Asomafoɛ Nyumaa 8
8
1Né Saul koso pene ye wue naso.
Na ofi sɔ kyẽa ne, asafo bɔ ɔwɔ Yerusalem ne yiale ɔtaeɛ paa. Na bɛ mukoraati bɛnwati bɛhɔle Yudea ne Samaria mandam nanu maa ɔhale asomafoɛ ne ngome. 2Mmenia biemɔ bɔ bɛmva bɛ som benni angorɛ siele Steven, na bɛsuni ye paa. 3Saul koso hyɛle yebo kyɛ ɔsɛkye asafo ne, na ne owura awuro biala nu kɔtwe mmrienzua ne mmrasua mukoraati ba, maa bɛfa bɛ bɛgua prizin.
4Nakoso, bɛ bɔ bɛnwatili ne, nekaa biala bɔ bɛhɔle ne, bɛhane nzɛmba ne wɔ berɛ. 5Filipo hɔle Samaria kuro nanu, na ɔhane Kristo nwo dwirɛ hyirele bɛ. 6Mmeni lɔen ne tɛle bɛ so tiele edwirɛ bɔ Filipo ka ne yé, na bɛnwuni nzɛngyerɛneɛ bɔ ɔyɛle ne. 7Né bɛ nu pee le sunzummɔne, ná sunzummɔne nemɔ teɛteanu serɛ-serɛ, na bɛfili bɛ nu. Na ɔsale bɛ bɔ babubu ne bɛ bɔ bayɛ apakye nanu pee anwonyerɛ. 8Yeti kuro nanufoɛ nye gyele paa.
9Né biaa bie wɔ Samaria kuro nanu bɔ bɛfrɛ ye Simon, né ɔyɛ magyek wɔ kuro nanu maa ebiala nwo dwiri ye, na né yenwa ɔte sona titire. 10Ná bɛ mukoraati, ofi ngwalaa so bɔ ɔkwaadu mbanyi so ne, né ebiala tie ye, na ne bɛka kyɛ: “Sɔ biaa he yeɛ ole Nyameɛ tumi bɔ bɛfrɛ ye Tumi Piri ne.” 11Né bɛyɛ asoɛ betie ye paa, ofikyɛ né magyek bɔ ɔyɛ ne amaa bɛ nwo adwiri bɛ ahyɛ. 12Nakoso mmerɛ bɔ bɛlɛle Filipo bɔ ne ɔka Nyameɛ Ahennie ne Yesu Kristo dumaa nanwo nzɛmba ne bɛlili ne, bɛmaa bɛbɔle bɛ asu, mmrienzua ne mmrasua mukoraati. 13Simon koso yɛle gyidiniɛ, na ɔbɔle asu yiele ne, ɔne Filipo natele; na nzɛngyerɛneɛ ne anwanwadeɛ mbiri-mbiri bɔ onwuni ye ne maa ye nwo dwirili ye paa.
14Mmerɛ bɔ asomafoɛ bɔ bɛwɔ Yerusalem ne tele kyɛ Samariafoɛ alɛ́ Nyameɛ dwirɛ ne, bɛsomane Petro ne Yohane maa bɛhɔle dɔ. 15Bɛdwuli dɔ ne, bɛbɔle mbaeɛ bɛmane bɛ maa benyane honhom krongron. 16Ofikyɛ né honhom krongron ne nya walle bɛ nu biala so, mmon Awurade Yesu dumaa nanu ngome yeɛ ne babɔ bɛ asu ɔ. 17Yeti, bɛfale bɛ sa bɛguale bɛ so, na benyane honhom krongron. 18Mmerɛ bɔ Simon nwuni kyɛ, sɛ asomafoɛ nemɔ fa bɛ sa gua ebie so a, né wanya honhom krongron ne, ɔyɛle kyɛ ɔma bɛ sikaa, 19yeɛ ɔhane kyɛ: “Ɛmɔma me tumi he bie, ná sɛ mefa me sa megua ebie so a, ye koso wanya honhom krongron.” 20Yeɛ Petro ha hyirele ye kyɛ: “Ɛne wɔ dwetɛ namukoraati, ɛmɔ sɛkye, ofikyɛ ɛse kyɛ ɛkɔhora kɔfa sikaa kɔtɔ Nyameɛ akyɛdeɛ. 21Ɛlle kyɛfa biala wɔ edwirɛ he anu, ofikyɛ w'ahone ndengyɛ wɔ Nyameɛ nyunu. 22Yeti sakra fi wɔ bɔne nwo, na srɛ Awurade kyɛ, sɛ ɔkɔyɛ ye a, ɔfa nningyein tɛɛ bɔ adwene ye nwo wɔ w'ahone nu ne hyɛ wɔ; 23ofikyɛ manwu kyɛ ɛte pɔizen bɔ ɔyɛ wee, na ɛtte akoaa pa.” 24Simon ha hyirele bɛ kyɛ: “Ɛmɔsrɛ Awurade bɛma me, ná nningyein bɔ akeka nanu biala amma me so.”
