मरकुस 5
5
बालु होर के बुगिन एदेयाय
(मती 8:28–34; लूका 8:26–39)
1ईसु अरो चेलाकु गलील समुदर रआ आना परोम गिरासेनिया पोरदेस तेबाःएनाकु। 2जोब डोंगा एते उनकु अरगु एनाकु दो एनेन गी मिहोर होर जेकर रे घिन रावा तहिकेनाय, जे मरघाटी एते उडुङ केते ईसु ठिनुः हेच्चेनाय। 3उनी मरघाटी ताला रे तहीः केनाय अरो जहय बेरी ते हों काकु तोल दड़िवाय केना; 4चिलिमेनचि उनी एनेन-एनेन गी, बेरी अरो सिकड़ी एते तोलेय केनाकु, ते उनी सिकड़ी हुचाः एताय अरो बेरी हों खन्डा-खन्डा लाःआय, अरो जहय हों उनी के अकु रआ कबजा रे काकु साप दोहो दड़िवाय केना। 5उनी लघाइर गी निदा सिंगी मरघाटी अरो बुरु रे होनोर-होनोर ते कुर्रीइ केनाय, आच तिगी दिड़ी एते घवेलोः केनाय।
6उनी ईसु के नेल केते संगिञ तिगी नीर अगुवेताय अरो उनी उकरुम डोंडोत वते ईसु रआ बका रे उयुःएनाय, 7अरो जोड़ एते कुर्री केते गाम्मेताय, “ए ईसु, परमपरधान परमेसर रिई होपोन हेरेल, इञ के आम एते चिलि कामि? इञ आम के मेताम कनिञ चि, परमेसर एते किरया जोम कनिञ मेनमी, चि इञ के तकलिब ओलोम एमाञा!” 8(उनी इनाते गाम्मेताय चिलिमेनचि ईसु उनी एते गामलाःआय, “ए घिन रावा, नोय होर एते उडुङ जोनमी।”)
9ईसु उनी एते कुलिएदेयाय, “आम रआ चिलि लुतूम हेके?”
मुवां रावा ईसु के गामवादेयाय, “इञ रआ लुतूम पलटनकु#5:9 पलटनकु पलटनकु मनेकि लिगियोन - 6000 सिपाही रेन सेना हेके, चिलिमेनचि आले बेचोट मेनाःलेया!” 10अरो उनी ईसु के बेचोट गोहराव एदेयाय चि, “आले मुवां रावाकु के नुवां पोरदेस एते बहरी ओलोम कुल लेया।”
11ओन्डो टोंगरी रे सुकरी रआ मियाः मरंग गोहड़ा अतिञ केनाकु। 12मुवां रावाकु ईसु एते गोहराव एदेयाकु, “आले के उनकु सुकरी रे कुलकालेम चि आले उनकु रआ होड़मो भीतरी रे बोलो नाले।” 13इनाते उनी उनकु के हुकूम एमाःकुवाय अरो घिन रावा उडुङ केते, सुकरी रआ होड़मो भीतरी रे बोलो एनाकु। गोहड़ा रे जे बार हजार सुकरी तहिकेनाकु, खंड़हर अतोम चुड़ीर केते, समुदर रे डुबाव गोच्चेनाकु।
14तोब सुकरी गोरखिवानकु, नीर केते चट्टी, हातु रे खभेर उदुःवाःकुवाकु अरो जे होयकेना उना होर नेनेल हेच्चेनाकु, 15ईसु रआ हेनात हेचकेते उनकु उनी के जेकर रे मुवां रावा तहिकेनाकु अरो जे रे पलटन समाव केनाकु, उनी होर किचरीः होरोः केते बुगिन एते दुरुप केनाय, उनकु नेलेःदेयाकु आर बोरो वनाकु। 16नेनेलवानकु उनी रआ जेकर रे मुवां रावा तहिकेनाय अरो सुकरी चिलका एनाकु उना खभेर उनकु के उदुःवाःकुवाकु।
17तोब उनकु ईसु एते गोहराव केते, गागाम हेलावेनाकु, चि आले रआ पोरदेस एते सेनजोनमी।
18जोब ईसु डोंगा रे देजुः हेलावेनाय दो, उनी जे रे पहिल मुवां रावा तहिकेनाय, उनी एते गोहराव हेलावेनाय, “इञ के आम रआ गाति रे तही इरीवाञमी!”
19मुदा ईसु उनी के ओलोम हिजुःआं मेन एते मना एदेयाय अरो उनी के गामवादेयाय, “आम ओड़ाः सेन केते आमरेन होर के उदुःवाकुम, चि इञ रे दया केते, परभु अपे कथिर चिलका मरंग कामि एकाःआय।”
20उनी दिकापुलिस पोरदेस#5:20 दिकापुलिस पोरदेस नियां दस गो चट्टी रआ राइज तहिकेना। सेन केते नुवां गानाम रआ परचार हेलावेनाय, चि ईसु इञ कथिर चिलका मरंग कामि एताय अरो सुबिन होर चकरीत एनाकु।
जाइर रिई गोच कुरी अरो मिहोर रोगी एरा
(मती 9:18–26; लूका 8:40–56)
21ईसु अरो डोंगा एते परोम रुवाड़ हेच्चेनाय, उनी मरंग समुदर रआ अतोम रिगी तहिकेनाय, दो बेचोट भीड़ उनी ठिनुः जमाएनाकु। 22इमिताः जहुदी रआ बिनती ओड़ाः रिई मिहोर सरदार जाइर लुतूम होर तहिकेनाय अरो उनी के नेल केते उनी रआ बका रे उयुःएनाय 23अरो नुवां गामकेते उनी एते गोहराव कराव हेलावेनाय, “इञ रिई दुलार होपोन एरा गोजुः लेका हेनाया। आम हेचकेते उनी रे ती दोहोयमी चि उनी बुगी केते जुवेत तहिनाय!”
