17
1Ná ɔha hyirele ye asuafoɛ nemɔ kyɛ: “Kyɛbɔ ɔte biala ne, sintidua kɔwa, nakoso bɔ ɔnate yeso kɔwa ne, ye yaakɔ! 2Sɔ sona ne, sɛ bɛfale nyɔboɛ bɔ bɛfa bɛtĩ hwiit bɛtole ye kɔme bɛgyili ye bɛtole ɛpo nu po a, ahaa ɔte pa ma ye tra kyɛ ɔkɔto mmaa–mmaa he anu kõ sintidua. 3Yeti, ɛmɔnea ɛmɔ nwo yé, sɛ eliema yɛ wɔ bɔne a, ka kyire ye, sɛ ɔsakra a, fa kyɛ ye. 4Sɛ ɔyɛ wɔ bɔne pɛn nzoo kyẽa komapɛ po, na ɔba wɔ berɛ pɛn nzoo baka kyire wɔ kyɛ, ‘Masakra’ a, fa kyɛ ye.”
5Asuafoɛ nemɔ ha hyirele Awurade kyɛ: “Ma yɛ gyidie yɛ se.” 6Yeɛ Yesu ha hyirele bɛ kyɛ: “Sɛ ɛmɔle gyidie bɔ ye piri te kyɛ sinapi mmaa a, ahaa ɛmɔka bɛkyire sikamore bakaa he kyɛ, ‘Tu fi wa, na kogyina ɛpo nu’ a, okotie ɛmɔ. 7Yɛfa ye kyɛ ɛmɔ nu bie le akoaa bɔ ofundam aseɛ anaa ɔnea mmoan, sɛ akoaa ne fi fiɛso ba awuro a, aso ɔkɔha kohyire ye kyɛ, ‘Yɛ ye ndɛ baatena ase didi’? 8Nná bɔ ɔkɔha kohyire ye yeɛ ole kyɛ, ‘Yɛ aleɛ ma nni ye nnɔsoa ye, na siesie wɔ nwo so me ma nnidi na nno nyie, meyie ne wɔ koso adidi ano’? 9Ɛmɔnea a, ɔkɔla akoaa ne ase kyɛ wayɛ bɔ okuro wama ye hɔ? 10Yeti ɛmɔ koso, sɛ ɛmɔyɛ bɔ baha kyɛ ɛmɔyɛ namukoraati beyie a, ɛmɔha kyɛ: ‘Yɛte ngoaa bɔ mvasoɛ nne yɛ so, bɔ odikyɛ yɛyɛ ala yeɛ yayɛ ne.’ ”
11Na ɔnate atee so ɔkɔ Yerusalem ne, ɔfale Samaria ne Galilea wɛen so. 12Ɔkɔ nnamue bie nu ne, oyiale kwatafoɛ 10 bie, né bɛgyi dede, 13ná bɛteɛteane nu kyɛ: “Yesu, Owura, nwu yɛ anwunvo.” 14Yesu nwuni bɛ ne, ɔha hyirele bɛ kyɛ: “Ɛmɔhɔ, na ɛmɔfa ɛmɔ nwo beehyire sɔfo nemɔ.” Bɛnate atee so bɛkɔ ne, bɛ nwo tɔle bɛ. 15Mmerɛ bɔ bɛ nu kõ nwuni kyɛ ye nwo atɔ ye ne, osale ye si, na ɔmane ye konvi so yele Nyameɛ ayɛ. 16Na obuli ndwerɛ wɔ Yesu gya bo lale ye ase; ne ɔte Samarianiɛ. 17Yeɛ Yesu bisale kyɛ: “Nná mmenia buru yeɛ nzale bɛ anwonyerɛ ɔ? Ná ngona ne wɔ nisua? 18Yeti bɛ nu biala anza yesi amma anye Nyameɛ ayɛ, sana ɛwɔfoɔ he ngome?” 19Yeɛ ɔha hyirele ye kyɛ: “Dwɔso na kɔ; wɔ gyidie amaa wɔ nwo atɔ wɔ.”
