Yohane 13
13
1Né waha kaa maa bɛdi Pɛnu afahyɛ ne, na né Yesu se kyɛ ye mmerɛ aso kyɛ ofi wiase he anu, na ɔkɔ ye Baba dɔ. Na ɔnate kyɛ Yesu dɔ ye bɔbɔ ye deɛ bɔ bɛwɔ wiase nati, ɔlɔle bɛ oosili awieɛ. 2Na nnɔsoa bɔ bɛdidi ne, né Abɔnzam afa wura Simon awa Yuda Iskariot ahone nu dada kyɛ ɔye ye ma. 3Ná ɔnate kyɛ ne Yesu se kyɛ ye Baba afa nikye biala awura ye sa, ná ofi Nyameɛ dɔ yeɛ ɔwale, na osa kɔ ye dɔ nati, 4odwɔso fili aleɛ nabo, na ɔfale atadeɛ bɔ ogua ye so ne guale berɛ. Yeɛ ɔfale nzasrɛ bɔle ye nu. 5Afei ɔfale nzue guale nikye nu, na ɔhyɛle yebo nwunzini asuafoɛ nemɔ gya bo, na ɔfale nzasrɛ bɔ ɔbɔ ye nu ne nunune bɛ gya nanwo. 6Odwuli Simon Petro so ne, Petro bisale ye kyɛ: “Awurade, wɔ yeɛ ɛnwunzi me gya bo ɔ?” 7Yesu ha hyirele ye kyɛ: “Bɔ meyɛ ne, kesaalae de, ɛngɔte ye bo, nakoso yesi ne, ɛkɔte ye bo.” 8Yeɛ Petro ha hyirele ye kyɛ: “Mengɔma ɛngɔnwunzi me gya bo lle.” Yesu koso ha hyirele ye kyɛ: “Sɛ amma mannwunzi wɔ gya bo a, ye de ɛlle kyɛfa biala wɔ me nu.” 9Yeɛ Simon Petro ha hyirele ye kyɛ: “Awurade, nnɛnwunzi me gya bo ngome, nwunzi me sa nwo ne me ti so koso.” 10Yesu ha hyirele ye kyɛ: “Ebiala bɔ wabia ne, ye nwo nhia kyɛ bɛbia ye kõ, ye gya bo ngome yeɛ odikyɛ onwunzi ɔ, ofikyɛ ye nwo mukoraati afi. Ɛmɔ nwo afi, nakoso nná ɛmɔ mu ɔ.” 11Né ɔse sona bɔ ɔbaaye ye ma ne, yeti yeɛ ɔhane kyɛ: “Nná ɛmɔ mukoraati yeɛ ɛmɔ nwo afi ɔ.”
12Onwunzini bɛ gya bo yiele ne, ɔfale ye atadeɛ ne wurale, na osa tenane tɛbulu nanwo, yeɛ ɔha hyirele bɛ kyɛ: “Bɔ mayɛ mama ɛmɔ ne, ɛmɔte yebo? 13Ɛmɔfrɛ me Kyerɛkyerɛniɛ ne Awurade, ye ala ne, ofikyɛ nde Kyerɛkyerɛniɛ ne Awurade. 14Na sɛ me bɔ nde Kyerɛkyerɛniɛ ne Awurade ne, mawunzi ɛmɔ gya bo a, ye de ɛmɔ koso, odikyɛ ɛmɔ nu biala nwunzi ye mmango gya bo. 15Na mayɛ nneasoɛ mama ɛmɔ, yeti bɔ mayɛ ne, ɛmɔ koso ɛmɔyɛ sɔ ala. 16Nahorɛ paa bɔ meka mekyire ɛmɔ yeɛ ole kyɛ, akoaa ndra ye wura; na somafoɛ ndra bɔ ɔsomane ye ne. 17Sɛ ɛmɔse ɛhemɔ na ɛmɔyɛ a, ne ɛmɔle anigye.
18“Edwirɛ bɔ meka ne, ɔmva ɛmɔ mukoraati nwo, mese bɛ bɔ maye bɛ ne; kyɛbɔ ɔkɔyɛ a Tworɔnzɛm ne kɔwa nu kyɛ: ‘Sona bɔ odi m'aleɛ ne, ye yeɛ wadwɔso watia me ne.’ 19Afei meka ɛhe mekyire ɛmɔ kora né wasi, na sɛ osi a, ɛmɔ alɛ́ bali kyɛ me yeɛ nne ye. 20Nahorɛ paa bɔ meka mekyire ɛmɔ yeɛ ole kyɛ, ebiala bɔ okole sona bɔ masoma ye ne, wale me, na ebiala bɔ okole me ne, wale Bɔ ɔsomane me ne koso.”
