16
1“Maha ɛhemɔ mahyire ɛmɔ, kyɛbɔ ɔkɔyɛ a nikye fee ngɔto ɛmɔ sintidua. 2Bɛkɔtu ɛmɔ bɛkofi sua bɔ beyia nu nanu. Nahorɛ nu, mmerɛ bie ba, bɔ ebiala bɔ okohu ɛmɔ ne, okonya adwene kyɛ ɔyɛ sɔ fa so Nyameɛ. 3Bɛkɔyɛ sɔ nningyein hemɔ, ofikyɛ bennya bɛnwuni Baba ne, anaa me. 4Maha ɛhemɔ mahyire ɛmɔ, na mmerɛ ne so a, ɛmɔ akaye kyɛ, nga ngyirele ɛmɔ.
“Ahyɛaseɛ ne de, manga ɛhe mangyire ɛmɔ, ofikyɛ né mene ɛmɔ yeɛ yɛwɔ berɛ ɔ. 5Nakoso kesaalae de, mekɔ bɔ ɔsomane me ne berɛ, nakoso ɛmɔ nu biala bisalle me kyɛ, ‘Nisua yeɛ ɛkɔ ɔ?’ 6Na ɔnate kyɛ maha ɛhemɔ mahyire ɛmɔ nati, wamaa ɛmɔ wora abɔ paa. 7Nakoso, nahorɛ yeɛ meka mekyire ɛmɔ ne, ɛmɔ pa nu ti yeɛ mekɔ ne. Sɛ mangɔ a, bokafoɛ ne ngɔwa ɛmɔ berɛ. Nakoso sɛ mekɔ a, ngɔsoma ye maa ɔkɔwa ɛmɔ berɛ. 8Na sɛ ɔba a, ɔkɔma wiase ne adanzeɛ bɔ ɔfa bɔne, tenenee, ne atemmuo nwo. 9Ɔfa bɔne nwo, ofikyɛ belle gyidie wɔ me nu; 10afei ɔfa tenenee nwo, ofikyɛ mekɔ Baba ne dɔ, na ɛmɔ ngonwu me kõ; 11yeɛ ɔfa atemmuo nwo, ofikyɛ babu bɔ odi wiase he aso ne atɛn.
12“Nne edwirɛ pee bɔ odikyɛ meka mekyire ɛmɔ ɔ, nakoso kesaalae de, ɛmɔ ngɔhora ye soa. 13Nakoso, sɛ nahorɛ honhom ne ba a, okohyire ɛmɔ atee kɔhɔ nahorɛ namukoraati nu. Ofikyɛ nná ye bɔbɔ ye pɛ yeɛ ɔkɔfa kodwudwo ɔ, mmom bɔ ɔkɔte ne, ɛhene yeɛ ɔkɔha ɔ, na ɔkɔmaa ɛmɔ konwu nningyein bɔ ɔbaasisi ne. 14Ye yeɛ ɔkɔhyɛ me anuonyam ɔ, ofikyɛ ɔkɔfa me deɛ ne bie, ná waha wahyire ɛmɔ. 15Bɔ Baba ne le ye biala te me deɛ, ɛhene ati yeɛ ngane kyɛ, me deɛ ne bie yeɛ ɔkɔha kohyire ɛmɔ ne.
