रोमि 8
8
पबितर रावा दोवासते जीवन
1नेबरीक जे मसी ईसु रे मेनाकुवा, उनकु रे दन्ड रआ हुकूम बनुःआं, (चिलिमेनचि उनकु होड़मो रआ मोताबिक बङा, मुदा रावा रआ मोताबिक सेसेन कनाकु।) 2चिलिमेनचि रावा रआ नियम, जे ईसु मसी रे जीवन एमुःकानाय, इञ के पाप रआ नियम एते अरो गोनोच सोझ इदी कनाय, आजाद एदेञाय। 3मनवां रआ सोवाभव कोमजोरी रआ चलते मूसा रआ नियम जे कराव तहिकेना, उना कामि काय कराव दड़ी वताय, उना कामि परमेसर ता पुराव एताय। उनी ता पाप रआ बलिदानोः कथिर अपन होपोन हेरेल के कुलेःदेयाय, जे ता पापी मनवां लेका होड़मो धारन एताय। नियां लेका परमेसर ता मनवां होड़मो रे पाप ता रे दंड एम्मेताय। 4ताकि अबुन रे, जे होड़मो रआ पाप सोवाभव एते बङा, मुदा रावा रआ नियम मोताबिक सेसेन कनाबुन, नेयाय उचित जरुरेत पुराव कोःका। 5चिलिमेनचि जे होर होड़मो रआ मोताबिक जुवेत ओःकानाकु, उनकु, होड़मो रआ हिछा रे मोन लगाव कनाकु, मुदा उनकु जे रावा रआ मोताबिक जुवेतोः कनाकु, उनकु रावा रे मोन लगाव कनाकु। 6होड़मो रे मोन लगाव दो गोनोच हेके, मुदा रावा रे मोन लगाव जीवन अरो सांति हेके। 7चिलिमेनचि होड़मो रे मोन लगाव दो परमेसर एते बाइर कराव हेके, चिलिमेनचि नुंकन मोन न दो परमेसर रआ नियम रआ अधिन रेया अरो न तही दड़िवाःआय। 8होड़मो रआ हिछा रे सेसेन कनाकु उनकु मनवां, परमेसर के खुस काकु दोहो दड़िवाया।
9जदि परमेसर रआ रावा सरिगी अपे रे बोसाः काना, रेदो अपे, होड़मो रआ हिछा एते बङा, मुदा रावा रआ दोवासते जुवेतोः कनापे। जे मनवां रे मसी रआ रावा का बोसाः काना, उनी मसी रिई बङ कानीः 10अरो जदि मसी अपे रेयाय रेदो होड़मो पाप रआ चलते गोच एकाना, रेहोंगी रावा धरमी होयुः रआ चलते जुवेत हेनाःआं 11#1 कुरु 3:16 अरो जदि परमेसर रआ रावा जे ईसु के गोच वनकु रे ते जुवेत लेदेयाय, अपे रआ भीतरी रे बोसाः कनाय रेदो परमेसर जे ता ईसु मसी के गोच वनकु रे ते जुवेत लेदेयाय, अपे रआ गोजुः होड़मो ता अपन रावा एते जे अपे रआ भीतरी रे बोसाः कनाय, जीवन एमापेयाय।
12ए बिसवासी बोयहा-मिसी अबुन रीनी हेकेबुन, मुदा होड़मो रआ बङा चि अबुन होड़मो रआ मोताबिक जीवन बितावियाबुन। 13चिलिमेनचि जदि अपे होड़मो रआ लछन मोताबिक जीवन बितावियापे रेदो गोजुःआपे। मुदा अपे रावा रआ मोताबिक होड़मो रआ लछन ता चबायापे रेदो अपे जुवेत तहिनापे। 14चिलिमेनचि जे परमेसर रआ रावा रआ एगवाइ मोताबिक सेसेन कनाकु, उनकु परमेसर रेन होपोन हेकेकु। 15#गला 4:5–7#मर 14:36; गला 4:6 चिलिमेनचि अपे कथिर गुलाम रआ रावा का नाम्मेकाना ताकि अरो अपे बोरोयापे, मुदा उना रावा के जे अपे कथिर एम एकाना, अपे के परमेसर रेन गोद अगु वन होपोन बाय पेकानाय। जेकर एते अबुन, “ए आपु, आबा!” गाम केते होहोय कनाबुन। 16उनी पबितर रावा खुद अबुन रिई रावा लोः मिलाव केते गोवाही एम कनाय चि अबुन परमेसर रेन होपोन हेकेबुन। 17जदि अबुन उनी रेन होपोन हेकेबुन दो अबुन हों हकदार हेकेबुन। जदि अबुन महिमा ननाम कथिर दुख उठाव कनरेदोबुन परमेसर रेन हकदार हेकेबुन, मसी लोः संगी हकदार हेकेबुन।
हिजुः आना समेय रे दिसतारोः वनाः महिमा