25Mmerɛ bɔ Petro ne Yohane lili adanzeɛ fekɔ-fekɔ na bɛhane Awurade dwirɛ ne beyiele ne, bɛsili atee so kyɛ bɛba Yerusalem. Bɛba namukoraati, né bɛka nzɛmba ne wɔ Samaria nguraa nemɔ pee nu.
26Na Awurade bɔfo ha hyirele Filipo kyɛ: “Dwɔso kɔ ngwaen dɔ, atee bɔ ofi Yerusalem kɔ Gaza naso.” (Sɔ atee ne la ɛserɛ so.) 27Yeti, odwɔso hɔle, ɔkwaanea a, Etiopianiɛ ahemvie panyi bie ɛhe. Né sɔ biaa ne le tumi paa, né owura Etiopia hemaa Kandake bo, ye yeɛ ne ɔnea ye agudeɛ mukoraati so ɔ. Né wahɔ Yerusalem waaso, 28bɔ osa kɔ ye kuro, na ne ɔte ye teaseɛnam nu ɔkenga diifoɛ Isaiah nwomaa ne. 29Yeti, honhom ne ha hyirele Filipo kyɛ: “Kɔ dɔ, pingye teaseɛnam ne.” 30Yeti, Filipo tuli mirika hɔle ye nwo berɛ, na ɔtele kyɛ biaa ne kenga diifoɛ Isaiah nwomaa ne. Filipo bisale ye kyɛ: “Bɔ ɛkenga ne, ɛte ye bo?” 31Biaa ne hane kyɛ: “Sɛ ebie angyire me a, ngɔyɛ sɛɛ ne mate ye bo.” Yeti ɔsrɛle Filipo kyɛ ɔɔtena ye nwo berɛ. 32Edwirɛ bɔ ne ɔkenga ye wɔ tworɔnzɛm nanu ne ɛhe:
“Bɛfale ye bɛhɔle kyɛ boan bɛ bɛkwaahu ye ne,
na kyɛbɔ boan bɔ bɛpepɛ ye nwo nwiaa yɛ konn ne,
sɔ ala yeɛ ye koso wammukye ye noa ɔ.
33Mmerɛ bɔ bɛbrɛle ye ase ne, bammu atɛn tenenee bamma ye,
Nwa yeɛ okohyire ye aworɛ ndoɔtoasoɛ ɔ?
Ofikyɛ bɛyele ye bɛfili aseɛ naso.”
34Ahemvie panyi ne bisale Filipo kyɛ: “Mesrɛ wɔ, nwa nwo dwirɛ yeɛ né diifo ne ka ne? Ye bɔbɔ, anaa sona foforɛ?” 35Filipo hyɛle yebo dwudwole, na ɔfale tworɔnzɛm he hyɛle yebo hane Yesu nwo nzɛmba hyirele ye. 36Na mmerɛ bɔ bɛnate atee naso ne, bɛnwuni nzue bie, yeɛ ahemvie panyi ne bisale Filipo kyɛ: “Nea, nzue yeɛ ɔla berɛ ne, nzu yeɛ osi m'asubɔ atee ɔ?” 37#8:37 Sɛ ɛnea Bible biemɔ nu a, bafa edwirɛ bie wura ɛwa kyɛ: Yeɛ Filipo ha hyirele ye kyɛ, “Sɛ edɛ́ di koraa wɔ w'ahone nu de a, ɛkɔhora kɔbɔ asu.” Na ye koso ɔhane kyɛ, “Medɛ́ medi kyɛ Yesu Kristo yeɛ ole Nyameɛ Awa ne.” Nakoso sɔ dwirɛ ne, ɔnne tete asaanoa ndworɔyɛ bɔ wahyɛ paa, ɔne bɔ odi mu paa nanu. ― 38Yeti, ɔmaa teaseɛnam ne gyinane, na Filipo ne ahemvie panyi ne dwu hɔle nzue nanu, na ɔbɔle ye asu. 39Bɛfili nzue nanu bɛfitele ne, Awurade honhom fale Filipo hɔle, ná ahemvie panyi ne anwu ye kõ, na ɔfale anigye hɔle ye atee. 40Filipo nye wale ye nwo so ne, né ɔwɔ Asdod, na ɔfale mandanu berɛ mukoraati hane nzɛmba ne wɔ kuro biala nu tonn oodwuli Kaesarea.
Currently Selected:
Asomafoɛ Nyumaa 8: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