16“Waha kaa bie, né ɛmɔnnwu me kõ, nakoso waha kaa bie, ɛmɔ kosa bɛkonwu me.” 17Ɛhe ati, asuafoɛ nemɔ bie bisale bɛ nwo kyɛ: “Mmerɛ bɔ ɔhane kyɛ, ‘Waha kaa bie, né ɛmɔnnwu me kõ, nakoso waha kaa bie, ɛmɔ kosa bɛkonwu me,’ ná osa hane kyɛ, ‘ofikyɛ mekɔ Baba ne dɔ’ ne, né ɔpena kyire sɛɛ”? 18Yeti ne bɛka kyɛ: “‘Waha kaa bie’ bɔ ɔhane ne, né ɔpena kyire sɛɛ? Yɛnde bɔ ɔka ne bo po.” 19Né Yesu se kyɛ, bɛpena kyɛ bɛ bisa ye dwirɛ, yeti ɔha hyirele bɛ kyɛ: “Ɔnate kyɛ ngane kyɛ ‘Waha kaa bie, né ɛmɔnnwu me kõ, nakoso waha kaa bie, ɛmɔ kosa bɛkonwu me’ ne, yeti yeɛ ɛmɔ bisa-bisa ɛmɔ nwo dwirɛ ne anaa? 20Nahorɛ paa bɔ meka mekyire ɛmɔ yeɛ ole kyɛ: Ɛmɔ kosu bɛkɔpɛ awuye, nakoso wiase ne de, bɛ nye kɔgye; ɛmɔ koli aworaborɛ, nakoso ɛmɔ aworaborɛ ne kɔkakyi anigye. 21Sɛ aworɛ ka brasua a, ɔte yealɛ, ofikyɛ ye mmerɛ aso, nakoso sɛ onya wo akwalaa ne a, ɔngaye yealɛ ne kõ, ofikyɛ ye nye agye kyɛ wawo sona wawa wiase ɔ. 22Yeti ɛmɔ koso, kesaalae, ɛmɔ wora abɔ; nakoso ngonwu ɛmɔ bieku maa ɛmɔ ahone kɔtɔ ɛmɔ kunu; ná ɛmɔ anigye ne, ebiala ngole ngofi ɛmɔ sa nu. 23Na sɔ kyẽa ne, ɛmɔ ngobisa me hwee. Nahorɛ paa bɔ meka mekyire ɛmɔ yeɛ ole kyɛ, nikye biala bɔ ɛmɔ kobisa Baba ne wɔ me dumaa nu ne, ɔkɔfa kɔma ɛmɔ. 24Ná ɔbadwu bekye, ɛmɔ bisalle nikye fee wɔ me dumaa nu. Nakoso ɛmɔ bisa, na ɛmɔ sa kɔha ye, ná wamaa ɛmɔ anigye ne ali mu.
25“Anyandera#16:25 Anaa “Mvandoho.” yeɛ mva ngane edwirɛ he ngyirele ɛmɔ ɔ. Mmerɛ bie ba, bɔ mengɔfa anyandera mengɔha hwee mengohyire ɛmɔ, mmom ngɔha Baba ne nwo dwirɛ ngohyire ɛmɔ pen. 26Sɔ kyẽa ne, ɛmɔ kɔsrɛ Baba ne wɔ me dumaa nu; bɔ meka ne ngyire kyɛ me yeɛ ngɔsrɛ ngɔma ɛmɔ ɔ. 27Bɔ yeti yeɛ ɔte sɔ yeɛ ole kyɛ, Baba ne bɔbɔ kuro ɛmɔ dwirɛ, ofikyɛ ɛmɔ kuro me dwirɛ, na ɛmɔdɛ bɛdi kyɛ mvi Nyameɛ berɛ yeɛ mmale ɔ. 28Baba ne berɛ yeɛ mvi mmale wiase ɔ. Na afei de, mefi wiase mekɔ Baba ne dɔ.”
29Ye asuafoɛ nemɔ hane kyɛ: “Aha a, afei de, edwudwo pen-pen, ɛmmu anyandera kõ. 30Afei de, yanwu kyɛ ɛse nningyein mukoraati, na ye nwo nhia kyɛ ebie kobisa wɔ dwirɛ. Ɛhe yeɛ ɔmaa yedɛ yɛdi kyɛ efi Nyameɛ berɛ yeɛ ɛwale ɔ.” 31Yesu ha hyirele bɛ kyɛ: “Afei de ɛmɔ alɛ́ bali? 32Ɛmɔnea, mmerɛ bie ba, na wawa po yeɛ ole sɔ, sɔ mmerɛ ne, ɛmɔ kɔbɔ kɔsande, na ebiala kɔhɔ ye awuro maa ɔkɔha me ngome. Nakoso ɔhalle me ngome, Baba ne boka me so. 33Maha ɛhe mahyire ɛmɔ, na wamaa ɛmɔ anya asomdwie wɔ me nu. Ɛmɔ konwu amaneɛ paa wɔ wiase nanu de, nakoso ɛmɔnya akukuduro! Mali wiase naso ngunim.”
