Luka 16
16
1Osa ha hyirele ye asuafoɛ nemɔ kyɛ: “Né sikaniɛ bie le ebie bɔ ɔnea ye awuro so, ná bɛɛbɔle ye amaneɛ kyɛ, sɔ sona ne bɔ ye kerɛ. 2Yeti ɔfrɛle ye, yeɛ ɔha hyirele ye kyɛ: ‘Nzu yeɛ metete mefa wɔ nwo ne? Baabu w'adwuma nanwo ngondaa kyire me, ofikyɛ mengɔma ɛngɔnea m'awuro naso kõ.’ 3Yeɛ akoaa bɔ ɔnea awuro naso ne ha hyirele ye nwo kyɛ: ‘Kesaalae bɔ me wura baale m'adwuma ne fi me sa nu ne, nzu yeɛ ngɔyɛ ɔ? Nnne anwoserɛ bɔ ngɔfa ngoli paa, na me fɛle kyɛ ngɔsrɛ-srɛ. 4Ahaa, mese bɔ ngɔyɛ, na sɛ ɔka kyɛ nnɛmaa menea ye awuro naso kõ a, mmenia alɛ́ me ahɔ b'awuro.’ 5Yeti ɔfrɛle bɛ bɔ bɛma ye wura kerɛ namukoraati. Yeɛ obisale bɔ oli moa ne kyɛ: ‘Ɛma me wura kerɛ sɛɛ?’ 6Yeɛ ɔhane kyɛ: ‘Anwa galɔn 100.’ Yeɛ bɔ ɔnea awuro naso ne ha hyirele ye kyɛ: ‘De wɔ krataa ne, na tena ase tworɔ 50 kesaalae.’ 7Yeɛ obisale sona foforɛ kyɛ: ‘Wɔ koso, ɛma kerɛ sɛɛ?’ Ɔhane kyɛ: ‘Hwiit bɔtɔ 100.’ Yeɛ bɔ ɔnea awuro naso ne ha hyirele ye kyɛ: ‘De wɔ krataa ne, na tworɔ 80.’ 8Ɔwɔ nu, sona bɔ ɔnea awuro naso ne anni nahorɛ, nakoso ye wura ne kamvole ye, ofikyɛ wafa ye adwene wayɛ adwuma. Mmenia bɔ bɛwɔ berɛ ɛnɛ ne,#16:8 Anaa “Aworɛ ndoɔtoasoɛ he.” sɛ bɛne bɛ mmango mɔ yɛ nikye a, bɛkyire kyɛ bɛ nye ate atra kanea mmaa nemɔ. 9Yeti meka mekyire ɛmɔ kyɛ, ɛmɔfa ahonyadeɛ bɔ ɔndengyɛ so benya nnamvoa, na sɛ ofi berɛ a, bamaa ɛmɔ anya nekaa batena daa.
10“Ebiala bɔ odi nahorɛ wɔ nningyein mmaa-mmaa nu ne, odi nahorɛ wɔ nningyein mbiri nu koso; na bɔ onni nahorɛ wɔ nningyein mmaa-mmaa nu ne, onni nahorɛ wɔ nningyein mbiri nu. 11Sɛ ɛmɔ anni nahorɛ wɔ ahonyadeɛ bɔ ɔndengyɛ nu a, nwa yeɛ ɔkɔfa ahonyadeɛ pa kowura ɛmɔ sa ɔ? 12Na sɛ ɛmɔ anni nahorɛ wɔ ebie deɛ nu a, nwa yeɛ ɔbaafa ɛmɔ bɔbɔ ɛmɔ deɛ ma ɛmɔ ne? 13Akoaa biala nne berɛ bɔ ɔkɔhora kɔsõ mmenia nyɔ ɔ; ɔba ye sɔ a, okohuro kõ dwirɛ na ɔngɔhuro kõ dwirɛ, anaakyɛ ɔkɔso kõ nahorɛ nu, né wabu kõ animtia. Ɛmɔ ngɔhora bɛngɔsõ Nyameɛ na ɛmɔ asa basõ ahonyadeɛ.”
14Farisifoɛ bɔ bɛ nye boro sikaa ne tele ɛhe amukoraati, na bɛhyɛle yebo bɛgorole Yesu nwo. 15Yeti ɔha hyirele bɛ kyɛ: “Ɛmɔpena kyɛ mmenia nwu ɛmɔ kyɛ ɛmɔte teneneefoɛ, nakoso Nyameɛ se bɔ ɔwɔ ɛmɔ ahone nu. Ofikyɛ nikye bɔ mmenia nwu ye kyɛ ɔsom bo ne, Nyameɛ nye so de, ɔte akyiwadeɛ.
