Mateo 12
12
1Sɔ mmerɛ nanu ne, Yesu fale hwiit boo bie nu homeda. Né ɛhɔen ku ye asuafoɛ nemɔ, yeti bɛtetele hwiit ne bie bɛlili. 2Na Farisifoɛ nemɔ nwuni ye sɔ ne, bɛha bɛhyirele ye kyɛ: “Nea! Bɔ w'asuafoɛ nemɔ yɛ ne, mmeraa mma atee kyɛ bɛyɛ ye homeda.” 3Yesu ha hyirele bɛ kyɛ: “Bɔ David yɛle, mmerɛ bɔ ne ɛhɔen ku ɔne ye mmrandeɛ nemɔ ne, ɛmɔ kenngale? 4Kyɛbɔ ɔhɔle Nyameɛ awuro berɛ, na ɔne ye mmrandeɛ nemɔ lili paanoo bɔ ne bafa bawa Nyameɛ nyunu ne? Né mmeraa mma atee kyɛ ye, anaa bɛ bɔ bɛboka ye so ne di bie, mmom asɔfo ngome yeɛ ne odikyɛ bɛdi ɔ. 5Anaa ɛmɔ kenngale ye wɔ mmeraa nanu kyɛ, odwu homeda, na asɔfo bɔ bɛwɔ asɔre awuro ne bu homeda naso a, bɛyɛlle bɔne? 6Nakoso meka mekyire ɛmɔ kyɛ, bɔ ɔte piri tra asɔre awuro ne wɔ wa. 7Sɔ dwirɛ he: ‘Mekuro anwunvoin, ɔtte afɔleɛ’ ne, sɛ ɛmɔte yebo a, ahaa bɔ edwirɛ nne ye nwo ne, ɛmɔ ngobu ye fɔ. 8Ofikyɛ Sona awa ne yeɛ ɔte homeda ne wura ɔ.”
9Yesu fili berɛ hɔle sua bɔ beyia nu nanu, 10na né biaa bie wɔ berɛ bɔ ye sa kõ awu. Na bɔ ɔkɔyɛ ne banya edwirɛ bafa babɔ ye sommoɛ ne, bɛbisale ye kyɛ, “Mmeraa maa atee kyɛ bɛsa ebie anwonyerɛ homeda?” 11Yeɛ ɔha hyirele bɛ kyɛ: “Sɛ ɛmɔ nu bie le boan kõ, na ɔkɔtɔ bɔen#12:11 Anaa “Kumaa.” nu homeda a, ɔngɔsɔ ye nu ngɔye ye anaa? 12Nakoso, sona nwo hia koraa tra boan! Yeti mmeraa ma atee kyɛ yɛkora yɛyɛ nikye pa homeda.” 13Yeti ɔha hyirele biaa ne kyɛ: “Tengyɛ wɔ sa nanu.” Ɔtengyɛle nu, na ye sa ne yɛle kama te kyɛ kõhene. 14Yeɛ Farisifoɛ nemɔ fite hɔle aluo dɔ bɛɛbɔle ye nwo porɛ, né bɛpena atee bɔ bɛkɔfa so bɛkɔhu ye ɔ.
15Yesu nwuni ye sɔ ne, ofili berɛ hɔle. Mmeni pee lili ye si, na ɔsale bɛ mukoraati anwonyerɛ, 16nakoso, ɔha hyirele bɛ kyɛ, nnɛmaa bɛka ye nwo dwirɛ bɛkyire ebiala. 17Ɛhe maa edwirɛ bɔ diifoɛ Isaiah hane ne wale nu kyɛ:
18“Nea, m'akoaa bɔ maye ye ne ɛhe.
Bɔ medɔ ye,
na male ye mato nu ne.
Ngohwie me honhom ngogua ye so,
na ɔkɔha atɛn tenenee nwo dwirɛ kohyire maen-maen ne.
19Ɔne ebiala nngɔhõ, na ɔngɔ teɛtea nu.
Na bɛngɔte ye konvi wɔ dwaaso.