21Yesu hane ɛhemɔ yiele ne, ne ye nwo teetee ye, na ɔhane kyɛ: “Nahorɛ nu, meka mekyire ɛmɔ kyɛ, ɛmɔ nu kõ kɔye me kɔma.” 22Na asuafoɛ nemɔ hyɛle yebo neɛneane bɛ nwo nyunu, né bɛnnwu sona bɔ ɔka ye nwo dwirɛ ne. 23Suaniɛ bɔ Yesu kuro ye dwirɛ paa ne, né ɔte Yesu nwo berɛ pɛɛ.#13:23 Anaa “Né watena wakisa Yesu.” 24Yeti Simon Petro bɔle ye nye hyirele ye bisale ye kyɛ: “Ka kyire yɛ, nwa yeɛ ɔka ye nwo dwirɛ ne?” 25Yeti, suaniɛ ne kisale Yesu hue so, na obisale ye kyɛ: “Awurade, nwa ane?”
26Yesu yele ye noa kyɛ: “Bɔ ngɔfa paanoo sii he ngɔbɔ kwangoa nanu ngɔma ye ne, ye ɛne.” Yeti Yesu fale paanoo ne bɔle kwangoa nanu, na ɔfa mane Simon Iskariot awa Yuda. 27Yuda lɛle paanoo sii nala pɛ, Satan wurale ye nu. Yeti, Yesu ha hyirele ye kyɛ: “Bɔ ɛyɛ ne, yɛ ye ndɛ.” 28Nakoso, bɛ bɔ bɛte tɛbulu nanwo ne, bɛ nu biala anwu bɔ yeti yeɛ Yesu hane sɔ dwirɛ ne hyirele ye ne. 29Ɔnate kyɛ Yuda yeɛ ne sikaa alaka ne wɔ ye berɛ nati, ne ebiemɔ adwene yɛ bɛ kyɛ Yesu ka kyire ye kyɛ, “Kɔtotɔ nningyein bɔ yɛbaafa yɛdi afahyɛ ne,” anaakyɛ ɔfa nikye bie maa ahiafoɛ. 30Yeti olɛle paanoo sii ne yiele ne, ɛberɛ ala yeɛ ofili berɛ hɔle ɔ, na ne aleɛ asa.
31Ofite hɔle ne, Yesu hane kyɛ, “Afei de, bahyɛ Sona Awa ne anuonyam, na ɔnate ye so, bahyɛ Nyameɛ koso anuonyam. 32Nyameɛ bɔbɔ kɔhyɛ ye anuonyam, na ɔkɔhyɛ ye anuonyam ndɛ-ndɛ. 33Me mmaa mɔ, mene ɛmɔ kɔtena wa kaa. Ɛmɔ kɔpena me, nakoso ɛmɔ ngonwu me, na bɔ nga ngyirele Yudafoɛ nemɔ ne, ɛhene ala yeɛ meka mekyire ɛmɔ kesaalae ɔ, yeɛ ole kyɛ, ‘Nekaa bɔ mekɔ ne, ɛmɔ ngɔhora berɛ ba.’ 34Mema ɛmɔ ahyɛdeɛ foforɛ, yeɛ ole kyɛ, ɛmɔdodɔ ɛmɔ nwo. Kyɛbɔ medɔ ɛmɔ ne, sɔ ala yeɛ ɛmɔdodɔ ɛmɔ nwo ɔ. 35Sɛ ɛmɔdodɔ ɛmɔ nwo a, ɛhene yeɛ ɔkɔmaa ebiala konwu ye kyɛ, amba, ɛmɔte m'asuafoɛ.”
36Simon Petro bisale ye kyɛ: “Awurade, nisua yeɛ ɛkɔ ne?” Yesu ha hyirele ye kyɛ: “Nekaa bɔ mekɔ ne, kesaalae de, ɛngɔhora me si di, nakoso ye si ne, ekoli me si.” 37Yeɛ Petro hane kyɛ: “Awurade, nzuati yeɛ kesaalae de, mengɔhora wɔ si di ɔ? Me ngoa po a, ngɔfa ngɔto berɛ ngɔma wɔ.” 38Yesu bisale ye kyɛ: “Ɛkɔfa wɔ ngoa kɔto berɛ kɔma me? Nahorɛ nu, meka mekyire wɔ kyɛ, kora bɔ akɔ kɔbɔ ne, né aha ye pɛn nza kyɛ ɛnze me.”#13:38 Anaa “Né aye me ama pɛn nza.”
Currently Selected:
Yohane 13: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
