Yohane 11
11
1Biaa bie bɔ bɛfrɛ ye Lazarus fokyɛle. Né ofi Betania, nekaa bɔ Mary ne oliema Marta fi ne. 2Mary he yeɛ ɔfale ngoo fona-fona guale Awurade nwo, na ɔfale ye ti nwiaa kyikyile ye gya bo ne, oliema brienzua Lazarus yeɛ ne wafokyɛ ne. 3Yeti, oliema mmrasua nemɔ tole Yesu ngraa kyɛ: “Awurade, nea, bɔ ekuro ye dwirɛ ne afokyɛ.” 4Nakoso mmerɛ bɔ Yesu tele ɛhe ne, ɔhane kyɛ: “Sɔ anwonyerɛ he, ɔtte anwonyerɛ bɔ okohu ye ɔ, mmom Nyameɛ anuonyam ti ɔ, na ɔnate ɛhe aso ne, bɛkɔhyɛ Nyameɛ Awa ne anuonyam.”
5Né Yesu dɔ Marta ne oliema brasua ne né Lazarus paa. 6Nakoso mmerɛ bɔ ɔtele kyɛ Lazarus afokyɛ ne, olili ɛlɛnyɔ wɔ nekaa bɔ né ɔwɔ ne. 7Yesi ne, ɔha hyirele ye asuafoɛ nemɔ kyɛ: “Ɛmɔma yesa yɛhɔ Yudea.” 8Asuafoɛ nemɔ ha hyirele ye kyɛ: “Rabi, nná anomasi wala yeɛ ahaa Yudafoɛ nemɔ si wɔ nyɔboɛ ne, yeɛ esa kɔ dɔ ne?” 9Yesu hane kyɛ: “Nná dɔnhwere buru-ne-nyɔ yeɛ ɔwɔ kyẽa biala nu ɔ? Sɛ ebie nate eyia a, ɔmpoli, ofikyɛ onwu kanea bɔ ɔwɔ wiase ne. 10Nakoso sɛ ebie nate kɔngɔen a, ɔkɔpoli, ofikyɛ kanea nne ye nu.” 11Ɔhane ɛhemɔ yiele ne, osa ha hyirele bɛ kyɛ: “Yɛ damvo Lazarus ala, na mekɔ dɔ mekɔ tingye ye.” 12Yeɛ asuafoɛ nemɔ ha hyirele ye kyɛ: “Awurade, sɛ wala de a, ye nwo kɔtɔ ye.” 13Nakoso Yesu de, ye wue nwo dwirɛ yeɛ ne ɔka ne, nakoso bɛ de, né b'adwene yɛ bɛ kyɛ wala bɔ odɛ́ ye nwomeɛ. 14Yeti, Yesu ha hyirele bɛ pen kyɛ: “Lazarus awu, 15na ɛmɔ ti, ɔyɛ me fɛ kyɛ né nne berɛ, kyɛbɔ ɔkɔyɛ a ɛmɔkole bɛkoli. Nakoso, ɛmɔma yɛhɔ dɔ.” 16Yeti Tomas, bɔ bɛfrɛ ye Ata ne ha hyirele ye mmango asuafoɛ nemɔ kyɛ: “Ɛmɔma yɛne ye hɔ, ná yɛne ye wu.”