20Yesi ne, Farisifoɛ nemɔ bisale Yesu kyɛ, “Mmerɛ beni yeɛ Nyameɛ Ahennie ne kɔwa ɔ?” Yesu ha hyirele bɛ kyɛ: “Nyameɛ Ahennie ne ba, nakoso mmenia ngɔfa bɛ nye ngonwu ye; 21na bɛngɔha kyɛ: ‘Nea, ɔwɔ wa,’ anaa ‘Ɔwɔ faen.’ Bɔ ɔte yeɛ ole kyɛ, Nyameɛ Ahennie ne wɔ ɛmɔ afia.”
22Yeɛ Yesu ha hyirele ye asuafoɛ ne kyɛ: “Mmerɛ bie ba, sɔ mmerɛ ne, ɔhale ɛmɔ ngome a, ahaa ɛmɔ anwu Sona Awa ne ngyẽa nanu kõ, nakoso ɛmɔ ngonwu ye. 23Na sɛ bɛka bɛkyire ɛmɔ kyɛ, ‘Ɔwɔ ɛwa,’ anaa ‘Ɔwɔ ɛdɔ’ a, nnɛmɔ kɔ, na nnɛmɔ di bɛ si. 24Na kyɛbɔ agralaa te yerɛm wɔ ewienu a, ɔta maa ebiala nwu ye ne, sɔ ala yeɛ Sona Awa ne ngyẽa ne kɔyɛ ɔ. 25Nakoso odikyɛ onwu amaneɛ paa na mmenia bɔ bɛwɔ berɛ ɛnɛ ne#17:25 Anaa “Aworɛ ndoɔtoasoɛ he.” ye ye ma. 26Afei, bɔ ɔhɔle so wɔ Nowa aberɛ so ne, ɛhene ala bie yeɛ ɔkɔhɔ so wɔ Sona Awa ne ngyẽa nanu ɔ. 27Bɛdidili, bɛnone, mmrienzua gyale, na bɛfale mmrasua bɛmane agyaa tonn oodwuli kyɛ, Nowa wurale alaka nanu, ɛhene si ne, nzue ne yi sɛkyele bɛ mu. 28Na sɔ ala yeɛ ɔhɔle so wɔ Lot aberɛ so ɔ; né mmenia didi, bɛno, bɛdi dwaa, bɛyɛ ɛboo, bɛsisi sua, 29nakoso kyẽa bɔ Lot fili Sodom ne, see ne sɔfa tɔ fili anwuro sɛkyele bɛ mukoraati. 30Kyẽa bɔ bɛkɔla Sona Awa ne ali ne, sɔ ala yeɛ ɔkɔyɛ ɔ.
31“Sɔ kyẽa ne, nnɛmaa sona bɔ ɔwɔ sua ti afia dwu ba ase kyɛ ɔbaafa ye agyapadeɛ. Na bɔ wahɔ fiɛso ne, nnɛmaa ɔba awuro kyɛ ɔbaafa ye nningyein bɔ wayakyi ye wɔ siɛ ne. 32Ɛmɔkaye Lot aye ne. 33Ebiala bɔ ɔkɔyɛ kyɛ ɔbɔ ye ngoa nwo waen ne, okofi ye sa, na ebiala bɔ ye ngoa kofi ye sa ne, ɔkɔbɔ ye nwo waen. 34Meka mekyire ɛmɔ kyɛ, sɔ kɔngɔen ne, mmenia nyɔ kɔla bɛen kõ so, bɛkɔfa kõ na bayakyi kõ. 35Mmrasua nyɔ kotĩ nikye wɔ nyɔboɛ kõ so, bɛkɔfa kõ, na bayakyi kõ.” 36#17:36 Sɛ ɛnea Bible biemɔ nu a, edwirɛ bie wura ɛwa kyɛ: Mmrienzua nyɔ kɔhɔ fiɛso, bɛkɔfa kõ, na bayakyi kõ. Nakoso sɔ dwirɛ ne, ɔnne asaanoa ndworɔyɛ bɔ wahyɛ paa, ne bɔ odi mu paa nemɔ nu.—
37Yeɛ bɛbisale ye kyɛ: “Awurade, nisua?” Na ɔha hyirele bɛ kyɛ: “Nekaa bɔ fuin ne la ne, ɛberɛ yeɛ mbɛtɛ koso boa bɛ noa ɔ.”
