Luka 2
2
1Sɔ mmerɛ nanu ne, Kaesare Augusto hyɛle mmeraa kyɛ, bɛhworɔ mmenia bɔ bɛwɔ wiase mukoraati né dumaa. 2Ɛhe yeɛ ole mmerɛ bɔ oli moa bɔ bɛhworɔle dumaa, mmerɛ bɔ ne Kirinio te amrado wɔ Siria ne. 3Yeti, ebiala hɔle ye kuro kyɛ ɔkwaahworɔ ye dumaa. 4Na Yosef koso, ɔnate kyɛ ofi David awuro ne ye abusua nu nati, ofili Nazerɛt bɔ ɔwɔ Galilea ne, na osili nu hɔle David kuro Betlehem bɔ ɔwɔ Yudea ne. 5Ɔhɔle kyɛ ɔkwaahworɔ ɔne Mary bɔ bafa ye bama ye kyɛ ogya ye ne dumaa, sɔ mmerɛ ne, né waha kaa maa Mary wo.
6Bɛdwuli berɛ ne, aworɛ hane Mary. 7Na ɔwole brienzua, ɔwa panyi, na ɔfale ɛtena kyekyele ye nwo, yeɛ ɔfale ye tole alaka bɔ ngaka didi nu nanu, ofikyɛ bannya nekaa wɔ ɛwɔfoɛ sua nemɔ nu.
8Sɔ kɔngɔen ne, né mmenia biemɔ wɔ porɛ nanu berɛ, bɔ ne bɛnea bɛ mmoan wɔ ɛserɛ so. 9Na komapɛ, Awurade bɔfo yele ye nwo ali hyirele bɛ, na Awurade anuonyam pɛle bɛ nwo yiale, na esuronyi hane bɛ paa. 10Yeɛ abɔfo ne ha hyirele bɛ kyɛ: “Nnɛmɔ suro! Ɛmɔnea, edwirɛ pa yeɛ mefa mebrɛ ɛmɔ ɔ, sɔ dwirɛ ne kɔmaa mmenia mukoraati nye kɔgye paa. 11Ɛnɛ kyẽa ye, bawo agyenkwa bɔ yeɛ ole Awurade Kristo ne bama ɛmɔ wɔ David kuro. 12Na ɛhe yeɛ ɔkɔmaa ɛmɔ konwu ye ɔ: Ɛmɔ konwu adɔma bɔ bafa ɛtena bakyekye ye nwo, kyɛ ɔla alaka bɔ ngaka didi nu nanu.”
13Ɛberɛ ala, abɔfo pee bɛɛbokale abɔfo naso, na bɛyele Nyameɛ ayɛ kyɛ:
14“Anuonyam ha Nyameɛ wɔ anwuro-anwuro,
na asomdwie ha mmenia bɔ bɛsɔ ye nye wɔ aseɛ so!”
15Abɔfo nemɔ fili bɛ nwo berɛ hɔle anwuro ne, bɛ bɔ bɛnea mmoan ne ha hyirele bɛ nwo kyɛ: “Ɛmɔma yɛhɔ Betlehem, na yɛɛnea edwirɛ bɔ wasi, bɔ Awurade ala ye ali ahyire yɛ ne.” 16Yeti, bɛyɛle ndɛ bɛhɔle, na bɛnwuni Mary ne Yosef, ne adɔma né kyɛ ɔla alaka bɔ ngaka didi nu nanu. 17Mmerɛ bɔ bɛnwuni ye ne, akwalaa ne nwo dwirɛ bɔ bɛha bɛhyirele bɛ ne, bɛha bɛhyirele bɛ. 18Na edwirɛ bɔ bɛ bɔ bɛnea mmoan ne hane ne, ɔyɛle ebiala bɔ ɔtele ne nwanwa, 19nakoso Mary de, ɔfale edwirɛ he amukoraati siele ye ahone nu, na ɔdwenene ye nwo.
20Na bɛ bɔ bɛnea mmoan ne sa hɔle, na bɛhyɛle Nyameɛ anuonyam bɛyele ye ayɛ wɔ bɔ banwu ye, ná bate namukoraati nwo, ofikyɛ bɔ bɛha bɛhyirele bɛ ne, sɔ pɛpɛɛpɛ yeɛ né ɔte ɔ.
21Ngyẽa mmɔtwɛ si ne, né mmerɛ aso kyɛ bɛpɛ akwalaa ne toa, na bɛtole ye dumaa Yesu; sɔ dumaa ne yeɛ abɔfo ne fa tole ye kora yeɛ bɛnwonzɛ ye ne.
22Kyɛbɔ Mose mmeraa ne kyire ne, mmerɛ sone kyɛ bɛte ye nwo ne, bɛfale ye bɛwale Yerusalem kyɛ bɛbaafa ye bɛkyire Awurade, 23na kyɛbɔ bahworɔ ye wɔ Awurade mmeraa nanu ne: “Baa brienzua biala bɔ okoli moa kofi koɛ nanu kofite ne, odikyɛ bɛfrɛ ye krongron bɛma Awurade.” 24Na bɛbɔle afɔleɛ kyɛbɔ baha ye wɔ Awurade mmeraa nanu ne: “ɔfa mmubure nyɔ anaa mmorɔnoma mmaa-mmaa nyɔ.”