24तोब ईसु, उनी रआ गाति रे तोराया अरो मरंग भीड़ उनी रआ तयोम एनाकु, नोन्डो तक चि होर उनी रे उयुःवोः लगावेनाकु।
25मिहोर एरा तहिकेनाय, जे रे बारो बरीस एते मयम अतुः रआ रोग तहिकेना। 26उनी रानु-मुरगन वनकु एते बेचोट रानु-मुरगन इरी एनाय रेहों दुख बिपेत अरो एतकोना अरो आच रआ सुबिन हुरु टका खरचा एताय रेहोंगी उनी के जहन फयदा का होयकेना, मुदा अरोगी रोगताय एतको इदिएना। 27उनी ईसु रआ चरचा अयुम लाःआय, इनाते भीड़ ताला रे उनी रआ तयोम हेच्चेनाय। उनी रआ किचरीःताय जोटेतेताय, 28चिलिमेनचि उनी आच रआ मोन रे गाम्मेकेनाय, “जदि इञ उनी रआ किचरीःताय जोटेतिञ रेदो बुगी होय जोनिञ।”
29आर एनेन गी उनी रआ मयम अतुः अटकावेना अरो उनी आच रआ होड़मो रे सरीएताय चि इञ उना दुख एते बुगिन्नीञ। 30ईसु एनेन गी सरीएताय चि इञ रे एते सोमोर्थ उडुङ एकाना अरो भीड़ रे तयोम नेल रुवाड़ केते कुलिवेःकुवाय, “इञ रआ किचरीः ओकोय जोटेत एताय?”
31उनी रेन चेला उनी के गामवादेयाकु, “आम नेल कुकन गियाम चि आम ठिनुः भीड़ उयुः बेराः कनाकु, आर आम मेन कनाम चि ओकोय इञ के जोटेत एदेञाय?”
32तोब ईसु उनी के नेनेल कथिर जे उनी के जोटेत लेदेयाय, चइरो ओइर नेल्लेताय। 33तोब उनी एरा सारी केते चि उनी के चिलका होय एकाना, बोरोय-बोरोय अरो थड़थड़वाते हेच्चेनाय अरो उनी रआ कटा रे उयुः केते उनी एते सुबिन हाल सच-सच उदुःवादेयाय। 34ईसु उनी के गामवादेयाय, “होपोन, आम रआ बिसवासगी आम के बुगी वेःमाय, सांति ते सेनजोनमी अरो आम रआ नुवां हासु एते बनचाव तहीःमी।”
35उनी लोः नुवां गाम एकेनाय रिगी मुध जाइर रआ बिनती ओड़ाः एते होर हेच केते गामवादेयाकु, “आम रिई होपोन एरा दो गोच्चेनाय, दो गुरु के चिलिमेन दुख ऐमाय कनाम?”
36जे गानाम उनकु गाम्मेकेनाकु, उना ईसु अनसुनी केते, बिनती ओड़ाः रिई सरदार के गामवादेयाय, “ओलोम बोरोया; सिरीफ बिसवास दोहोयमी।” 37अरो उनी, पतरस, जाकूब अरो जाकूब रिई बोयहा जोहन के बगी केते जहय के आच लोः काय हेच इरीवाःकुवाय। 38जाइर रआ ओड़ाः रे तेबाः केते, ईसु बेचोट होर के इयाम राः एते नेलेःकुवाय। 39तोब उनी भीतरी सेन केते उनकु के गामवाःकुवाय, “अपे चिलिमेन गरेद कनापे आर इयाम कनापे? कुरी काय गोच, मगर गितीच एकानाय।”
40उनकु उनी रआ गानाम ओनाव केते लंदा हेलावेनाकु। मुदा उनी सुबिन के उडुङ काःकुवाय अरो कुरी रेन एंगा-आपु अरो आचरेन चेला लोः गाति केते भीतरी, जे ठिनुः कुरी तहिकेनाय ओन्डो तोराकुवा। 41अरो कुरी रआ ती साप केते उनी के गामवादेयाय, “तलीता कुमी।” ओरोथ तेः हेके, “ए कुरी! इञ आम के गाम वामकानिञ, बिरीत।”
42कुरी एनेन गी बिरीत केते सेन-बेरा हेलावेनाय; कुरी बारो बरीस रिई तहिकेनाय। नुवां नेल केते होर बेचोट तजुब एनाकु। 43अरो उनी उनकु के चेताव केते हुकूम एमाःकुवाय चि नुवां गानाम जहय हों ओलोकु सरीका अरो गाम्मेताय, “नोय के जहन्नाः जोजोम अनाः एमायपे।”
Currently Selected:
मरकुस 5: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
