Yohane 12
12
1Né waha ɛlɛsia maa bɛdi Pɛnu ne, na Yesu wale Betania, nekaa bɔ Lazarus bɔ otingyele ye fili awufo nu ne wɔ ne. 2Nnɔsoa ne, bɛyɛle aleɛ bɛmane ye wɔ berɛ, Marta yeɛ ne ɔsõ bɛ ɔ, na né Lazarus boka bɛ bɔ bɛne ye didi naso. 3Na Mary fale ngoo fona-fona bɔ ye nyɔboɛ yɛ se paa, ngoo pa bɔ bafa nardo bayɛ towaa kõ, ohwie guale Yesu gya nwo, na ɔfale ye ti nwiaa kyikyile. Ná ngoo ne pambaen ne lɛle awuro berɛ. 4Nakoso asuafoɛ nanu kõ bɔ bɛfrɛ ye Yuda Iskariot, bɔ ne ɔbaaye Yesu ma ne hane kyɛ: 5“Nzuati yeɛ bandɔne ngoo fona-fona he banne dɛnare 300 bamva bamma ahiafoɛ ne?” 6Ɔtte kyɛ Yuda dwene ahiafoɛ nwo ti yeɛ ɔhane sɔ ɔ, mmom ne ɔte awieniɛ. Ye yeɛ ne sikaa alaka ne wɔ ye berɛ ɔ, na ne owia sikaa bɔ bɛfa bɛgua nu ne. 7Yeɛ Yesu hane kyɛ: “Ɛmɔyakyi ye, ná ɔyɛ ɛhe ma kyẽa bɔ bɛkosie me ne. 8Ofikyɛ ahiafoɛ de, daa bɛne ɛmɔ yeɛ ɛwɔ wa ɔ, nakoso me de, ɛmɔngonya me daa.”
9Na Yudafoɛ nanu pee nwuni kyɛ Yesu wɔ berɛ, yeti bɛwale berɛ. Nná Yesu ngome ti yeɛ bɛwale berɛ ɔ, mmom né bɛbaanea Lazarus bɔ watingye ye wafi ewue nu ne. 10Yeti sɔfo mbanyi nemɔ bɔle porɛ kyɛ bekohu Lazarus koso, 11ofikyɛ yeti yeɛ ne Yudafoɛ nanu pee kɔ berɛ, na bedɛ Yesu bɛdi ne.
12Aleɛ hene ne, mmenia nwora bɔ bɛwale afahyɛ nabo ne tele kyɛ Yesu ba Yerusalem. 13Yeti, bɛfale ɛberɛ kyɛ bɛkwaayia ye, na bɛbɔle ose kyɛ:
“Hozanna!” #12:13 Hozanna te Hebri dwirɛ bɔ yebo kyire kyɛ, “Yɛsrɛ wɔ, de ye.” Greek nu ne, sɔa yeɛ bɛtworɔ ye ɔ: “ὡσαννά (hōsanná).”
“Nhyira yeɛ ole bɔ ɔba Awurade dumaa nu ne!”
“Nhyira yeɛ ole Israel Hene ne!”
14Yesu nwuni afunum ba bie, na ɔtenane ye so kyɛbɔ bahworɔ ne, bahworɔ kyɛ:
15“Zion awa brasua, nnɛsuro.
Nea, wɔ hene ba wɔ berɛ,
na ɔte afunum ba so.”
16Ahyɛaseɛ ne, né asuafoɛ nemɔ nde sɔ nningyein nemɔ bo, nakoso, mmerɛ bɔ bɛhyɛle Yesu anuonyam ne, bɛkayele kyɛ, né bahworɔ sɔ nningyein he amukoraati bafa ye nwo, na bɛyɛ bɛmane ye. 17Na mmenia nwora bɔ ne bɛwɔ berɛ mmerɛ bɔ ɔfrɛle Lazarus fili asieleɛ nanu, na otingyele ye fili ewue nu ne, bɛlili ye nwo adanzeɛ. 18Na ɔnate kyɛ mmeni lɔen ne tele kyɛ wayɛ sɔ nzɛngyerɛneɛ nemɔ nati yeɛ beeyiale ye ne. 19Na né Farisifoɛ nemɔ keka kyɛ; “Nnaa ɛmɔ anwu ye kyɛ ɛmɔ ngɔhora ye nwo hwee yɛ. Ɛmɔnea, wiase mukoraati yeɛ bɛli ye si ne.”
20Bɛ bɔ bɛhɔle afahyɛ nabo kyɛ bɛkwaasõ ne, né Greekfoɛ biemɔ boka so. 21Sɔ mmenia hemɔ wale Filipo bɔ ofi Betsaida bɔ ɔwɔ Galilea ne berɛ, na bɛha behyirele ye kyɛ: “Owura, yɛpena kyɛ yɛnwu Yesu.” 22Filipo bɔle Andrea amaneɛ, na Andrea ne Filipo wale Yesu berɛ bɛɛbɔle ye amaneɛ. 23Nakoso Yesu ha hyirele bɛ kyɛ: “Mmerɛ aso kyɛ bɛhyɛ Sona Awa ne anuonyam. 24Nahorɛ paa bɔ meka mekyire ɛmɔ yeɛ ole kyɛ, sɛ hwiit baa kõ andɔ ase anwu a, ɔtɛ́ te baa kõ; nakoso sɛ owu a, osu mmaa pee. 25Ebiala bɔ okuro ye ngoa#12:25 Anaa “Kra.” ne, okofi ye sa, nakoso ebiala bɔ ɔtane ye ngoa#12:25 Anaa “Kra.” wɔ wiase he anu ne, ɔkɔbɔ ye nwo waen kɔhɔ daa ngoa nu. 26Sɛ ebie pena kyɛ ɔsõ me a, odikyɛ odi me si; na nekaa bɔ nwɔ ne, ɛberɛ yeɛ me somvoɛ ne koso kɔwa ɔ. Sɛ ebie pena kyɛ ɔsõ me a, me Baba koso koli ye ni.
