Mateo 23
23
1Yeɛ Yesu ha hyirele mmenia ne né ye asuafoɛ nemɔ kyɛ: 2“Atwerɛfoɛ ne Farisifoɛ nemɔ nwa bɛte Mose bia so. 3Yeti bɔ bɛka bɛkyire ɛmɔ ne, ɛmɔli so, na ɛmɔyɛ, nakoso bɔ bɛyɛ ne de, nnɛmɔyɛ bie, ofikyɛ bɔ bɛka ne, bɛmva bɛnyɛ adwuma. 4Bakyekye nningyein nnunɛ-nnunɛ bato mmenia kɔme anwo, nakoso bɛ de, bɛnguro kyɛ bɛfa bɛ sa ba po bɛka ye. 5Bɔ bɛyɛ namukoraati, bɛyɛ ye wɔ mmenia nyunu. Bayɛ tworɔnzɛm nwomaa bɔ bɛfa bɛbɔ bɛ nwo waen ne mbiri-mbiri, yeɛ bayɛ bɛ ndadeɛ noa wowaa. 6Sɛ bɛkɔ paati bo a, nekaa bɔ mbanyi tena yeɛ bɛkuro ɔ, na sɛ bɛkɔ sua bɔ beyia nu nanu a, ɛyɛ a né bɛpena anyunu bia. 7Bɛkuro dwaaso ngyeaa, na bɛpena kyɛ mmenia frɛ bɛ ‘Rabi.’ 8Nakoso, nnɛmɔ maa ebiala frɛ ɛmɔ ‘Rabi,’ ofikyɛ sona-horɛ yeɛ ɔte ɛmɔ kyerɛkyerɛniɛ ɔ, ɛmɔ mukoraati ɛmɔte aliemaa. 9Na nnɛmɔ frɛ ebiala kyɛ ɛmɔ baba wɔ aseɛ he aso, ofikyɛ ɛmɔ Baba te komapɛ, yeɛ ɔwɔ anwuro ne. 10Afei koso, nnɛmɔ maa bɛfrɛ ɛmɔ kannifoɛ, ofikyɛ ɛmɔ kannifoɛ te komapɛ, yeɛ ole Kristo. 11Mmom bɔ ɔte piri wɔ ɛmɔ nu ne, odikyɛ ɔsõ bɛ bɔ baha ne. 12Ebiala bɔ ɔkɔma ye nwo so ne, bɛkɔbrɛ ye ase, na ebiala bɔ ɔkɔbrɛ ye nwo ase ne, bɛkɔma ye so.
13“Atwerɛfoɛ ne Farisifoɛ, ɛmɔ yaakɔ, nyaatwomfoɛ! Ofikyɛ ɛmɔ ato anwuro Ahennie né anoa nanu. Ɛmɔ ahɔ a, ɛmɔ ngɔ nu, na bɛ bɔ bɛkɔ nu ne koso, ɛmɔsi bɛ atee.”
14 # 23:14 Sɛ ɛnea Bible biemɔ nu a, edwirɛ bie wura ɛwa kyɛ: Atwerɛfoɛ ne Farisifoɛ, ɛmɔ yaakɔ, nyaatwomfoɛ! Ofikyɛ ɛmɔdɛ akunafoɛ awuro, na ɛmɔhyɛda bɛbɔ mbaeɛ ndendee wɔ mmenia nu; yeti ɛmɔ yeɛ ɛmɔ konya atemmuo bɔ ye noa yɛ hye paa ne. Nakoso, sɛ ɛnea asaanoa ndworɔyɛ bɔ wahyɛ paa, ɔne bɔ odi mu nemɔ nu a, sɔ dwirɛ ne, ɔnne nu. — 15Atwerɛfoɛ ne Farisifoɛ, ɛmɔ yaakɔ! Nyaatwomfoɛ! Ofikyɛ ɛmɔpɛ atee bɛfa ɛpo ne aseɛ so bɛkɔsakra sona-horɛ, na sɛ ɔsakra a, ɛmɔma ɔbafata ma Gehenna, ofikyɛ ɛmɔma ye bɔne ne bayɛ kyɛ ɛmɔ deɛ ne bɔ bafa babɔ ye nwo nyɔ ɔ.
16“Anyesiniwaafoɛ bɔ ɛmɔ kyire atee, ɛmɔ yaakɔ! Ɛmɔka kyɛ: ‘Sɛ ebie ka asɔre awuro ne ndaen a, ɔtte hwee, nakoso sɛ ɔka sikaa kɔkorɛ bɔ ɔwɔ asɔre awuro berɛ ne ndaen de a, odikyɛ odi so.’ 17Anyesiniwaafoɛ ngwaseafoɛ! Beni yeɛ ɔte piri ɔ, sikaa kɔkorɛ ne, anaa asɔre awuro ne bɔ wamaa sikaa kɔkorɛ nanwo ate ne? 18Ɛmɔsa bɛka kyɛ, ‘Sɛ ebie ka afɔleɛ bokyea ne ndaen a, ɔtte hwee, nakoso sɛ ɔka akyɛdeɛ bɔ ogua bokyea naso ne ndaen de a, odikyɛ odi so.’ 19Anyesiniwaafoɛ! Beni yeɛ ɔte piri ɔ, akyɛdeɛ ne, anaa afɔleɛ bokyea ne bɔ ɔmaa akyɛdeɛ nanwo te ne? 20Yeti, ebiala bɔ ɔka afɔleɛ bokyea ne ndaen ne, waha nikye biala bɔ ɔwɔ so ne ndaen. 21Na ebiala bɔ ɔka asɔre awuro ne ndaen, waha ɔne Bɔ ɔte nu namukoraati ndaen. 22Na bɔ ɔka anwuro ndaen ne, waha Nyameɛ bia#23:22 Kyire kyɛ, “Ɔhene bia” anaa “Ahennie bia.” ne Nyameɛ bɔ ɔte so namukoraati ndaen.
