Asomafoɛ Nyumaa 4
4
1Bɛguso bɛdwudwo bɛkyire mmenia ne, sɔfo nemɔ, bɔ ɔnea asɔre awuro naso ne, ɔne Sadukifoɛ nemɔ wale bɛ so. 2Né bafɛ yaa paa, ofikyɛ ne asomafoɛ nemɔ kyirekyire mmenia ne, na né bɛka ye wɔ badwanu kyɛ Yesu atingye afi ewue nu. 3Yeti bɛhyele bɛ; na ɔnate kyɛ né aleɛ asa ayie nati, bɛfale bɛ bɛguale prizin maa aleɛ hene. 4Nakoso bɛ bɔ betiele edwirɛ nanu pee lɛ lili, na mmrienzua ne dodoɔ ne dwuli kɔyɛ 5,000.
5Aleɛ hene ne, maen nanu atumvoɛ, mbanyi, ne atwerɛfoɛ nemɔ yiale nu wɔ Yerusalem, 6né Annas bɔ ɔte sɔfo panyi ne, Kaiafa, Yohane, Alɛzanda, ne sɔfo panyi ne abusuafoɛ mukoraati wɔ berɛ. 7Bɛfale Petro ne Yohane bɛgyinane bɛ afia, na bɛhyɛle yebo bɛbisale bɛ kyɛ: “Tumi beni yeɛ ɛmɔfa bɛyɛle ɛhe ne, na ɛmɔyɛle ye wɔ nwa dumaa nu?” 8Yeɛ Petro bɔ honhom krongron ayi ye tɛkyɛ ne ha hyirele bɛ kyɛ: “Maen nanu atumvoɛ ne mbanyi, 9sɛ ɛnɛ, pa bɔ yayɛ yama bubuaniɛ nati yeɛ ɛmɔneɛnea yɛ dwirɛ nu, na ɛmɔpena kyɛ ɛmɔnwu bɔ ɔmaa biaa he nwo tɔle ye ne de a, 10yɛpena kyɛ ɛmɔ mukoraati, ne mmenia bɔ bɛwɔ Israel namukoraati nwu ye kyɛ, Nazerɛtniɛ Yesu Kristo bɔ ɛmɔ bɔle ye asɛnnua nu, ná Nyameɛ tingyele ye fili ewue nu ne, ɔnate ye so yeɛ biaa he nwo atɔ ye bɔ ogyi ɛmɔ nyunu wa ne. 11Yesu he yeɛ ole,
‘nyɔboɛ bɔ ɛmɔ bɔ ɛmɔte brekyafoɛ ne gyi tole ne,
ɛhene yeɛ waayɛ nyɔboɛ bɔ ye nwo hia paa ne.’
12Afei koso, sona foforɛ biala nne berɛ bɔ ɔkɔmaa yekonya ngoa ɔ, ná dumaa foforɛ biala nne anwuro bo bɔ bafa bama mmenia kyɛ yɛfa so yɛnya ngoa ɔ.”
13Mmerɛ bɔ bɛnwuni akukuduro bɔ Petro ne Yohane fa dwudwo, ná bɛnwuni kyɛ bangɔ sukuu, ná bɛtte mmenia titire biala ne, ɔyɛle bɛ nwanwa paa. Na ɛberɛ yeɛ bɛnwuni kyɛ sãa né bɛboka Yesu so. 14Na mmerɛ bɔ bɛnwuni biaa bɔ basa ye anwonyerɛ ne kyɛ ogyi bɛ nwo berɛ ne, bangora hwee ka. 15Yeti, bɛmaa bɛfili Sanhendrin sua nanu bɛfitele, na bɛtuli agyina. 16Yeɛ bɛbisale bɛ nwo kyɛ: “Nzu yeɛ yɛfa yɛyɛ mmenia hemɔ ɔ? Ofikyɛ ebiala bɔ ɔwɔ Yerusalem ne nye tua nzɛngyerɛneɛ kandinga bɔ bayɛ ne, ná yɛsu ye nwo aporowaa a, ɔnyɛ yé. 17Yeti bɔ ɔkɔyɛ na edwirɛ he andrɛ kõ ne, ɛmɔma yɛ nwuna-nwuna bɛ, na yɛha yɛhyire bɛ kyɛ, bɛnea ye, na banga dumaa he anwo dwirɛ bangyire ebiala kõ.” 18Yeti, bɛfrɛle bɛ bɛwale, na bɛhyɛle bɛ kitii kyɛ, nnɛmaa bɛbɔ Yesu dumaa ne kõ, na nnɛmaa bɛyɛ ngyerɛkyerɛ wɔ ye dumaa nanu kõ. 19Nakoso Petro ne Yohane hane kyɛ: “Sɛ ɔte pa wɔ Nyameɛ nyunu kyɛ, yɛtie ɛmɔ yɛtra Nyameɛ a, ɛmɔ bɔbɔ ɛmɔbua. 20Yɛ de, bɔ yanwu ye, na yate ne, yɛyakyi ye hanɛ a, ɔnyɛ yé.” 21Yeti besa bɛbɔle bɛ ndrɛneɛ, na bɛyakyile bɛ kyɛ bɛhɔ, ofikyɛ bannya edwirɛ biala bɔ begyina so bɛtwe bɛ so ɔ. Afei koso, né bɛsuro mmenia ne, ofikyɛ né ebiala ye Nyameɛ ayɛ wɔ bɔ wasi nanwo. 22Biaa bɔ bɛyɛle anwanwadeɛ he bɛsale ye anwonyerɛ ne, né ɔbo afoɛ 40.