18चिलिमेनचि इञ रआ बिचार रे नियां समेय रआ दुख, उना महिमा रआ तुलना रे, जे अबुन रे दिसतारोः वनाः हेनाःआं, जहन्नाः बनुःआं। 19चिलिमेनचि नुवां उपनेज वनाः दुनिया मरंग आसा एते उना समेय कथिर तांगी एकाःकुवाय जोब परमेसर रेन होपोन के दिसतार कुवाय। 20#एटे 3:17–19 दुनिया बेकामा रआ अधिन कताय, अपन हिछा रआ मोताबिक बङा, मुदा परमेसर रआ हिछा एते होय्येना, जे ता उनी के आसरा रआ आधार अधिन एदेयाय। 21चि खुद दुनिया हों बिनास रआ गुलाम एते छुटकारा नामकेते परमेसर रेन होपोनकु रआ महिमामय आजादी नाम्मेकाकु। 22चिलिमेनचि अबुन सारीइ कनाबुन चि पुरा दुनिया तिहिञ तक होपोन जनमव रआ लेका केहराः अरो छटपटाः कनाय। 23#2 कुरु 5:2–4 सिरीफ इनागी बङा, मुदा अबुन हों जेकर ठिनुः रावा रआ पहला फोल हेनाःआं, खुद गी अपन रे केहराः कनाबुन अरो गोद अगु वन होपोन होयुः कथिर, मनेकि अपन होड़मो रआ छुटकारा रआ होरा जोहाव कनाबुन। 24नियां आसरा एते अबुन उद्धार नाम एकाःआबुन, मुदा जोब अबुन आसराय कनाबुन, उना नेल केकानाबुन रेदो उना आसरा का तहीःकाना। चिलिमेनचि जे नेलुः काना उना रआ आसरा ओकोय कराव दड़िवाःआय। 25मुदा जे जिनिस ता अबुन कबुन नेलकाना, उना रआ आसराय कनाबुन दो सबुर केते उना रआ तंगिइ कनाबुन।
26इना लेका एते रावा हों अबुन रआ कोमजोरी रे अबुन के देंगा बुन कनाय, चिलिमेनचि अबुन कबुन सारीइकाना चि पराथना करा लेका एते कराव चही। मुदा रावा खुद गी नुंका सिसकाव-सिसकाव अबुन कथिर बिनतीइ कनाय जे बाखान एते टांड़ी मेनाःआं। 27अरो मोन जांचाव वनीः परमेसर ता सारीइ कनाय चि रावा रआ चिलि मोन हेनाःआं? चिलिमेनचि रावा पबितर होरकु कथिर परमेसर रआ हिछा रआ मोताबिक बिनतीइ कनाय।
28अरो अबुन सारीइ कनाबुन चि जे होर परमेसर लोः दुलार कनाकु, उनकु कथिर सुबिन गानाम मिलाव केते बुगिन कामि गी उपनेज कनाय, मनेकि उनकु कथिर गी जे उनी रआ उदेस रआ मोताबिक होहो एकानाकु। 29जेके परमेसर ता पहिल एते सारी कुकनकेनाय, पहिल गी उनकु के अपन होपोन हेरेल रआ रुप रे बयुः कथिर ठहराव वेःकुवाय, जेकर मसी ईसु बेचोट बोयहा-मिसी एते मरंग बोयहा बाय दड़िवाःआय। 30उनी ता जेके पहिल एते ठहराव वेःकुवाय, उनकु के होहो एकाःकुवाय। जे के होहोवेःकुवाय, उनकु के धरमी बायेःकुवाय अरो जे के धरमी बाय एकाःकुवाय, उनकु के महिमा एते पेड़ेच वेःकुवाय।
परमेसर रआ दुलार
31अबुन नियां गानाम रआ बबेत रे चिलिकाः गाम्माबुन? जदि परमेसर अबुन सोझ हेनाया रेदो अबुन रिई बिरोधी ओकोय होय सकाःकाय। 32परमेसर ता जे अपन होपोन हेरेल के बलिदान होयुः कथिर काय हिचकिचाव केनाय, मुदा परमेसर अपन होपोन हेरेल के अबुन सुबिन कथिर गोजुः कथिर सोंपाव कदेयाय। तोब उनी अबुन के उनी लोः अरो सुबिन्नाः चिलिमेन बकसिस रे काय एमुःआय? 33परमेसर रेन सला इकु रे ओकोय दोस लगावियाय? उनी परमेसर गी हेकेय, जे उनकु के निरदोस ठहराव कुकानाय। 34नुंका ओकोय हेनाया जे उनी के दोसी ठहराव दड़िवायाकु? जहय बङा। चिलिमेनचि मसी ईसु उनी हेकेय जे गोच्चेनाय अरो गोनोच रे ते जुवेत बिरीत एनाय। जे परमेसर रआ जोम ती सोझ दुरुप एकानाय अरो अबुन कथिर बिनतीइ कनाय। 35ओकोय हेनाया, जे अबुन के मसी रआ दुलार एते अलग दड़िवाबुनाय? चिलि क्लेस, संकट, सताहट, भूखमरी, लंगटा, जोखिम, तलवाइर? 36#सिरिञ 44:22 जे लेका चि पबितर पोथी रे ओल्लेकाना,
“आम कथिर दिन भोइर आले गोजुः चित तहीः कनाले।
आले गेत कुकानाकु इनकु भेड़ी लेका लेखा एकानाले।”
37मुदा नुवां सुबिन गानाम एते हों आले उनी दोवासते जे ता आले एते दुलार एताय, आले पुरापुरी जिताव ओःकाले। 38चिलिमेनचि आले निचित बिसवास कनाले चि ना गोनोच ना जीवन ना सोवारागदूत ना राइज कराव वनकु ना नेबरीक रआ जुग ना हिजुः आनाः जुग ना बोल 39ना उसुल, ना गहिड़, ना दुनिया रेन जहन अरो जिनिस अबुन के परमेसर रआ दुलार एते, जे अबुन रिई परभु मसी ईसु रे हेनाःआं, अलग कराव दड़िवाबुनाय।
Currently Selected:
रोमि 8: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
