Asomafoɛ Nyumaa 5
5
1Né biaa bie bɔ bɛfrɛ ye Ananias wɔ berɛ, na ɔne ɔye Safira tɔnene b'agyapadeɛ bie. 2Nakoso ɔyele sikaa bɔ onyane ye ne bie feale, na ɔfale bɔ ɔhale ne brɛle asomafoɛ nemɔ. Né ɔye se ye nwo bie. 3Ná Petro ha hyirele ye kyɛ: “Ananias, nzuati yeɛ Satan amaa anya akukuduro kyɛ, ɛpɛ anoanu hyire honhom krongron ne, ná ɛfa aseɛ nanwo sikaa ne bie fea ne? 4Mmerɛ bɔ aseɛ ne wɔ wɔ berɛ ne, né ɔtte wɔ deɛ? Ná ɛtɔnene ye ne, né sikaa ne tte wɔ deɛ? Na nzuati yeɛ anya sɔ adwene ne wɔ w'ahone nu ne? Nná sona yeɛ apɛ anoanu ahyire ye hɔ oo, mmom Nyameɛ.” 5Ananias tele ɛhe ala pɛ, ɔpɛ fini, ná owuli. Ná esuronyi hane bɛ bɔ bɛtele sɔ dwirɛ namu. 6Ná mmrandeɛ nemɔ dwɔsole, bɛfale ɛtena bɛkyekyele ye nwo, yeɛ bɛɛsiele ye ɔ.
7Kɔyɛ dɔnhwere nza si ne, ɔye wale, nakoso ne ɔnze bɔ wasi ɔ. 8Petro bisale ye kyɛ: “Ka kyire me, sɔ ala yeɛ ɛmɔ tɔnene aseɛ ne ɔ?” Na ɔhane kyɛ: “Yoo, sɔ ala yeɛ yɛ tɔnene ye ɔ.” 9Yeti Petro ha hyirele ye kyɛ: “Nzuati yeɛ ɛmɔ munyɔ ne, ɛmɔ ayɛ ɛmɔ adwene kyɛ ɛmɔ kɔsɔ Awurade honhom bɛkɔnea ne? Nea, bɛ bɔ beesiele ɛhu ne, bekye bɔ badwu anoa ne nyunu berɛ ɔ, na wɔ koso, bɛkɔfa wɔ bɛkɔhɔ.” 10Na ɛberɛ ala, ɔpɛ fini ye gya bo berɛ, na owuli. Na mmerɛ bɔ mmrandeɛ ne wale berɛ ne, bɛnwuni kyɛ wawu, yeti bɛfale ye, na beesiele ye wɔ ohu nanwo berɛ. 11Yeti, esuronyi hane asafo ne paa, na bɛ bɔ bɛtele sɔ dwirɛ ne koso, esuronyi hane bɛ.
12Nakoso, asomafoɛ nemɔ hɔle so yɛle nzɛngyerɛneɛ ne anwanwadeɛ pee wɔ mmenia nanu; na bɛ mukoraati, né beyia nu wɔ Solomon varanda naso. 13Bɔ ɔte yeɛ ole kyɛ, bɛ bɔ baha nanu biala nne berɛ bɔ onyane akukuduro fale ye nwo bɔle bɛ ɔ, nakoso, né mmenia ka bɛ nwo dwirɛ pa. 14Na bɔ ɔtra sɔ ne, mmeni pee nyane gyidie wɔ Awurade nu, ná bɛɛbokale bɛ so, mmrienzua ne mmrasua pee. 15Na bɛfale bɛ bɔ bɛnde apɔ ne bɛguale mba ne bɛen so wɔ atee noa, na sɛ Petro pɛ nu a, né ye wawoɛ ne atɔ bɛ so. 16Afei, mmeni pee fi nguro bɔ wapɛ Yerusalem nwo wayia nanu wale, ná bɛba ne, bɛfale bɛ bɔ bɛnde apɔ ne bɛ bɔ sunzummɔne wɔ bɛ so bɛwale, na bɛ mukoraati bɛ nwo tɔle bɛ.
17Ná sɔfo panyi ne né Sadukifoɛ kue bɔ bɛboka ye so ne dwɔsole, né ahoɔyaa ku bɛ. 18Yeti, bɛhyele asomafoɛ nemɔ, na bɛfale bɛ bɛguale prizin. 19Na kɔngɔen ne, Awurade abɔfo bukyele prizin né anoa ne, ɔyele bɛ fili berɛ, na ɔha hyirele bɛ kyɛ: 20“Ɛmɔɔgyina asɔre awuro berɛ, na ɛmɔha ngoa he nwo dwirɛ behyire mmenia ne.” 21Bɛtele ɛhe ne, bɛhɔle asɔre awuro berɛ ngyerɛmɔ tutuutu, na bɛhyɛle yebo kyɛ bɛ kyirekyire mmenia ne.
