Asomafoɛ Nyumaa 9
9
1Né Saul tɛ́ nwuna-nwuna Awurade asuafoɛ nemɔ, na né ɔpena kyɛ oku bɛ. Yeti ɔhɔle sɔfo panyi ne berɛ, 2na ɔhane kyɛ, ɔma ye krataa ma ɔhɔ Damasko sua bɔ beyia nu nemɔ nu, na brienzua anaa brasua biala bɔ okonwu ye kyɛ ɔboka Atee naso ne, wahye ye wawa Yerusalem. 3Ɔka kaa maa odwu Damasko ne, mvum nu, kanea bie fi anwuro pɛle ye nwo yiale. 4Na ɔte tɔle, yeɛ ɔtele konviɛ bie kyɛ: “Saul, Saul, nzuati yeɛ ɛtane me nye sɔ ne?” 5Saul hane kyɛ: “Me wura, wɔ yeɛ ɛle nwa?” Ye koso ɔhane kyɛ: “Me yeɛ nne Yesu bɔ ɛtane ye nye ne. 6Afei dwɔso kɔ kuro nanu, na bɛkɔmaa ekonwu bɔ odikyɛ ɛyɛ ɔ.” 7Afei, né mmenia bɔ bɛne ye kɔ ne gyi berɛ tolii bɔ bɛngora dwudwo, ofikyɛ ne bɛte kyɛ ebie dwudwo, nakoso né bɛnnwu sona ne. 8Saul dwɔso fili aseɛ nwo berɛ, ɔwɔ nu, né ye nye ne tetɛ so, nakoso ne onnwu hwee. Yeti, bɛsosɔle ye nu bɛfale ye bɛhɔle Damasko. 9Ná ɛlɛsa mua, né onwu hwee, wannidi ná wanno hwee koso.
10Né suaniɛ bie wɔ Damasko bɔ bɛfrɛ ye Ananias, na Awurade dwudwo hyirele ye wɔ anisoadehu nu kyɛ: “Ananias!” Na olɛle so kyɛ: “Awurade, me ɛhe.” 11Na Awurade ha hyirele ye kyɛ: “Dwɔso kɔ atee bɔ bɛfrɛ ye Tee naso, kɔ Yuda awuro, na kɔpena biaa bie bɔ bɛfrɛ ye Saul bɔ ofi Tarsus ne. Nea, ɔbɔ mbaeɛ, 12na wanya anisoadehu kyɛ biaa bie bɔ bɛfrɛ ye Ananias awa berɛ, na wafa ye sa wagua ye so maa ye nye ne ate.” 13Nakoso Ananias hane kyɛ: “Awurade, mmeni pee aha sɔ biaa he nwo dwirɛ ahyire me, baha nningyein tɛɛ bɔ wafa wayɛ wɔ akrongronfoɛ bɔ bɛwɔ Yerusalem ne bahyire me. 14Ná waale tumi wafi sɔfo mbanyi nemɔ dɔ kyɛ, ɔba wa bakye ebiala bɔ ɔbɔ wɔ dumaa ne.” 15Nakoso Awurade ha hyirele ye kyɛ: “Kɔ, ofikyɛ brienzua he te nikye bɔ baye ye bama me kyɛ, ɔfa me dumaa hɔ maen-maen nanufoɛ, b'ahemvo, ne mmenia bɔ bɛwɔ Israel ne berɛ. 16Na ngɔmaa okonwu amaneɛ bɔ me dumaa ti, okonwu ye ne.” 17Yeti Ananias hɔle awuro berɛ; odwuli berɛ ne, ɔfale ye sa guale ye so, na ɔhane kyɛ: “Nniema Saul, Awurade Yesu bɔ ɔyele ye nwo ali hyirele wɔ mmerɛ bɔ ne ɛnate atee so ɛba ne, ye yeɛ wasoma me kyɛ mmera wɔ berɛ, kyɛbɔ ɔkɔyɛ a wɔ nye kɔte na anya honhom krongron.” 18Na ɛberɛ ala, nikye bie te kyɛ ɛboen fili ye nye naso guale ase, na onwuni nikye. Na ɔdwɔsole maa bɛbɔle ye asu, 19na odidili nyane anwoserɛ.
Na ɔne asuafoɛ nemɔ tenane Damasko berɛ hyɛle kaa. 20Ná ɛberɛ ala ɔhyɛle yebo hane Yesu nwo dwirɛ wɔ sua bɔ beyia nu nemɔ nu kyɛ, Yesu yeɛ ole Nyameɛ Awa ne. 21Nakoso bɛ bɔ né betie ye namukoraati nwo dwirili bɛ, na bɛhane kyɛ: “Nná sɔ biaa he yeɛ né ɔteetee bɛ bɔ bɛbɔ sɔ dumaa he wɔ Yerusalem ne? Ná ɛwa bɔ ɔwale ne, nnaa ɔwale kyɛ ɔbaahye bɛ kɔma sɔfo mbanyi nemɔ?” 22Nakoso Saul nyane anwoserɛ pee, ná ɔmaa Yudafoɛ bɔ bɛwɔ Damasko ne nwo dwirili bɛ, ofikyɛ ɔmaa enu lale berɛ paa kyɛ, Yesu yeɛ ole Kristo ne.