23“Atwerɛfoɛ ne Farisifoɛ, ɛmɔ yaakɔ, nyaatwomfoɛ! Ɛmɔtua ɛmanyire, ɛsaa, ne ngete-ngete nwo taet, nakoso nningyein bɔ ye nwo hia wɔ mmeraa nanu te kyɛ atɛn tenenee, anwunvoin, ne nahorɛ ne de, ɛmɔbu ɛmɔ nye bɛgua so. Sɛ ɛmɔdɛ taet ne a, ongyire kyɛ ɛmɔbu ɛmɔ nye bɛgua bɔ ohia paa naso. 24Anyesiniwaafoɛ bɔ ɛmɔ kyire atee, Ɛmɔ songyi anonneɛ so bɛye ndondom, nakoso, ɛmɔme afupɔngɔ.
25“Atwerɛfoɛ ne Farisifoɛ, ɛmɔ yaakɔ, nyaatwomfoɛ! Ofikyɛ ɛmɔnwunzi kwangoa ne kyɛnzee nwo, nakoso ye kunu de, apoo ne akɔnnɔ-bɔne ayi ye tɛkyɛ. 26Farisifoɛ anyesiniwaafoɛ, ɛmɔli moa bɛnwunzi kwangoa ne kyɛnzee ne kunu, na ye nwo ne koso kofi.
27“Atwerɛfoɛ ne Farisifoɛ, ɛmɔ yaakɔ! Nyaatwomfoɛ! Ofikyɛ ɛmɔte kyɛ asieleɛ bɔ baha ye nwo fufue hyɛnn, ná ye nwo yɛ nyemene, nakoso ye kunu de, fuin mmowie, ne nningyein fiɛ ngome. 28Sɔ ala yeɛ ɛmɔ koso, ɛmɔyɛ ɛmɔ nwo teneneefoɛ wɔ mmenia nyunu, nakoso ɛmɔte nyaatwom ne mmeratofoɛ.
29“Atwerɛfoɛ ne Farisifoɛ, ɛmɔ yaakɔ! Nyaatwomfoɛ! Ofikyɛ ɛmɔto adiifoɛ nemɔ asieleɛ, na ɛmɔsiesie ateneneefoɛ nemɔ asieleɛ so kama, 30na ɛmɔka kyɛ, ‘Sɛ ne yɛwɔ yɛ baba mɔ aberɛ so a, ahaa yɛngɔ boka bɛ maa bɛngɔhwie adiifoɛ nemɔ mogya bɛngɔgua.’ 31Yeti, ɛmɔdi adanzeɛ betia ɛmɔ nwo kyɛ ɛmɔ baba mɔ yeɛ bɛhuni adiifoɛ nemɔ ɔ. 32Ye de, bɔ ɛmɔ baba mɔ hyɛle yebo ne, ɛmɔyie. 33Ɛwoo, ɛkyerebene mmaa, ɔkɔyɛ sɛɛ na ɛmɔ ahora banwati Gehenna atemmuo? 34Ɛhe ati, mesoma adiifoɛ, anyanzafoɛ, ne akyerɛkyerɛfoɛ meba ɛmɔ berɛ. Ɛmɔ kohu bɛ nu biemɔ, na ɛmɔ asinze bɛ wɔ bakaa so, na ɛmɔ kogwa ebiemɔ wɔ sua bɔ ɛmɔ yia nu nanu, na ɛmɔ atane bɛ nye bafi kuro kõ anu bahɔ foforɛ nu. 35Yeti, ateneneefoɛ bɔ bahwie bɛ mogya bagua aseɛ he aso ne, ɔkɔwa ɛmɔ so, ofi teneneeniɛ Habel mogya so, ɔbaadwu Barakia awa Zakaria, bɔ ɛmɔ hunu ye wɔ nekaa krongron ne afɔleɛ bokyea ne afia ne mogya so. 36Nahorɛ, meka mekyire ɛmɔ kyɛ, ɛhe amukoraati kɔwa sɔ mmenia bɔ bɛwɔ berɛ ɛnɛ#23:36 Anaa “Aworɛ ndoɔtoasoɛ.” naso.
37“O Yerusalem, Yerusalem, wɔ bɔ ɛku adiifoɛ na ɛsi bɛ bɔ bɛsomane bɛ wɔ berɛ ne nyɔboɛ, nea mmerɛ-tende bɔ ne mepena kyɛ meboɔboa wɔ mmaa mɔ noa, kyɛbɔ akɔ taen boɔboa ye mmaa noa wɔ ye ndaa bo ne, nakoso ambene. 38Nea, bayakyi w'awuro bama wɔ. 39Meka mekyire wɔ kyɛ, ofi ɛnɛ bɔ ɔkɔ ne, ɛmɔ ngonwu me kõ kodwu kyɛ ɛmɔkɔha kyɛ, ‘Nhyira yeɛ ole bɔ ɔba Awurade dumaa nu’ ne.”
Currently Selected:
Mateo 23: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
