Asomafoɛ Nyumaa 15
15
1Yesi ne, mmrienzua biemɔ fili Yudea wale berɛ, na bɛhyɛle yebo bɛhyirehyirele aliemaa nemɔ kyɛ, “Sɛ bambɛ ɛmɔ toa, kyɛbɔ Mose mmeraa ne ka nea a, ɛmɔngonya ngoa.” 2Ɛhe fale dwudwolɛ wale bɛ ne Paul ne Barnaba afia, na bɛsuli bɛ nwo aporowaa paa. Yeti, bɛyele Paul ne Barnaba ne ebiemɔ kyɛ, bɛhɔ asomafoɛ ne mbanyi nemɔ berɛ wɔ Yerusalem, na bɛɛbisa edwirɛ nanu. 3Yeti mmerɛ bɔ asafo ne guale bɛ atee ne, bɛɛfale Foinike ne Samaria, na bɛhane kyɛbɔ maen-maen nanufoɛ asakra b'adwene nanwo dwirɛ pee bɛhyirele bɛ, na ɛhe maa aliemaa nemɔ nye gyele paa. 4Bɛdwuli Yerusalem ne, asafo ne, asomafoɛ ne mbanyi nemɔ lɛle bɛ kama, na bɛhane nningyein bɔ Nyameɛ nate bɛ so ayɛ namukoraati bɛhyirele bɛ. 5Nakoso, Farisifoɛ nanu biemɔ bɔ baayɛ gyidifoɛ ne dwɔsole, na bɛhane kyɛ: “Maen-maen nanufoɛ ne, odikyɛ bɛpɛ bɛ toa, na yɛhyɛ bɛ maa bɛdi Mose Mmeraa naso.”
6Yeti asomafoɛ ne mbanyi nemɔ yiale nu, na bɛsusuli edwirɛ nanwo bɛhɔle siɛ. 7Bɛsusuli edwirɛ nanwo bɛhɔle siɛ paa, yeɛ Petro dwɔso ha hyirele bɛ kyɛ: “Aliemaa mɔ, ɛmɔse kyɛ ahyɛaseɛ nala yeɛ Nyameɛ neɛneane ɛmɔ nu yele me kyɛ, maen-maen nanufoɛ ne fa me noa dwirɛ so te nzɛmba ne, ná bɛle bɛli. 8Na Nyameɛ bɔ ɔse ahone nu ne mane bɛ honhom krongron fa lili ye nwo adanzeɛ, kyɛbɔ ɔyɛ mane yɛ nala. 9Ná wamma nzonzonyɛ biala amma yɛ ne bɛ afia, mmom ɔnate gyidie naso tele bɛ nwo. 10Ye de, nzuati yeɛ ɛmɔsɔ Nyameɛ bɛnea, na ɛmɔfa kɔnnua bɔ yɛne yɛ nana mɔ po angora ye soa bɛto bɛ so ne? 11Afei koso, yedɛ yɛdi kyɛ, ɔnate Awurade Yesu Kristo adom so yeɛ balɛ́ yɛ ɔ, na sɔ adom nala yeɛ wamaa balɛ́ bɛ ɔ.”
12Ɛhe maa mmenia namukoraati yɛle dinn. Na Barnaba ne Paul hane nzɛngyerɛneɛ ne anwanwadeɛ pee bɔ Nyameɛ nate bɛ so ayɛ ye wɔ maen-maen nanu ne hyirele bɛ, na mmenia namukoraati tiele. 13Bɛdwudwo bɛyiele ne, Yakobo hane kyɛ: “Aliemaa mɔ, ɛmɔtie me. 14Simeon#15:14 Ye ala yeɛ ole Simon Petro. amaa yanwu mmerɛ bɔ oli moa bɔ Nyameɛ pɛle ye nye neane maen-maen, ná ɔyele mmenia bie wɔ bɛ nu fale ye dumaa tole bɛ so ne. 15Na ɛhe ne adiifoɛ nemɔ dwirɛ ne yia, ofikyɛ bahworɔ kyɛ:
16‘Ɛhe si ne, ngosa ngɔwa,
na ngoosi David tɛnt bɔ wadwiri wagua ne.
Ngosa ngosi bɔ wadwiri wagua ne,
na ngɔmaa okosi ye daa nu,
17kyɛbɔ ɔkɔyɛ a, bɛ bɔ baha ne kɔpena Awurade,
bɛ ne maen-maen nanufoɛ namukoraati, mmenia bɔ me dumaa la bɛ so ne;
Awurade bɔ ɔyɛ nningyein he ne yeɛ waha ɔ,
18nningyein bɔ bɛse fi teteete ne.’
19Yeti bɔ meka yeɛ ole kyɛ, maen-maen nanufoɛ bɔ bɛsakra bɛba Nyameɛ berɛ ne, nnɛmɔ maa yɛha bɛ, 20mmom yɛhworɔ krataa yɛma bɛ, na yɛma bɛnwu ye kyɛ, odikyɛ bɛtwe bɛ nwo bɛfi nningyein bɔ bosoen amaa yɛnwu agua fiɛ, adwamammɔ, ɔne ngaka bɔ bahu bɛ, ná banhwie bɛ mogya bangua nanwo. 21Na ofi teteete ne, Mose le mmenia bɔ bɛka ye nwo dwirɛ wɔ kuro biala nu, ofikyɛ homeda biala, bɛkenga ye dwirɛ wɔ sua bɔ beyia nu nemɔ nu.”
