीत ओ:वो, अपे नासरत रिई ईसु के जे कुरुस रे ठोकाव लेदेयाकु, दंड़ाय कनापे? उनी जुवेत बिरीत एकानाय, नोन्डो बनुः इचाय; नेलेयपे, नियागी उना ठांव कानाः, जे ठिनुः उनी के दोहो लेदेयाकु। 7-8#मती 26:32; मर 14:28 मुदा अपे सिनुःपे अरो उनी रेन चेलाकु के अरो पतरस के गामवायपे चि, ‘उनी अपे एते पहिल गलील सिनुःआय। जे लेका उनी अपे के गामवाःपे केनाय, अपे ओन्डो उनी के नेलेयापे।’”
अरो उनकु उडुङ केते मरघाटी एते नीर एनाकु; चिलिमेनचि चकरीत केते थरथराः अरो घबराः लगावेनाकु; उनकु जहय एते जहन्नाः काकु गाम लाःआ, चिलिमेनचि बोरोय केनाकु।
मगदलना हातु रिई मरियम के ईसु नेल इरिएनाय
(मती 28:9–10; जोहन 20:11–18)
9एतवार हिलोः मरसल होयुः रिगी उनी जुवेत बिरीत केते सुबिन एते पहिल मगदलना हातु रिई मरियम के जेकर रे उनी सात मुवां रावा उडुङ लेःकुवाय, नेल इरिएनाय। 10उनी सेन केते ईसु रेन गाति के जे सोंच रे डुबाव केनाकु अरो इयाम केनाकु खभेर एमाःकुवाय। 11उनकु नुवां अयुम केते चि उनी जुवेत गियाय अरो उनी ईसु के नेल एकाःदेयाय, दो उनकु काकु पेतयाव केना।
बार चेला के ईसु नेल इरिएनाय
(लूका 24:13–35)
12इना तयोम ईसु एटाः रुप रे उनकु चेला रे ते बार होर के जोब उनकिन हातु सोझ सिनुः केनाकिन, नेल इरिएनाय। 13उनकु हों रुवाड़ केते अपन गातिकु के खभेर एमाःकुवाकु, मुदा उनकु उनकिन रआ हों काकु बिसवास एकेना।
गारो चेलाकु के ईसु नेल इरिएनाय
(मती 28:16–20; लूका 24:36–49; जोहन 20:19–23; कुलवानकु.कामि 1:6–8)
14तयोम एते ईसु उनकु गारो चेलाकु केहों जोब उनकु जोजोम कथिर दुरुप केनाकु नेल इरिएनाय, उनकु रआ अबिसवास अरो ढिठाय मोन नेल केते डाटाव वेःकुवाय, चिलिमेनचि उनकु उनी रआ जुवेत बिरीत रआ तयोम जे ईसु के नेल लेदेयाकु उनी रेन चेलाकु काकु बिसवास लाःआ। 15#कु.कामि 1:8 अरो उनी उनकु एते गामवाःकुवाय, “अपे दुनिया रआ सुबिन कोना-कोना रे सेन केते सुबिन होर के बुगिन खभेर परचार वाकुपे। 16जे बिसवासियाकु अरो बतिसमा अगुयाकु, उनी रआ उद्धार होयुःआ, मुदा जे काकु बिसवासिया उनकु दोसी ठहराव वोःओकु। 17जे बिसवासियाकु उनकु कथिर नुवां चिनहा होयुःआ चि उनकु इञ रआ लुतूम एते मुवां रावा के उडुङ कुवाकु, नवां-नवां भाखा गापाम्माकु, 18जदि बिञ के साप कुवाकु, उनकु गोजुः रानु हों नुंयाकु रेहों उनकु काकु जहन नोःओ, उनकु हासु-रुवा वनकु रे ती दोहोयाकु अरो उनकु बुगिन नोःओकु।”
ईसु सिरमा रिम्मेनाय
(लूका 24:50–53; कुलवानकु.कामि 1:9–11)
19 #
कु.कामि 1:9–11
परभु ईसु आचरेन चेला लोः नधनी तयोम सोवाराग रे रिम्मेनाय, परमेसर रआ जोम ती सोझ दुरुप्पेनाय। 20अरो उनकु सेन केते सुबिन ठांव रे परचार एताकु, अरो परभु उनकु के देंगा चित तहिएनाय। अरो उना चिनहा जे गाति-गाति होयुः केना, चेलाकु रआ सिखाव बेरयार इदिएना। अमीन।
Currently Selected:
मरकुस 16: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