23Ngyẽa biemɔ si ne, Yudafoɛ nemɔ bɔle porɛ kyɛ bɛkɔhu ye. 24Nakoso, Saul nwuni porɛ bɔ babɔ ne. Né bɛtetɛ ye wɔ atee nemɔ noa eyia ne kɔngɔen, kyɛbɔ ɔkɔyɛ a bekonya ye bɛkɔhu ye. 25Nakoso ye asuafoɛ nemɔ fale ye siele kɛndɛn nu kɔngɔen, na bɛdwurale ye bɛfale bɔen bie bɔ ɔla fasue nanwo nanu.
26Mmerɛ bɔ ɔwale Yerusalem ne, ɔbɔle mmɔden kyɛ ɔkɔfa ye nwo kɔbɔ asuafoɛ nemɔ, nakoso ne bɛsuro ye, ofikyɛ né bennɛ benni kyɛ waayɛ suaniɛ. 27Nakoso Barnaba fale ye hɔle asomafoɛ nemɔ berɛ, na ɔmaa bɛnwuni kyɛbɔ onwuni Awurade wɔ atee naso, ná ɔne ye dwudwole, ɔne kyɛbɔ ɔfale akukuduro hane Yesu nwo dwirɛ wɔ Damasko ne. 28Yeti ɔne bɛ tenane berɛ, na Yerusalem de, né ɔkora kɔ nekaa biala, na né ɔkora fa akukuduro dwudwo wɔ Awurade dumaa nu. 29Ɔne Yudafoɛ bɔ bɛka Greek dwudwolɛ ne dwudwole, na ɔne bɛ suli aporowaa, yeti né bɛpena ye bɛku ye. 30Mmerɛ bɔ aliemaa nemɔ nwuni ye sɔ ne, bɛfale ye bɛwale Kaesarea, na bɛmaa ɔhɔle Tarsus.
31Na asafo ahoroɛ bɔ ɔwɔ Yudea, Galilea ne Samaria ne nyane asomdwie, na bɛyɛle se; na mmerɛ bɔ bɛnate Awurade suronyi ne honhom krongron né awerɛkyekye nu ne, bɛ dodoɔ ne hɔle anyunu.
32Mmerɛ bɔ Petro kyini sɔ mandam nanu ne, ɔhɔle akrongronfoɛ bɔ bɛwɔ Lida ne berɛ. 33Ɛberɛ yeɛ onwuni biaa bie bɔ bɛfrɛ ye Aeneas. Né wabubu, yeti ne wala neka-horɛ afoɛ mmɔtwɛ. 34Petro ha hyirele ye kyɛ: “Aeneas, Yesu Kristo asa wɔ anwonyerɛ. Dwɔso, na sɛ wɔ bɛen ne.” Na ɛberɛ ala ɔdwɔsole. 35Na mmerɛ bɔ bɛ bɔ bɛte Lida ne Saron né nwuni ye ne, bɛsakrale bɛwale Awurade berɛ.
36Né suaniɛ bie wɔ Yopa bɔ bɛfrɛ ye Tabita, bɔ yebo kyire “Dorkas.” Né sɔ maame he yɛ nyumaa pa, na né ɔyɛ adɔyɛ paa. 37Nakoso sɔ mmerɛ nanu ne, anwonyerɛ bɔle ye maa owuli. Yeti bɛbiale ye, na bɛfale ye bɛtole aborosaen sua bie nu. 38Né Lida pingye Yopa, yeti mmerɛ bɔ asuafoɛ nemɔ tele kyɛ Petro wɔ Lida ne, bɛsomane mmenia nyɔ maa bɛɛsrɛle ye kyɛ: “Yɛsrɛ wɔ, bra wa kesaalae.” 39Yeti Petro dwɔsole, na ɔne bɛ hɔle. Mmerɛ bɔ odwuli berɛ ne, bɛfale ye bɛhɔle aborosaen naso. Ná akunafoɛ namukoraati fale esue wale ye nwo berɛ, na ndadeɛ ne ɛtena bɔ Dorkas yɛle, mmerɛ bɔ ne ɔte ase ne, bɛfale pee bɛhyirele ye. 40Petro maa ebiala fitele, na obuli ndwerɛ bɔle mbaeɛ. Afei ɔkakyile ye nwo hyirele fuin ne, na ɔhane kyɛ: “Tabita, dwɔso!” Ná ɔtele ye nye, na mmerɛ bɔ onwuni Petro ne, odwɔso tenane berɛ. 41Yeti Petro sɔle ye sa nu maa ɔdwɔso gyinane berɛ. Ná ɔfrɛle akrongronfoɛ ne akunafoɛ nemɔ, na ɔfale ye mane bɛ, bɔ ne ɔte ase ɔ. 42Edwirɛ he trɛ hɔle Yopa kuro nanu mukoraati, na mmeni pee nyane gyidie wɔ Awurade nu. 43Ná Petro tenane Yopa kaa, né ɔte Simon bɔ ɔfa ngaka nwomaa yɛ nningyein né awuro.
Currently Selected:
Asomafoɛ Nyumaa 9: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