16“Mmeraa ne adiifoɛ ne tenane berɛ tonn oodwuli Yohane so. Ofi sɔ mmerɛ ne, Nyameɛ Ahennie nanwo dwirɛ yeɛ bɛka ɔ, na ebiala yere ye nwo kyɛ ɔkɔhɔ nu bie. 17Na ɔkɔyɛ mmerɛ kyɛ anwuro ne aseɛ kɔpɛ nu, tra kyɛ bɔ bahworɔ ye wɔ mmeraa nanu ne komapɛ po komini bɔ ɔngɔwa nu ɔ.
18“Ebiala bɔ okoyira ɔye kogya foforɛ ne, wasɛkye agyaa, na ebiala bɔ okogya brasua bɔ bayira ye ne, ye koso wasɛkye agyaa.
19“Né sikaniɛ bie wɔ berɛ bɔ ne ɔtaa wura atadeɛ valent#16:19 Daa ne, sɛ ebie wura atadeɛ bɔ ye kɔla te violet anaa purple (Brɔfo) a, né ɔte ebie bɔ ole sikaa paa, ofikyɛ ne sɔ ndadeɛ nemɔ nyɔboɛ yɛ se. ne nwera pa. Na daa biala ne ɔfa nningyein pa gye ye nye. 20Né bɛtaa bɛfa hianiɛ bie bɔ bɛfrɛ ye Lazarus bɛbatena ye atee ne noa, né ye nwo mukoraati atutu ngena. 21Na aleɛ bɔ ne ofi sikaniɛ ne tɛbulu naso gua ase ne, ɛhene yeɛ ne odi ɔ. Afei koso, ne ngyea batafe ye kena nanu. 22Hianiɛ ne wuli, na abɔfo fale ye hɔle Abraham berɛ. Na sikaniɛ ne wuli maa bɛsiele ye. 23Ɔla kumaa nanu ne, né ye nwo teetee ye. Na ɔtole ye nye ne, onwuni Abraham wɔ dedeede, na onwuni kyɛ Lazarus wɔ ye nwo berɛ. 24Na ɔteane nu kyɛ: ‘Baba Abraham, mesrɛ wɔ nwu me anwunvo, na soma Lazarus ma ɔfa ye sa ati bɔ nzue nu, na ɔfa pe me temverema so, ofikyɛ me nwo yerɛ-yera me wɔ see bɔ ɔsɔ buru-buru he anu.’ 25Nakoso Abraham ha hyirele ye kyɛ: ‘Mma, kaye kyɛ w'asetena nu ne, nningyein pa ngome yeɛ enyane ye ɔ, nakoso Lazarus de, ɔhaw ngome yeɛ ɔhɔle nu ɔ. Nakoso kesaalae de, ye nwo atɔ ye wɔ wa, yeɛ wɔ koso wɔ nwo teetee wɔ. 26Sɛ ɛhene la ahameɛ a, kumaa kandinga la yɛ ne ɛmɔ afia, yeti ebiala ngɔhora ngofi wa ngɔwa ɛmɔ berɛ, yeɛ ebiala ngɔhora ngofi ɛmɔ berɛ ngɔwa wa.’ 27Yeɛ sikaniɛ ne hane kyɛ: ‘Daa, ye de mesrɛ wɔ, soma ye ma ɔhɔ me baba awuro berɛ, 28nne aliemaa mmrienzua nnu wɔ berɛ, ma ɔɔbɔ bɛ kɔkɔ na bɛ koso, bamma anwu amaneɛ bɔ menwu ye ne bie.’ 29Nakoso Abraham ha hyirele ye kyɛ: ‘Mose ne adiifoɛ nemɔ wɔ dɔ, ma betie bɛ.’ 30Yeɛ ɔhane kyɛ: ‘Daabi oo, baba Abraham, sɛ ebie fi ɛwa mmom kɔ a, ɛhene yeɛ ɔkɔmaa bɛkɔsakra ɔ.’ 31Yeɛ Abraham ha hyirele ye kyɛ: ‘Sɛ bɛngotie Mose ne adiifoɛ nemɔ a, ye de sɛ ebie fi awufo nanu kɔ po a, bɛngotie ye.’ ”
Currently Selected:
Luka 16: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