20Elemmire bɔ wayɛ fanga-fanga ne, ɔngɔbu nu,
Na kanea nyamaa bɔ ɔsɔ wusi-wusi ne, ɔngɔnua ye,
kodwu kyɛ atɛn tenenee kɔwa nekaa biala ɔ.
21Ye dumaa nu yeɛ maen-maen ne konya anidasoɛ ɔ.”
22Bɛfale biaa bie bɔ sunzummɔne wɔ ye so bɛbrɛle Yesu, né ye nye asi, na ne ɔngora dwudwo. Na ɔsale biaa ne anwonyerɛ maa ɔdwudwole, na osa nwuni nikye. 23Ɔyɛle mmenia ne nwanwa, na bɛbisale kyɛ: “Aa! Nná David awa ne ɛhe?” 24Nakoso Farisifoɛ nemɔ tele ɛhe ne, bɛhane kyɛ, “Sɔ akoaa he, Beelsebub#12:24 Anaa “Beelsebul.” bɔ ɔte sunzummɔne nemɔ panyi ne, ye tumi yeɛ ɔfa tu sunzummɔne ɔ.” 25Onwuni b'adwene ne, ɔhane kyɛ: “Ahennie biala bɔ ɔne ye nwo kõ ne, ogu; na kuro anaa awuro biala bɔ ɔne ye nwo kõ ne, ɔbɔ. 26Sɔ ala yeɛ sɛ Satan tu Satan a, wadwɔso watia ye nwo, yeti ɔkɔyɛ sɛɛ ne ye ahennie ahora agyina? 27Na sɛ Beelsebub tumi yeɛ mefa metu sunzummɔne a, ye de tumi beni yeɛ ɛmɔ mmaa nemɔ fa tu bɛ ɔ? Ɛhe ati yeɛ bɛkobu ɛmɔ atɛn ne. 28Nakoso, sɛ Nyameɛ honhom yeɛ mefa metu sunzummɔne a, ye de Nyameɛ ahennie ne asã ɛmɔ nwo. 29Na ɔkɔyɛ sɛɛ na ebie ahora ahɔ kwabranoa bie awuro waafa ye nningyein? Sana odi moa kyekye kwabranoa ne, kora ne wahora wasesa ye nningyein ne. 30Ebiala bɔ ɔbboka me so ne, ɔdwɔso tia me, na ebiala bɔ ɔne me mmoaboa ye noa ne, ɔbɔ sande. 31Yeti, meka mekyire ɛmɔ kyɛ, bɛkɔfa bɔne ne mmusue dwirɛ biala bɛkɔhyɛ sona, nakoso mmusue dwirɛ bɔ otia honhom ne de, bɛngɔfa bɛngɔhyɛ. 32Ebiala bɔ odwudwo tia sona Awa ne, bɛkɔfa bɛkɔhyɛ ye, nakoso bɔ odwudwo tia honhom krongron ne de, bɛngɔfa bɛngɔhyɛ ye lle, bɛngɔfa bɛngɔhyɛ ye wɔ ewiase he, anaa bɔ ɔba nanu.
33“Sɛ ɛmɔ kɔmaa bakaa ne kɔyɛ bakaa pa, na ye mmaa ne ayɛ pa a, ɛmɔma ɔyɛ; na sɛ ɛmɔ kɔmaa ɔkɔyɛ bakaa tɛɛ, na ye mmaa ne koso ayɛ tɛɛ a, ɛmɔma ɔyɛ. Ofikyɛ bakaa ne mmaa ne yeɛ ɔmaa bɛnwu bakaa horɛ ɔ. 34Ɛkyerebene mmaa mɔ, ɔkɔyɛ sɛɛ na ɛmɔ ahora baha edwirɛ pa, mmerɛ bɔ ɛmɔte abɔnefoɛ ɔ? Ofikyɛ bɔ wabu so wɔ ebie ahone nu ne, ɛhene yeɛ noa ne ka ɔ. 35Sona pa fi nningyein pa bɔ waboɔboa ye noa wɔ y'ahone nu ne da nningyein pa ali; ná nnipa-bɔneniɛ fi nningyein tɛɛ bɔ waboɔboa ye noa nanu da nningyein tɛɛ ali. 36Na meka mekyire ɛmɔ kyɛ, edwirɛ bɔ mvasoɛ nne so biala bɔ sona kɔha ne, atemmuda ne, okobu ye nwo ngondaa. 37Ofikyɛ ɛmɔ noa nu dwirɛ yeɛ bɛkogyina so bɛkobu ɛmɔ bem, na ɛmɔ noa nu dwirɛ yeɛ bɛkogyina so bɛkobu ɛmɔ fɔ ɔ.”
