14
1“Nnɛmɔ maa ɛmɔ wora bɔ. Ɛmɔ de, ɛmɔnya gyidie wɔ Nyameɛ nu, na ɛmɔnya gyidie koso wɔ me nu. 2Nekaa pee wɔ me Baba awuro berɛ, sɛ ɔtte sɔ a, ahaa nzuati yeɛ meka mekyire ɛmɔ kyɛ, mekwaasiesie nekaa bie mema ɛmɔ ne? 3Na sɛ mekosiesie nekaa mema ɛmɔ a, ngosa ngɔwa, ná maafa ɛmɔ mahɔ me bɔbɔ me berɛ, ná nekaa bɔ nwɔ ne, ɛmɔ koso ɛmɔ awa berɛ bie. 4Na nekaa bɔ mekɔ ne, ɛmɔse atee ne.” 5Yeɛ Tomas bisale ye kyɛ: “Awurade, yɛnze nekaa bɔ ɛkɔ ne, ye de ɔkɔyɛ sɛɛ né yanwu atee ne?” 6Yesu ha hyirele ye kyɛ: “Me yeɛ nne atee ne, nahorɛ ne, ne ngoa ne. Sɛ ebie kɔhora kɔwa Baba ne berɛ a, sana ɔfa me so. 7Sɛ ɛmɔse me a, ye de, ɛmɔse me Baba ne koso. Ofi ɛnɛ bɔ ɔkɔ ne, ɛmɔse ye, na ɛmɔ anwu ye.”
8Filipo ha hyirele ye kyɛ: “Awurade, kyire yɛ Baba ne, na ɛhene ala yeɛ yɛhia ɔ.” 9Yesu ha hyirele ye kyɛ: “Filipo, mmerɛ-tende bɔ mene ɛmɔ atena ne, enya nwuni me? Ebiala bɔ wanwu me ne, wanwu Baba ne. Na nzuati yeɛ ɛka kyɛ, ‘Kyire yɛ Baba ne’? 10Enne nni kyɛ nwɔ Baba ne nu, na Baba ne koso wɔ me nu? Edwirɛ bɔ meka mekyire ɛmɔ ne, nná me bɔbɔ me adwene yeɛ mefa meka ɔ. Mmom Baba ne bɔ ɔwɔ me nu ne, ye yeɛ ɔyɛ ye adwuma ɔ. 11Ɛmɔle me bɛli, nwɔ Baba ne nu, na Baba ne koso wɔ me nu. Nná sɔ a, ɛmɔnea nningyein bɔ meyɛ ne, na ɛmɔle bɛli.
12“Nahorɛ paa bɔ meka mekyire ɛmɔ yeɛ ole kyɛ, ebiala bɔ onya gyidie wɔ me nu ne, ɔkɔyɛ adwuma bɔ meyɛ ne bie; na ɔkɔyɛ nyumaa mbiri-mbiri kɔtra bɔ meyɛ ne po, ofikyɛ mekɔ Baba ne dɔ. 13Afei, nikye biala bɔ ɛmɔ kobisa ye wɔ me dumaa nu ne, ngɔyɛ, ná wamaa bahyɛ Baba ne anuonyam wɔ Baa ne nu. 14Sɛ ɛmɔ bisa nikye biala wɔ me dumaa nu a, ngɔyɛ.”
15“Sɛ ɛmɔdɔ me a, ɛmɔ koli m'ahyɛdeɛ so. 16Na ngɔsrɛ Baba ne maa ɔkɔma ɛmɔ bokafoɛ foforɛ bɔ ɔne ɛmɔ kɔtena daa. 17Ye yeɛ ole nahorɛ honhom bɔ wiase ne ngora nnya ye ne, ofikyɛ wiase ne nwuni ye, na bɛnze ye. Ɛmɔ de ɛmɔse ye, ofikyɛ ɔne ɛmɔ yeɛ bɛte ɔ, na ɔte ɛmɔ nu.
18“Mengɔyakyi ɛmɔ kyɛ nyisiaa, ngɔwa ɛmɔ berɛ. 19Waha kaa bie né wiase nnwu me kõ, nakoso ɛmɔ de, ɛmɔ konwu me; ofikyɛ nde ase, na ɛmɔ koso ɛmɔ kɔtena ase. 20Sɔ kyẽa ne, ɛmɔ konwu kyɛ, nwɔ me Baba ne nu, na ɛmɔ koso ɛmɔ wɔ me nu, na me koso nwɔ ɛmɔ nu. 21Ebiala bɔ otie m'ahyɛdeɛ na odi so ne, ye yeɛ ɔdɔ me ɔ. Na bɔ ɔdɔ me ne, me Baba koso kɔlɔ ye, na me koso ngɔlɔ ye, na ngɔla me nwo ali ngohyire ye.” 22Afei Yuda (nná Iskariot ne ɔ) bisale ye kyɛ: “Awurade, nzuati yeɛ ɛpena kyɛ ɛye wɔ nwo ali pefee kyire yɛ, na ɛngɔye ngohyire wiase ne?” 23Yesu yele yenoa kyɛ: “Sɛ ebie dɔ me a, okoli me dwirɛ so, na me Baba kɔlɔ ye, na yɛkɔwa ye berɛ, na yaatena ye nu.#14:23 Anaa “Yaafa ye berɛ yayɛ y'awuro.” 24Ebiala bɔ ɔnnɔ me ne, onni me dwirɛ so. Edwirɛ bɔ ɛmɔte ne, ɔtte me deɛ, mmom ɔte Baba bɔ ɔsomane me ne deɛ.
25“Maha edwirɛ he mahyire ɛmɔ, mmerɛ bɔ mene ɛmɔ wɔ wa ne. 26Nakoso honhom krongron, bokafoɛ bɔ Baba ne kɔsoma ye me dumaa nu ne, ye yeɛ okohyirehyire ɛmɔ nikye biala, na ɔkɔkaye-kaye ɛmɔ nningyein bɔ maha mahyire ɛmɔ ne. 27Asomdwie yeɛ mefa meyakyi ɛmɔ ɔ; mefa m'asomdwie mema ɛmɔ. Nná kyɛbɔ wiase fa asomdwie ma ne yeɛ mefa mema ɛmɔ ɔ. Nnɛmɔ maa ɛmɔ wora bɔ, na nnɛmɔ maa esuronyi ka ɛmɔ. 28Nnaa ɛmɔ tele kyɛ nga ngyirele ɛmɔ kyɛ, ‘Mekɔ, na ngosa ngɔwa ɛmɔ berɛ.’ Sɛ ɛmɔdɔ me a, ɔkɔyɛ ɛmɔ fɛ kyɛ mesa mekɔ me Baba ne berɛ, ofikyɛ Baba ne te piri tra me. 29Ná mali moa maha mahyire ɛmɔ kora yeɛ ɔbaasi ɔ, na sɛ osi a, ɛmɔ alɛ́ bali. 30Mene ɛmɔ ngodwudwo pee, ofikyɛ bɔ odi wiase naso ne ba, ná olle me so tumi. 31Na bɔ ɔkɔyɛ na wiase ne anwu kyɛ medɔ Baba nati, ahyɛdeɛ bɔ Baba ne afa ama me ne, ɛhene ala yeɛ meyɛ ɔ.
“Ɛmɔ dwɔso, na ɛmɔma yefi wa yɛhɔ.”