17Yesu dwuli berɛ ne, onwuni kyɛ basie Lazarus maa wali ɛlɛnna. 18Né Betania pingye Yerusalem, na efi Yerusalem bɔ ɛkɔ berɛ ne, ɔte kɔyɛ kwanzii nyɔ. 19Né Yudafoɛ pee awa berɛ kyɛ bɛbaayɛ Marta ne Mary yaakɔ, bɛ liema ne wue nati. 20Mmerɛ bɔ Marta tele kyɛ Yesu ba ne, ooyiale ye; nakoso Mary de, né ɔte awuro. 21Marta ha hyirele Yesu kyɛ: “Awurade, sɛ ɛwɔ wa a, ahaa nniema ne annwu. 22Nakoso kesaalae po, mese kyɛ, nikye biala bɔ ekobisa Nyameɛ ne, Nyameɛ kɔfa kɔma wɔ.” 23Yesu ha hyirele ye kyɛ: “Eliema ne kotingye.” 24Marta ha hyirele ye kyɛ: “Mese kyɛ kyẽa bɔ ɔpɛ yebo, bɔ bɛtingye awufo ne, okosa kɔdwɔso.” 25Yesu ha hyirele ye kyɛ: “Me yeɛ nne ewue tingyelɛ ne ngoa. Ebiala bɔ onya gyidie wɔ me nu ne, sɛ wawu po a, okosa kɔwa ngoa nu; 26na ebiala bɔ ɔte ase, na odɛ́ me di ne, ongowu koraa. Edɛ́ ɛhe di?” 27Marta hane kyɛ: “Yoo, Awurade, medɛ́ medi kyɛ wɔ yeɛ ɛle Kristo ne, Nyameɛ Awa bɔ ɔba wiase ne.”
28Ɔhane ɛhe yiele ne, ofili berɛ hɔle, na ɔɔfrɛle oliema Mary, yeɛ ɔha guale ye so anu kyɛ: “Kyerɛkyerɛniɛ ne awa, na yenwa ɛbra.” 29Ɔtele ɛhe ne, ɛberɛ ala yeɛ odwɔso hɔle ye dɔ ɔ. 30Né Yesu nnya dwuli nnamue nanu, né ɔtɛ́ wɔ nekaa bɔ Marta yiale ye ne. 31Mmerɛ bɔ Yudafoɛ bɔ bɛwɔ Mary nwo berɛ bɛkyekye ye wora ne nwuni kyɛ wadwɔso kuhuru ɔkɔ ne, bɛlili ye si; né bɛse kyɛ ɔkɔ asieleɛ naso kosu. 32Mary dwuli nekaa bɔ Yesu wɔ, na ye nye bɔle ye so ne, ɔkotole ye gya bo, na ɔha hyirele ye kyɛ: “Awurade, sɛ ɛwɔ wa a, ahaa nniema ne anwu.” 33Mmerɛ bɔ Yesu nwuni kyɛ osu, ná Yudafoɛ bɔ bɛne ye wale ne su ne, ye wora bɔle paa, na ɔyɛle basaa. 34Yeti obisale bɛ kyɛ: “Nisua yeɛ ɛmɔ fale ye bɛtole ɔ?” Bɛhane kyɛ: “Awurade, baanea.” 35Yesu suni. 36Yeti Yudafoɛ nemɔ hane kyɛ, “Ɛmɔnea kyɛbɔ ne okuro ye dwirɛ ɔ!” 37Nakoso, bɛ nu biemɔ hane kyɛ: “Nná biaa he yeɛ ɔte anyesiniwaafoɛ nye ne? Yeɛ wangora wanyɛ ye nwo hwee bɔ wamaa biaa he awu ne?”
38Mmerɛ bɔ Yesu sa guale nwomeɛ bieku ne, ɔwale asieleɛ naso. Né ɔte nyɔboɛ bɔ wayɛ kyɛ sua, na né bafa nyɔboɛ bakisa ye noa. 39Yesu hane kyɛ: “Ɛmɔye nyɔboɛ ne bɛfi berɛ.” Na Marta bɔ oliema brienzua awu ne ha hyirele ye kyɛ: “Awurade, bekye de ɔbõ, ofikyɛ owuli ne, ɛlɛnna ɛhe.” 40Yesu ha hyirele ye kyɛ: “Manga mangyire wɔ kyɛ, sɛ enya gyidie a, ekonwu Nyameɛ anuonyam?” 41Yeti bɛyele nyɔboɛ ne bɛfili berɛ. Na Yesu mane ye ti so neane anwuro, yeɛ ɔhane kyɛ: “Baba, meda wase kyɛ atie me. 42Mese kyɛ daa ɛtie me; nakoso mmenia bɔ bɛwɔ wa nati yeɛ me dwudwo ne, ná wamaa balɛ́ bali kyɛ wɔ yeɛ ɛsomane me ɔ.” 43Ɔhane ɛhe yiele ne, ɔteane nu kyɛ: “Lazarus, fite bra!” 44Ná sona bɔ wawu ne fite wale, né bafa ɛtena bakyekye ye gya ne sa, na né bafa ɛtena bie bakyekye ye nyunu. Yeɛ Yesu ha hyirele bɛ kyɛ: “Ɛmɔ sangye ye, ná ɛmɔma ɔhɔ.”