Mmerɛ bɔ sɔfo panyi ne né bɛ bɔ bɛboka ye so ne wale ne, bɛfrɛle Sanhendrin ne, na bɛfrɛle mbanyi bɔ bɛwɔ Israel namukoraati maa beyiale nu, yeɛ bɛsoma kyɛ bɛhɔ prizin dɔ bɛɛfa asomafoɛ nemɔ bɛbra. 22Nakoso, sogyafoɛ nemɔ dwuli berɛ ne, né benne berɛ, yeti bɛɛbɔle bɛ amaneɛ kyɛ: 23“Yɛhɔle ne, né batoto prizin né anoa nanu, ná ne sogyafoɛ nemɔ gyi-gyi anoa ne nyunu berɛ. Nakoso yɛ bukyele anoa ne, né ebiala nne nu.” 24Mmerɛ bɔ sona bɔ ɔnea asɔre awuro berɛ ne sɔfo mbanyi nemɔ tele ɛhe ne, né bɛnwu bɔ bɛyɛ ɔ, ofikyɛ né bɛnze bɔ okofi nu kɔwa ɔ. 25Nakoso ebie wale berɛ ɔɔha hyirele bɛ kyɛ: “Mmenia bɔ ɛmɔ hyele bɛ ne, ɛmɔɔnea kyɛ bɛgyi asɔre awuro dɔ bekyirekyire mmenia ne ɔ!” 26Yeti sogyaniɛ panyi ne né sogyafoɛ nemɔ hɔle dɔ, na bɛɛfale bɛ bɛwale, nakoso bannyɛ bɛ basa-basa, ofikyɛ né bɛsuro kyɛ annea a né mmenia ne asi bɛ nyɔboɛ. 27Na bɛfale bɛ bɛɛgyinane Sanhendrin ne nyunu, na sɔfo panyi ne bisale bɛ kyɛ: 28“Yɛhyɛle ɛmɔ kitii kyɛ, nnɛmɔfa dumaa he bɛyɛ ngyerɛkyerɛ kõ, nakoso ɛmɔ afa ɛmɔ ngyerɛkyerɛ ne balɛ́ Yerusalem kuro ne babɔ so, na ɛmɔ ayɛ ɛmɔ adwene kyɛ, ɛmɔ kɔmaa biaa he mogya kɔwa yɛ so.” 29Petro ne asomafoɛ bɔ baha ne hane kyɛ: “Nyameɛ mmom yeɛ odikyɛ yɛtie ye ɔ,#5:29 Anaa “Nyameɛ yeɛ ɔte Sodifoɛ bɔ odikyɛ yɛtie ye ɔ.” na ɔtte sona. 30Yɛ baba mɔ Nyameɛ tingyele Yesu bɔ ɛmɔ sinzele ye bakaa so bɛhuni ye ne. 31Na Nyameɛ apagya ye so ayɛ ye Kannifoɛ ne Agyenkwa, na wafa ye watena ye sa famaa so kyɛ ɔma Israel nya adwene-sakra na ɔfa bɛ bɔne hyɛ bɛ. 32Na yɛte edwirɛ he anwo adanzefoɛ, na honhom krongron bɔ Nyameɛ afa ama bɛ bɔ betie ye ne koso di ɛhe anwo adanzeɛ.”
33Mmerɛ bɔ badwa ne tele ɛhe ne, bɛfɛle yaa paa, na ne bɛpena kyɛ bɛku bɛ. 34Né Farisiniɛ bie bɔ bɛfrɛ ye Gamaliel boka Sanhendrin naso, né okyire Mmeraa, na né mmenia bu ye paa. Odwɔsole, na ɔha hyirele bɛ kyɛ bɛfa mmrienzua ne bɛfite kaa. 35Yeɛ ɔha hyirele bɛ kyɛ: “Israel mmrienzua, bɔ ɛmɔpena kyɛ ɛmɔfa bɛyɛ sɔ mmrienzua hemɔ ne, ɛmɔdwene ye nwo yé. 36Mmerɛ bie bɔ wapɛ nu ne, Teuda dwɔsole, né yenwa ɔte sona titire, na mmenia kɔyɛ kyɛ 400 tu lili ye si. Nakoso mmerɛ bɔ bɛhuni ye ne, bɛ bɔ beli ye si namukoraati bɔ sandele, na wanzi bɛ yé. 37Yesi ne, mmerɛ bɔ bɛtworɔ dumaa ne, Yuda bɔ ofi Galilea ne koso mane ye nwo so, na ɔhwene mmeni pee lili ye si. Sɔ biaa ne koso wuli ne, bɛ bɔ bɛli ye si namukoraati bɔ sandele. 38Yeti edwirɛ he bɛ yɛka ne, mepena kyɛ ɛmɔnwu ye kyɛ, nnɛmɔ ha mmrandeɛ hemɔ, ɛmɔyakyi bɛ. Na sɛ sɔ nhyehyɛɛ he anaa adwuma he fi sona a, okogu; 39Nakoso sɛ ofi Nyameɛ a, ɛmɔ ngɔhora ye gu lle. Wanyɛ sɔ a, né wayɛ kyɛ ɛmɔ ne Nyameɛ yeɛ bɛkõ ɔ.”
40Yeti betiele Gamaliel afutuo ne. Na bɛfrɛle asomafoɛ nemɔ bɛwale, na bɛgwale bɛ, yeɛ bɛhyɛle bɛ kyɛ, nnɛmaa bɛfa Yesu dumaa ne bɛyɛ ngyerɛkyerɛ kõ, na bɛyakyile bɛ. 41Ná bɛfi Sanhendrin ne nyunu bɛkɔ ne, né bɛ nye agye paa kyɛ ye dumaa nati, banwu kyɛ odikyɛ bɛgua bɛ nyunu ase. 42Na daa biala, né bekyirekyire bɛka Kristo Yesu nwo nzɛmba ne wɔ asɔre awuro berɛ ne awuro-awuro nu, ná banyakyi.
Currently Selected:
Asomafoɛ Nyumaa 5: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