38Yeɛ atwerɛfoɛ ne Farisifoɛ ne biemɔ ha hyirele ye kyɛ, “Kyerɛkyerɛniɛ, yɛpena kyɛ ɛyɛ nzɛngyerɛneɛ bie maa yɛnea.” 39Yesu koso ha hyirele bɛ kyɛ: “Ɛnɛ mmerɛ#12:39 Anaa “Aworɛ ndoɔtoasoɛ” abɔnefoɛ ne bɛ bɔ bɛsɛkye agyaa ne pena nzɛngyerɛneɛ, nakoso bɛngonya bie, sana diifoɛ Yona deɛ ne. 40Ná kyɛbɔ Yona lili bonsu kunu ɛlɛsa, eyia ne kɔngɔen ne, sɔ ala yeɛ sona Awa ne koso koli aseɛ kunu ɛlɛsa, eyia ne kɔngɔen ɔ. 41Atemmuda ne, Ninewifoɛ ne mmenia bɔ bɛwɔ ɛnɛ#12:41 Anaa “Aworɛ ndoɔtoasoɛ he.” ne kɔdwɔso, na bɛkobu mmenia bɔ bɛwɔ berɛ ɛnɛ ne fɔ, ofikyɛ Yona dwirɛ ne maa bɛsakrale. Nakoso, bɔ ɔtra Yona wɔ wa. 42Ngwan dɔ hemaa ne né mmenia bɔ bɛwɔ berɛ ɛnɛ#12:42 Nea 12:41 bo berɛ dwirɛ ne. ne kɔdwɔso wɔ atemmuo nu, na okobu bɛ fɔ. Ofikyɛ ofili aseɛ ne noa dɔ ootiele Solomon nyanza, nakoso nea, bɔ ɔtra Solomon wɔ wa.
43“Sɛ sunzummɔne fi ebie nu a, okyini ɛtii so pena nekaa bɔ ɔkɔtena ɔ, nakoso onnya bie. 44Afei ɔka kyɛ, ‘Ngosa ngɔhɔ nekaa bɔ mvi mmale ne.’ Na ɔkɔwa ne, né ebiala nne berɛ, na baprapra berɛ kama, basiesie nu. 45Afei ɔkɔfa honhom nzoo bɔ bɛ ti anu yɛ se tra ye boka ye nwo so, ná baatena berɛ. Afei sɔ sona ne asetena ne sɛkye koraa tra daa deɛ ne. Sɔ ala yeɛ ɔkɔto mmenia bɔ bɛwɔ berɛ ɛnɛ ne ɔ.”
46Yesu ne mmenia ne dwudwo ne, Ye maame ne oliema mmrienzua nemɔ wale aluo berɛ, né bɛpena kyɛ bɛne ye dwudwo. 47Yeti, ebie ha hyirele ye kyɛ: “Nea, wɔ maame ne eliema mɔ gyi aluo dɔ, bɛpena kyɛ bɛne wɔ dwudwo.” 48Nakoso, mmuayɛ bɔ Yesu fa mane ye yeɛ ole kyɛ: “Me maame yeɛ ole nwa, na nniema yeɛ ole mwamɔ?” 49Ɔfale ye sa hyirele ye asuafoɛ naso hane kyɛ, “Nea, me maame ne nniema mɔ yeɛ bɛwɔ wa ne. 50Ebiala bɔ ɔyɛ bɔ me baba bɔ ɔwɔ anwuro ne kuro ne, ɔte nniema brienzua, nniema brasua, ne me maame.”
Currently Selected:
Mateo 12: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