22Yeti, asomafoɛ ne, mbanyi ne, ne asafo namukoraati sili gyinayɛ kyɛ, bɛkɔye mmrienzua biemɔ bɛkofi bɛ nu, na basoma bɛ ne Paul ne Barnaba maa bahɔ Antiokia. Yeti bɛsoma Yuda bɔ bɛfrɛ ye Barsaba ne né Silas, bɛ yeɛ ne bɛli aliemaa nemɔ nyunu ɔ. 23Edwirɛ he yeɛ bɛhworɔ bɛfa bɛsomane bɛ ɔ:
Krataa he fi asomafoɛ ne mbanyi bɔ yɛte ɛmɔ aliemaa mɔ ne berɛ,
Yɛfa yɛbrɛ aliemaa mɔ bɔ ɛmɔ wɔ maen-maen nanu wɔ Antiokia, Siria, ne Kilikia ne:
Yɛ kyea ɛmɔ.
24Yate kyɛ yɛ nu biemɔ awa ɛmɔ berɛ, na bɛkeka edwirɛ bie bɛfa bɛha ɛmɔ adwene, na bɛpena kyɛ bɛsɛkye ɛmɔ adwene. Nakoso, yɛmanne bɛ akwankyerɛ biala. 25Yeti yɛ mukoraati yale yato nu kyɛ, yɛye mmenia biemɔ yɛboka Barnaba ne Paul bɔ yɛdɔ bɛ naso, 26sɔ mmrienzua hemɔ afa bɛ ngoa ato asane nu ama y'Awurade Yesu Kristo dumaa ne. 27Na yesa yɛsoma Yuda ne Silas maa bɛfa bɛ noa bɛbaka edwirɛ komapɛ nala.
28Ná honhom krongron ne, ɔne yɛ bɔbɔ koso nguro kyɛ yɛfa adesoa foforɛ biala yɛto ɛmɔ so, sana ɛhemɔ bɔ ye nwo hia nala; yeɛ ole kyɛ: 29Ɛmɔhwe ɛmɔ nwo bɛfi nningyein bɔ bafa babɔ afɔleɛ bama bosoen, mogya, ngaka bɔ bahu bɛ, ná banhwie bɛ mogya bangua, ɔne adwamammɔ nwo. Sɛ ɛmɔtwe ɛmɔ nwo koraa bɛfi sɔ nningyein hemɔ nwo a, okosi ɛmɔ yé.
Nyameɛ boka ɛmɔ so.#15:29 Anaa “Yɛ kyea ɛmɔ.”
30Yeti bɛguale mmrienzua nemɔ atee maa bɛhɔle Antiokia. Bɛdwuli berɛ ne, bɛboale asafo ne noa bɛfale krataa ne bɛmane bɛ. 31Ná bɛkengale krataa ne bɛyiele ne, bɛ nye gyele paa, ofikyɛ ne enu dwirɛ ne hyɛ nguraen. 32Né Yuda ne Silas te adiifoɛ, yeti bɛhane edwirɛ pee bɛhyɛle aliemaa nemɔ nguraen, na ɔmaa bɛyɛle se. 33Na bɛtenane berɛ kaa ne, aliemaa nemɔ guale bɛ atee asomdwie nu maa besa bɛhɔle bɛ bɔ bɛsomane bɛ ne berɛ. 34#15:34 Sɛ ɛnea Bible biemɔ nu a, bafa edwirɛ bie bawura ɛwa kyɛ, “Silas de, né onwu ye kyɛ, ɔte pa kyɛ ɔkɔtena berɛ.” Nakoso sɛ ɛnea asaanoa ndworɔyɛ bɔ wahyɛ paa, ɔne bɔ odi mu paa nemɔ nu a, sɔ dwirɛ ne nne nu.― 35Nakoso Paul ne Barnaba de, bɛtenane Antiokia, na bɛne mmeni pee bɔle nu yɛle ngyerɛkyerɛ, na bɛhane Awurade dwirɛ ne.
36Ngyẽa biemɔ si ne, Paul ha hyirele Barnaba kyɛ: “Ma yɛhɔ kuro biala bɔ yɛhane Awurade dwirɛ wɔ nu naso, na yɛɛnea kyɛbɔ aliemaa nemɔ nwo te ɔ.” 37Né Barnaba ayɛ ye adwene kyɛ, ɔkɔmaa bɛkɔfa Yohane bɔ bɛfrɛ ye Marko ne bɛkɔhɔ. 38Nakoso Paul de, né onwu ye kyɛ, bɛne ye kɔ a ɔnyɛ yé, ofikyɛ ɔyakyile bɛ berɛ wɔ Pamfilia, na ɔne bɛ angɔ anyɛ adwuma ne. 39Ɛhe fale dwudwolɛ paa wale bɛ afia, na ebiala fale ye atee. Barnaba fale Marko, na bɛfale ɛpo so bɛhɔle Kipro, 40na Paul koso fale Silas, ná aliemaa nemɔ fale bɛ wurale Awurade adom bo ne, ofili berɛ hɔle. 41Na ɔɔfale Siria ne Kilikia, na ɔbokale asafo nemɔ maa bɛyɛle se.
Currently Selected:
Asomafoɛ Nyumaa 15: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
