Mateo 18
18
1Sɔ mmerɛ ne, asuafoɛ nemɔ wale Yesu berɛ, na bɛbisale ye kyɛ: “Nwa yeɛ ɔte piri wɔ anwuro Ahennie nanu ɔ?” 2Yeti, Yesu frɛle akwalaa kamba bie, na ɔfale ye gyinane bɛ afia, 3yeɛ ɔha hyirele bɛ kyɛ: “Nahorɛ, meka mekyire ɛmɔ kyɛ, sɛ ɛmɔ anzakra banyɛ kyɛ akwalaa kamba he a, ɛmɔngɔhɔ anwuro Ahennie nanu lle. 4Yeti, ebiala bɔ ɔbrɛ ye nwo ase kyɛ akwalaa he ne, ye yeɛ ɔte piri paa wɔ anwuro Ahennie nanu ɔ. 5Na ebiala bɔ okole akwalaa kamba he me dumaa nu ne, wale me koso. 6Nakoso, ebiala bɔ ɔkɔto ngwalaa mmaa-mmaa bɔ bɛle gyidie wɔ me nu nanu kõ sintidua ne, sɛ bɛfale nyɔboɛ kandinga bɔ bɛfa bɛtĩ hwiit bɛtole ye kɔme bɛgyili ye bɛtole ɛpo nu a, ahaa ɔte pa.
7“Sintidua ti, ewiase ne yaakɔ. Ofikyɛ kyɛbɔ ɔte biala ne, sintidua kɔwa, nakoso sona bɔ ɔnate yeso kɔwa ne, ye yaakɔ. 8Sɛ wɔ sa kõ anaa wɔ gya kõ to wɔ sintidua a, pɛ na gyi to. Ɔte pa kyɛ ɛkɔyɛ apakye anaa bubuaniɛ kɔhɔ ngoa nu, tra kyɛ bɛkɔto wɔ nipadua namukoraati bɛkɔto see bɔ ɔsɔ daa nanu ɔ. 9Afei koso, sɛ wɔ nye kõ to wɔ sintidua a, tu na gyi to, ofikyɛ ɔte pa kyɛ ɛkɔfa anyeɛ komapɛ kɔhɔ ngoa nu tra kyɛ ɛkɔfa wɔ nye nyɔ namukoraati kɔhɔ Gehenna. 10Ɛmɔnea yé na ɛmɔ ammu mmaa-mmaa he anu kõ po animtia, na meka mekyire ɛmɔ kyɛ b'abɔfo bɔ bɛwɔ anwuro ne nwu me Baba bɔ ɔwɔ anwuro ne nyunu daa. 11#18:11 Sɛ ɛnea Bible biemɔ nu a, edwirɛ bie wura ɛwa kyɛ: “Ofikyɛ sona Awa ne wale kyɛ ɔbaale bɛ bɔ bamini ne ngoa.” Nakoso sɛ ɛnea tete asaanoa ndworɔyɛ bɔ wahyɛ paa, ɔne bɔ odi mu paa nemɔ nu a, sɔ dwirɛ ne nne nu.— 12Ɛmɔ adwene yɛ ɛmɔ sɛ? Sɛ ebie le mmoan 100 na bɛ nu kõ mini a, aso ɔngɔyakyi 99 ne wɔ bokaa naso ngɔhɔ ngɔpena kõ bɔ wamini ne? 13Na sɛ onwu ye a, nahorɛ nu, meka mekyire ɛmɔ, ye nye gye boan kõ nanwo tra 99 bɔ bɛmminini ne. 14Sɔ ala yeɛ ɛmɔ Baba bɔ ɔwɔ anwuro ne nguro kyɛ mmaa-mmaa he anu kõ po komini ɔ.
