14
1Bɛdwuli Ikoniom ne, bɛhɔle Yudafoɛ sua bɔ beyia nu nanu, na kyɛbɔ bɛ dwudwole ne, ɔmaa Yudafoɛ ne Greekfoɛ pee yɛle gyidifoɛ. 2Nakoso Yudafoɛ bɔ banne banni ne tutu guale maen-maen nanufoɛ ne so anu, na bɛsɛkyele b'adwene maa benyane aliemaa nemɔ nwo adwemmɔne. 3Yeti bɛhyɛle berɛ kaa, na Awurade mane bɛ tumi maa bɛfale akukuduro bɛ dwudwole. Na Nyameɛ maa bɛyɛle nzɛngyerɛneɛ ne anwanwadeɛ, na ɔnate so lili edwirɛ bɔ ɔfa ye adom nwo nanwo adanzeɛ. 4Nakoso, mmenia nanu hyɛle nyɔ, né ebiemɔ ta Yudafoɛ ne si, yeɛ né bɛ ngaa ne koso ta asomafoɛ ne si. 5Mmerɛ bɔ maen-maen nanufoɛ ne Yudafoɛ, ne b'atumvoɛ ne yɛle kyɛ bɛteetee bɛ, ná besi bɛ nyɔboɛ ne, 6bɛnwuni ye. Yeti bɛnwati bɛhɔle Listra, Derbi, ne Likaonia nguro nemɔ nu, 7na bɛtoale so bɛhane nzɛmba ne wɔ dɔ.
8Né biaa bie te abafam wɔ Listra. Né ɔtaha ase bɔ ɔnatelle lle, ofikyɛ bɛwole ye ne, né wabubu. 9Mmerɛ bɔ Paul dwudwo ne, ne biaa ne tie ye paa. Paul neane ye dinn, na onwuni kyɛ ole gyidie bɔ ɔkɔhora kɔmaa ye nwo kɔtɔ ye, 10yeti ɔmane ye konvi so hane kyɛ: “Dwɔso gyina wɔ gya so.” Yeti biaa ne dwɔso gyinane berɛ, na ɔhyɛle yebo natele. 11Mmerɛ bɔ mmenia ne nwuni bɔ Paul ayɛ ne, bɛfale Likaonia dwudwolɛ bɛteane nu kyɛ: “Nyameɛ nemɔ ayɛ bɛ nwo mmenia badwu bawa yɛ wa!” 12Yeti bɛhyɛle yebo bɛfrɛle Barnaba Zeus, na bɛfrɛle Paul Hermes, ofikyɛ ye yeɛ ne odi anyunu dwudwo ɔ. 13Yeti Zeus sɔfo bɔ ye asɔre sua wɔ kuro ne tiwaa ne fale nandwie ne flawa abotire wale anoa nanwo berɛ, ná ne ɔpena kyɛ ɔbɔ afɔleɛ wɔ mmenia nanu. 14Nakoso, mmerɛ bɔ asomafoɛ Barnaba ne Paul tele ye nwo dwirɛ ne, bɛsunzuale bɛ ndadeɛ nu, na bɛdwɔso bɛgyinane mmenia nanu bɛteane nu kyɛ: 15“Mmrienzua, nzuati yeɛ ɛmɔyɛ ɛhe ɔ? Yɛ koso yɛte mmenia, na yɛdi mvomsoɛ kyɛ ɛmɔ ala. Nzɛmba yeɛ yɛka yɛkyire ɛmɔ, kyɛbɔ ɔkɔyɛ a, ɛmɔ kɔsakra bɛkofi sɔ nningyein hemɔ nwo, na ɛmɔ awa Nyameɛ teasefoɛ bɔ ɔbɔle anwuro, aseɛ, ɛpo ne nningyein bɔ ɔwɔ nu namukoraati ne berɛ. 16Aworɛ ndoɔtoasoɛ bɔ wapɛ nu ne de, ɔmane maen-maen nanufoɛ ne atee maa bɛyɛle bɔ bɛkuro ɔ. 17Nakoso ɔhɔle so yɛle nningyein pa fa lili ye nwo adanzeɛ; ebie yeɛ ole kyɛ ɔmaa nzue tɔ mane ɛmɔ, ɔmaa ɛmɔ nyane mmerɛ bɔ aleɛ ba, ɛmɔ nyane aleɛ bɛlili maa ɛmɔ ko yili, na ɔmaa ɛmɔ nyane anigye wɔ ɛmɔ ahone nu.” 18Nakoso ɛhe po ne, ɔha fɛle pa, kora yeɛ mmenia ne yakyi afɔleɛ bɔ ne bɛpena kyɛ bɛbɔ bɛma bɛ ne ɔ.
19Na Yudafoɛ biemɔ fili Antiokia ne Ikoniom wale berɛ, na bɛtutu bɛguale mmenia ne so anu maa bɛsili Paul nyɔboɛ bɛhwene ye bɛɛtole kuro ne si dɔ, ofikyɛ ne bɛse kyɛ wawu. 20Nakoso mmerɛ bɔ asuafoɛ nemɔ wale berɛ bɛɛpɛle ye nwo beyiale ne, odwɔsole, na ɔhɔle kuro nanu. Na aleɛ hene ne, ɔne Barnaba fili berɛ hɔle Derbi. 21Bɛhane nzɛmba ne wɔ kuro nanu, ná benyane asuafoɛ kaa ne, besa bɛwale Listra, Ikoniom ne Antiokia 22bɛɛbokale asuafoɛ nemɔ maa bɛyɛle se, na bɛhyɛle bɛ nguraen kyɛ, bɛhɔ so bɛtena gyidie nanu. Bɛha bɛhyirele bɛ kyɛ: “Odikyɛ yɛfa amaneɛ pee nu kora né yahɔ Nyameɛ ahennie nanu.” 23Mmerɛ bɔ bɛyele mbanyi wɔ asafo biala nu ne, bɛbɔle mbaeɛ, na bɛyɛle akɔngyere bɛfale bɛ bɛwurale Awurade bɔ banya ye nu gyidie ne sa.
24Na bɛfale Pisidia bɛwale Pamfilia. 25Na mmerɛ bɔ bɛhane edwirɛ ne wɔ Perga beyiele ne, bɛhɔle Atalia. 26Bɛfale hyep bɛfili Atalia bɛwale Antiokia. Ɛberɛ ala yeɛ mmerɛ bie bɛfale bɛ bɛwurale Nyameɛ adom bo, maa bɛɛyɛle adwuma bɔ kesaalae bayie ne. 27Bɛdwuli ne, bɛboale asafo ne noa bɛhane bɔ Nyameɛ nate bɛ so ayɛ namukoraati, ɔne kyɛbɔ wabukye anoa wama maen-maen nanufoɛ kyɛ bɛɛyɛ gyidifoɛ ne behyirele bɛ. 28Na bɛne asuafoɛ ne tenane berɛ hyɛle kaa.