27“Afei de, me nwo teetee me.#12:27 Anaa “Me kra nwo teetee ye.” Na nzu po yeɛ nga ɔ? Baba, dɛ́ me fi mmerɛ he anu! Nakoso, ɛhe ati yeɛ mawa sɔ mmerɛ he anu ɔ. 28Baba, hyɛ wɔ dumaa anuonyam.” Yeɛ konviɛ bie fili anwuro hane kyɛ: “Mahyɛ ye anuonyam dada, na ngɔhyɛ ye anuonyam bieku.” 29Na mmeni lɔen bɔ bɛgyi berɛ ne tele, na bɛhane kyɛ agralaa abɔnu. Na ebiemɔ koso hane kyɛ: “Abɔfo adwudwo ahyire ye.” 30Yesu hane kyɛ: “Nná me ti yeɛ konviɛ he wale ɔ, ɛmɔ ti yeɛ ɔwale ɔ. 31Kesaalae, bɛbu wiase he atɛn; kesaalae, bɛbaaye bɔ odi wiase he aso ne bɛfi berɛ. 32Na me de, sɛ benya bɛma me so bɛfi aseɛ naso a, ngɔhwe mmenia ahoroɛ mukoraati ngɔwa me nwo.” 33Né ɔka sɔ dwirɛ ne fa kyire ewue horɛ bɔ ɔbaawu ne. 34Yeɛ mmenia ne ha hyirele ye kyɛ: “Yate ye wɔ Mmeraa nanu kyɛ, Kristo ne wɔ berɛ daa. Yeti, nzuati yeɛ ɛka kyɛ, odikyɛ bɛma Sona Awa naso ne? Sona Awa beni yeɛ ɛka ye nwo dwirɛ ne?” 35Na Yesu ha hyirele bɛ kyɛ: “Kanea ne kɔtena ɛmɔ nu mmerɛ kaa. Ɛmɔ nate mmerɛ bɔ kanea ne wɔ berɛ ne, ná awosii anni ɛmɔ so. Ebiala bɔ ɔnate awosii nu ne, ɔnze nekaa bɔ ɔkɔ ɔ. 36Mmerɛ bɔ ɛmɔle kanea ne, ɛmɔnya gyidie wɔ kanea nanu, na wamaa ɛmɔ ayɛ kanea ne mmaa.”
Yesu hane ɛhemɔ yiele ne, ofili berɛ, na ɔfale ye nwo feale bɛ. 37Ɔwɔ nu, ne wayɛ nzɛngyerɛneɛ pee wahyire bɛ, nakoso banne ye banni, 38kyɛbɔ ɔkɔyɛ a, diifoɛ Isaiah dwirɛ ne kɔwa nu ɔ, ɔhane kyɛ:
“Awurade, nwa yeɛ wale yɛ dwirɛ bɔ yɛhane ne wali ɔ?
Na nwa yeɛ baye Awurade sa bahyire ye ɔ?”
39Bɔ yeti yeɛ banne banni ne, Isaiah sa hane kyɛ:
40“Wasi bɛ nye,
na wamaa b'ahone ayɛ se,
kyɛbɔ ɔkɔyɛ a, bɛngɔfa bɛ nye bɛngonwu nikye,
ná bafa b'ahone bate yebo basakra,
maa masa bɛ anwonyerɛ.”
41Isaiah hane sɔ nningyein hemɔ, ofikyɛ onwuni ye anuonyam, na ɔhane ye nwo dwirɛ. 42Ye mukoraati si ne, atumvoɛ nanu biemɔ po nyane gyidie wɔ ye nu, nakoso Farisifoɛ nati, bannye bɛ nyunu, sɛ bɛyɛle sɔ a, ahaa bɛkɔtu bɛ bɛkofi sua bɔ beyia nu nanu. 43Ofikyɛ, né bɛkuro sona anuonyam bɛtra Nyameɛ deɛ.
44Nakoso, Yesu teane nu hane kyɛ: “Ebiala bɔ okole me koli ne, nná me ngome yeɛ wale me wali ɔ, mmom wale bɔ ɔsomane me ne koso wali; 45Na bɔ okonwu me ne, wanwu bɔ ɔsomane me ne koso. 46Mawa wiase kyɛ kanea, na ebiala bɔ odɛ́ me di ne, ɔngɔha awosii nu. 47Nakoso sɛ ebie te me dwirɛ, na wanni so a, memmu ye atɛn; ofikyɛ mamma kyɛ mebaabu wiase atɛn, mmale kyɛ mebaale wiase ne ngoa. 48Ebiala bɔ ɔpo me, na ɔnne me dwirɛ ndonu ne, ole bɔ ɔkɔbu ye atɛn ɔ. Edwirɛ bɔ maha ne, ɛhene yeɛ kyẽa bɔ ɔpɛ yebo ne, okobu ye atɛn ɔ. 49Ofikyɛ, nná me bɔbɔ mepɛ yeɛ mefa medwudwo ɔ, mmom Baba bɔ ɔsomane me ne ahyire me bɔ nga, ne bɔ ngyire ɔ. 50Na mese kyɛ, ye ahyɛdeɛ ne te daa ngoa. Yeti bɔ ngɔha biala ne, bɔ Baba ne ahyire me nala yeɛ meka ɔ.”
Currently Selected:
Yohane 12: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