23Bɛyakyile bɛ ne, bɛhɔle asuafoɛ bɔ baha ne berɛ, na edwirɛ bɔ sɔfo mbanyi ne mbanyi nemɔ ha hyirele bɛ ne, bɛhane ye mukoraati bɛhyirele bɛ. 24Na bɛtele sɔ dwirɛ ne, bɛ mukoraati bɛmane bɛ konvi so bɛha bɛhyirele Nyameɛ kyɛ: “Awurade Tumvoɛ, wɔ yeɛ ɛbɔle anwuro, aseɛ, ɛpo, ne nikye biala bɔ ɔwɔ nu ne, 25wɔ yeɛ ɛnate honhom krongron so hane ye wɔ yɛ nana David, bɔ ɔte wɔ akoaa ne noa nu kyɛ:
‘Nzuati yeɛ maen ne afɛ yaa sɔ ne,
Ná mmenia ne dwene nningyein bɔ mvasoɛ nne so nwo ne?
26Aseɛ naso ahemvo dwɔso gyina,
na atumvoɛ nemɔ dwɔso tia Awurade,
ne bɔ Awurade asra ye ne.’
27Nahorɛ nu, sɔ kuro he ala nu yeɛ Herode, Pontio Pilato, maen-maen nanufoɛ ne, ɔne mmenia bɔ bɛwɔ Israel ne ha bɔle nu, na bɛdwɔso betiale Yesu, bɔ ɔte w'akoaa krongron bɔ asra ye ne. 28Na bɛyɛle bɔ aha ato berɛ kyɛ ɛkɔyɛ ne. Ɛhemɔ wale nu, ofikyɛ ɛle tumi, na ne ɔte wɔ pɛ kyɛ osi. 29Afei Awurade, nea kyɛbɔ bɛ nwuna-nwuna yɛ ne, na ma wɔ ngoaa akukuduro paa ma yɛfa yɛha wɔ dwirɛ ne, 30mmerɛ bɔ ɛtengyɛ wɔ sa fa sa mmenia anwonyerɛ, ná ɛma nzɛngyerɛneɛ ne anwanwadeɛ fa w'akoaa krongron Yesu dumaa nu ba ne.” 31Bɛbɔle mbaeɛ ne bɛyiele ne, nekaa bɔ bayia nu ne wosole, na honhom krongron wale bɛ mukoraati so, na bɛhɔle so bɛfale akukuduro bɛhane Nyameɛ dwirɛ ne.
32Afei mmeni lɔen namukoraati nyane ahone ne kra kõ, ná bɛ nu biala anga kyɛ nningyein bɔ ole ye ne te ye deɛ, mmom bɛfale bɛ nningyein namukoraati bɛbɔle nu. 33Ná asomafoɛ nemɔ fale tumi kandinga lili Awurade Yesu bɔ batingye ye nanwo adanzeɛ, na adom kandinga wale bɛ mukoraati so. 34Bɛ nu biala nne berɛ bɔ ne ye nwo kyere ye ɔ, ofikyɛ ebiala bɔ né ole aseɛ ne awuro ne tɔnene ye, na bɔ onyane ye ne, 35ɔfa brɛle asomafoɛ nemɔ. Na bɛ koso, bɛhyɛle maa ebiala nyane bɔ ohia ɔ. 36Né Yosef bɔ asomafoɛ nemɔ frɛ ye Barnaba (bɔ yebo kyire “Awerɛkyekye Awa”) ne wɔ berɛ. Né ɔte Lewiniɛ bɔ ofi Kipro; 37né ole aseɛ bie, na ɔtɔnene ye fale sikaa bɔ onyane ye ne brɛle asomafoɛ nemɔ.
Currently Selected:
Asomafoɛ Nyumaa 4: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