45Yeti, Yudafoɛ bɔ ne bawa Mary berɛ ne nwuni bɔ wasi ne, na bɛ nu pee nyane gyidie wɔ ye nu. 46Nakoso ebiemɔ hɔle Farisifoɛ nemɔ berɛ, na bɛhane bɔ Yesu ayɛ ne bɛhyirele bɛ. 47Yeti sɔfo mbanyi ne Farisifoɛ nemɔ frɛle Sanhendrin ne maa beyiale, na bɛhane kyɛ: “Nzu yeɛ yɛyɛ ɔ, biaa he yɛ nzɛngyerɛneɛ pee? 48Sɛ yɛmaa ɔkɔso yɛ sɔ a, ebiala kole ye koli, ná Romanfoɛ nemɔ kɔwa kɔɔfa ɛwa#11:48 Anaa ebie a “Nekaa bɔ yɛso ne, kyire kyɛ asɔre awuro ne.” ne yɛ maen namu.” 49Nakoso bɛ nu kõ bɔ bɛfrɛ ye Kaiafa, bɔ sɔ afoɛ ne, né ɔte sɔfo panyine hane kyɛ: “Ɛmɔ de, ɛmɔnze hwee, 50ɛmɔnze kyɛ ɔte pa kyɛ sona-horɛ kowu kɔma maen, tra kyɛ bɛkɔsɛkye maen namu ɔ.” 51Nakoso nná ye ti anu adwene yeɛ ɔfa hane sɔ dwirɛ ne ɔ, mmom ɔnate kyɛ sɔ afoɛ ne, ye yeɛ ne ɔte sɔfo panyi nati, né ɔhyɛ ngɔm kyɛ odikyɛ Yesu wu ma maen ne. 52Nná maen ne angome, na mmom okosa kɔboɔboa Nyameɛ mmaa bɔ babɔ bapete ne noa maa bɛkɔyɛ kõ. 53Ná ofi sɔ kyẽa ne, bɛbɔle porɛ kyɛ bɛkɔhu ye.
54Yeti, Yesu anye ye nwo ali annate-nate Yudafoɛ nanu kõ, mmom ofili berɛ hɔle nekaa bɔ opingye ɛserɛ naso, kuro bie bɔ bɛfrɛ ye Efraim nu, na ɔne ye asuafoɛ nemɔ tenane berɛ.
55Sɔ mmerɛ ne, né Yudafoɛ Pɛnu afahyɛ ne apingye, ná mmeni pee fili nguraa nemɔ nu fo hɔle Yerusalem kyɛ bɛkwaate bɛ nwo kora ne Pɛnu afahyɛ ne adwu so. 56Né bɛpena Yesu, yeti mmerɛ bɔ bɛgyi asɔre awuro berɛ ne, né bɛ bisa-bisa bɛ nwo kyɛ: “Ɛmɔ adwene yɛ ɛmɔ sɛ? Ɔngɔwa afahyɛ nabo koraa hɔ?” 57Né sɔfo mbanyi ne Farisifoɛ nemɔ ahyɛ mmeraa kyɛ, ebiala bɔ okonwu nekaa bɔ Yesu wɔ ne, ɔɔha ma bɛhye ye.
Currently Selected:
Yohane 11: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