15“Afei, sɛ eliema yɛ wɔ bɔne a, wɔ ngome kɔ ye berɛ, na ma onwu ye mvomsoɛ. Sɛ otie wɔ a, anya eliema. 16Nakoso sɛ wandie wɔ a, fa sona kõ anaa nyɔ boka wɔ nwo so na ɛmɔhɔ ye berɛ, na wamaa mmenia nyɔ anaa nza ali edwirɛ nanwo adanzeɛ. 17Sɛ wandie bɛ a, bɔ asafo ne amaneɛ, na sɛ wandie asafo ne a, bu ye kyɛ ɔte maen-maen nuniɛ, anaa ebie bɔ odidɛ toɔ. 18Na nahorɛ dwirɛ bɔ meka mekyire ɛmɔ yeɛ ole kyɛ, bɔ ɛmɔ akyekye ye wɔ aseɛ he aso ne, bakyekye ye wɔ anwuro, na bɔ ɛmɔ asangye ye sɔ aseɛ he aso ne, basangye ye wɔ anwuro. 19Nahorɛ, mesa meka mekyire ɛmɔ kyɛ, sɛ ɛmɔ nu nyɔ yɛ adwene kõ wɔ aseɛ he aso kyɛ bɛkobisa nikye bie bɔ ye nwo hia a, ɛmɔ Baba bɔ ɔwɔ anwuro ne kɔyɛ kɔma ɛmɔ. 20Ofikyɛ nekaa biala bɔ mmenia nyɔ anaa nza koyia nu wɔ me dumaa nu ne, né nwɔ berɛ.”
21Yeɛ Petro wale ye berɛ, na obisale ye kyɛ: “Nniema yɛ me bɔne pɛn nyɛɛ a, yeɛ mva ngyɛ ye ɔ? Pɛn nzoo anaa?” 22Yesu yele ye noa kyɛ, “Meka mekyire wɔ kyɛ, nná pɛn nzoo, mmom aburaso ne nzoo!” #18:22 Anaa “Aburaso ahoroɛ nzoo” (70×7)
23“Yeti, anwuro ahennie ne te kyɛ ɔhene bie bɔ ɔpena kyɛ ɔne ye ngoaa bu ngondaa. 24Ɔhyɛle yebo ne, bɛfale biaa bie bɛwale, né ɔma kerɛ talɛnde 10,000.#18:24 Kyire kyɛ dɛnare 60,000,000. 25Nakoso, ne ɔngɔhora sɔ kerɛ ne tua lle, yeti ye wura ne hane kyɛ bɛtɔne ye, ɔye, ye mmaa mɔ, ne nikye biala bɔ ole ye, na bɛfa betua kerɛ ne. 26Yeɛ akoaa ne buli ndwerɛ wɔ ye wura ne nyunu srɛle ye kyɛ: ‘Nya me nwo aboterɛ, na ngotua wɔ kerɛ namukoraati ngɔma wɔ.’ 27Edwirɛ ne yɛle ye wura ne anwunvo, yeti ɔfale kerɛ ne hyɛle ye, na ɔyakyile ye kyɛ ɔhɔ. 28Nakoso sɔ akoaa ne fili berɛ ne, onwuni ye mmango akoaa bie bɔ ɔma ye kerɛ dɛnare 100 pɛ, na ɔyerele ye, yeɛ omiane ye kɔme hane kyɛ: ‘Tua me kerɛ namukoraati ma me.’ 29Yeti, ye mmango akoaa ne buli ndwerɛ srɛle ye kyɛ, ‘Mesrɛ wɔ, nya me nwo aboterɛ, na ngotua wɔ kerɛ ne.’ 30Nakoso, wande ye bo, yeti ɔhane kyɛ bɛfa ye bɛto prizin ma oodwu kyɛ okotua ye kerɛ ne kɔma ye ɔ. 31Ye mmango nemɔ nwuni bɔ wasi ne, ɔyɛle bɛ yea paa, yeti bɛɛhane bɔ wasi namukoraati bɛhyirele bɛwura ne. 32Yeɛ ye wura ne frɛle ye, na ɔha hyirele ye kyɛ, ‘Wɔ, ɛtte sona pa!#18:32 Ngyerɛaseɛ Tee: “Akoaa tɛɛ.” Mmerɛ bɔ ɛsrɛle me ne, mamva wɔ kerɛ namukoraati mangyɛ wɔ. 33Nzuati yeɛ wɔ de anwu wɔ mmango akoaa ne anwunvo kyɛbɔ nwuni wɔ anwunvo ne?’ 34Yeti ye wura ne fɛle yaa, na ɔfale ye mane bɛ bɔ bɛnea prizin berɛ ne, kyɛ bɛfa ye bɛto nu kodwu kyɛ okotua kerɛ namukoraati ɔ. 35Sɔ ala yeɛ ɛmɔ koso, sɛ ɛmɔ amvi ɛmɔ ahone nu bamva ɛmɔ mmango mɔ bɔne bangyɛ bɛ a, me Baba bɔ ɔwɔ anwuro ne né ɛmɔ koli.”
Currently Selected:
Mateo 18: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