25Né biaa bie wɔ Yerusalem bɔ bɛfrɛ ye Simeon. Né sɔ biaa he te teneneeniɛ, na ne ɔmva ye som nni angorɛ, afei ne ɔnwondɛ Israel awerɛkyekye ne, na né honhom krongron wɔ ye so. 26Afei koso, né honhom krongron amaa wanwu ye kyɛ, okonwu Kristo bɔ Awurade asoma ye ne kora, né wawu. 27Na honhom krongron ne hane ye maa ɔhɔle asɔre awuro berɛ. Na mmerɛ bɔ adɔma Yesu awofo fale ye wale berɛ kyɛ bɛbaayɛ bɔ mmeraa ne ahyɛ ne bɛma ye ne, 28olɛle akwalaa ne tole ye sa so, na ɔyele Nyameɛ ayɛ kyɛ:
29“Otumvoɛ Awurade, kesaalae de, esoma w'akoaa atee asomdwie nu,
kyɛbɔ wɔ dwirɛ ne te ne.
30Ofikyɛ me nye anwu atee bɔ ɛkɔfa so kole ngoa,
31bɔ asiesie ye wɔ maen-maen mukoraati nyunu ne,
32kanea bɔ ɔkɔye nikye bɔ wakata maen-maen naso ne kofi berɛ,
na wahyɛ wɔ maen Israel anuonyam ne.”
33Na edwirɛ bɔ ɔha fale akwalaa nanwo ne yɛle ye baba ne ye maame nwanwa. 34Afei Simeon hyirale bɛ, yeɛ ɔha hyirele Mary, bɔ ɔte akwalaa ne maame ne kyɛ:
“Baye akwalaa he kyɛ, ɔma mmeni pee fi ase wɔ Israel,
na ɔma pee koso dwɔso,
na ɔkɔyɛ nzɛngyerɛneɛ bɔ mmeni pee kodwudwo kotia,
35kyɛbɔ ɔkɔyɛ a, mmeni pee tianu nzusuyɛɛ kɔla ali,
(amba, dadeɛ tendee bie kosina wɔ).”
36Né diifoɛ brasua bie bɔ bɛfrɛ ye Anna wɔ berɛ, né ɔte Fanuel bɔ ofi Aser abusua nu ne awa. Né sɔ maame he anyi paa, na ogyale ohu ne, ɔne ye tenane afoɛ nzoo. 37Na sɔ mmerɛ ne, né ɔte kunaniɛ bɔ wali afoɛ 84. Daa biala ne ɔwɔ asɔre awuro berɛ, bɔ ɔfa akɔngyere ne mbaebɔ sõ Nyameɛ eyia ne kɔngɔen. 38Na ye koso ɔwale bɛ nwo berɛ sɔ mmerɛ nala, na ɔhyɛle yebo lale Nyameɛ ase, na ɔhane akwalaa nanwo dwirɛ hyirele bɛ bɔ bɛnwondɛ kyɛ bɛkole Yerusalem namukoraati ne.
39Na beyiele nikye biala kyɛbɔ ɔwɔ Awurade mmeraa nanu ne, besa bɛhɔle bɛ kuro Nazerɛt bɔ ɔwɔ Galilea ne. 40Na akwalaa ne nyini, na ye nwo yɛle se, na onwuni nworɛ paa, na né Nyameɛ adom wɔ ye so.
41Afoɛ biala, né ye awofo kɔ Pɛnu Afahyɛ nabo wɔ Yerusalem. 42Na onyane afoɛ 12 ne, bɛhɔle kyɛbɔ afahyɛ nanwo nhyehyɛɛ te ne. 43Bɛlili afahyɛ ne beyiele, ná besa bɛkɔ bɛ kuro ne, abɛɛmaa Yesu de, ɔhale Yerusalem, nakoso ye awofo adwene angɔ so. 44Né b'adwene yɛ bɛ kyɛ, wafra mmenia bɔ bɛne bɛ tu atee nanu, yeti bɛpɛle ɛlɛho atee. Na afei bɛhyɛle yebo kyɛ bɛpena ye wɔ b'abusuafoɛ ne bɛ nnamvo nemɔ nu. 45Nakoso bannwu ye, yeti besa bɛhɔle Yerusalem bɛɛpenane ye. 46Ɛlɛsa si ne, bɛnwuni ye wɔ asɔre awuro berɛ, né ɔte akyerɛkyerɛfoɛ nemɔ afia otie bɛ, na né obisabisa bɛ dwirɛ. 47Na ye nyanza ne ye mmuayɛ ne yɛle bɛ bɔ betie ye namukoraati nwanwa. 48Ye awofo nwuni ye ne, bɛ nwo dwirili bɛ, na ye maame bisale ye kyɛ: “Mma, nzuati yeɛ ayɛ yɛ sɔ ne? Mene wɔ baba apena wɔ afɛ pa.” 49Na ye koso ɔha hyirele bɛ kyɛ: “Nzuati yeɛ ɛmɔpena me ɔ? Ɛmɔnze kyɛ odikyɛ metena me baba awuro anaa?” 50Nakoso bɛ de, bannde bɔ ɔha hyirele bɛ ne bo.
51Ɔne bɛ sa hɔle Nazerɛt, na ɔbrɛle ye nwo ase mane bɛ. Na ye maame fale edwirɛ he amukoraati siele ye ti anu. 52Na Yesu nyini, onwuni nworɛ paa, na ne Nyameɛ ne mmenia mukoraati kuro ye dwirɛ.
Currently Selected:
Luka 2: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
